TLAMACHTIJLI 43
TLAKUIKAJLI 90 Xmoyolchikauakan
Tlenon uelis tikchiuaskej tla tiometlamatij
“Xkixtlalokan nochi” (1 TES. 5:21).
TLAJTOS ITECH:
Kenijki uelis tikchiuaskej tla tiometlamatij niman ijkon ok kuajli tiktekichiuiliskej Jehová.
1, 2. a) ¿Tlenon ueliskia totlajtoltiskej? b) ¿Tlenon tikitaskej ipan yejuin tlamachtijli?
TINOCHIMEJ kemantika tiometlamatij. a Matontlanemilikan itech se telpochtli akin xkimati tla Jehová kita tlen kichiua, ika yejon, nomojtia noapolaktis. Noso matontlanemilikan itech se tokniuj akin ijkuak telpochtli katka, xonotominti para uelis kachtopa kitekichiuilis Jehová. San ika, aman yekipiya ichanejkauan niman kita ika xmás kajxilia itomintsin para kintlakualtis niman kanaj notlajtoltia tla kuajli tlen yeuejkaui okitlapejpeni. Noijki matontlanemilikan itech se tokniuj akin yelamajtsin niman xok más kojtik, yejua najmana pampa xok ueli miyek kichiua ken yeuejkaui. Kanaj tejua ijkin yotimotlajtoltijka: “¿Jehová kita tlen nikchiua? ¿Kuajli tlen yeuejkaui onijkauj niman ijkon más niktekichiuilis Jehová? ¿Ok nikpaleuiya Jehová?”.
2 Tla tiometlamatij, uelis kichiuas maka sa machikaujto totlaneltok niman hasta ueliskia tijkajkauaskej ika tiktekichiuiliaj Jehová. Ipan yejuin tlamachtijli, tikitaskej kenijki Biblia uelis techpaleuis tla tiknemiliaj ika Jehová xkita tlen tikchiuaj, tla tiknemiliaj ika xkuajli tlen yeuejkaui otiktlapejpenijkej noso tla tiknemiliaj ika xok tikpaleuiyaj Jehová.
KENIJKI UELIS TIKNANKILISKEJ TLEN TOTLAJTOLTIAJ
3. ¿Tlenon techpaleuis tla tiometlamatij?
3 ITlajtol toTajtsin techpaleuis tla tiometlamatij. Techpaleuis más matitlaneltokakan itech Jehová niman más iuan matouikakan, niman noijki techpaleuis matimelajkanentokan ipan totlaneltok (1 Cor. 16:13).
4. ¿Kenijki uelis tikchiuaskej tlen kijtoua ipan 1 Tesalonicenses 5:21?
4 (Xpoua 1 Tesalonicenses 5:21). Biblia techijlia: “Xkixtlalokan nochi”. ¿Kenijki uelis tikchiuaskej yejuin? Tla xtikmatij tla yompa tlen tiknemiliaj, noneki tikitaskej tlen kijtoua Biblia itech yejon. Matontlanemilikan itech se telpochtli akin xkimati tla Jehová kita tlen kichiua. ¿Tlenon noneki kichiuas? Noneki kitas ipan Biblia kenijki tlanemilia Jehová niman ijkon kimatis tla yompa tlen kinemilia.
5. ¿Kenijki uelis “tijkakiskej” ken technankilia Jehová?
5 Jehová kentla technotstoskia ijkuak tikamapouaj iTlajtol, Biblia. San ika, noneki itlaj tikchiuaskej tla tiknekij “tijkakiskej” kenijki technankilia tlen totlajtoltiaj. Noneki tikintejtemoskej tlaxeloltin ipan Biblia kampa tlajtoua itech tlen tikixnamiktokej niman matiktekitiltikan tlen ikalpan toTajtsin yotechmakak para tomachtiskej (Prov. 2:3-6). Melak noneki matiktlajtlanilikan Jehová matechyekana ijkuak tomachtiskej niman matechpaleui matiknextikan tlen tiknekij tikmatiskej. Matikintejtemokan tlaxeloltin ipan Biblia niman okseki tlen techpaleuis matiknankilikan tlen totlajtoltiaj. Noijki melak techpaleuis tla tikitaj tlen okichiujkej yeuejkaui itekipanojkauan Jehová akin noijki okixnamijkej tlen tejuamej tikixnamiktokej.
