1. ¿Kemanon más ouijtika tikitaj tiktekichiuiliskej Jehová?

¿TEJUA tlenon tiknemilia? ¿Kemanon más ouijtika tikitaj tiktekichiuiliskej Jehová? ¿Ijkuak tikinpiyaj tlaueltin noso ijkuak xtikinpiyaj? Ijkuak tikinpiyaj tlaueltin, nimantsin tiktlajtlaniliaj Jehová matechpaleui. San ika, ¿tlenon tikchiuaj ijkuak kuajli tinemij? ¿Kanaj uelis tikilkauaskej ika melak noneki tiktekichiuiliskej toTajtsin? Jehová okimijli israelitas manotlajpiyakan maka ijkon inpan nochiuaskia (Deut. 6:10-12).

2. ¿Tlenon tiuelij itech tekiuaj Asá?

² Tekiuaj Asá nochipa otlaneltokak itech Jehová. Asá xsan okitekichiuili toTajtsin ijkuak onkatka tlauejli, noijki okitekichiuili ijkuak nochi kuajli onkatka. Desde ijkuak telpochtli katka, yejua “nochipa okitokak [noso okitekichiuili] toTEKO ika nochi iyojlo” (1 Rey. 15:14). Ijkon okiteititi ijkuak okichiuj maka sa manoueyichiuakan tajtsitsintin ipan Judá. Biblia kijtoua ika “okinxoxotonij intlaixpanuan on oksekimej dioses, niman no okinxoxotonij on pipitikej tiopamej kampa kimauistiliayaj ídolos. Okintetlajtlapan on temej yejuan kinmauistiliayaj, niman okintsojtsontek on kojtin yejuan kimpiyayaj ixneskayouan on diosa Asera” (2 Crón. 14:3, 5). Niman hasta okichiuj ika iabuela, Maacá, maka sa makiueyiteneuakan pampa yejua “otlanauatijka ma kichijchiuakan sen ídolo” (1 Rey. 15:11-13).

3. ¿Tlenon tikitaskej pan yejuin tlamachtijli?

³ Asá xsan okichiuj maka sa manoueyichiuakan tajtsitsintin,  noijki okinpaleui akin chantiyaj Judá oksejpa makiueyichiuakan Jehová. ToTajtsin okiteochiuj Asá niman kalpan Judá, okichiuj maka makipiyakan “guerra iuan yakaj”. Ijkuak yejua otekiuajtik, onenkej ika inyojlo majtlaktli xiuitl (2 Crón. 14:1, 4, 6). Ipan yejuin tlamachtijli, kachtopa tikitaskej tlenon okichiuj Asá ipan yejon tonaltin ijkuak xkipiayaj tlauejli. Sakin, tikitaskej tlenon okichiujkej tokniuan akin onenkej ipan kachtopa siglo, akin, ijkon ken Asá, noijki kuajli okikuikej intiempo ijkuak xkipiayaj tlauejli. Niman sa ika tlami, tikitaskej kenon uelis kuajli tijkuiskej totiempo tla kampa tichantij techkauiliaj matikueyichiuakan Jehová.

4. Ken kijtoua 2 Crónicas 14:2, 6, 7, ¿kenon Asá kuajli okikuik itiempo ijkuak xkipiayaj tlauejli?

⁴ (Xpoua 2 Crónicas 14:2, 6, 7). Asá okimijli akin chantiyaj Judá ika Jehová yejua akin yokichiujka maka makipiyakan tlauejli. San ika, xokinemili ika aman xok itlaj nonekiya kichiuas. Yejua opeuj kinchijchiua okseki kalpamej, tepantin, torres niman puertas. Okimijli akin chantiyaj Judá: “In país tejuamej toyaxka”. ¿Tlenon okijtosnek? Ika ueliskiaj kichiuaskej tlen kinekiyaj ipan yejon tlajli tlen toTajtsin yokinmakaka niman ika noijki ueliskiaj kichijchiuaskej tlen kinekiskiaj pampa xakaj kimixnamikiskia. Ika yejon, okinyolchikauj akin chantiyaj Judá kuajli makikuikan yejon tiempo.

5. ¿Tleka Asá okinmiyekili isoldados?

