1. ¿Tlenon okijtosnek Jesús ijkuak okijto ika tiktejtemoskej “tlen ualeua itech toTajtsin”, niman kenon techpaleuiya yejon matiyolpakikan?

 YEMELAK tiyolpakis xsan kijtosneki tipajkamikis, ka, yejuin pakilistli xsan panoua, yej uejkaui nochi monemilis. Niman ¿kenon uelis yemelak tiyolpakis? Ipan se itlamachtil, Jesús otechijli kenijki uelis yemelak tiyolpakiskej, yejua okijto: “Yolpakij akin kimatstokej ika kipiya ika kitejtemoskej tlen ualeua itech toTajtsin” (Mat. 5:3, TNM). ¿Tlenon okijtosnek Jesús ijkuak okijto ika tiktejtemoskej tlen ualeua itech toTajtsin? Jesús okijtosnek ika tejuamej otexchijchiujkej para matiknekikan tikixmatiskej niman tikueyichiuaskej Jehová. Jehová se “toTajtsin akin paktika”, ika yejon, akin tiktekichiuiliaj noijki uelis tipakiskej (1 Tim. 1:11, TNM).

2, 3. a) ¿Akinomej okijto Jesús ika noijki uelis yolpakiskej? b) ¿Tlenon tikitaskej ipan yejuin tlamachtijli, niman tleka noneki matikitakan yejuin?

² ¿San uelis tiyolpakiskej tla xtikpiyaj tlauejli? Ka. Niman ijkon tikijtouaj pampa Jesús okijto ika akin najmanaj pampa okichiujkej se tlajtlakojli noso akin kixnamiktokej itlaj tlen ouijtika, uelis yolpakiskej. Noijki okijto ika akin “kintlauelitaj san pampa kichiuaj on tlen kuajli” noso akin kinpijpinaujtiaj pampa nochiuaj inomachtijkauan, noijki uelis yolpakiskej (Mat. 5:4, 10, 11). San ika ¿kenon uelis yemelak tiyolpakiskej ijkuak tikixnamikiskej yejuin? 

³ Jesús okijto ika maski tikixnamiktokej itlaj tlen ouijtika, uelis yemelak tiyolpakiskej. ¿Kenon? Tla tikixmatij Jehová, tla tikueyichiuaj niman tla tiknisiuiyaj (Sant. 4:8). Niman ipan yejuin  tlamachtijli tikitaskej yeyi tlemach tlen techpaleuis yemelak matiyolpakikan.

4. ¿Tlenon kachtopa noneki tikchiuaskej tla tiknekij yemelak tiyolpakiskej? (Salmo 1:1-3).

⁴ KACHTOPA: Tla tiknekij yemelak tiyolpakiskej, noneki tikamapouaskej niman tomachtiskej Biblia. Jesús okijto ika iTlajtol toTajtsin yeskia kentla tlakuajli. ¿Xmelak ika tlaltikpakchanejkej niman yolkamej noneki tlakuaskej para yoltoskej? Kema. San ika, san tlaltikpakchanejkej uelij kiamapouaj iTlajtol toTajtsin, niman noneki ijkon kichiuaskej tla kinekij kuajli nemiskej. Ika yejon, Jesús okijto: “Xsan ikan tlaxkajli uelis nemis sen tlakatl, yej no ikan nochi tlajtojli yejuan Dios kijtoua” (Mat. 4:4). Kuakon, mojmostla matikamapouakan iTlajtol toTajtsin, Biblia. Se salmista okijto: “Sanoyej pakis on yejuan [...] kuelita itlanauatil toTEKO niman ipan tlanemilia ikan tonajli niman ikan yeuajli” (xpoua Salmo 1:1-3).

5, 6. a) ¿Tlenon tiuelij ipan Biblia? b) ¿Kenon techpaleuis tla nochipa tikamapouaj Biblia?

⁵ Jehová melak techtlasojtla, ika yejon, ipan Biblia techijlia tlenon uelis tikchiuaskej tla tiknekij yemelak tiyolpakiskej. Ompa techijlia tleka otexchijchiuj, kenon uelis iuan touikaskej niman tlenon noneki tikchiuaskej tla tiknekij matechtlapopolui. Noijki, ompa techijlia tlen kualtsin techmakas ika tlayekapan (Jer. 29:11). Ijkuak tejuamej tiuelij nochi yejuin ipan Biblia, melak techyolpaktia.

