1, 2. a) ¿Tlenon yokinchiuilijkej sekimej itekipanojkauan Jehová, niman yejuamej tlenon yokichiujkej? b) ¿Tleka uelis tiyolpakiskej maski techtlaueltokaj? (Noijki xkinteneua tlaixkopinaltin tlen nesij ixpan yejuin revista).

 IPAN nochi tlaltikpaktli, ipantsin 30 países xtechkauiliaj matiktekichiuilikan Jehová. Ipan yejon kalpamej, sekimej tekiuajkej yokintsajkej tokniuan tlakamej niman siuamej. ¿Okintsajkej pampa okichiujkej itlaj tlen xkuajli? Ka. Jehová kimatstok ika yejuamej xokichiujkej itlaj tlen xkuajli. Yejuamej okintsajkej san pampa kiamapouaj niman nomachtiaj Biblia, pampa kimijliaj oksekimej tlen kineltokaj, pampa nosentlaliaj imiuan oksekimej tokniuan niman pampa xnokalaktiaj ipan política. San ika, maski melak kintlaueltokaj, yejuamej melajkanemij b niman san kiueyichiuaj Jehová. Yejuamej melak yolpakij pampa uelij melajkanemij itech Jehová.

² Kanaj yotikimitaka ipan fotos kenon yejuin tokniuan akin kintlaueltokaj melak yolpakij. Yejuamej melak yolpakij pampa kimatstokej ika kiyolpaktiaj Jehová ijkuak itech melajkanemij (1 Crón. 29:17a). Jesús okijto: “Dios kintiochiua on yejuan kijyouiyaj ijkuak kintlauelitaj san pampa kichiuaj on tlen kuajli […]. Xpakikan niman xnemikan ikan paktli, pampa […] nenkiseliskej sen ueyi tetlayokolijli” (Mat. 5:10-12).

3. Ken kijtoua Hechos 4:19, 20, ¿tlenon okichiujkej apóstoles ijkuak okintlaueltokakej, niman tleka ijkon okichiujkej?

³ Aman tokniuan noijki kintlaueltokaj ijkon ken okintlaueltokakej  apóstoles ipan kachtopa siglo pampa tenojnotsayaj itech Jesús. Miyekpa, tekiuajkej “okinnauatijkej para maka más tenojnotsaskej nion temachtiskej ikan itokatsin Jesús” (Hech. 4:18; 5:27, 28, 40). ¿Tlenon okichiujkej apóstoles? (xpoua Hechos 4:19, 20). Yejuamej kimatstoyaj ika yakaj akin más ueyixtika okinnauati matenojnotsakan niman matemachtikan itech Jesús (Hech. 10:42). Ika yejon, Pedro iuan Juan okiteijlikej ika yejuamej niman oksekimej apóstoles xkintlakamatiskiaj tekiuajkej, yej kitlakamatiskiaj toTajtsin. Noijki okijtojkej ika xkikajkauaskiaj ika temachtiskiaj itech Jesús. Kentla kintlajtoltijtoskiaj tekiuajkej: “¿Tleka nenkixnamikij toTajtsin? ¿Nenkinemiliaj ika nemejuamej más nenuejueyixtokej?”.

4. Ken kijtoua Hechos 5:27-29, ¿tlenon okichiujkej apóstoles ijkuak okintlaueltokakej, niman kenon uelis noijki ijkon tikchiuaskej?

⁴ Apóstoles ijkin okimijlikej tekiuajkej: “Kitocaroua achtoj tiktlakamatiskej Dios xken nemejuamej yejuan san nentlakamej” (xpoua Hechos 5:27-29). Tlen okijtojkej niman tlen okichiujkej apóstoles melak techpaleuiya. Aman itikmatij tlenon noneki tikchiuaskej ijkuak tekiuajkej techtlaueltokaskej. Biblia kijtoua ika ijkuak yokinuisojkaj apóstoles, yejuamej “ouajkiskej ne imixpan on más uejueyi tekiuajkej ipan on Sanedrín ikan paktli, pampa Dios okinkauilij okimpijpinauijkej pampa kineltokayaj Jesús”. Niman noijki kijtoua ika xokikajkaujkej ika tenojnotsaj (Hech. 5:40-42).

5. ¿Tlenon noneki tiknankiliskej?

⁵ Tlen okichiujkej apóstoles kanaj noijki kichiua matotlajtoltikan: “¿Kenon ouel okitlakamatkej toTajtsin niman noijki ouel okintlakamatkej tekiuajkej ijkon ken kijtoua Biblia? ¿Niman kenon uelis tikintlakamatiskej ‘on yejuan tlayekanaj niman on yejuan kipiyaj ueyitekiuayotl’, ijkon ken okijto apóstol Pablo, niman noijki timelajkanemiskej itech toTajtsin akin más ueyixtika?” (Rom. 13:1; Tito 3:1).