6. ¿Kenijki tlanechikoltin techpaleuiyaj matikmatikan tlen totlajtoltiaj?
6 Ijkuak tiauej tlanechikoltin, noijki “tijkakij” Jehová. Kemantika ipan se tlamachtijli noso ijkuak tlanankiliaj, kijtouaj itlaj tlen tiknekiyaj tikmatiskej (Prov. 27:17). Aman matikteneuakan seki tlen ueliskia totlajtoltiskej niman kenijki uelis tikinnankiliskej.
“¿JEHOVÁ NECHITA?”
7. ¿Kanaj tlenon totlajtoltiaj?
7 ¿Kanaj yotimotlajtoltijka tla Jehová kita tlen tikchiua? Tla tikmachilia ika xtiueyixtika, kanaj xueli tikneltoka ika uelis timouikas iuan toTlachijchiujkauj. Tekiuaj David kanaj noijki ijkon okinemili. Yejua melak kimojkatlachialtiaya ika Jehová kita tlen kichiuaj tlaltikpakchanejkej, ika yejon, ijkin okitlajtolti: “NoTEKO, ¿Tline tikita ken sanoyej ueyixtikaj sen tlaltikpaktlakatl? ¿Tline ipan titlacha niman sanoyej tiktlajsojtla?” (Sal. 144:3). Matikitakan kenijki uelis tiknankiliskej yejuin.
8. Ijkon ken kijtoua 1 Samuel 16:6, 7, 10-12, ¿tlenon kita Jehová?
8 Biblia kijtoua ika Jehová kita tlen kichiuaj akin nesi kentla xuejueyixtokej. San matontlanemilikan ijkuak Samuel oyaj ichan Jesé niman ijkon kitlapejpenis akin tekiuajtiskia Israel. Ijkuak Jesé okinsentlali chikomemej ikoneuan para makimita Samuel, xokijli David, akin más pitentsin katka, no teuan ompa manemi. b San ika, Jehová yokitlapejpenijka David (xpoua 1 Samuel 16:6, 7, 10-12). ¿Tleka? Pampa Jehová yokitaka tlen kipiaya ipan iyojlo niman okitak ika David melak kitlasojtlaya.
9. ¿Tleka uelis kuajli tikmatstos ika Jehová mitsita? (Noijki xkita tlaixkopinajli).
9 Xnemili kenijki Jehová yomitsititi ika kita tlen tikchiua. Ijkuak noneki mamitspaleuikan, yejua mitsijlia tlenon noneki tikchiuas (Sal. 32:8). Niman, ¿xmelak ika para uelis mitspaleuis noneki kuajli mitsixmatis? (Sal. 139:1). Ijkuak tejua tikchiua tlen yejua mitsijlia niman kuajli tonkisa, más tikneltoka ika Jehová melauak mitsita (1 Crón. 28:9; Hech. 17:26, 27). Yejua kita nochi tlen tikchiua ipampa niman kimita mokualneskayouan (Jer. 17:10). Kineki mouan nouikas niman kineki xnekto iuan xmouika (1 Juan 4:19).
“Tla tejua tiktejtemoua, mitskauilis tiknextis” (1 Crón. 28:9). (Xkita párrafo 9). c
“¿KUAJLI TLEN ONIKTLAPEJPENI?”
10. ¿Kanaj tlenon totlajtoltiaj ijkuak titlanemiliaj itech tlen yeuejkaui otiktlapejpenijkej?
10 Kanaj yakaj tlanemilia itech tlen yeuejkaui okichiuj niman notlajtoltia tla kuajli tlen okitlapejpeni. Kanaj okikauj noso xokipeualti se tekitl kampa kitlaniskia miyek tomin pampa kinekiya más kitekichiuilis Jehová. San ika, aman kita ika sekimej akin chikauak otekitkej para notomintiskej nesi melak kualtsin nemij. Ika yejon, kanaj notlajtoltia: “¿Yompa tlen onikchiuj ijkuak onijkauj nochi yejon para más niktekichiuilis Jehová? ¿Noso más kuajli nonkisaskia tla xijkon nikchiuaskia?”.
