1. Xkinteneua seki tetlayokoliltin tlen yotechinmakak Jesús.

 XNEMI nion se tlakatl akin melak makuelita kitetlayokolis ijkon ken Jesús. Ijkuak yejua nemiya ipan tlaltikpaktli, okinchiuj milagros niman ijkon tepaleuis (Luc. 9:​12-17). Noijki otechmakak se ueyi tetlayokolijli: okitemakak inemilis topampa (Juan 15:13). Niman hasta aman, yejua ok melak kuelita kitetlayokolis. Yejua kitlajtlanilia Jehová makitekitilti iespíritu santo para techmachtis niman techyolseuis ijkon ken otechijli (Juan 14:​16, 17; 16:13). Noijki, ipan tlanechikoltin, Jesús kuajli techmachtia niman ijkon uelis nochiuiyan titenojnotsaskej (Mat. 28:​18-20).

2. ¿Akinomej yotechinmakak Jesús ken tetlayokoliltin? (Efesios 4:​7, 8).

² San ika, Jesús yotechinmakak okseki tetlayokoliltin. Apóstol Pablo okijto ika ijkuak Jesús oyaj iluikak, okintemakak tlakamej ken “tetlayokoliltin” (xpoua Efesios 4:​7, 8). Okijto ika Jesús okintemakak yejon tlakamej para makinpaleuikan tlanechikoltin (Efes. 1:​22, 23; 4:​11-13). ¿Akinomej yejon tetlayokoliltin aman? Tlapaleuijkej, noso, ministeriales, tlayekankej ipan tlanechikojli niman tlayekankej ipan circuito. a Maski yejuamej tlajtlakolejkej niman kemantika nopopolouaj, Jesús kintekitiltia para techpaleuis (Sant. 3:2).

3. ¿Kenon uelis tikinpaleuiskej tokniuan tlakamej niman ijkon kuajli makichiuakan intekiyo tlen Jesús okinmakak? Xkijto se neskayotl.

³ Jesús otechinmakak yejuin tlakamej ken tetlayokoliltin niman ijkon matlapaleuikan ipan tlanechikoltin (Efes. 4:12). San ika, tinochimej uelis tikinpaleuiskej kuajli makichiuakan  intekiyo. Para más kuajli tikajsikamatiskej yejuin, matontlanemilikan itech sekimej akin kichijchiuaj Kajli kampa tosentlaliaj. Sekimej kalchiuaj, san ika, oksekimej noijki tlapaleuiyaj pampa kimitkiliaj tlen kikuaskej akin kalchiujtokej, kinuikaj kampa kalchiujtokej noso kinpaleuiyaj ika okseki tlemach. Noijki ijkon, tlapaleuijkej, tlayekankej ipan tlanechikojli niman tlayekankej ipan circuito kichiuaj se ueyi tekitl, san ika, tinochimej uelis tikinpaleuiskej ika tlen tikchiuaj niman ika tlen tikijtouaj. Matikitakan kenon techpaleuiya nochi tlen kichiuaj niman kenon uelis tikimititiskej niman tikititiskej Jesús ika tiktlasojkamatij ika techpaleuiyaj.

TLAPALEUIJKEJ MELAK TEKITIJ

4. ¿Tlen tekitl kichiuayaj tlapaleuijkej ipan kachtopa siglo?

⁴ Ipan kachtopa siglo, sekimej tokniuan tlakamej kintlaliayaj ken tlapaleuijkej (1 Tim. 3:8). Nesi ika yejuin tlapaleuijkej yejuamej akin Pablo okinteneuj ipan 1 Corintios 12:28 ijkuak okijto “on yejuan tepaleuiyaj”. Nesi ika yejuamej kichiuayaj seki tekitl niman ijkon tlayekankej san matemachtikan niman makinyolchikauakan tokniuan. Kanaj tlapaleuijkej yejuamej akin kinchiuayaj copias itech iTlajtol toTajtsin noso kinkouayaj tlen ika nochiuaskej yejon copias.

5. ¿Tlenon kichiuaj tlapaleuijkej aman?

