IPAN nochi tlaltikpaktli, tokniuan tlayekankej melak kipatiojkaitaj ika tekitij ipan ikalpan toTajtsin. Niman tejuamej melak tiktlasojkamatij ika touan nemij. San ika, san kemach, itlaj onopatlak. Okintlajtlanilijkej tokniuan akin iuejueyimej niman akin tlayekankej makinmaktilikan tokniuan tlayekankej akin telpokamej seki tekitl tlen kipiyaj. ¿Tlenon kijtosneki yejuin?

Kema, sekimej tekitij ken tlayekankej ipan circuito noso tlamachtiaj ipan tlamachtiltin tlen kitemaka ikalpan toTajtsin. Aman tej, tla yejon tokniuan kajxiltiaj 70 xiuitl, nonekis kikauaskej yejon tekitl. Niman tla se tokniuj tlayekanketl kajxiltia 80 xiuitl niman yejua akin kixeloua tekitl itech Grupo akin tlayekana ipan se Sucursal, aman xok yejua kichiuas yejon tekitl. Noijki ijkon panoua iuan se tokniuj akin kixeloua tekitl itech tlayekankej. Yejon tekitl aman nonekis kichiuas se tlayekanketl akin xiueyi. ¿Kenon nomachiliaj tokniuan tlayekankej akin iuejueyimej pampa aman ijkin nochiua? Yejuamej yolmelaujkanemij itech Jehová niman xkikauaj ikalpan.

Se tokniuj akin itoka Ken, okixelo tekitl itech Grupo akin tlayekana ipan se Sucursal kanaj 49 xiuitl, kijtoua: “Ijkuak onikmat yejuin, onikitak ika melak kuajli katka. Kema, nikilnamiki ika ipan yejon tonajli ika kualkan, onikijlika Jehová ika tiknekiyaj se tokniuj akin matelpokatl niman ijkon yejua makixelo tekitl”. Itech nochi tlaltikpaktli, miyekej tokniuan akin youeuentsintiakej ijkon tlanemiliaj. Melauak, yejuamej  kuelitaj kinpaleuiskej tokniuan. Ika yejon, miyekej onajmankej ijkuak okimatkej yejuin.

Esperandio, se tokniuj akin kixelouaya tekitl itech tlayekankej, nokuitia ika ijkuak okimat yejon kema achijtsin okajman. San ika, noijki kijtoua ika yejua san kuajkualouaya, niman ika nonekiya kitas kenon nopajtiskia. Maski ijkon, tokniuj Esperandio ok kitekichiuilia Jehová, niman tokniuan akin nemij ipan itlanechikol kitlasojkamatij ika ompa nemi.

¿Niman tlenon kijtouaj tokniuan akin melak ouejkaujkej ken tlayekankej ipan circuito? Allan, se tokniuj akin otekit ken tlayekanketl ipan circuito kanaj 38 xiuitl, kijtoua: “Ijkuak onikmat yejon, xok nikmatiya tlenon nikchiuaskia”. San ika, yejua kijtoua ika melak kuajli tla tikinmachtiaj tokniuan akin telpokamej, niman yejua ok chikauak kitekichiuilia Jehová.

Russell otekit 40 años ken tlayekanketl ipan circuito niman noijki tlamachtiaya ipan tlamachtiltin tlen kitemaka ikalpan toTajtsin. Yejua kijtoua ika ijkuak okimatkej yejuin, yejua iuan isiuauj melak onajmankej. Niman noijki kijtoua: “Melak tikuelitayaj yejuin tekitl niman tikmachiliayaj ika ok tiueliskiaj tikchiuaskiaj”. Aman Russell iuan isiuauj kitekitiltiaj ipan intlanechikol nochi tlen yonomachtijkej niman tlen youelkej, niman tokniuan melak yolpakij ika imiuan nemij.

Kanaj tejuamej xijkon tomachiliaj ken yejuin tokniuan. Maski ijkon, melak techpaleuis tlen kijtoua 2 Samuel niman ijkon tikimasikamatiskej.

Matikilnamikikan ika yeuejkaui, Absalón okixnamik itaj, tekiuaj David. Kuakon, David ocholoj itech Jerusalén niman oyaj Mahanaim, tlen nokaua kampa ikisayan tonajli itech Jordán. Ompa, David niman akin imiuan yaya ueliskiaj mikiskiaj pampa xkipiayaj tlen nonekiya niman ijkon yoltoskiaj. ¿Tikilnamikij tlenon opanok?

