TLAMACHTIJLI 38
“Notech xuajlakan [...] niman nejua nemechyolseuis”
“Notech xuajlakan, nochimej akin yonensiaujkej niman nemotekipachouaj, niman nejua nemechyolseuis” (MAT. 11:28, TNM).
TLAKUIKAJLI 17 “Nikneki”
TLEN TIKITASKEJ *
1. ¿Tlenon okijto Jesús ipan Mateo 11:28-30?
JESÚS okijto itlaj melak kualtsin ijkuak nemiya imixpan miyekej tlaltikpakchanejkej. Okijto: “Notech xuajlakan [...] niman nejua nemechyolseuis” (xpoua Mateo 11:28-30, TNM). * Ika tlen okijto okiteititi ika yemelak kineki techyolseuis. San matikonnemilikan kenon okipaleui se siuatsintli akin melak kualouaya.
2. ¿Kenon Jesús okipaleui se siuatsintli akin kualouaya?
2 Yejuin siuatsintli melak kinekiya makipaleuikan. Yokimitatoya miyekej tepajtikej, san ika, yopanoka 12 xiuitl niman xakaj ueliya kipajtiaya. Niman Tlanauatijli kijtouaya ika yejua xchipauak katka (Lev. 15:25). Oajsik tonajli ijkuak yejuin siuatsintli okitekakili ika Jesús tepajtiaya, kuakon, okitejtemoto. Ijkuak okinexti, okajsik itenpan itlaken niman opajtik. San ika, Jesús xsan okipajti. Yejua noijki okichiuj ika yejuin siuatsintli makimachili ika kitlasojtlayaj niman ika kitlakaitayaj. Jesús okinots ika tlakaitalistli niman okijli “nokoneu”. San xkonnemili kenon melak oyolseuj yejuin siuatsintli (Luc. 8:43-48).
3. ¿Tlenon tiknankiliskej ipan yejuin tlamachtijli?
3 Tla kuajli tikitaj, yejuin siuatsintli yejua akin okitejtemoto Jesús. Tejuamej noijki noneki ijkon tikchiuaskej. Noneki tokojtiliskej niman ijkon tiknisiuiskej Jesús. Ipan yejuin tonaltin, Jesús xkichiua milagros niman ijkon kinpajtis akin kinisiuiyaj. San ika, yejua ok techijlitika: “Notech xuajlakan [...] niman nejua nemechyolseuis”. Ipan yejuin tlamachtijli,
tiknankiliskej makuijli tlajtoltilistin: ¿Kenon tonisiuiyaj itech Jesús? ¿Tlenon okijtosnek Jesús ijkuak okijto: “Xmomamaltikan noyugo”? ¿Tlenon tiuelij itech Jesús? ¿Tleka tiyolseuij ijkuak tikchiuaj yejon tekitl tlen yotechnauatij? Niman ¿kenon uelis tiyolseujtoskej ipan yejon tekitl?“NOTECH XUAJLAKAN”
4, 5. ¿Kenon tonisiuiyaj itech Jesús?
4 Tonisiuiyaj itech Jesús ijkuak tomachtiaj nochi tlen okijto niman tlen okichiuj (Luc. 1:1-4). Toseselti noneki tikitaskej tlenon kijtoua Biblia itech inemilis Jesús. Noijki tiknisiuiyaj ijkuak tikijtouaj tikchiuaskej ken yejua niman ijkuak toapolaktiaj.
5 Noijki tonisiuiyaj itech Jesús ijkuak tikintlajtlaniliaj tlayekankej matechpaleuikan. Yejuamej se tetlayokolijli tlen Jesús yotechmakak, yejua yokintekitlali niman ijkon matechtlajpiyakan (Juan 21:16; Efes. 4:7, 8, 11; 1 Ped. 5:1-3). San ika, tejuamej akin noneki tikintlajtlaniliskej tlayekankej matechpaleuikan. Maka matiknemilikan ika tlayekankej kimatstokej tlenon tiknemilijtokej noso ika kimatstokej kemanon tiknekij matechpaleuikan. Matikitakan tlenon okijto se tokniuj akin itoka Julian, yejua okijto: “Ononek nijkauas Betel pampa opeuj nikualo, niman se akin iuan ninouika onechijli manikintlajtlanili tlayekankej manechpaleuikan. Niknemiliaya ika xnonekiya manechitatij. San ika, sakin, onikinnots tlayekankej niman nikita ken se tlateochiualistli ika onechtlajpalotoj”. Tlayekankej, ken akin okitatoj Julian, uelis techpaleuiskej matikmatikan “tlen toTEKO kinemilia”, kema, techpaleuiskej matikasikamatikan kenon tlanemilia Jesús niman matikchiuakan ken yejua okichiuj (1 Cor. 2:16; 1 Ped. 2:21). Ijkuak tlayekankej ijkon techpaleuiyaj, tikitaj ika se tlateochiualistli tlen kichiuaj topampa.
