¿TLENON tikchiuaj ijkuak tiknekij tikmatiskej tlen hora? Kanaj tikonitaj reloj tlen tiktlalijtiuej ipan toma noso tikonitaj reloj tlen pepechiujtika ipan tepantli. Aman tla yakaj techtlajtoltia tlen hora, ¿tlenon tikijliaj? Miyek onka ken uelis tiknankiliskej.

Matiknemilikan ika yopanok tlajkotonajli. Kema, yopanok se hora iuan 45 minutos. Kanaj uelis tikijtoskej ika la una ipan cuarenta y cinco minutos, noso uelis tikijtoskej ika poliui quince minutos niman ijkon ajsis las dos ika teotlak. Noso tla kampa tichantij kipouaj nochi 24 horas tlen kipiya se tonajli, kanaj uelis noijtos ika las 13:45.

Ijkuak tikpouaj Biblia kanaj totlajtoltiaj: “¿Kenon yeuejkaui kiteijliayaj tlen hora katka?”. Miyek onkatka ken noijki tlanankiliayaj. Ipan Tlajkuiloltin ika Hebreo, tlajtoua itech “kualkan”, “tlajkotonajli” niman “teotlak” (Gén. 8:11; 19:27; 43:16; Deut. 28:29; 1 Rey. 18:26). San ika, kemantika Biblia kiteneua okse tlen yeuejkaui kitekitiltiayaj niman ijkon kiteijliskej tlen hora katka.

Ijkuak Jesús ouajla ipan tlaltikpaktli, judíos yopeujkaj kitekitiltiayaj ken griegos niman romanos kijtouayaj tlen hora katka. Yejuamej kixelouayaj yeuajli ika naui vigilias.

Yejuin vigilias miyekpa noteneua ipan Evangelios. Se neskayotl, ika naui vigilia noso kanaj “ipan yeyi hora ika kualkan”, Jesús nejnentiaya ixko mar niman ijkon ajsis ipan barco kampa nemiyaj inomachtijkauan (Mat. 14:25).

Jesús okinteneuj nochi yejon naui vigilias ijkuak okimijli inomachtijkauan: “Xtlachixtiakan, tej, pampa xnenkimatij kemanon nejkos, tla tlayoua, noso tlajkoiuan, noso ijkuak tsajtsitokej on kaxtiltin, noso ijkuak yotlanes” (Mar. 13:35). Kachtopa vigilia noso ijkuak “tlayoua”, peuaya ijkuak kalakiya tonajli niman tlamiya kanaj las nueve ika tlayoua. Ika ome vigilia noso ijkuak “tlajkoiuan”, peuaya kanaj las nueve niman tlamiya a las doce ika tlayoua. Ika yeyi vigilia noso ijkuak “tsajtsitokej on kaxtiltin”, peuaya ijkuak tlajkoyeuajli katka niman tlamiya kanaj las tres ika kualkan. Kanaj ijkuakon ijkuak se kaxtil otsajtsik ipan yejon yeuajli ijkuak okajsikej Jesús (Mar. 14:72). Niman ika naui vigilia noso ijkuak “yotlanes”, peuaya kanaj las tres ika kualkan niman tlamiya ijkuak kisaya tonajli.

Tikitaj tej, ika maski yeuejkaui xtlaj katkaj relojes ijkon ken aman, tlaltikpakchanejkej kema ueliyaj kiteijliayaj tlen hora katka.