Yeyimej tlakamej akin ompa ika chantiyaj okimitkilijkej tlapechtin, tlakuajli niman okseki tlemach tlen kinpolouaya. Semej itech yejuamej katka Barzilai (2 Sam. 17:27-29). Ijkuak Absalón xouel okichiuj tlen kinekiya, David ouel onokuep Jerusalén, niman Barzilai okikauato hasta Jordán. David okijli iuan mauiya Jerusalén niman kimakaskia tlen kikuaskia, maski Barzilai xkipolouaya pampa yejua kipiaya miyek tomin (2 Sam. 19:31-33). Kema, kanaj David kitlasojkaitaya Barzilai pampa kitaya ika kipiaya kualneskayomej niman ika ueliskia kitlajtolpaleuis pampa uejkaujtipan yonenka. Niman kuajli tikmatstokej ika Barzilai kuelitaskia tekitis niman chantis kampa tlanauatiaya tekiuaj.

San ika, Barzilai kuajli tlanemiliaya niman kimatiya ika xnochi ueliya kichiuaya. Okijli David ika yejua kipiaya 80 xiuitl. Noijki okijli: “¿Ueliskia nikasikamatis tlen kuajli itech tlen xkuajli?”. ¿Tlenon okijtosnek? Tikmatstokej ika Barzilai kipiaya tlamachilistli pampa uejkaujtipan yonenka. Niman tikmatstokej ika ok kintlajtolpaleuiaya oksekimej tlaltikpakchanejkej. Kanaj kichiuaya ijkon ken yejon tlakamej akin iuejueyimej katkaj niman akin sakin okitlajtolpaleuijkej tekiuaj Rehoboam (1 Rey. 12:6, 7; Sal. 92:12-14; Prov. 16:31). Kuakon, ijkuak Barzilai ijkon  okijli kijtosnekiya ika yejua xok miyek ueliya kichiuaya pampa youeuentsintiaka. Yejua kuajli okijto ika xok kimatiya tla uelik katka noso xuelik katka tlen kikuaya niman noijki okijto ika xok tlakakiya (Ecl. 12:4, 5). Ika yejon, okijli David ika kuajli yeskia tla kuikaya Kimham, akin kanaj ikoneuj katka (2 Sam. 19:35-40).

Itech tlen okichiuj Barzilai, tikasikamatij tleka yokintlajtlanilijkej tlayekankej akin youeuentsintiakej makichiuakan tlen otikteneujkej ipeujyan yejuin tlamachtijli. Xsan onoitak tla yakaj itlaj melak kuajli kichiua, ijkon ken yeuejkaui okitakej itech Barzilai. Onoitak tlenon kinpaleuis tlayekankej akin youeuentsintiakej itech nochi tlaltikpaktli.

Yejuin tlayekankej akin youeuentsintiakej kimatij ika xnochi uelij kichiuaj niman xokintekiyomakak kasikamatiskej tleka aman ijkon nochiua. Tla yejuamej kinmaktiliaj tokniuan akin telpokamej tlen achtopa kichiuayaj, kuakon, ikalpan toTajtsin uelis kuajli tekitis ika tlayekapan pampa tekitl miyekixtiuj. Miyekpa, yejuin tokniuan sa no yejuamej kinmachtiaj oksekimej telpokamej. Kanaj noijki ijkon temachtiaj ken Barzilai okimachti ikoneuj noso ken apóstol Pablo okimachti Timoteo (1 Cor. 4:17; Filip. 2:20-22). Yejuin tokniuan akin telpokamej tikimitaj ken “tetlayokoliltin” niman tikitaj ika uelis tlapaleuiskej niman ijkon “kiskaltiskej icuerpo Cristo” (Efes. 4:8-12; uelis tikitas Números 11:16, 17, 29).

Ipan nochi tlaltikpaktli, miyekej tokniuan yokitemaktilijkej intekiyo tlen kachtopa kichiuayaj. Niman aman yejuin tokniuan okseki tekitl uelij kichiuaj niman ijkon uelij kitekichiuiliaj toTajtsin.