“XMOMAMALTIKAN NOYUGO”
6. ¿Tlenon okijtosnek Jesús ijkuak okijto: “Xmomamaltikan noyugo”?
6 Ijkuak Jesús okijto “xmomamaltikan noyugo”, kanaj okijtosnek “xnechtlakamatikan”. Noijki, kanaj okijtosnek “nouan xmamajtiakan yugo niman san sekan matiktekichiuilikan Jehová”. Maski san kenon, yejuin kijtosneki ika noneki titekitiskej.
7. Ken kijtoua Mateo 28:18-20, ¿tlenon yotechijlikej matikchiuakan, niman tlenon uelis kuajli tikmatstoskej?
7 Tomamaltiaj iyugo Jesús ijkuak tosentemakaj itech Jehová niman ijkuak toapolaktiaj. Jesús kineki ika nochimej ijkon makichiuakan. Yejua xkeman kimapeuaskia akin yemelak kineki kitekichiuilis toTajtsin (Juan 6:37, 38). Nochimej akin kichiuaj ken Cristo uelis kichiuaskej yejon tekitl tlen Jehová yokimakak Jesús. Uelis kuajli tikmatstoskej ika Jesús nochipa techpaleuis matikchiuakan yejuin tekitl (xpoua Mateo 28:18-20, TNM). *
“NOTECH XUELIKAN”
Matiteyolseuikan ijkon ken Jesús (Xkimita párrafos 8-11). *
8, 9. a) ¿Tleka akin yolyemankej katkaj kinekiyaj kinisiuiskej Jesús? b) ¿Tlenon noneki matotlajtoltikan?
8 Akin yolyemankej katkaj kinekiyaj kinisiuiskej Jesús (Mat. 19:13, 14; Luc. 7:37, 38). ¿Tleka? Pampa yejua xijkon katka ken fariseos. Yejon tlakamej nion achijtsin xtetlasojtlayaj niman melak noueyimatiyaj (Mat. 12:9-14). San ika, Jesús melak tetlasojtlaya niman yolyemanki katka. Fariseos kinekiyaj uejueyixtoskej niman ika miyekej makimixmatikan. San ika, Jesús okimititi inomachtijkauan mayolyemankej niman matetekichiuilikan (Mat. 23:2, 6-11). Fariseos kinmojtiayaj oksekimej niman ijkon san yejuamej makintlakamatikan (Juan 9:13, 22). San ika, Jesús kinyolseuiaya pampa kinchiuiliaya tlen kuajli niman pampa kualtsin kinnotsaya.
9 ¿Tikchiujtokej ijkon ken Jesús? Matotlajtoltikan: “¿Nechixmatij ika xnimantsin nikualani niman ika niyolyemanki? ¿Niknektika nikchiuas se tekitl tlen xueyi kijtosneki niman ijkon nikinpaleuis oksekimej? ¿Kuajli nitenotsa?”
10. ¿Tleka tikijtouaj ika Jesús kuajli kinmachtiaya inomachtijkauan?
10 Jesús melak kiyolpaktiaya kinmachtis inomachtijkauan. Kichiuaya ika nochimej mayolseujtokan niman kuajli manomachilikan (Luc. 10:1, 19-21). Kinyolchikauaya makitlajtlajtoltikan niman kuajli kikakiya tlen kinemiliayaj (Mat. 16:13-16). Matontlanemilikan itech yejuin, ijkuak yakaj tlatoka ijtik se invernadero, yejon tlen kitoka kualtsin noskaltia niman tlaki. Noijki ijkon, ken Jesús okinmachti inomachtijkauan okichiuj ika yejuamej melak kuajli matekitikan.
Matiyolpakikan imiuan oksekimej.
Chikauak matitenojnotsakan.