11. ¿Tleka melak najmanaya akin okijkuilo Salmo 73?
11 Tla kemantika ijkin yotimotlajtoltijka, xnemili kenijki onomachili akin okijkuilo Salmo 73. Yejua kitaya ika akin xkitekichiuiliayaj Jehová melak kipiayaj tomin, yolseujtoyaj niman xkualouayaj (Sal. 73:3-5, 12). Nesiya ika melak kuajli nemiyaj, ika yejon, salmista opeuj kinemilia ika xtlaj ika tepaleui tla kitekichiuiliaya Jehová. Yejua nochi tonajli najmantoya pampa ijkon tlanemiliaya (Sal. 73:13, 14). ¿Tlenon okipaleui maka ijkon matlanemili?
12. Ijkon ken kijtoua Salmo 73:16-18, ¿tlenon okipaleui salmista kuajli matlanemili?
12 (Xpoua Salmo 73:16-18). Salmista oyaj ichan Jehová niman okitak ika akin ompa nemiyaj yolseujtoyaj, ika yejon, opeuj kuajli tlanemilia. Okajsikamat ika maski nesiya ika sekimej melak kuajli nemiyaj, ika tlayekapan xkuajli onkisaskiaj. Okitak ika melak kuajli ika okitlapejpenijka kachtopa kitekichiuilis Jehová. Niman pampa ijkon opeuj tlanemilia, oyolseuj niman okipaleui oksejpa makineki kuajli kitekichiuilis Jehová (Sal. 73:23-28).
13. ¿Kenijki uelis oksejpa tiyolpakiskej? (Noijki xkimita tlaixkopinaltin).
13 Ijkon ken salmista, tejua uelis oksejpa tiyolpakis. ¿Kenijki? Xnemili nochi tlen kuajli tikpiya, ken itlateochiualis Jehová. Niman xkilnamiki ika akin xkitekichiuiliaj Jehová yejua xkinpaleuiya. Yejuamej xkipiyaj se tlamachialistli, yejuamej san kipiyaj tlen kinmaka yejuin tlaltikpaktli niman san yejon itech yolchikauij. San ika, tejuamej xijkon tikchiuaj pampa Jehová yotechijli ika techmakas miyek tlen kualtsin, hasta techmakas tlen nion xtikonnemiliayaj (Sal. 145:16). Melauak, tejuamej xtikmatij kenijki tinemiskiaj tla okse itlaj tiktlapejpeniskiaj, san ika, kema tikmatij ika akin kitlapejpeniaj itlaj pampa tetlasojtlaj niman kitlasojtlaj Jehová xitlaj kinpolos.
Nochipa matikilnamiktokan tlen Jehová yotechijli techmakas. (Xkita párrafo 13). d
“¿OK NIKPALEUIYA JEHOVÁ?”
14. ¿Tlenon kixnamikij sekimej itekipanojkauan Jehová, niman kanaj tlenon notlajtoltiaj?
14 Sekimej itekipanojkauan Jehová kuelitaskiaj más kitekichiuiliskej, san ika, xuelij pampa yeuejueyimej noso kualoj. Ika yejon, kanaj kinemiliaj ika Jehová xok kinpatiojkaita niman kanaj notlajtoltiaj: “¿Ok nikpaleuiya Jehová?”.
15. ¿Tlenon kuajli kimatstoya akin okijkuilo Salmo 71?
15 Akin okijkuilo Salmo 71 noijki ijkon onomachili. Yejua okijli Jehová: “Maka tinechtlalkauis ijkuak xok nikojtik yes” (Sal. 71:9, 18). San ika, yejua kuajli kimatstoya ika tla melajkanemiya itech Jehová, Jehová nochipa kiyekanaskia niman kipaleuiskia. Yejua okajsikamat ika Jehová yolpaki ijkuak tiktekichiuiliaj ika nochi toyojlo maski xok miyek ueli tikchiuaj (Sal. 37:23-25).
16. ¿Tleka tikijtouaj ika tokniuan akin yeueuentsitsintin melak kipaleuiyaj Jehová? (Salmo 92:12-15).
