KANAJ ipan xiuitl 1935, notajuan, akin intoka katka James niman Jessie Sinclair, ochantitoj Bronx, tlen onkaj itech kalpan Nueva York. Ompa okixmatkej Wille Sneddon, akin oualeuj Escocia ken yejuamej. San achijtsin yopanoka ika yonoixmatkaj, opeujkej tlajtouaj itech inchanejkauan. Yejuin opanok seki xiujtin achto niuajnemiskia.

Nonan okitlajtlatouili Willie ika itaj niman ikniuj akin iueyi, oamimijkej ipan mar del Norte kachtopa nochiuaskia Ueyi Guerra. Barco tlen ika michtlajtlamayaj, okimaili se mina niman otopon. Willie okijli: “Motaj nemi ipan infierno”. * Willie katka se iteixpantijkauj Jehová, niman ijkin ken nonan nion xkichiaya kixmatis tlen melauak.

Tlen okijto Willie, nonan xokuelkak, pampa yejua kimatstoya ika itaj katka se kuajli tlakatl. San ika, Willie noijki okijli: “¿Kuajli timomachiliskia tla nimitsijliskia ika Jesús noijki oyaj infierno?”. Nonan nimantsin okilnamik ika ipan teopan ouel se teoyotl itoka katka credo kampa kijtouaya ika Cristo otemok ipan infierno niman onokuiteuj ipan yeyi tonajli. Kuakon, onotlajtolti tleka Jesús oyajka kampa kintlajyouiltiaj ika tlitl akin xkuakualtin. Yejon okichiuj ika nonan makineki kixmatis tlen melauak. Opeuj nosentlalia iuan tlanechikojli tlen onka Bronx niman onoapolakti ipan 1940.

Ipan yejon tonaltin, xsajnoye kinyolchikauayaj tajtin manomachtikan Biblia iuan inkoneuan. Ijkuak nipitentsin katka, notaj nechtlajpiaya ijkuak nonan yaya tlanechikoltin niman ijkuak ontenojnotsaya itlamiyan semana. Seki xiujtin sakin, notaj niman nejua opeuj tiauej tlanechikoltin iuan nonan. Yejua melak tenojnotsaya niman miyekej kinmachtiaya itech Biblia. Oajsik tonajli ijkuak sekimej inomachtijkauan san sekan nomachtiayaj pampa nisiuj chantiyaj. Ijkuak ipan kaltlamachtijli nechmakayaj vacaciones, nikuikaya nonan ijkuak ontenojnotsaya. Niman ijkon oniuel miyek itech Biblia niman kenon nikinmachtis oksekimej itech tlen kijtoua.

Nipinaui nikijtos, san ika, ijkuak nipitentsin katka, xnikpatiojkaitaya tlen melauak ken nonekiya. Xnikitaya tla ueyi kijtosneki. San ika, ijkuak nikpiaya 12 xiuitl oninochiuj tenojnotsketl, ijkuakon onipeuj niman hasta aman  xnikajkaua ika nitenojnotsa. Ijkuak nikpiaya 16 xiuitl oninosentemakak itech Jehová. Oninoapolakti ipan julio 24 itech xiuitl 1954 ipan ueyi tlanechikojli tlen onochiuj Toronto (Canadá).

Sekimej tokniuan akin nemiyaj ipan totlanechikol, katkaj betelitas noso ompa otekitkaj. Tlen kichiuayaj melak onechyolchikauj. Melak nikuelitaya kenon tenojnotsayaj teixpan niman kenon kitetomiliayaj tlen melauak itech Biblia. Maski notemachtijkauan kinekiyaj maniuiya universidad, nejua niknekiya nias Betel. Kuakon oniktemilti se solicitud ipan yejon ueyi tlanechikojli tlen onochiuj Toronto. Niman uajsextli oksejpa oniktemilti ipan ueyi tlanechikojli tlen onochiuj Nueva York ipan Estadio de los Yankees. Sakin, ijkuak nikpiaya 17 xiuitl, onechnotskej manitekititi Betel tlen onka Brooklyn, nipeuaskia nitekitis ipan septiembre 19 itech xiuitl 1955. Ijkuak inikuikaya ome tonajli ipan Betel, oniaj kampa kinchijchiuaj amatlajkuiloltin, tlen onka ipan número 117 itech ojtli Adams. Ompa yeskia kampa nitekitiskia. Nimantsin opeuj niktekitiltia se máquina tlen kinsentlaliaya 32 amamej, kinyektlaliaya niman ijkon okse máquina ueliskia kinsasalos yejon amoxtin.