Matiyolyemankej niman matitekitkej. *
11. ¿Tlenon noneki matotlajtoltikan?
11 Matotlajtoltikan: “¿Kenijki nitlayekana nochan noso kampa nitekiti? ¿Niyolseujki? ¿Niknektika manechtlajtlajtoltikan? Niman ¿nikneki nijkakis tlenon kinemiliaj oksekimej?”. Maka matikchiuakan ken fariseos, yejuamej kintlauelitayaj akin kintlajtlajtoltiayaj niman kintlaueltokayaj akin xtlanemiliayaj ken yejuamej (Mar. 3:1-6; Juan 9:29-34).
“NENYOLSEUISKEJ”
12-14. ¿Tleka tiyolseuij ijkuak tikchiuaj yejon tekitl tlen yotechnauatij Jesús?
12 ¿Tleka tiyolseuij ijkuak tikchiuaj yejon tekitl tlen yotechnauatij Jesús? Matikitakan tleka.
13 Akin techyekanaj melak kuajli inyojlo. Maski Jehová melak Ueyixtika, yejua yolkuajli niman melak kitlasojkamati tlen tikchiuaj (Heb. 6:10). Techmaka kojtilistli niman ijkon matikchiuakan yejon tekitl tlen yotechmakak (2 Cor. 4:7; Gál. 6:5). Jesucristo, akin toTekiuaj, techititia kenon noneki titepaleuiskej (Juan 13:15). Niman tokniuan tlayekankej nokojtiliaj kichiuaskej ken “toTEKO JesuCristo yejuan ueyi Tlajpixki” (Heb. 13:20; 1 Ped. 5:2). Nokojtiliaj kuajli technotsaskej, techyolchikauaskej, techmachtiskej niman techtlajpiyaskej.
14 Akin touan tekitij melak kuajli inyojlo. Xakaj kiyolpaktia itekiyo ijkon ken tejuamej akin tiktekichiuiliaj toTajtsin. Xnemij akin manotlasojtlakan ken tejuamej. Matitlanemilikan itech yejuin: se tlateochiualistli ika titekitij imiuan akin kitlakamatij itlanauatiluan toTajtsin niman akin xkinemiliaj tla uejueyixtokej. Miyekej melak miyek tekitl uelij kichiuaj, san ika, xnoueyimatij niman kimitaj oksekimej ika más uejueyixtokej. Yejuamej xkinemiliaj ika san imiuan titekitij, techitaj ken iminamigos. Melak techtlasojtlaj niman hasta ueliskiaj mikiskej topampa.
15. ¿Tleka tiyolpakij ijkuak tikchiuaj yejon tekitl tlen yotechmakakej?
15 Totekiyo melak ueyi kijtosneki. Titemachtiaj tlen melauak itech Jehová niman tikteijliaj kenon yotekajkayauj Diablo (Juan 8:44). Diablo kintlajyouiltia tlaltikpakchanejkej pampa kimijlia tlen xmelauak niman kichiua maka manemikan ika inyojlo. Yejua kineki matikneltokakan ika Jehová xtechtlapopoluiya niman ika xakaj uelis techtlasojtlas. Yejon se tlakajkayaualistli tlen melak xkuajli tlen kichiua matajmanakan. Ijkuak tiknisiuiyaj Cristo, toTajtsin techtlapopoluiya pampa yejua yemelak techtlasojtla (Rom. 8:32, 38, 39). ¡Melak tiyolpakij ika tikimititiaj oksekimej matlaneltokakan itech Jehová niman makitakan kenon Biblia melak kinpaleuiya!
MATIYOLSEUJTOKAN IPAN YEJON TEKITL TLEN YOTECHMAKAK JESÚS
16. ¿Tleka yejon tekitl tlen yotechmakak Jesús sejneka itech okseki tekitl tlen noneki tikchiuaskej?