⁵ Asá okikuik yejon tiempo niman ijkon más kinmiyekilis isoldados (2 Crón. 14:8). ¿Ijkon okichiuj pampa xtlaneltokaya itech Jehová? Ka. Yejua kema tlaneltokaya itech Jehová, san ika, pampa yejua tekiuaj katka nonekiya kuajli kitas kenon ikalpan ueliskia kixikos tlen kixnamikiskia ika tlayekapan. Kimatstoya ika ajsiskia se tonajli ijkuak  oniaskia tlauejli ipan Judá. Niman melauak ijkon opanok.

6. ¿Kenon tokniuan akin onenkej ipan kachtopa siglo kuajli okikuikej intiempo ijkuak xkipiayaj tlauejli?

⁶ Maski tokniuan akin onenkej ipan kachtopa siglo miyekpa okintlaueltokakej, kemantika noijki xkipiayaj tlauejli. ¿Tlenon okichiujkej ipan yejon tonaltin? Yejon tokniuan tlakamej niman siuamej más onokojtilijkej tenojnotsaskej itech iTlajtol toTajtsin. Ipan Hechos kijtoua ika yejuamej “kitlakaitayaj on toTEKO” niman, pampa xokikajkaujkej ika tenojnotsaj, más miyekixtiayaj. Kuajli nesi ika Jehová okinteochiuj pampa yejuamej xokikajkaujkej ika tenojnotsaj ijkuak xonkatka tlauejli (Hech. 9:26-31).

7, 8. Xkijto tlenon okichiujkej apóstol Pablo niman oksekimej tokniuan ijkuak xkipiayaj tlauejli.

⁷ Tokniuan akin onenkej ipan kachtopa siglo onokojtilijkej nochipa tenojnotsaskej. San matikonnemilikan yejuin, apóstol Pablo okinek nokauas Éfeso pampa okitak ika ompa miyekej nemiyaj akin ueliskia kinnojnotsas niman kinmachtis (1 Cor. 16:8, 9).

⁸ Pablo niman oksekimej tokniuan okitakej ika ipan xiuitl 49 ueliskiaj kinnojnotsaskej miyekej tlaltikpakchanejkej, ijkuakon apóstoles niman tlayekankej akin nemiyaj Jerusalén yokiyektlalijkaj yejon tlauejli itech circuncisión (Hech. 15:23-29). Sakin ika okimijlikej nochimej tlanechikoltin tlen yonotlapejpenijka nochiuas, tokniuan más onokojtilijkej kiteijliskej “itlajtol toTEKO” (Hech. 15:30-35). ¿Kenon okisato intekiyo? Biblia kijtoua ika tlanechikoltin “noyolchikauayaj ipan intlaneltok niman on tlaneltokakej mojmostla más miyekixtiayaj” (Hech. 16:4, 5).

9. ¿Tlenon tiuelij tikchiuaj ipan miyek países, niman tlenon noneki totlajtoltiskej?

⁹ Ipan yejuin tonaltin, tiuelij titenojnotsaj ipan miyekej países. Tla tichantij kampa techkauiliaj matitenojnotsakan, matotlajtoltikan: “¿Kuajli nijkuitok notiempo?”. Ipan yejuin itlamiyan tonaltin, ikalpan Jehová más miyekan tenojnotstika niman más miyekej kinmachtijtika (Mar. 13:10). ¡Melak techyolpaktia pampa ipan yejuin tonaltin miyek ken tiuelij tiktekichiuiliaj Jehová!

10. ¿Tlenon techijlia matikchiuakan 2 Timoteo 4:2?

¹⁰ Tla tichantij kampa techkauiliaj matikueyichiuakan Jehová, ¿kenon uelis kuajli tijkuiskej totiempo? (Xpoua 2 Timoteo 4:2). Matikitakan kenon más uelis titlapaleuiskej ipan ikalpan Jehová. ¿Uelis más titenojnotsaskej noso tochiuaskej precursores? ¿Yakaj itech tofamilia uelis ijkon kichiuas? Xnoneki tijkuiskej yejuin tiempo niman ijkon totomintiskej noso tiktejtemoskej okseki tlemach, pampa nochi yejuin popoliuis ijkuak yejkos ueyi tlajyouilistli (Prov. 11:4; Mat. 6:31-33; 1 Juan 2:15-17).