6. a) ¿Akinomej on “tekiuajkej” akin noteneuaj ipan Romanos 13:1, niman kenon noneki tikimitaskej? b) ¿Tleka tekiuajkej uelij tlayekanaj?

⁶ (Xpoua Romanos 13:1). Ijkuak ipan  yejuin tlaxelojli kijtoua “tekiuajkej”, tlajtotika itech nochimej gobiernos akin kinyekanaj tlaltikpakchanejkej. Akin tikchiuaj ken Cristo noneki tikintlakamatiskej yejuin gobiernos pampa yejuamej techtlajpiyaj, kichiuaj manotlakamatikan tlanauatiltin tlen yokintlalijkej niman kemantika hasta kipaleuiyaj ikalpan Jehová (Apoc. 12:16). Ika yejon, Biblia techijlia matikintlaxtlauilikan impuestos niman matikintlakaitakan (Rom. 13:7). San ika, yejuin tekiuajkej uelij tlayekanaj pampa Jehová kinkauilia. Niman ijkon tikijtouaj pampa ijkuak tekiuaj romano Poncio Pilato kiyolkuitijtoya Jesús niman okijli ika yejua ueliskia kichiuas makimakixtikan noso makimiktikan, Jesús okinankili: “Xtikpiyaskia itlaj tekiuajyotl noka nejua tla Dios xmitsmakaskia” (Juan 19:11). Ijkon ken Pilato, nochimej gobiernos niman políticos akin aman nemij, xuelij tlayekanaj ijkon ken Jehová tlayekana.

7. ¿Kemanon xnoneki tikintlakamatiskej gobiernos, niman yejuamej tlenon noneki kimatstoskej?

⁷ Akin tikchiuaj ken Cristo noneki tikintlakamatiskej itlanauatiluan gobiernos. San ika, xnoneki tikintlakamatiskej ijkuak techijliskej maka matikchiuakan itlaj tlen toTajtsin kineki matikchiuakan noso ijkuak techijliskej matikchiuakan itlaj tlen Jehová xkuelita, ken ijkuak kimijliskej telpokamej matlaixnamikitij ipan guerra. c Noso ken ijkuak techijliskej maka matiktekitiltikan Biblia niman toamatlajkuiloluan noso ken ijkuak xok techkauiliskej matitenojnotsakan nion matosentlalikan. Ijkuak gobiernos xtlayekanaj ijkon ken noneki niman kintlaueltokaj akin kichiuaj ken Cristo, Jehová kinyolkuitis pampa yejua kitstika nochi tlen kichiujtokej (Ecl. 5:8).

8. ¿Tleka xsan noijki tlayekanaj tekiuajkej niman Jehová, niman tleka noneki matikmatstokan yejuin?

⁸ Tekiuajkej uelij tlanauatiaj, uelij kichiuaj miyek tlen kuajli niman uelij kinyekanaj tlaltikpakchanejkej. San ika, yejuin xkijtosneki ika yejuamej xtlajtlakolejkej niman ika san yejuamej más uejueyixtokej. San se nemi akin xtlajtlakole niman akin más ueyixtika intech nochimej tekiuajkej. ¿Akinon? ToTajtsin Jehová. Ipan Biblia miyekpa kitokayotia Jehová ken “ueyixtikaj Dios” (Dan. 7:18, 22, 25, 27).

9. ¿Tlenon okimitak Daniel ipan seki tlatlachalistin?

⁹ Teotlajtoketl Daniel okimitak seki tlatlachalistin tlen techititiaj ika san Jehová más ueyixtika xijkon ken tekiuajkej. Kachtopa okimitak nauimej xkuajkualtin yolkamej tlen kinneskayotiaj tekiuajkej akin yeuejkaui otlayekankej niman akin aman tlayekanaj: Babilonia, Medopersia, Grecia niman Roma, niman Reino Unido niman Estados Unidos, akin aman tlayekantokej (Dan. 7:1-3, 17). Sakin, Daniel okitak ika Jehová yeuatoya ipan itrono ne iluikak (Dan. 7:9, 10). Tlen sakin okitak teotlajtoketl Daniel techititia tlenon inpan nochiuas nochimej gobiernos akin aman nemij.

10. Ken kijtoua Daniel 7:13, 14, 27, ¿akinomej kintekitlalia Jehová ipan tlaltikpaktli, niman tlenon techititia yejon itech Jehová?

