1. Xkijto tlenon kimachilia Jehová inpampa akin yolyemankej.

JEHOVÁ kintlasojtla akin yolyemankej. San akin yemelak yolyemankej ueliskej kuajli nouikaskej iuan Jehová. San ika, akin noueyimatij, Jehová “kineki uejka ma nemikan” pampa xkimitasneki (Sal. 138:6). Tinochimej tiknekij tikyolpaktiskej Jehová niman tikmachiliskej ika techtlasojtla, yejua ika, noneki tiyolyemankej yeskej.

2. ¿Tlenon tikitaskej ipan yejuin tlamachtijli?

² Ipan yejuin tlamachtijli, tikinnankiliskej yeyi tlajtoltilistin. 1) ¿Tlenon kijtosneki yolyemanilistli? 2) ¿Tleka noneki tiyolyemankej yeskej? 3) ¿Tlenon ueliskia kichiuas maka sa matiyolyemankej? Ken tikitaskej, tla tiyolyemankej, tikyolpaktiskej Jehová niman yejon noijki techpaleuis (Prov. 27:11; Is. 48:17).

3. ¿Tlenon kijtosneki yolyemanilistli?

³ Yolyemanilistli kijtosneki xtimoueyimatis niman xtiknemilis ika tiueyixtika. Biblia techititia ika akin yolyemanki kasikamati ika Jehová melak ueyixtok xken yejua niman noijki kasikamati ika nochimej uelij kichiuaj okseki itlaj tlen yejua xueli (Filip. 2:3, 4).

4, 5. ¿Tleka tikijtouaj ika xsan noneki manesi ika se yolyemanki?

⁴ Sekimej san nesij ika yolyemankej. Kanaj melak tetlakaitaj, kuajli tenotsaj niman san pijpinauij, ijkon kichiuaj pampa intajuan ijkon okinmachtijkej. San ika, kanaj ipan inyojlo noueyimatij.  Ajsis tonajli ijkuak kiteititiskej kenon yemelak yejuamej (Luc. 6:45).

⁵ Niman nemij oksekimej akin melak yolchikaujkej noso nimantsin kijtouaj tlen kinemiliaj, san ika, kemantika yejuamej xnoueyimatij (Juan 1:46, 47). Maski ijkon, noneki notlajpiyaskej maka san intech tlaneltokaskej. Maski san kenon tiyeskej, tinochimej noneki tokojtiliskej niman ijkon yemelak tiyolyemankej yeskej.

6. Itech tlen kijtoua 1 Corintios 15:10, ¿tlenon tiuelij itech apóstol Pablo?

⁶ Matikitakan tlenon okichiuj apóstol Pablo. Jehová okitekitilti niman ijkon miyekan makinpeualti tlanechikoltin. Hasta uelis tikijtoskej ika nion se iapóstol Jesucristo xmiyekan otenojnotstinen ijkon ken apóstol Pablo. Maski ijkon, Pablo xokinemili tla melak ueyixtoya xijkon ken tokniuan, ika yolyemanilistli okijto: “Nejua tej, xniueyixtikaj ken on oksekimej apóstoles, niman nion achijtsin xnechmelaua nechtokayotiskej apóstol pampa onikintlauelitak niman onikintlajyouiltij on tlaneltokakej” (1 Cor. 15:9). Sakin, Pablo okijto ika yejua kuajli nouikaya iuan Jehová “ipampa iueyitetlajsojtlalis Dios”, niman xpampa yejua ueyixtoya noso pampa miyek yokichiujka ipampa Jehová (xpoua 1 Corintios 15:10). Kuajli tikitaj ika Pablo okiteititi ika yolyemanki katka ijkuak okomintlajkuilouili corintios, maski kimatstoya ika sekimej kitejteneuayaj (2 Cor. 10:10).

7. ¿Kenon okiteititi se tokniuj akin melak kixmatiyaj ika yolyemanki?

⁷ Miyekej tokniuan okinyolchikauj kipouaskej revista kampa tokniuj Karl Klein otlajto itech inemilis, yejua teuan katka itech Grupo akin Tlayekana ipan nochi tlanechikoltin. Tokniuj Klein ika yolyemanilistli okiteneuj seki tlaueltin tlen okinpix. Matikitakan  seki tlen okixnamik. Kanaj ipan 1922, kemach ika sejpa otenojnotsato techajchan, niman pampa okimat melak ouijtika, ome xiuitl xok otenojnotsato. Sakin, ijkuak inemiya Betel, okualan iuan se tokniuj pampa okichikajkanots. Noijki, okipix depresión nerviosa, niman sakin opajtik. San ika, noijki okiseli miyek tlateochiualistin ipan ikalpan toTajtsin. ¿Xmelak ika ononek yolyemanilistli niman ijkon yejuin tokniuj akin melak kixmatiyaj makijto tlenon okixnamik? Miyekej itekipanojkauan Jehová ika tlasojtlalistli kilnamikij tokniuj Klein niman kenon okijto nochi tlen okixnamik. *

8. ¿Kenon 1 Pedro 5:6 techpaleuiya matikitakan ika Jehová kuelita yolyemanilistli?