16 Tla tejua yetiueuentsin, xyejyeko xmoita ken Jehová mitsita. Tejua uelis kuajli tiktekichiuilis Jehová maski xok tikojtik (xpoua Salmo 92:12-15). Maka san xnemilijto tlen xueli tikchiua, yej xnemili tlen kema ueli tikchiua. Tlen tejua tikchiua, uelis kinyolchikauas oksekimej niman uelis tikimititis ika timajmana inpampa. Noijki uelis tikimijlis kenijki Jehová yomitspaleui niman kenijki sa tiknektok tikitas kenijki kichiuas tlen yokijto. Niman xkilnamiki ika moteoyouan melak kinpaleuiya oksekimej (1 Ped. 3:12). Maski san tlenon tikixnamiktokej, tinochimej uelis tikpaleuiskej Jehová niman tikinpaleuiskej oksekimej.
17. ¿Tleka xnoneki san tikitstoskej tlen oksekimej ueli kichiuaj?
17 Tla melak timokuaajmana pampa tiknemilia ika xueyi tikchiua ipampa Jehová, xkilnamiki ika Jehová kipatiojkaita nochi tlen tikchiua. ¡Maka xometlamati! Maka san xkitsto tlen sekimej ueli kichiuaj, pampa Jehová xkeman kinemilia tla oksekimej más kuajli kitekichiuiliaj (Gál. 6:4). Matontlanemilikan itech omemej siuatsitsintin: itech María akin okitlalili Jesús ipan ikxiuan ajuiyalistli tlen melak patioj katka, niman itech siuakaualtsintli akin okitemakak ome itomintsin tlen xpatiojkej katkaj ipan teopan (Juan 12:3-5; Luc. 21:1-4). Maski tlamantik tlen okitemakakej, Jesús okitak ika yejuin omemej siuatsitsintin melak tlaneltokayaj. Kuakon, kuajli xmatsto ika iTaj, Jehová, noijki melak kipatiojkaita nochi tlen tejua tikchiua pampa tiktlasojtla niman pampa tikneki tiktekichiuilis, maski tla tejua tiknemilia ika xueyi tikchiua ipampa.
18. ¿Tlenon uelis mitspaleuis maka sa xometlamati? (Noijki xkita recuadro “ ITlajtol toTajtsin techpaleuiya maka matiometlamatikan”).
18 Tinochimej kemantika tiometlamatij. San ika, ken yotikitakej, iTlajtol toTajtsin kinankilia tlen totlajtoltiaj. Kuakon xtejtemo ipan Biblia tlen timotlajtoltia, tla ijkon tikchiua, xok tiometlamatis niman más titlaneltokas itech Jehová. Jehová mitsita, kipatiojkaita tlen tikchiua ipampa niman yejua mitsteochiuas. Maka xkilkaua: Jehová kintlasojtla nochimej itekipanojkauan niman kintlajpiya.
TLAKUIKAJLI 111 Onka tlen ika tipakij
a TLEN NONEKI MATIKMATIKAN: Ipan yejuin tlamachtijli, ijkuak tikijtouaj ika yakaj ometlamati, xtikijtojtokej ika xtlaneltoka itech Jehová noso tla xkineltoka ika nochiuas tlen yejua yokijto. Yej tikteneujtokej ijkuak yakaj xueli kineltoka ika Jehová kipatiojkaita noso notlajtoltia tla kuajli tlen yeuejkaui okitlapejpeni.
b Maski Biblia xkijtoua kech xiuitl kipiaya David ijkuak Jehová okitlapejpeni, nonemilia ika ok telpochkonetl katka (xkita revista La Atalaya del 1 de septiembre de 2011, página 29, párrafo 2).
c TLEN NESI IPAN TLAIXKOPINAJLI: Se tokniuj ichpochtli kiamapoujtika Biblia niman ijkon kitas tlenon kinemilia Jehová itech tlen kixnamiktika.
d TLEN NESI IPAN TLAIXKOPINALTIN: Se tokniuj kichipaujtika teskatl niman ijkon kitlanis tomin para kintlakualtis ichanejkauan, san ika, ontlanemilijtika itech Xochitlalpan.