⁵ ¿Tlenon kichiuaj tlapaleuijkej aman? (1 Ped. 4:10). Sekimej kipouaj tomintsin tlen nonechikoua ipan tlanechikojli, sekimej kitaj kanon notenojnotsas, sekimej kintlajtlanij amatlajkuiloltin para kinmakaskej tokniuan, sekimej kintlaliaj tlakuikaltin niman videos ipan tlanechikojli, sekimej teseuiyaj ipan tlanechikojli niman oksekimej tepaleuiyaj ijkuak noyektlalia Kajli kampa tosentlaliaj. Nochi yejuin tekitl melak noneki manochiua para kuajli onias tlanechikojli (1 Cor. 14:40). San ika, xsan yejon, sekimej kinpanoltiaj tlamachtiltin ipan tlanechikojli Nemilistli niman Tekitl niman ipan tlanechikojli tlen nopanoltia itlamiyan semana. Sekimej kintlajtlaniliaj makinpaleuikan tokniuan akin kiyekanaj se grupo. Kemantika tlayekankej kintlajtlaniliaj tlapaleuijkej makinuikakan ijkuak komonyolchikauaj tokniuan.

6. ¿Tleka melak tiktlasojkamatij tlen kichiuaj tlapaleuijkej?

⁶ ¿Tleka melak tiktlasojkamatij tlen kichiuaj tlapaleuijkej? Matikitakan tlen okijtojkej sekimej tokniuan. Se tokniuj siuatl akin itoka Beberly b niman chanti Bolivia kijtoua: “Ipampa tlen kichiuaj tlapaleuijkej, más nikinuelita tlanechikoltin. Ipampa tekitl tlen kichiuaj, aman ueli nitlakuika, nitlanankilia, kuajli nikinkaki tlamachtiltin niman miyek niueli itech videos niman tlaixkopinaltin tlen kintlaliaj. Yejuamej techtlajpiyaj ipan tlanechikojli niman kitaj ika tokniuan mauelikan makitakan tlanechikojli ipan internet. Ijkuak tlami tlanechikojli, tlapaleuiyaj ijkuak tlachipaualo niman kipouaj tomintsin tlen nosentlalia ipan tlanechikojli, niman kitaj ika matikinpiyakan amatlajkuiloltin tlen tikintekitiltiskej. ¡Melak nikintlasojkamachilia!”. Leslie, akin chanti Colombia niman iueuentsin tlayekanketl, kijtoua: “Tlapaleuijkej melak kipaleuiyaj noueuentsin. Tla yejuamej xkichiuaskiaj tekitl tlen kichiuaj, noueuentsin más melak miyek tekitl kipiyaskia. Ika yejon, melak nikintlasojkamachilia pampa ika inyojlo tekitij niman nochipa kinektokej tepaleuiskej”. ¿Xmelak ika tinochimej melak tikintlasojkamachiliaj tlapaleuijkej? (1 Tim. 3:13).

7. ¿Kenon uelis tikimititiskej tlapaleuijkej ika tiktlasojkamatij tlen kichiuaj? (Noijki xkita tlaixkopinajli).

⁷ Kanaj melak tikintlasojkamachiliaj tlapaleuijkej, san ika, noijki noneki tikimititiskej  pampa Biblia kijtoua: “Xpiyakan tetlajsojkamachilistli” (Col. 3:15). Matikitakan tlenon kichiua Daavid, se tlayekanketl akin chanti Finlandia, yejua kijtoua: “Nikintitlanilia se amatsintli noso se mensaje kampa niktlalia se tlaxelojli itech Biblia niman nikimijlia kenon melak yonechyolchikaujkej noso nikintlasojkamachilia tlen kichiuaj”. Pascal niman Jael, akin chantij Nueva Caledonia, ijkin kijtouaj: “Nochipa ijkuak tiknotsaj Jehová, tiktlasojkamachiliaj nochi tlen kichiuaj tlapaleuijkej ipan totlanechikol niman tiktlajtlaniliaj makinpaleui”. Jehová kinkaki yejon teoyomej niman tlanechikojli más kuajli nemi (2 Cor. 1:11).