⁸ Tiknekij tiyolyemankej yeskej pampa yejon kuelita Jehová, ijkon ken okijto apóstol Pedro (xpoua 1 Pedro 5:6). Ipampa tlen okijto Pedro, amoxtli “Ven, sé mi seguidor” kijtoua ika timoueyimatis ken se veneno tlen melak teijtlakoua niman ika toTajtsin nion xkintekitiltisneki akin noueyimatij maski miyek mauelikan makichiuakan. San ika, kijtoua ika tla se yolyemanki, toTajtsin ueli kitekitiltia maski xmiyek ueli kichiua. Niman noijki kijtoua ika toTajtsin kiyolpaktis techteochiuas tla tiyolyemankej. * Kuajli tikmatstokej ika melak ueyi kijtosneki tikyolpaktiskej Jehová (Prov. 23:15).

9. ¿Tleka tikuelitaj tinemiskej imiuan akin yolyemankej?

⁹ Xsan tikyolpaktiaj Jehová ijkuak tiyolyemankej, yejuin noijki melak techpaleuiya. Tla tiyolyemankej, oksekimej kinekiskej touan nemiskej. Uelis tikasikamatiskej yejuin tla tiknemiliaj akinon imiuan tiknekij tinemiskej (Mat. 7:12). ¿Xmelak ika xtikuelitaj tinemiskej imiuan akin nochipa kinekij kichiuaskej tlen yejuamej kinekij niman xkinokauiliaj ika oksekimej itlaj makimijlikan? San ika, tikuelitaj tinemiskej imiuan akin teasikamatij, tetlasojtlaj, teikneliaj niman yolyemankej (1 Ped. 3:8). Tla tejuamej ijkon tomachiliaj, uelis tikijtoskej ika oksekimej noijki kuajli nomachiliskej touan nemiskej tla tiyolyemankej.

10. ¿Tleka tla tiyolyemankej techpaleuiya matikixnamikikan tlen ouijtika?

¹⁰ Tla tiyolyemankej, noijki techpaleuiya matikixnamikikan tlen ouijtika. Kemantika uelis tikmachiliskej ika itlaj xkinamiki ijkon manochiua. Hasta tekiuaj Salomón akin  tlamachilise katka okijto yejuin: “Onikintak on yejuan esclavos kistinemij ipan caballos niman on tlayekankej nejnentinemij ken esclavos yeskiaj” (Ecl. 10:7). Xnochipa kintlakaitaj akin kuajli tekitij, niman kemantika más kintlakaitaj akin xmás itlaj kichiuaj. San ika, Salomón okasikamat ika más kuajli tla xsajnoye totekipachouaj itech tlen nochiua (Ecl. 6:9). Tla tiyolyemankej, xtitlauelmikiskej noso xtajmanaskej tla xnochiua tlen tikuelitaskiaj.

11. ¿Tlenon noneki tikchiuaskej ijkuak yakaj texchikajkanotsas?

¹¹ Mojmostla, uelis tikteititiskej ika tiyolyemankej. Matikitakan kenon uelis tikteititiskej. Ijkuak yakaj texchikajkanotsa. Noneki tikilnamikiskej ika tla yakaj yokixelo tiempo niman ijkon techmelajkatlalis, kanaj kijtosneki ika xsan achijtsin otopopolojkej ken tejuamej tiknemiliayaj. Niman kanaj kachtopa xtikseliskej matechpaleuikan. Kanaj tiktejteneuaskej akin texchikajkanotsa noso xtikuelitaskej kenon techijlia. San ika, tla tiyolyemankej, tikchiuaskej ijkon ken otechijli.

12. Ken kijtoua Proverbios 27:5, 6, ¿tleka noneki tiktlasojkamatiskej ijkuak yakaj texchikajkanotsas? Xkijto se neskayotl.

¹² Akin yolyemanki kitlasojkamati ijkuak kichikajkanotsaj noso ijkuak itlaj kijliaj. Matitlanemilikan itech yejuin. Matiknemilikan ika tinemij ipan Kajli kampa Tosentlaliaj niman titlajtlajtojtokej imiuan sekimej tokniuan. Kuakon, se tokniuj oksekan techuika niman san ichtaka techijlia ika achijtsin onokauj tlakuajli ipan totlan. Maski tipinauij, tiktlasojkamachiliaj pampa otechijli. Hasta tiknekiskiaj ika nimantsin matechijlianij. Noijki ijkon kipiya ika tiktlasojkamatiskej ijkuak se tokniuj noyolchikauas texchikajkanotsas noso itlaj techijlis. Maka matikitakan ken yakaj akin techtlauelita, matikitakan ken yakaj akin techtlasojtla (xpoua Proverbios 27:5, 6; Gál. 4:16).

13. ¿Kenon tikteititiaj ika tiyolyemankej ijkuak oksekimej kiseliaj okseki tekitl ipan ikalpan toTajtsin?