Ijkuak inikuikaya se metstli kampa kinchijchiuaj amatlajkuiloltin, onechtitlankej ipan Grupo kampa kitaj kanon Kiselisnekij revistas pampa niueliya nitlajkuilouaya ipan máquina. Ipan yejon tonaltin, nemiyaj sekimej tokniuan tlakamej niman siuamej akin kijkuilouayaj ipan tepostsitsintin kanon chantij akin yenkuikej yonoijkuilojkej ipan Amatl Tekakistilijketl niman ¡Despertad!, niman seki metstin sakin, opeuj nitekiti ipan Grupo akin Kintitlani amatlajkuiloltin. Klaus Jensen, akin ompa tlayekanaya, onechtlajtolti tla niknekiya nikpaleuis akin kuikaya camión niman iuan manikauati amatlajkuiloltin kampa ajsij barcos niman ijkon komintitlaniskej ipan miyek países, niman noijki onechtlajtlanili manikimitki costaltin tlen kipiayaj revistas kampa oficina de correos, tlen  komintitlaniskej ipan tlanechikoltin tlen onka Estados Unidos. Tokniuj Jensen okijto ika nechpaleuiskia tla nikchiuaskia tekitl tlen yetik, pampa melak niteuajki katka ken se tlakotsintli. San 57 kilos (125 libras) niyetik katka. Pampa niontlakauaya kampa ajsij barcos niman ipan oficina de correos okichiuj manikojtia. Melauak tlen okijtoka tokniuj Jensen.

Grupo kampa kitaj kanon Kiselisnekij revistas noijki kintitlaniya revistas tlen tlanechikoltin kitlajtlatlaniyaj. Ijkon onikmat kenon intoka miyek tlajtoltin itech tlen nochijchiuayaj toamatlajkuiloluan ipan Brooklyn. Miyek itech yejon tlajtoltin xkeman nikakiya, san ika, melak nechyolpaktiaya nikmatis ika melak miyek revistas notitlaniyaj melak uejka ipan tlaltikpaktli. Ijkuakon, nejua nion xniknemiliaya ika Jehová nechkauiliskia sakin manikintlajpaloti yejon miyekej kalpamej.

Ipan 1961, onechijlikej ika aman nitekitiskia ipan Grupo akin kita ken Notekitiltia tomin, niman akin kiyekanaskia notekiyo yeskia tokniuj Grant Suiter. Seki xiujtin sakin, onechijlikej maniuiya kampa tekitiya tokniuj Nathan Knorr, akin ijkuakon kiyekanaya tenojnotsalistli. Tokniuj Knorr onechijli ika se tokniuj akin kipaleuiaya, xompa nemiskia pampa yaskia ipan Tlamachtijli itech iTekiyo Tekiuajyotl, niman ijkuak yejon tokniuj nokuepaskia, tekitiskia ipan Grupo akin kiyekana itech ken notenojnotsa. Onechtlajtlanili maniktekipatla niman manitekiti iuan tokniuj Don Adams. Yejuin tokniuj akin okiselijka nosolicitud tlen ika onikalak Betel ipan ueyi tlanechikojli ipan 1955. Omemej akin ompa nemiyaj ijkuak onajsik, katkaj tokniuan Robert Wallen niman Charles Molohan. Tinauimej san sekan otitekitkej ipantsin 50 xiuitl. Melak niyolpaki ika onitekit iuan tokniuan akin melak oyolmelaujkanenkej niman chikauak intlaneltokil (Sal. 133:1).

Ipan 1970 onechmakakej okse yenkuik tekitl: sejpa ipan se xiuitl noso ipan ome xiuitl  kipiaya nikisaskia seki semanas nikomintlajpaloskia seki insucursales Watch Tower Society, nikchiuaskia tekitl ken tlayekanketl akin kontlajpaloua Betel, yeuejkaui ijkon notokayotiaya. Niaya nikominchikauiliaya intlaneltokil akin tekitiyaj Betel niman misioneros, noijki nikimitaya iamauan sucursales. Ouel onikimixmat seki tokniuan akin oyajkaj ipan kachtopa iTlamachtil Galaad, akin miyek xiujtin sakin ok tekititoyaj ika melajkayotl ipan países kampa okintitlankej. Yonikintlajpaloto ipantsin 90 países. Se tetlayokolijli melak ueyi.

Akin nemiyaj ipan Betel tlen onkatka Brooklyn techtitlaniyaj ipan tlanechikoltin tlen onkatkaj ipan ueyikalpan Nueva York, niman nejua onechtitlankej ipan se tlanechikojli tlen onkatka ipan Bronx. Kachtopa tlanechikojli tlen onkatka Bronx youeyiyaka niman ononek kixeloskej. Tlen kachtopa onkatka okitokayotijkej Upper Bronx, niman nejua ompa niaya.