11. ¿Tlenon yokichiujkej sekimej tokniuan niman ijkon más miyekej kinnojnotsaskej?

¹¹ Miyekej tokniuan youelkej okse tlajtojli niman ijkon uelis kinnojnotsaskej oksekimej niman kinmachtiskej. Pampa ikalpan toTajtsin kineki techpaleuis más miyekej matikinnojnotsakan, yokinkixti melak miyekej amatlajkuiloltin ika más tlajtoltin. San matikonnemilikan yejuin, ipan 2010 toamatlajkuiloluan okiskej kanaj ipan 500 tlajtoltin. San ika, aman toamatlajkuiloluan notlajtolkuepaj ika más de 1,000 tlajtoltin.

12. ¿Kenon nomachiliaj tlaltikpakchanejkej ijkuak kikakij iTlajtol toTajtsin ika intlajtol? Xkijto se neskayotl.

¹² ¿Kenon nomachiliaj tlaltikpakchanejkej ijkuak kikakij iTlajtol toTajtsin ika intlajtol?  Matitlanemilikan itech yejuin tlen opanok. Se tokniuj siuatl oyajka ne Memphis (Tennessee, Estados Unidos) ipan se ueyi tlanechikojli tlen onopanolti ika itlajtol, tlen itoka kiniaruanda. Yejuin tlajtojli san notekitiltia ipan países ken Ruanda, la República Democrática del Congo niman Uganda. Sakin ika yotlan yejon ueyi tlanechikojli, okijto: “Inikpiya 17 xiuitl nikan Estados Unidos, niman hasta aman kuajli onikasikamat nochi tlen onopanolti”. Kuajli nesi ika oajsik ipan iyojlo tlen onopanolti ipan ueyi tlanechikojli pampa okipanoltijkej ika itlajtol. Tla xitlaj techteltia, ¿tleka xtomajmachtiaj okse tlajtojli niman ijkon más uelis titepaleuiskej? ¿Kanaj oksekimej más kuajli techkakiskej tla tikinnojnotsaj ika intlajtol? Melak titepaleuiskej tla tomajmachtiaj se yenkuik tlajtojli.

13. ¿Kenon tokniuan akin chantij Rusia kuajli okikuikej intiempo ijkuak xkipiayaj tlauejli?

¹³ Sekimej tokniuan xkinkauiliaj matenojnotsakan, pampa ipan seki países tekiuajkej xkitekauiliaj manotenojnotsa. San matontlanemilikan intech tokniuan akin chantij Rusia. Maski melak ouejkauj ika okintlaueltokakej, ipan xiuitl 1991 okinkauilijkej matenojnotsakan. Ipan yejon tonaltin, inemiyaj 16,000 iteixpantijkauan Jehová. 20 xiuitl sakin, inemiyaj más de 160,000 tokniuan. Kuajli nesi ika tokniuan kuajli okikuikej intiempo. Niman maski aman yopeuj kipiyaj tlauejli, yejuamej ok kitekichiuilijtokej Jehová ika pakilistli niman kichiuaj nochi tlen uelij maski kixnamiktokej tlen ouijtika.

14, 15. ¿Kenon Jehová okipaleui Asá?

¹⁴ Oksejpa matitlajtokan itech Asá. Oajsik se tonajli ijkuak akin chantiyaj Judá xok ika inyojlo onenkej, pampa se millón de soldados akin ualeuayaj Etiopía okimixnamikitoj.  Zérah, akin kinyekanaya yejuin soldados, kijtouaya ika kitlaniskia Judá. San ika, Asá tlaneltokaya itech Jehová. Ika yejon, okitlajtlanili: “¡Xtechpaleui toTEKO niman toDios, pampa motech tiktlaliaj toyojlo, niman ikan motokatsin yotiualajkej nikan para tikinmixnamikiskej on miyekej soldados!” (2 Crón. 14:11).

¹⁵ Maski soldados etíopes más miyekej katkaj xijkon ken soldados akin tlaixnamikiyaj ipampa Judá, Asá kimatiya ika Jehová ueliskia kipaleuis ikalpan. Niman Jehová xokikauj. Kema, soldados akin ualeuayaj Etiopía xouel otetlankej (2 Crón. 14:8-13).