TLAYEKANKEJ MELAK CHIKAUAK TEKITIJ IPAN TLANECHIKOJLI

8. ¿Tleka Pablo okijto ika tlayekankej akin onenkej ipan kachtopa siglo chikauak tekitiyaj? (1 Tesalonicenses 5:​12, 13).

⁸ Ipan kachtopa siglo, tokniuan tlayekankej melak chikauak tekitiyaj (xpoua 1 Tesalonicenses 5:​12, 13; 1 Tim. 5:17). Yejuamej kinyekanayaj tlanechikoltin, yejon kijtosnekiya ika yejuamej kitayaj tlenon nopanoltis ipan tlanechikojli niman noijki nonekiya kitlapejpeniskej tlenon nochiuas. Tlayekankej kimijliayaj tokniuan tlenon nonekiya kichiuaskej para ijkon tlanechikojli kuajli maonia (1 Tes. 2:​11, 12; 2 Tim. 4:2). Noijki nokojtiliayaj kichikauaskej intlaneltok niman kintlajpiyaskej inchanejkauan (1 Tim. 3:​2, 4; Tito 1:​6-9).

9. Xteneua seki tlen kichiuaj tlayekankej.

⁹ Ipan yejuin tonaltin, tlayekankej noijki kichiuaj miyek tekitl. Yejuamej kiteijliaj on kuajli tlajtojli (2 Tim. 4:5). Yejuamej ontenojnotsaj, kitaj kanon niman kenon notenojnotsas niman techmachtiaj kenon titenojnotsaskej niman titemachtiskej. Yejuamej noijki teyolkuitiaj. Ijkuak yakaj kichiua se ueyi tlajtlakojli, xkichikoitaj, yej kikneliaj niman kipaleuiyaj oksejpa kuajli manouika iuan Jehová. San ika, noijki kitaj machipaujto tlanechikojli ixpan Jehová (1 Cor. 5:​12, 13; Gál. 6:1). Tlayekankej noijki tlajpixkej. Yejuamej kuajli nomajmachtiaj niman ijkon kinpanoltiskej tlamachtiltin ipan tlanechikojli, nokojtiliaj kimixmatiskej nochimej tokniuan akin nemij ipan tlanechikojli niman komonyolchikauaj. Niman xsan yejon, sekimej tlayekankej tepaleuiyaj ijkuak nochijchiua noso noyektlalia se Kajli kampa tosentlaliaj, sekimej kitaj kenon nopanoltis se ueyi tlanechikojli, sekimej teuamej itech Comités de Enlace con los Hospitales, sekimej teuamej itech Grupos de Visita a Pacientes niman oksekimej kichiuaj okseki tekitl. ¡Melak miyek kichiuaj!

10. ¿Tleka melak tikintlasojtlaj tlayekankej?

¹⁰ Jehová yokijtojka ika tlayekankej melak kuajli kintlajpiyaskiaj iborreguitos, niman okijto ika iborreguitos “xnomojtiskej nion xitlaj kimakasiskej” (Jer. 23:​4, TNM). Tokniuj Johanna, akin chanti Finlandia, okitak kenon se tlayekanketl okipaleui ijkuak inan melak opeuj kualo. Yejua kijtoua: “Nejua xmás ueli nikteijlia tlen nopan nochiua, san ika, se tlayekanketl akin xmás kuajli nikixmatiya melak kuajli onechkak, nouan okichiuj teoyotl niman onechijli ika Jehová melak nechtlasojtla. Xmás nikilnamiki tlenon onechijli, san ika, nikilnamiki ika melak kuajli oninomachili. Nikmachilia ika Jehová yejua akin okuajtitlan yejon tlayekanketl niman ijkon manechpaleuiki”. ¿Niman tejua kenon yomitspaleuijkej tlayekankej ipan motlanechikol?

11. ¿Kenon uelis tikimititiskej tlayekankej ika melak tikintlasojkamachiliaj ipampa tekitl tlen kichiuaj? (Noijki xkita tlaixkopinajli).