⁶ Ken tikmatij, Biblia techijlia tlen uelis tikchiuaskej ipan tonemilis. Niman ijkuak tikchiuaj tlen ompa kijtoua, melak tiyolpakij. Ika yejon, tla kemantika melak tajmanaj  pampa tikpiyaj se tlauejli, más matikamapouakan iTlajtol Jehová niman itech matitlanemilikan. Jesús okijto: “Dios más kintiochiua on yejuan kakij itlajtoltsin niman kitlakamatij” (Luc. 11:28).

7. ¿Kenon noneki tikamapouaskej iTlajtol toTajtsin?

⁷ Ijkuak tikamapouaskej iTlajtol toTajtsin, maka san totoka matikchiuakan. ¿Tleka? San matikonnemilikan ika yakaj texchijchiuilia se tlakuajli tlen melak tikueliliaj. San ika, pampa tijsiuij noso pampa itlaj techajmantikaj, san tiktojtolojtiuetsij noso san totoka tikuajtiuetsij. Ijkuak tiualixuij, tikitaj ika ueliskia san yolik tikuajtiaskiaj niman tikuelilijtiaskiaj. Tla xtotlajpiyaj, noijki uelis ijkon topan panos ijkuak tikamapouaskej toBiblia. Tla san totoka tikamapouaj, xtikitaskej tlen Jehová kineki techijlis. Kuakon, san yolik matikamapoujtiakan toBiblia niman matikonnemilijtiakan tlen panotoya, tlen kijtotoyaj niman matiknemilijtiakan kenon uelis techpaleuis tlen tikamapoujtokej. Tla ijkon tikchiuaj, melak tiyolpakiskej.

8. ¿Kenon “tekitketl” yolmelauak niman tlamachilise kichiujtika tlen Jesús okinauati? (Xkita nota).

⁸ Jesús yokinauati “tekitketl” yolmelauak niman tlamachilise matechmaka tlen ika tikchikauaskej totlaneltok. Niman yejuin “tekitketl” nochipa techmakatika tlen noneki (Mat. 24:45). b Nochi tlen techmaka “tekitketl” nokixtia itech Biblia (1 Tes. 2:13). Ijkuak tomachtiaj amatlajkuiloltin tlen techinmakaj, más tikasikamatij kenon tlanemilia Jehová, ijkon ken nesi ipan Biblia. Ika yejon, matikinamapouakan revistas Amatl Tekakistilijketl niman ¡Xtlachiakan! niman tlamachtiltin tlen notlaliaj ipan jw.org. Noijki matomachtikan tlen nopanoltis ipan tlanechikoltin niman matikitakan JW Broadcasting^® tla onka ika totlajtol. Tla tomachtiaj nochi tlen techmaka Jehová, techpaleuis matikchiuakan uan ika ome tlemach tlen techpaleuis yemelak matiyolpakikan.

9. ¿Tlenon noijki noneki tikchiuaskej tla tiknekij yemelak tiyolpakiskej?

⁹ IKA OME: Tla tiknekij yemelak tiyolpakiskej, noneki tikintlakamatiskej itlanauatiluan Jehová. Se salmista okijto: “Sanoyej tipakis, tejua yejuan tiktlakaita toTEKO [Jehová] niman tiktlakamati” (Sal. 128:1). ¿Tlenon kijtosneki tiktlakaitas Jehová? Kijtosneki xtiknekis tikchiuas tlen yejua kitlauelita (Prov. 16:6). Ika yejon, tokojtiliaj tiktlakamatiskej tlen Jehová technauatia ipan Biblia, tikchiuaj tlen kuajli niman xtikchiuaj tlen xkuajli (2 Cor. 7:1). Tla tikchiuaj tlen Jehová kitlasojtla niman xtikchiuaj tlen yejua kitlauelita, melak tiyolpakiskej (Sal. 37:27; 97:10; Rom. 12:9).

10. Ken kijtoua Romanos 12:2, ¿tlenon noneki tikchiuaskej?

¹⁰ (Xpoua Romanos 12:2). Kanaj yakaj kimatstok ika san Jehová kimelaua kijtos tlenon kuajli niman tlenon xkuajli, san ika, xsan noneki kimatstos, noijki noneki kintlakamatis itlanauatiluan. San matikonnemilikan yejuin: kanaj yakaj kimatstok ika san gobierno kimelaua kijtos kech noneki kitlalochtis icarro ipan carretera, san ika, xkineki kitlakamatis tlen kijtoua gobierno niman más kitlalochtia icarro. Noijki ijkon, tlen tikchiuaj kiteititis tla yemelak tikneltokaj ika tlen Jehová technauatia techpaleuiya (Prov. 12:28). David kimatstoya ika tla kitlakamatiya Jehová, melak kipaleuiskia, yejua ika, ijkin okijli Jehová: “Tejua tinechititis on ojtli yejuan teuika ipan nemilistli. Onkaj miyek pakilistli tejua motech.  On pakilistli xkaman tlamis ne mouan” (Sal. 16:11).