Kanaj ipan xiuitl 1965, se familia tlen ualeuaya Letonia niman okixmatkaj tlen melauak ipan sur del Bronx, onochantikoj kampa titenojnotsayaj. Livija, imichpoch akin iueyi, onochiuj precursora regular ijkuak otlan nomachtia ipan kaltlamachtijli. Seki metstin sakin otlapaleuito Massachusetts kampa nonekiyaj tenojnotskej. Nejua nikijkuilouiliaya tlenon panouaya ipan tlanechikojli, niman yejua nechijliaya kenon ipan Boston melak kuajli kikakiyaj ijkuak tenojnotsaya.

Seki xiujtin sakin, Livija okitokayotijkej precursora especial. Yejua kinekiya kichiuas nochi kech ueliskia ipampa Jehová, kuakon, noijki okitemilti se solicitud itech Betel, okinotskej mauajla ipan 1971. ¡Nesiya kentla Jehová itlaj nechijlitoskia! Otonamiktijkej ipan octubre 27 itech xiuitl 1973, niman se tlateochiualistli ika tokniuj Knorr otechmakak tlamachtijli. Proverbios 18:22 kijtoua: “Akin kinextia se kuajli isiuauj yokinexti itlaj kuajli. Niman yejua kiselia itlateochiualis Jehová”. Niman yejon melauak. Livija niman nejua yotechteochiuj Jehová, pampa yotechkauili san sekan matitekitikan Betel ipantsin cuarenta xiuitl. Noijki, ok tiauej ipan se tlanechikojli tlen onka Bronx.

Nitekitis iuan tokniuj Knorr melak onechyolpakti. Nochipa melak chikauak tekitiya niman kitlasojtlaya tlen melauak niman noijki misioneros, akin miyekej intech yejuamej kachtopa Teixpantijkej katkaj ipan países kampa okomintitlankej. Tokniuj Knorr okajsik cáncer ipan 1976, niman melak onechyolkoko nikitas kenon otlajyoui. Sejpa, ijkuak sa nemiya ipan itlapech, onechtlajtlanili manikpouili itlaj tlen sa achijtsin poliuiya ika nokixtiskia. Onechijli maniknotsati Frederick Franz, ijkon yejua noijki kikakiskia tlen nikpouaskia. Sakin onikmat ika pampa tokniuj Franz xok melak kuajli tlachiaya, kipiaya seki tonaltin ika tokniuj Knorr yejua kipouiliaya amatlajkuiloltin ken yejuin.

Tokniuj Knorr omik ipan 1977, san ika, akin tikixmatiyaj niman tiktlasojtlayaj melak otechyolseui tikitaskej ika kuajli okitekichiuilijteuj toTajtsin ipan tlaltikpaktli (Apoc. 2:10). Ijkuak  yejon opanok, tokniuj Franz yejua opeuj kiyekana tenojnotsalistli.

Ijkuakon, nejua niitlajkuilojkauj katka tokniuj Milton Henschel, akin otekitka miyek xiujtin iuan tokniuj Knorr. Yejua onechijli ika aman notekiyo yeskia nikpaleuis tokniuj Franz ipan nochi tlen nonekiskia. Miyekpa nikinpouiliaya amatlajkuiloltin tlen kisaskiaj. Melak temojkatlachialti kenon nochi kilnamikiya, niman ijkuak nitlapouaya kuajli san itech yejon tlanemilijtiaya. Melak onechyolpakti ijkon nikpaleuis hasta ijkuak otlan inemilis ipan tlaltikpaktli ipan diciembre itech xiuitl 1992.

Notajuan noijki oyolmelaujkanenkej niman okitekichiuilijkej Jehová hasta ijkuak omijkej, niman nikchia ika nochi noyojlo kuajli nikinselis ipan yenkuik tlaltikpaktli (Juan 5:28, 29). Nochi 61 xiujtin tlen yonitekit Betel nion xonikinmachili. Xitlaj tlen uelis mitstekiuiltis yejuin tlaltikpaktli uelis mitsyolpaktis ken titekitis inuan tokniuan tlakamej niman siuamej akin yolmelaujkej ipampa ikalpan toTajtsin itech nochi tlaltikpaktli. Livija niman nejua uelis tikijtoskej ika nochi toyojlo ika nochi yejuin xiujtin tlen yotiktekichiuilijkej, “iyolpakilis Jehová” yonochiuj “[to]chikaualis” (Neh. 8:10).

Tenojnotsalistli itech Tekiuajyotl ok nochiujtias, yejuin xsan itech se tlakatl onka. Melak teyolpakti niman se tetlayokolijli nitekitis yejuin xiujtin inuan miyekej tokniuan tlakamej niman siuamej akin yolmelaujkej. Miyekej tokniuan tlapejpeniltin akin inuan onitekit xok nemij ipan yejuin tlaltikpaktli. Melak niktlasojkamati ika san sekan inuan onitekit tlakamej akin yolmelaujkej niman chikauak intlaneltokil ipan itekiyo Jehová.