16 Yejon tekitl tlen yotechmakak Jesús melak sejneka itech okseki tekitl tlen noneki tikchiuaskej. Matitlanemilikan itech yejuin, ijkuak yotisetonalojkej titekititokej, timiyekej xsan tikmachiliaj ika melak yotisiaujkej, noijki xtinemij ika toyojlo. San ika, ijkuak tiktekichiuiliaj Jehová niman Jesús, melak tiyolpakij. Kemantika kanaj melak tisiaujtokej pampa nochi tonajli titekititoyaj niman kanaj noneki tochiualtiskej tiaskej totlanechikoluan. San ika ¿xmelak ika ijkuak tiuajtokuepaj tochan oksejpa tikojtikej niman xok tisiaujtokej? Noijki ijkon tomachiliaj ijkuak tokojtiliaj tontenojnotsaskej noso toselti tomachtiskej. Tlen kualtsin tikmachiliaj kichiua matokojtilikan tikchiuaskej nochi yejon.
17. ¿Tlenon noneki tikasikamatiskej, niman itech tlenon noneki totlajpiyaskej?
17 Noneki tikasikamatiskej ika tokojtilis san ontlami. Yejua ika, kuajli tla tikitaj kenon tijkuij tokojtilis. Kanaj sajnoye totekimiktijtokej ipampa tomin noso ipampa okseki tlen xnoneki. Matikitakan kenon okinankili Jesús se telpochtli akin kipiaya miyek tomin ijkuak okitlajtolti: “¿Tlinon nikchiuas para nikselis on nemilistli yejuan para nochipa?”. Yejuin telpochtli ikixmatiya Tlanauatijli niman kanaj yolkuajli katka pampa ipan ievangelio Marcos kijtoua ika Jesús okikneli. Yejua ika, Jesús okijli: “Xuiya mochan niman xnamaka nochi tlen tikpiya [...]. Niman kemaj xuajla nouan”. Yejuin telpochtli kinekiya nochiuas inomachtijkauj Jesús, san ika, nesi ika más kitlasojtlaya nochi itomin (Mar. 10:17-22). Tikitaj ika yejuin telpochtli xokinek kinomamaltis iyugo Jesús, okinek kinotekimakas tomin (Mat. 6:24). ¿Niman tejuamej tlenon tikchiuaskiaj?
18. ¿Tlenon noneki tikchiuaskej, niman tleka?
18 Melak kuajli tla nochipa toixtlalojtokej niman ijkon tikitaskej ipampa tlenon totekimiktijtokej. ¿Tleka? Pampa ijkon tikitaskej tla kuajli tijkuitokej tokojtilis. Matikitakan tlen ipan onochiuj Mark. Yejua kijtoua: “Maski yopanoka miyek xiuitl, nochipa oniknemili ika ninemiya san ika tlen noneki. San ika, maski niprecursor katka, nochipa nitlanemilijtinemiya itech tomin niman itech kenon más kuajli ninemis. Nochipa ninotlajtoltiaya tleka xnikpiaya tlen niknekiya. Kuakon, onikasikamat ika melak ninotekimiktijtoya ipampa tlen niknekiya niman ika xnikmakatoya Jehová nochi nokojtilis niman tiempo”. Mark okipatlak ken tlanemiliaya niman okipatlak inemilis. Ijkon ouel más kuajli kitekichiuilia Jehová. Yejua kijtoua: “Kemantika ninotekipachoua. San ika, ok chikauak niktekichiuilijtok toTajtsin pampa yejua niman Jesús nechpaleuiyaj”.
19. ¿Tleka noneki matikitakan totekiyo ken kinamiki?
19 Uelis tiyolseujtoskej ipan yejon tekitl tlen yotechmakak Jesús tla tikchiuaj yeyi tlemach. Kachtopa, matikitakan totekiyo ken kinamiki. Yejon tekitl tlen tikchiuaj itlatki Jehová, ika yejon, noneki tikchiuaskej ken yejua kijtoua. Yejua toTeko niman tejuamej tiitekipanojkauan (Luc. 17:10). Tla tiknekij tikchiuaskej yejuin tekitl ken tejuamej tikijtouaj, melak xkuajli tonkisaskej. Hasta se toro uan melak kojtik uelis nokokos ika yugo niman siauis tla xyauj kampa iteko kuikasneki. San ika, uelis tikchiuaskej miyek tlemach niman tikxikoskej san katlejua tlauejli tla tokauiliaj matechyekana Jehová. Matikilnamikikan ika xakaj uelis kiteltis manochiua tlen Jehová kineki (Rom. 8:31; 1 Juan 4:4).
20. ¿Tleka tiknekij tikchiuaskej yejon tekitl tlen yotechmakak Jesús?
