IJKUAK panotoya ika Okpa Guerra ipan nochi tlaltikpaktli, se soldado nazi ijkin okintsajtsili iteixpantijkauan Jehová: “Tla nemejuamej xnenkinekij nenkonixnamiskej Francia niman Inglaterra, ¡nenmikiskej!”. Maski ompa nisiuj nemiyaj miyekej soldados akin kinpiayaj miyek armas, nion se tokniuj xokinek ontlaixnamikis. ¡Melak yolchikaujkej katkaj! Tlen okichiujkej yejuin tokniuan, techititia tlenon tikchiuaj akin tiiteixpantijkauan Jehová: tejuamej xtiknekij tontlaixnamikiskej ipan guerras. Noijki xtokalaktiaj ipan tlauejli maski kinekij techmiktiskej.

1. NOCHIMEJ ITEKIPANOJKAUAN TOTAJTSIN CHANIKNIUJTIN KATKAJ

Yeuejkaui, Jehová okitlapejpeni se nación akin yeskia ikalpan: kalpan Israel. Yejua ijkin okimijli israelitas: “Nemochiuaskej nonación yejuan más niktlajsojtlas de nochimej naciones” (Éx. 19:5). Noijki okinmakak tlaltin kampa chantiskiaj. Kuakon, ijkuak kinnauatiaya makixnamikitij okse kalpan, israelitas xkixnamikiyaj nion xkimiktiayaj okse itekipanojkauj toTajtsin. a

Ipan yejuin tonaltin, itekipanojkauan Jehová nemij ipan “nochi naciones, tribus, razas niman yejuan tlajtouaj oksesekneka tlajtoltin” (Apoc. 7:9). Tla yaskiaj ipan guerra, kimixnamiktoskiaj imikniuan niman hasta ueliskiaj kinmiktiskej.

 2. JEHOVÁ KINNAUATIAYA ISRAELITAS MAUIYAN GUERRA

Yeuejkaui, Jehová kimijliaya israelitas kemanon nonekiya yaskej ipan guerra niman kimijliaya tleka nonekiya teixnamikiskej. Sejpatsin, okinnauati makinmiktitij nochimej cananeos pampa yejuamej kinueyichiuayaj demonios, melak auilnemiyaj niman kinuentlaliayaj kokonej. Cananeos chantiyaj ipan tlajli tlen Jehová yokimijlika kinmakas israelitas. Ika yejon, Jehová okinnauati makinmiktikan nochimej akin ompa chantiyaj pampa xkinekiya ika israelitas makichiuakan ijkon ken cananeos (Lev. 18:24, 25). Ijkuak israelitas yokinotlatkitijkaj tlajli tlen Jehová yokimijlika kinmakas, kemantika kinkauiliaya makimixnamikikan intlauelikniuan akin kinekiyaj kinchiuiliskej tlen xkuajli (2 Sam. 5:17-25). San ika, xkeman okinkauili san yejuamej makijtokan kemanon yaskej ipan guerra. Kemantika Jehová xkinkauiliaya mateixnamikitij niman ijkuak israelitas xtetlakamatiyaj, melak xkuajli onkisayaj (Núm. 14:41-45; 2 Crón. 35:20-24).

Ipan yejuin tonaltin, Jehová xkinkauilia tlaltikpakchanejkej mauiyan ipan guerra. Miyek países teixnamikij pampa kinekij kipiyaskej tlen yejuamej kinekij niman xtlanemiliaj itech toTajtsin. Miyekej kipeualtiaj guerras pampa kinekij tetlalkuiliskej, más notomintiskej noso teixnamikij ipampa política. Miyekej teixnamikij ipampa tlen kineltokaj noso pampa kijtouaj ika kinekij kinpopoloskej itlauelikniuan toTajtsin. San ika, Jehová xkuelita ijkuak ijkon kichiuaj pampa yejua xtlaj kimijlia mateixnamikikan. Jehová kijtoua ika yejua kintlajpiyas itekipanojkauan niman ika yejua kinpopolos itlauelikniuan ipan se guerra tlen nochiuas ika tlayekapan, tlen itoka Armagedón (Apoc. 16:14, 16). Ipan yejuin guerra, itekipanojkauan Jehová akin nemij ipan yejuin tlaltikpaktli xtlauijsokiskej, san tlauijsokiskej itekipanojkauan akin nemij iluikak (Apoc. 19:11-15).

3. ISRAELITAS XKINMIKTIAYAJ AKIN TLANELTOKAYAJ ITECH JEHOVÁ

Yeuejkaui, israelitas xkinmiktiayaj akin tlaneltokayaj itech toTajtsin, san kinmiktiayaj akin Jehová kimijliaya ika nonekiya kinmiktiskej. Sejpatsin,  Jehová otlanauati makinmiktikan nochimej akin chantiyaj Jericó. San ika, ijkuakon israelitas xokimiktijkej Rahab nion ichanejkauan pampa Rahab tlaneltokaya itech Jehová (Jos. 2:9-16; 6:16, 17). Sakin, israelitas noijki xokinmiktijkej akin chantiyaj Gabaón pampa okiteititijkej ika kitlakaitayaj toTajtsin (Jos. 9:3-9, 17-19).