16. ¿Kenon tikmatij ika xnochipa ika toyojlo tinemiskej?

¹⁶ Maski xtikmatij tlenon topan nochiuas, kema tikmatstokej ika ajsis se tonajli ijkuak xok ika toyojlo tinemiskej pampa onias tlauejli. Matikilnamikikan ika Jesús okijto ika ipan itlamiyan tonaltin kintlauelitaskiaj nochimej inomachtijkauan (Mat. 24:9). Apóstol Pablo noijki okijto: “Nochimej kintlauelitaskej niman kintlajyoulitiskej on yejuan kinekiskej nouikaskej yolchipajkej itech Cristo Jesús” (2 Tim. 3:12). Satanás melak kualantika, niman xkuajli yeskia tla tiknemiliaj ika xuelis itlaj texchiuilis (Apoc. 12:12).

17. ¿Kanaj kemanon melak nonekis tikteititiskej ika chikauak tikpiyaj totlaneltokil?

¹⁷ Sa achijtsin poliui ijkuak melak nonekis tikteititiskej ika chikauak tikpiyaj totlaneltokil. Xok uejkauis ijkuak peuas se ueyi tlajyouilistli “ken yejuan xkaman onkaj desde ijkuak opeu in tlaltikpaktli” (Mat. 24:21). Ijkuakon, kanaj tochanejkauan peuas techtlauelitaskej niman tekiuajkej xok techkauiliskej matitenojnotsakan (Mat. 10:35, 36). Matotlajtoltikan: “¿Nikchiuas ijkon ken Asá niman nikneltokas ika Jehová nechpaleuis niman ika nechtlajpiyas?”.

18. Itech tlen kijtoua Hebreos 10:38, 39, ¿tlenon techpaleuis matikxikokan tlen uajlauj?

¹⁸ Jehová kineki matikxikokan tlen uajlauj, ika yejon, techpaleuijtika matikchikauakan totlaneltokil. Yejua kitekitiltijtika “tekitketl” yolmelauak niman tlamachilise niman ijkon techmaka tlen techpaleuis matimelajkanemikan (Mat. 24:45). Aman, toseselti noneki tikchikauaskej totlaneltokil itech Jehová (xpoua Hebreos 10:38, 39).

19, 20. Itech tlen kijtoua 1 Crónicas 28:9, ¿tlenon noneki totlajtoltiskej, niman tleka?

 ¹⁹ Ijkon ken okichiuj tekiuaj Asá, tejuamej noneki tokojtiliskej touikaskej iuan Jehová (2 Crón. 14:4; 15:1, 2). Tipeuaj touikaj iuan Jehová ijkuak tikixmatij niman ijkuak toapolaktiaj. Niman aman noneki tokojtilijtoskej más tiktlasojtlaskej Jehová. Tla tiknekij tikmatiskej tla ijkon tikchiujtokej, matotlajtoltikan: “¿Ninokojtilia nias nochi tlanechikoltin?”. Ipan totlanechikoluan techyolchikauaj matiktekichiuilijtokan Jehová niman toyolchikauaj imiuan tokniuan (Mat. 11:28). Noijki uelis totlajtoltiskej: “¿Mojmostla ninomachtia Biblia?”. Tla tichantij imiuan tochanejkauan, ¿san sekan tikueyichiuaj Jehová nochi semanas? Noso, tla san toselti tichantij, ¿tomachtiaj itech Biblia, ijkon ken kichiuaj oksekimej familias? ¿Tokojtiliaj titenojnotsaskej niman titemachtiskej?

²⁰ ¿Tleka noneki totlajtoltiskej yejuin? Biblia kijtoua ika Jehová “kixtlaloua” tlen tiknemiliaj niman tlen onka ipan toyojlo. Ika yejon, tejuamej noijki noneki toixtlaloskej (xpoua 1 Crónicas 28:9). Tla tikitaj ika nonekis tikpatlaskej tlen yotiknemilijkaj tikchiuaskej niman noijki ken titlanemiliaj, matikijlikan Jehová matechpaleui. Noneki desde aman toyektlalijtiaskej niman ijkon tikxikoskej tlen uajlas ika tlayekapan. Ika yejon, tla aman ok techkauiliaj matikueyichiuakan toTajtsin, kuajli matijkuikan totiempo.