¹⁰ (Xpoua Daniel 7:13, 14, 27). Daniel okitak kenon toTajtsin kinkuilia intekiuajyo nochimej gobiernos akin tlayekanaj ipan tlaltikpaktli niman kinmaka akin más kuajli tlayekanaj niman akin más kojtikej. ¿Akinomej? “Yejuan tlajtlachaya ken se yejuan onochiu tlakatl”, Jesucristo, niman “yejuan okintlapejpenij on ueyixtikaj Dios”, on 144,000, akin “tlamandaroskej para nochipa” (Dan. 7:18). Yejuin techititia ika san Jehová Ueyixtika  Dios pampa san yejua ueli kijtoua akinomej kinmelaua tlanauatiskej.

11. ¿Tlenon okseki tlen okijkuilo Daniel kiteititia ika san Jehová más ueyixtika?

¹¹ Tlen okitak Daniel techititia ika yemelak tlen yejua yokijtojka. Yejua okijto: “Dios iluikakchanej […] kinkixtia niman kintlalia on reyes”. Noijki okijto: “Dios yejuan más ueyixtikaj, yejua tlamandaroua impan nochimej on reinos de in tlaltikpaktli. Yejua kitlalia para tlamandaroua akin yejua kineki” (Dan. 2:19-21; 4:17). ¿Kemantika Jehová yokinkixtijka niman yokintlalijka tekiuajkej? Kema.

12. Xkijto kenon yeuejkaui Jehová okinkixti tekiuajkej. (Xkita tlaixkopinajli).

¹² Jehová miyekpa yokiteititi ika san yejua más ueyixtika xijkon ken tekiuajkej akin nemij ipan tlaltikpaktli. San seki matikteneuakan. Kachtopa matitlajtokan itech faraón de Egipto. Yejua okitlajyouilti ikalpan Jehová niman xkinekiya kimakauas. San ika, toTajtsin okimakixti ikalpan niman okiamimikti faraón ipan mar Rojo (Éx. 14:26-28; Sal. 136:15). Ika ome, tekiuaj Belsasar, akin tlayekantoya Babilonia, okichiuj se iluitl niman okixnamik “Dios iluikakchanej”. Niman xokiueyichiuj, yej okinueyichiuj “dioses yejuan tlachijchijtin ikan oro [niman] plata” (Dan. 5:22, 23). San ika, toTajtsin okititi Belsasar ika san yejua más ueyixtoya. “Ipan on tlayoua okimiktijkej Belsasar” niman toTajtsin okinmakak itekiuajyo medos niman persas (Dan. 5:28, 30, 31). Ika yeyi, tekiuaj Herodes Agripa I, akin tlayekantoya Palestina, okimikti apóstol Santiago niman sakin okitsauk apóstol Pedro pampa noijki kinekiya kimiktis. San ika, Jehová xokikauili ijkon makichiua. “Se ángel yejuan toTEKO okuajtitlan ocastigaroj” Herodes ika se kokolistli niman sakin omik (Hech. 12:1-5, 21-23).

13. Xkijto kenon Jehová okintlan gobiernos akin onosentlalijkej para kixnamikiskej ikalpan.

¹³ Jehová noijki yokiteititi ika yejua más kojtik xijkon ken gobiernos akin nosentlaliaj para kixnamikiskej. Yejua okinpaleui israelitas makintlanikan 31 tekiuajkej cananeos akin onosentlalijkej para kominixnamikiskej niman okinpaleui makinnotlatkitikan tlaltin tlen yokimijlika kinmakas (Jos. 11:4-6, 20; 12:1, 7, 24). Jehová noijki okinpaleui israelitas makitlanikan tekiuaj Ben-Hadad niman  oksekimej 32 tekiuajkej sirios ijkuak okixnamikitoj Israel (1 Rey. 20:1, 26-29).

14, 15. a) ¿Tlenon okijtojkej tekiuajkej Nabucodonosor niman Darío itech Jehová? b) ¿Tlenon okijto se salmista itech Jehová niman ikalpan?

¹⁴ Jehová miyekpa yokiteititi ika san yejua Ueyixtika Dios. Ijkuak Nabucodonosor, akin tlayekantoya Babilonia, okijto ika melak kojtik katka niman ika melak ueyixtoya niman xokiueyiteneuj Jehová, toTajtsin okichiuj makipolo itlamachilis. Sakin, ijkuak Nabucodonosor okajsik itlamachilis, okiueyiteneuj Jehová niman okijto ika san yejua nochipa tlayekanas. Niman noijki okijto ika Jehová uelis kichiuas nochi tlen kinekis niman xakaj uelis kiteltis (Dan. 4:30, 33-35). Sakin, ijkuak Jehová okimakixti Daniel ijkuak okontlajkalkej kampa nemiyaj leones pampa itech omelajkanen, tekiuaj Darío otlanauati: “Nejua nikneki niman nitlanauatia para nochiu[i]yan kampa nitlamandaroua makimakajsikan niman makitlakaitakan iDios Daniel, pampa yejua sen Dios yejuan melauak nemi, niman yejua nemi para nochipa. Niman ireino xkaman yakaj kixoxotonis, niman ipoder xkaman tlamis” (Dan. 6:7-10, 19-22, 26, 27).