Ipan yejuin tonaltin akin yauej ipan guerra kinmiktiaj akin tlaneltokaj itech toTajtsin. Niman kemantika kinmiktiaj akin nion xtlaj kitechiuiliaj.

4. ISRAELITAS NONEKIYA TLAIXNAMIKISKEJ IJKON KEN JEHOVÁ KIMIJLIAYA

Yeuejkaui, Jehová okimijli israelitas tlenon nonekiya kichiuaskej ijkuak ontlaixnamikiskej ipan guerra. Kemantika, ijkuak israelitas konixnamikiyaj se kalpan, Jehová ijkin kinnauatiaya: “Achtopa xkintlajtoltikan on chanejkej tla kinekij noyoltlaliskej nemouan” (Deut. 20:10). Jehová noijki okimijli soldados ika nonekiya chipaujkej yeskej niman ika xnonekiya kichiuaskej tlen tsokuiltik (Deut. 23:9-14). Noijki, xkinkauiliaya makinnajnauiltikan siuamej akin chantiyaj kampa ontlaixnamikiyaj, ijkon ken kichiuayaj soldados akin xkitekichiuiliayaj Jehová. Niman tla se soldado israelita kinekiya nonamiktis iuan se siuatl akin kajsiyaj kampa ontlaixnamikiyaj, nonekiya tlamachias se metstli para uelis iuan nonamiktis (Deut. 21:10-13).

Ipan yejuin tonaltin, miyek países yokichijchiujkej se amatl kampa yokitlalijkej tlenon noneki kichiuaskej ijkuak noixnamikiskej. Yejuin amamej nochijchiuaj pampa xkinekij itlaj kinchiuiliskej akin xnokalaktiaj ipan guerra, san ika, kemantika xkitlakamatij tlen ompa kijtoua.

5. TOTAJTSIN KIPALEUIAYA IKALPAN IJKUAK TLAIXNAMIKIYA

Yeuejkaui, Jehová okinpaleui israelitas ijkuak ontlaixnamikiyaj niman miyekpa okinchiuj milagros para matetlanikan. San matikonteneuakan ijkuak israelitas okintlankej akin chantiyaj Jericó. Ijkuak israelitas okiyeualojkej Jericó, yejuamej “otsajtsikej sanoyej chikauak” pampa Jehová ijkon okinnauati. Niman ijkuak ijkon okichiujkej, “tepanchinantli yejuan kiyeualtsakutikatka on ueyikalpan ouets”. Pampa Jehová okinpaleui israelitas, xouijtika okitakej kinotlatkitiskej Jericó (Jos. 6:20). Sakin, noijki okintlankej amorreos. Ijkuakon, Jehová noijki okinpaleui. ¿Kenon? “Okuajxinij tejsiutli yejuan uejueyi ken temej […]. Okinmiktij más miyekej amorreos ikan tesiutli xken on israelitas okinmiktijkej ika iminespada” (Jos. 10:6-11).

AKIN YEMELAK KICHIUAJ KEN CRISTO XTEIXNAMIKIJ

Ken yotikitakej, aman ikalpan Jehová xok ijkon nemi ken yeuejkaui nemiyaj israelitas. San ika, xsan yejuin tlen techititia ika xnoneki tontlaixnamikiskej ipan guerra. ToTajtsin yokijtojka ika ipan itlamiyan tonaltin akin kinokauiliskiaj makinmachti, xnomajmachtiskiaj tlauijsokiskej nion xyaskiaj ipan guerra (Is. 2:2-4). Noijki, Cristo okijto ika inomachtijkauan xkichiuaskiaj ijkon ken akin xkitekichiuiliaj Jehová niman ika xtlapaleuiskiaj ijkuak tlaltikpakchanejkej noixnamikiskiaj (Juan 15:19).

Cristo noijki okinnauati inomachtijkauan ika nonekiya tetlapopoluiskej niman ika xnonekiya tetlauelitaskej nion teixnamikiskej (Mat. 5:21, 22). Niman okinmachti ika nonekiya noyolseuiskej imiuan oksekimej niman ika nonekiya kintlasojtlaskej intlauelikniuan (Mat. 5:9, 44).

Kuakon, ¿tlenon noneki tikchiuaskej? Kanaj tejuamej xtiknekij tiaskej guerra. San ika ¿kanaj tiktlauelitaj se tokniuj ipan tlanechikojli? Tla kema, kuakon nimantsin matopatlakan, maka matitetlauelitakan (Sant. 4:1, 11).

Akin tikchiuaj ken Cristo xtiteixnamikij ipan guerra, yej toyolseuiyaj niman totlasojtlaj (Juan 13:34, 35). Kuakon, maka yakaj matikpaleuikan ijkuak noixnamikilos, yej matikchiakan ijkuak Jehová kichiuas maka sa maoniakan guerras (Sal. 46:9).