“Aman yejuin nechkauilia manikintlajpaloti inueuentsitsinuan tokniuan akin xnomachtiaj akin nemij ipan notlanechikol”, kijtoua Marco, akin otekit 19 xiuitl ken tlayekanketl ipan circuito.

Geraldo, akin otekit 28 xiuitl ken tlayekanketl ipan circuito, kijtoua: “Nosiuauj niman nejua yotiknemilijkej tlenon tikchiuaskej, tiknekij tikinpaleuiskej akin youejkauj xok tenojnotsaj niman tiknekij tikinmachtiskej oksekimej tlaltikpakchanejkej”. Yejua kijtoua ika aman kinmachtijtokej 15 tlaltikpakchanejkej. Noijki kijtoua ika miyekej akin youejkauj xok tenojnotsaj, aman yauej ipan tlanechikoltin.

Allan, akin otikteneujkej ijkuak otipeujkej, kijtoua: “Aman tiuelij tikchiuaj okseki ipan tenojnotsalistli. Melak tikuelitaj titenojnotsaskej kampa tojlan nojuitilo, kampa tlanemakalo niman kampa tichantij. Omemej tlakamej akin chantij nisiuj tochan yopeujkej touan yauej ipan tlanechikoltin”.

Kanaj tejua noijki ijkon mopan yonochiuj. Kanaj aman yomitsmakakej okse tekitl ipan ikalpan toTajtsin. Tla kema, kuakon, onka okse tlemach tlen uelis tikchiuas niman ijkon titekitis iuan Jehová. Kema, uelis tikimititis oksekimej tokniuan akin telpokamej tlen yotiuel ipan monemilis. Russell, akin yotikteneujkaj kijtoua: “Jehová kinmachtijtika niman kintekitiltijtika tokniuan telpokamej akin yolmelaujkej niman akin kinekij tekitiskej. Miyekej tokniuan kitlasojkamatij pampa kinmachtiaj ika pakilistli niman ika kuajli kintlajpiyaj” (xkita recuadro “ Xkinpaleui tokniuan akin telpokamej kuajli matekitikan”).

Tla san kemach omitsijlijkej ika aman okse tekitl tikchiuas ipan ikalpan toTajtsin, xchiua ika paktli. Tlen otimokojtili tikchiuas melak yokinpaleui miyekej tlaltikpakchanejkej, niman ok uelis tikinpaleuis. Tejua melak titlasojti niman nochipa ijkon titlasojtis.

Niman tlen melak ueyi kijtosneki, ika tejua melak yotikyolpakti Jehová. Yejua kuajli yokijto ika “xkelkauas nemotekiu nion on tetlajsojtlalistli yejuan onenkititijkej ijkuak onenkimpaleuijkej on tlaneltokakej, niman hasta aman nenkimpaleuiyaj” (Heb. 6:10). Yejuin tlaxelojli techasikamachiltia ika yejua xsan kilnamiki tlen otikchiujkej  yeuejkaui. Jehová melak mitstlasojkaita, yejua xkilkaua tlen yotikchiuj yeuejkaui niman noijki xkilkaua nochi tlen aman tikchiujtika niman ijkon tikyolpaktis.

¿Niman tla tejuamej xtechijliaj tla nonekis tikchiuaskej okse tekitl ipan ikalpan toTajtsin? Maski ijkon, onka okseki tlemach tlen noijki uelis tikchiuaskej. ¿Tlenon?

Tla tosentlaliaj imiuan yejon tokniuan akin yokimijlikej ika okse tekitl kichiuaskej, kuakon, miyek tiueliskej intech niman noijki itech tlen yokichiujkej. Melak kuajli tla tikimijliaj matechtlajtolpaleuikan. Maski aman okse tekitl kichiuaj ipan ikalpan toTajtsin, yejuamej melak kuajli kitekitiltiaj nochi tlen youelkej. Ika yejon, melak kuajli tla tikitaj kenon kichiuaj.

Tla tejua yotiueuentsintiak niman aman okse tekitl tikchiua ipan ikalpan toTajtsin, noso tla tejua tikita ika melak mitspaleuiskej yejuin tokniuan akin youeuentsintiakej, kuajli xmatsto ika Jehová kintlasojtla akin uejkaujtipan yokitekichiuilijkej niman akin ok kitekichiuilijtokej.