Juan 6:25-27, 51, 60, 66; Filip. 3:18, 19). San ika, nemiyaj oksekimej akin yemelak kitlasojtlayaj toTajtsin niman tlaltikpakchanejkej. Yejuamej okichiujkej intekiyo ika pakilistli ijkuak nemiyaj ipan tlaltikpaktli, niman Jesús okimijli ika ueliskiaj iuan tekitiskej ne iluikak. Tejuamej noijki uelis tiyolpakiskej tla tomamaltiaj iyugo Jesús ijkon ken kinamiki.
20 Ika ome, matitekitikan pampa tiknekij tikueyichiuaskej Jehová. Ipan kachtopa siglo, miyekej onochiujkaj inomachtijkauan Cristo pampa ijkon ueliskiaj itlaj kiseliskej. Pampa ijkon kichiuayaj, sakin onajmankej niman xok okichiujkej yejon tekitl tlen yokinmakakaj (21. Ken kijtoua Mateo 6:31-33, ¿tlenon kichiuas Jehová?
21 Ika yeyi, matitlaneltokatokan. Yotiktlapejpenijkej se nemilistli kampa tikixnamikiskej tlen ouijtika. Jesús otechijli ika techtlaueltokaskiaj. San ika, uelis tikneltokaskej ika Jehová techmakas kojtilistli niman ijkon tikxikoskej maski san katlejua tlauejli. Tla más titlaxikouaj, más tikpiyaskej kojtilistli (Sant. 1:2-4). Noijki uelis tikneltokaskej ika Jehová uelis techmakas tlen techonpolos, ika Jesús techyekanas niman ika tokniuan techyolchikauaskej (xpoua Mateo 6:31-33; Juan 10:14; 1 Tes. 5:11). ¿Tlenon más techpoloua niman ijkon titlaxikoskej?
22. ¿Tlenon noneki matechyolpakti?
22 Yejon siuatsintli akin Jesús okipajti nimantsin oyolseuj ipan yejon tonajli. San ika, tla kinekiya nochipa yolseujtos, nonekiya nochiuas inomachtijkauj Cristo. ¿Tlenon tiknemiliaj okichiuj? Tla yejua okitlapejpeni kinomamaltis iyugo Jesús, kuakon, okiseli se ueyi tlateochiualistli: tekitis iuan Jesús ne iluikak. Xtikmatij tlenon nonekiya kikauas yejuin siuatsintli niman ijkon nochiuas se inomachtijkauj Cristo, san ika, tlen okiseli melak kuajli xijkon ken tlen okikauj. Maski tla tikchiaj tiaskej iluikak noso tinemiskej ipan tlaltikpaktli, tinochimej noneki matechyolpakti ika otijkakej Jesús ijkuak otechijli: “Notech xuajlakan”.
TLAKUIKAJLI 13 Cristo otechmakak neskayotl
^ párr. 5 Jesús techijlia matiknisiuikan. ¿Kenon uelis tikchiuaskej? Yejuin tlamachtijli kinankilis yejuin tlajtoltilistli niman techilnamiktis kenon tiyolseuij ijkuak titekitij iuan Jesús.
^ párr. 1 Mateo 11:28-30: “28 Notech xuajlakan, nochimej akin yonensiaujkej niman nemotekipachouaj, niman nejua nemechyolseuis. 29 Xmomamaltikan noyugo niman notech xuelikan, pampa nejua niyolkuajli niman niyolyemanki, niman nenyolseuiskej. 30 Pampa noyugo yemanki niman xyetik”.
^ párr. 7 Mateo 28:18-20: “18 Jesús ononisiui niman okimijli: ‘Nochi tlanauatijkayotl yonechmakakej ipan iluikak niman ipan tlaltikpaktli. 19 Xuiyan niman xkinmachtikan tlaltikpakchanejkej ipan nochi kalpamej, xkinapolaktikan ipampa itoka toTajtsin niman ipampa teKoneuj niman ipampa espíritu santo, 20 xkinmachtikan makitlakamatikan nochi tlajtlamach tlen yonimechnauati. Niman, ¡xkitakan!, mojmostla nemouan ninemi hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli’”.
^ párr. 62 TLEN NESI IPAN TLAIXKOPINAJLI: Jesús melak kuajli ken oteyolseui.
^ párr. 68 TLEN NESI IPAN TLAIXKOPINAJLI: Se tokniuj nokojtilia kichiuas ken Jesús.