¹⁵ Se salmista okijkuilo: “ToTEKO kinteltia on naciones para maka ma kichiuakan on tlen xkuajli kinemiliaj kichiuaskej”. Noijki okijto “¡Sanoyej tlatiochijtli on nación yejuan kita toTEKO ken yejua iDios! ToTEKO, yokitlapejpenij on nación para yejua iyaxka yes” (Sal. 33:10, 12). Ken tikitaj, melak tepaleui tla timelajkanemij itech Jehová

16. ¿Tlenon uelis kuajli tikmatstoskej, niman tleka? (Xkita tlaixkopinajli).

¹⁶ Yotikitakej kenon yeuejkaui Jehová okinmakixti itekipanojkauan. San ika ¿tlenon kichiuas ika tlayekapan? Kuajli tikmatstokej ika Jehová kinmakixtis itekipanojkauan akin itech melajkanemiskej ipan ueyi tlajyouilistli (Mat. 24:21; Dan. 12:1). Ijkon kichiuas ijkuak Gog de Magog, noso ijkuak nosentlaliskej miyek países, kimixnamikiskej itekipanojkauan  Jehová akin nemij ipan nochi tlaltikpaktli. Maski tla ipan yejuin grupo tlapaleuiskiaj nochi yejon 193 países noso gobiernos akin nemij ipan Naciones Unidas, Jehová niman iiluikaktekitkauan kintlaniskej. Jehová noijki techijlia: “Miyekej naciones nechixmatiskej. Nikintitis noueyipoder niman noyekchipaualis, niman yejuamej kimatiskej ika nejua niDios” (Ezeq. 38:14-16, 23; Sal. 46:10).

17. ¿Tlenon kijtoua Biblia ika inpan nochiuas on tekiuajkej niman akin melajkanemij itech Jehová?

¹⁷ Ijkuak Gog kimixnamikis itekipanojkauan Jehová, peuas sa ika tlami guerra: Armagedón. Niman ijkuakon, Jehová kinpopolos “nochimej on reyes ipan on tlaltikpaktli” (Apoc. 16:14, 16; 19:19-21). San ika, “yejuan melajkanemij niman yolchipajkej, nochipa nemiskej ipan in tlajli yejuan toyaxka” (Prov. 2:21).

18. ¿Tlenon kinektokej kichiuaskej miyekej akin kichiuaj ken Cristo, niman tleka? (Daniel 3:28).

¹⁸ Desde yeuejkaui, miyekej tokniuan melajkanemij maski kintsakuaj niman maski kinekij kinmiktiskej. Ijkon kichiuaj pampa kitlasojtlaj Jehová, inTekiuaj akin Ueyixtika Dios. Yejuamej kinektokej melajkanemiskej ijkon ken on yeyimej hebreos akin Jehová okinmakixti ijtik se horno pampa itech omelajkanenkej (xpoua Daniel 3:28).

19. ¿Tlenon kitas Jehová ijkuak techyolkuitis, niman tlenon noneki tikchiuaskej aman?

¹⁹ Tekiuaj David kimatstoya ika melak nonekiya melajkanemis itech Jehová. Yejua okijkuilo: “NoTEKO, tejua tikinyolkuitia niman tikincastigaroua nochi naciones tla kichiuaj tlen xkuajli. Tejua xnechyolkuiti niman xtenkixti ika xnikpiya tlajtlakojli, pampa xnitlajtlakolejketl [niman pampa nimelajkanemi, TNM]” (Sal. 7:8). Noijki okijto: “ToTEKO kitlajsojtla on yejuan yolmelajki niman xkaman kintlalkauiya on yejuan melauak kitlaliaj iminyojlo itech. Yejua kimanauiya on yolmelajki para nochipa” (Sal. 37:28). Kuakon, melak kuajli tla nochipa tokojtiliaj timelajkanemiskej itech Jehová, maski san tlenon tikixnamikiskej. Tla ijkon tikchiuaj, tikijtoskej ijkon ken se salmista akin okijkuilo: “Yejuan kiteititis[kej] ika kipiyaj yolmelajkilistli, [...] motech ma tsajtsikan ikan paktli” (Sal. 132:9).