¹¹ Jehová kineki matikimititikan tlayekankej ika melak tikintlasojtlaj “ipampa on tekitl yejuan kichiuaj” (1 Tes. 5:​12, 13). Tokniuj Henrietta akin noijki chanti Finlandia, kijtoua:  “Tlayekankej ika inyojlo tepaleuiyaj, san ika, yejon xkijtosneki tla melak kipiyaj tiempo niman kojtilistli noso tla xtlaj kinmajmana. Ika yejon, nejua ijkin nikimijliani: ‘San nikneki nimitsijlis ika melak kuajli tikchiua motekiyo ken tlayekanketl’”. Se tokniuj akin itoka Sera niman chanti Turquía, kijtoua: “Tlayekankej noijki noneki makinyolchikauakan para kuajli makichiujtokan intekiyo, ika yejon, nikinmijkuilouilia amatsitsintin, nikinnotsa nochan matlakuatij niman imiuan nontenojnotsa”. ¿Tikixmati se tlayekankej akin tikuelitaskia tiktlasojkamachilis? Tla kema, xkita kenon uelis tiktlasojkamachilis (1 Cor. 16:18).

TLAYEKANKEJ IPAN CIRCUITO KINYOLCHIKAUAJ TLANECHIKOLTIN

12. ¿Katlejua tetlayokolijli okinmakak Jesús tlanechikoltin para kinyolchikauas? (1 Tesalonicenses 2:​7, 8).

¹² Jesús otechmakak okse tetlayokolijli. Ipan kachtopa siglo, yejua okichiuj ika tlayekankej itech Jerusalén makintitlanikan Pablo, Bernabé niman oksekimej tokniuan para makimitatij tlanechikoltin (Hech. 11:22). ¿Tleka okintitlankej? Para ijkon makinyolchikauakan tlanechikoltin ken kichiuaj tlapaleuijkej niman tlayekankej (Hech. 15:​40, 41). Yejon tlakamej onokojtilijkej temachtiskej niman kinyolchikauaskej tokniuan, maski hasta ueliskia mikiskej (xpoua 1 Tesalonicenses 2:​7, 8).

13. Xteneua seki tlen kichiuaj tlayekankej ipan circuito.

¹³ Tlayekankej ipan circuito komontlajpalouaj tlanechikoltin. Kemantika noneki uejka yaskej. Sejse semana kinpanoltiaj miyek tlamachtiltin, komontlajpalouaj tokniuan para kinyolchikauaskej, kipanoltiaj tlanechikojli iuan precursores, kipanoltiaj tlanechikojli iuan tlayekankej niman kipanoltiaj tlamachtijli ijkuak tontenojnotsaj. Noijki, kitaj kenon nopanoltis toueyitlanechikol se tonajli niman toueyitlanechikol yeyi tonajli,  niman kinyekchiuaj tlamachtiltin tlen ompa nopanoltiskej. Noijki, kitaj kenon nopanoltis tlamachtijli tlen kiseliaj precursores, kitaj kenon nopanoltis tlanechikojli iuan precursores akin nemij ipan incircuito niman kichiuaj okseki tekitl tlen sucursal kinnauatia.

14. ¿Tleka melak tikintlasojtlaj tlayekankej ipan circuito?

¹⁴ ¿Kenon tlayekankej ipan circuito kinpaleuiyaj tlanechikoltin? Se tokniuj akin chanti Turquía, kijtoua: “Ijkuak techuajtlajpalouaj tokniuan tlayekankej ipan circuito, nechyolchikaua más manikneki ninemis imiuan tokniuan niman nikinpaleuis. Yonikimixmat miyekej tokniuan tlayekankej ipan circuito, san ika, xkeman nikitani ika se manechajsikamachilti ika xkipiya tiempo noso ika xkineki nouan tlajtos”. Johanna, akin otikteneujkej ipan párrafo 10, otenojnotsato iuan se tokniuj tlayekanketl ipan circuito, san ika, xakaj okinextijkej. Yejua kijtoua: “Maski ijkon, nochipa nikilnamiki yejon tonajli. Omemej nokniuan siuamej kemach yonochanpatlakaj niman uejka oyajkej, melak nikintemouaya. Tlayekanketl ipan circuito onechyolchikauj niman onechilnamikti ika maski aman xueli tinemij imiuan tochanejkauan pampa uejka nemij, ipan yenkuik tlaltikpaktli miyekpa uelis imiuan tinemiskej”. Kuajli nesi ika tokniuan melak kintlasojtlaj tlayekankej ipan circuito (Hech. 20:​37–21:1).