11, 12. a) ¿Itech tlenon noneki totlajpiyaskej ijkuak melak tajmantoskej? b) ¿Kenon techpaleuiya Filipenses 4:8 kuajli matiktlapejpenikan tlen ika toyolpaktiaj?

¹¹ Ijkuak melak tajmanaj, kemantika tiktejtemouaj tlenon tikchiuaskej niman ijkon achijtsin tikilkauaskej tlen topan panotika. Xtlaj tlenon tla ijkon tikchiuaj, san ika, noneki totlajpiyaskej maka tikchiuaskej itlaj tlen Jehová kitlauelita (Efes. 5:10-12, 15-17).

¹² Pablo okintitlanili se carta tokniuan akin chantiyaj Filipos niman okimijli ika nochipa makinemilikan tlen “melajki”, tlen “chipauak”, tlen “tepaktia” niman tlen “kipiya yekteneualistli” (xpoua Filipenses 4:8). Maski Pablo xtlajtotoya itech tlen ika toyolpaktiaj, tlen okijto techpaleuiya matiktlapejpenikan tlen kuajli. Kuakon, ijkuak tijkakiskej se tlakuikajli, ijkuak tikitaskej se película, ijkuak tikamapouaskej se libro noso ijkuak tiktauiltiskej se videojuego, matikitakan tla kipiya tlen “melajki”, tla “chipauak”, tla kipaktia Jehová niman tla “kipiya yekteneualistli”. Tla ijkin tikchiuaj, tikmatiskej tla Jehová kuelita noso xkuelita tlen tiknekij tikchiuaskej. Matikilnamikikan ika tejuamej nochipa tiknekij tikintlakamatiskej itlanauatiluan Jehová (Sal. 119:1-3). Niman tla tinemij “ixpan Dios ikan chipajkatlamachilistli”, uelis tikchiuaskej uan ika yeyi tlemach tlen techpaleuis yemelak matiyolpakikan (Hech. 23:1).

13. ¿Tlenon okse uelis tikchiuaskej tla tiknekij yemelak tiyolpakiskej? (Juan 4:23, 24).

¹³ IKA YEYI: Nochipa matikueyichiuakan Jehová niman maka matijkauilikan itlaj matechtsakuili. San Jehová kinamiki matikueyichiuakan pampa yejua otexchijchiuj (Apoc. 4:11; 14:6, 7). Ika yejon, noneki kuajli matikitakan tla tikueyichiujtokej ijkon ken yejua kuelita: ika espíritu niman “ika tlen melauak” (xpoua Juan 4:23, 24). Tiknekij ika iespíritu santo Jehová matechyekana niman ijkon tikueyichiuaskej ken kijtoua ipan Biblia. Noneki nochipa yejua kachtopa tikueyichiuaskej maski tla kampa tichantij xtechkauiliaj matikueyichiuakan. Aman, ipantsin 100 tokniuan tlakamej niman siuamej yokintsajkej pampa kiueyichiuaj Jehová. c Maski ijkon, yejuamej melak yolpakij pampa xkikajkauaj ika kiueyichiuaj. Yejuamej kichiuaj teoyotl, nomachtiaj niman kinnojnotsaj oksekimej itech toTajtsin niman itech tlen kichiuas ika tlayekapan. Maski aman techuijuikaltiaj noso techtlaueltokaj, melak tiyolpakij pampa tikmatstokej ika Jehová touan nemi niman ika melak techteochiuas (Sant. 1:12; 1 Ped. 4:14).

14. ¿Tlenon okichiuilijkej se tokniuj telpochtli de Tayikistán, niman tleka?