¹³ Ijkuak oksekimej tokniuan kiseliaj okseki tekitl ipan ikalpan toTajtsin. Se tlayekanketl itoka Jason kijtoua: “Ijkuak nikita ika oksekimej kinmakaj okseki tekitl ipan ikalpan toTajtsin, kemantika ninotlajtoltia tleka xnejua onechmakakej”. ¿Kemantika ijkon yotomachilijkej? Melak kuajli ika tokojtiliaj más titlapaleuiskej ipan ikalpan Jehová (1 Tim. 3:1). San ika, noneki totlajpiyaskej itech tlen tiknemiliaj, pampa tla xijkon tikchiuaj, uelis  tipeuaskej toueyimatiskej. Matitlanemilikan itech yejuin, se tokniuj uelis kinemilis ika san yejua uelis kuajli kichiuas se tekitl. Noso se tokniuj siuatl kanaj kinemilis ika iueuentsin más kuajli uelis kichiuas se tekitl xijkon ken okse tokniuj. Tla yemelak tiyolyemankej, xijkon titlanemiliskej.

14. ¿Tlenon tiuelij itech tlen okichiuj Moisés ijkuak oksekimej okiselijkej okseki tekitl?

¹⁴ Matikitakan tlenon tiuelij itech tlen okichiuj Moisés ijkuak oksekimej okiselijkej okseki tekitl. Moisés kipatiojkaitaya ika okitlapejpenijkaj makinyekana israelitas. San ika ¿tlenon okichiuj ijkuak Jehová okinmakak iespíritu oksekimej israelitas niman ijkon makipaleuikan ika itekiyo? Moisés xokualan (Núm. 11:24-29). Noijki Moisés okiteititi ika yolyemanki katka ijkuak okitekauili ika oksekimej makipaleuikan kinyolkuitiskej israelitas (Éx. 18:13-24). Pampa nemiyaj oksekimej jueces, nimantsin noyektlaliayaj tlaueltin niman israelitas xnonekiya uejkaujtipan tlamachixtoskej. Moisés más kajmanaya ika israelitas kuajli manemikan xijkon ken kiselis okseki tekitl. ¡Melak kuajli tlen okichiuj Moisés! Matikilnamikikan ika Jehová xsan kita tlen uelij tikchiuaj niman ijkon techtekitiltis, yejua más kita tla tiyolyemankej. Ken kijtoua Salmo 138:6, “maski toTEKO nemi ne tlakpak, impan tlacha on yejuan yolyemankej”.

15. ¿Kenon yonopatlak innemilis miyekej tokniuan?

¹⁵ Ijkuak nopatla tonemilis. Xiuejkaui, miyekej tokniuan akin youejkaujkaj kitekichiuiliaj toTajtsin oksekan okintitlankej. Se neskayotl, ipan 2014, tlayekankej ipan distrito iuan insiuauan okimijlikej makichiuakan okse tekitl ipan ikalpan toTajtsin. Niman desde yejon xiuitl onoijto ika ijkuak tlayekankej ipan circuito kajxiltiskej 70 xiuitl, kikajkauaskej intekiyo. Noijki, tokniuan akin kipiyaj 80 xiuitl noso ipantsin 80 xiuitl xok kixeloskej tekitl itech tlayekankej. Niman yopanok  seki xiujtin ika miyekej betelitas okimijlikej matekipanokan ken precursores. Oksekimej yononek kikauaskej kampa kitekichiuiliayaj toTajtsin pampa kualoj, pampa noneki kintlajpiyaskej inchanejkauan noso ipampa okseki itlaj.

16. ¿Kenon sekimej tokniuan yokiteititijkej ika yolyemankej?

¹⁶ Miyekej itech yejuin tokniuan xkuajli onomachilijkej pampa onopatlak innemilis. Miyekej melak onajmankej, pampa xok kichiuaskiaj yejon tekitl tlen uejkaujtipan yokichiujkaj niman tlen melak yokuelitakaj. San ika, sakin onomatkej. ¿Tleka? Pampa melak kitlasojtlaj Jehová. Yejuamej kimatstoyaj ika xokijlikej Jehová ika kitekichiuiliskiaj san tla kinmakaya se tekitl ipan ikalpan (Col. 3:23). Maski san kanon nemij, yejuamej pakij pampa ok kitekichiuiliaj Jehová ika yolyemanilistli. Yejuin tokniuan kimaktiliaj Jehová nochi tlen kinmajmana pampa kimatstokej ika Jehová kineki kinpaleuis (1 Ped. 5:6, 7).

17. ¿Tleka tiktlasojkamatij ika iTlajtol toTajtsin techijlia matiyolyemankej?

¹⁷ Melauak ika tiktlasojkamatij ika iTlajtol toTajtsin techijlia ika noneki tiyolyemankej yeskej. Ijkuak tiyolyemankej, más kuajli tikimixnamikij tlaueltin niman noijki más tonisiuiyaj itech toTajtsin iluikakchane. Melak techyolpaktia tikmatiskej ika maski Jehová melak ueyixtika, kintlasojtla niman kinpatiojkaita itekipanojkauan akin yolyemankej (Is. 57:15).