15. a) ¿Kenon uelis tikchiuaskej ken kijtoua 3 Juan 5-8 niman tikimititiskej tlayekankej ipan circuito ika tiktlasojkamatij nochi tlen kichiuaj? (Noijki xkita tlaixkopinajli). b) ¿Tleka noneki tikimilnamikiskej insiuauan tokniuan akin kipiyaj se tekitl ipan tlanechikojli niman tlenon uelis tikchiuaskej inpampa? (Xkita recuadro “ Matikimilnamikikan insiuauan”).

¹⁵ Apóstol Juan okijli Gayo kuajli makinseli tokniuan akin komontlajpalouayaj tlanechikoltin, yejua ijkin okijli: “Xkimpaleui, tla itlaj kimpoloua ipan inojui ijkon ken Dios kipaktia” (xpoua 3 Juan 5-8). ¿Kenon uelis  noijki ijkon tikchiuaskej? Tla tikintlakualtiaj tlayekankej ipan circuito niman tla tontenojnotsaj ijkuak yejuamej techuajtlajpalouaj. Matikitakan kenon tokniuj Leslie, akin otikteneujkej ipan párrafo 6, kimititia ika kitlasojkamati tlen kichiuaj, yejua kijtoua: “Niktlajtlanilia Jehová makinmaka tlen kinpoloua. Noueuentsin niman nejua tikomontlajkuilouiliaj niman tikimijliaj ika melak techyolchikauaj ijkuak techuajtlajpalouaj”. Maka matikilkauakan ika tlayekankej ipan circuito noijki san tlakamej. Kemantika kualoj, kixnamikij tlen ouijtika noso kemantika noijki najmanaj. Tla tejua tikimijlia itlaj tlen kualtsin noso itlaj tikintlayokolia, melak tikinyolchikauas, niman kanaj hasta kitaskej ika Jehová ijkon kinnankilijtika inteoyouj (Prov. 12:25).

NONEKIJ TLAKAMEJ AKIN MAKIMITAKAN KEN TETLAYOKOLILTIN

16. ¿Tlenon noneki notlajtoltiskej tokniuan tlakamej? (Proverbios 3:27).

¹⁶ Ipan nochi tlanechikoltin nonekij tlakamej akin makimitakan ken tetlayokoliltin. Tla tejua yotimoapolakti, ¿uelis más titepaleuis? (Xpoua Proverbios 3:27). ¿Timokojtilijtika timochiuas tlapaleuijketl? Niman tla yetitlapaleuijketl, ¿timokojtilijtika timochiuas tlayekanketl? c ¿Uelis tikchiuas tlen mitspaleuis xuiya ipan Tlamachtijli tlen kiseliaj akin Tenojnotsaj itech iTekiuajyo toTajtsin? Tla tikselia yejuin tlamachtijli, Jesús uelis más mitstekitiltis. Tla tikita ika xuelis tikchiuas nochi yejuin, xnotsa Jehová niman xtlajtlanili mamitspaleui ika iespíritu santo niman ijkon uelis tikchiuas nochi tekitl tlen mitsmakaj (Luc. 11:13; Hech. 20:28).

17. ¿Tlenon techititia tekitl tlen kichiuaj tlakamej akin Jesús yotechinmakak ken tetlayokoliltin?

¹⁷ Tlen kichiuaj tlakamej akin Jesús yotechinmakak ken “tetlayokoliltin” techititia ika Jesús techyekantok ipan yejuin itlamiyan tonaltin (Mat. 28:20). ToTekiuaj techinmaka tokniuan akin techpaleuiyaj pampa melak techtlasojtla niman kineki techtlayokolis nochi tlen kuajli. ¿Xmelak ika melak tiktlasojkamachiliaj? Kuakon, matikteititikan ika melak tiktlasojkamatij. Niman maka matikilkauakan tiktlasojkamachiliskej Jehová pampa “nochi kuajli tetlayokolijli” itech ualeua (Sant. 1:17).