¹⁴ Miyekej tokniuan yokiteititijkej ika tla tikchiuaj yejuin yeyi tlemach tlen yotikinteneujkej, melak tiyolpakiskej maski san tlenon tikixnamiktoskej. Matitlajtokan itech tokniuj Yovidón Boboyónov, akin kipiya 19 xiuitl niman chanti Tayikistán. Pampa yejua xokinek ontlaixnamikis ipan guerra, ipan 4 de octubre de 2019 okikixtitoj ichan. Okitsajkej seki metstin niman melak okitlajyouiltijkej ijkon ken kintlajyouiltiaj akin kichiuaj tlen melak xkuajli. Ipan miyek países okipanoltijkej ipan noticias tlen xkuajli okichiuilijkej yejuin tokniuj. Okijtokej ika melak okiuisojkej ijkuak kichiualtisnekiyaj makijto juramento tlen soldados kijtouaj niman ijkuak okijlikej makinaki noso makitlali itlaken tlen kitlaliaj soldados. Sakin okikauatoj  kampa chikauak kintekitiltiaj akin tsauktokej niman ompa nemiya hasta ijkuak presidente otlanauati makikixtikan. Maski ouijtika tlen ipan panotoya Yovidón, ouel oyolpak niman nochipa omelajkanen itech Jehová. ¿Tlenon okipaleui? Okasikamat ika nonekiya kitlakamatis, kiueyichiuas niman kinisiuis Jehová.

15. ¿Kenon Yovidón ouel okiamapouj niman onomachti Biblia ijkuak tsauktoya?

¹⁵ Ijkuak Yovidón tsauktoya, yejua kiamapouaya niman nomachtiaya Biblia. San ika ¿kenon ouel okiamapouj Biblia niman toamatlajkuiloluan tla ipan cárcel xkitekauiliaj makipiyakan se Biblia noso amatlajkuiloltin? Ijkuak tokniuan konkauiliayaj tlen kikuas, ipan bolsas kijkuilouiliayaj texto diario. Ijkon, Yovidón mojmostla kiamapouaya Biblia niman ueliya tlanemiliaya itech tlen nomachtiaya. Ijkuak okis ipan cárcel, ijkin okimijli tokniuan akin xikixnamikij tlen ouijtika: “Xmokojtilikan más kuajli nemouikaskej iuan Jehová aman ika ximechtlaueltokaj. Niman san uelis ijkon nenkichiuaskej tla nenkiamapouaj Biblia niman toamatlajkuiloluan”.

16. ¿Tlenon kichiuaya Yovidón ijkuak tsauktoya?

¹⁶ Tokniuj Yovidón okintlakamat itlanauatiluan Jehová. Yejua xkeman okinemili kichiuas tlen xkuajli, yejua otlanemili itech Jehová niman  itech tlen yejua kinekiya makichiua. Yovidón kixelouaya tiempo niman ijkon kitas nochi tlen kualtsin okichijchiuj toTajtsin. Mojmostla, ijkuak nokuiteuaya, kikakiya kenon kualtsin nokuikatiayaj tototsitsintin niman, ika tlayoua, kitaya Metstli niman sitlalimej. Yejua okijto: “Tlen Jehová nechmakaya, nechyolseuiaya niman nechyolpaktiaya”. Tla tikpatiojkaitaj tlen Jehová techmaka niman ken techmachtia, melak tiyolpakiskej. Niman yejon pakilistli techpaleuis matitlaxikokan.

17. ¿Kenon 1 Pedro 1:6, 7 uelis kipaleuis yakaj akin kixnamiktika tlen okixnamik tokniuj Yovidón?

¹⁷ Yovidón noijki nochipa okiueyichiuj Jehová. Yejua kuajli kimatstoya ika melak nonekiya melajkanemis itech Jehová pampa kilnamiktoya ika Jesús okijto: “Xtlakaita moTEKO Dios, niman san yejua xtekipano” (Luc. 4:8). Comandantes niman soldados kinekiyaj ika Yovidón makijto ika xok kinekiya yes iteixpantijkauj Jehová. San ika, yejua ika tonajli niman ika yeuajli kinotsaya Jehová niman kitlajtlaniliaya matlaxiko niman makipaleui itech mamelajkanemi. Maski miyekpa okichiuilijkej tlen xkuajli, Yovidón otlaxiko. Ijkuak okikixtitoj ichan, ijkuak okiuisojkej niman ijkuak okitsajkej, onotlatlatak itlaneltok. San ika, aman melak yolpaki pampa yejon okipaleui más machikaui itlaneltok (xpoua 1 Pedro 1:6, 7).

18. ¿Kenon uelis nochipa tiyolpakiskej?

¹⁸ Jehová kimati tlenon noneki tikchiuaskej tla tiknekij yemelak tiyolpakiskej. Kuakon, tla tikchiuaj yejuin yeyi tlemach tlen aman otomachtijkej, uelis tiyolpakiskej maski tikixnamikiskej tlen ouijtika. Niman uelis tikijtoskej: “Sanoyej pakij, on yejuan toTEKO [Jehová] yejua iminDios” (Sal. 144:15).