1, 2. Itech tlen kijtoua 1 Timoteo 6:20, ¿tlenon nonekiya kichiuas Timoteo?

IJKUAK tikpiyaj itlaj tlen melak patioj, kemantika tikmakaj yakaj okse niman ijkon makitlajpiya. Se neskayotl, kanaj tikonkauaj ipan banco on totomin niman ijkon ompa makejyeuakan niman maka tikpoloskej noso yakaj techixtekilis. Ika yejon, tikmatstokej tlenon kijtosneki tikmakas yakaj itlaj tlen melak patioj.

² (Xpoua 1 Timoteo 6:20). Apóstol Pablo okilnamikti Timoteo ika yokiselijka itlaj tlen melak patioj: yejua yokijlikaj tlen toTajtsin kineki kichiuas inpampa tlaltikpakchanejkej ika tlayekapan. Jehová noijki yokimakaka se kualtsin tekitl, kema, Timoteo nonekiya tenojnotsas niman kiteijlis “on kuajli tlajtojli” (2 Tim. 4:2, 5). Pablo okijli Timoteo ika nonekiya kitlajpiyas nochi on tlen yokimakakaj. Ijkon ken Timoteo, tejuamej noijki yotechmakakej miyek tlemach tlen melak patioj. ¿Tlenon yotechmakakej? ¿Niman tleka noneki tiktlajpiyaskej tlen Jehová yotechmakak?

3, 4. ¿Tleka tikijtouaj ika melak ueyi kijtosneki on tlen temachtia Biblia?

³ Maski xtechnamiki, Jehová yotechititi tlen melauak temachtia iTlajtol, Biblia. Nochi yejuin tlen yotechititi melak ueyi kijtosneki pampa aman itikmatstokej kenon uelis iuan touikaskej niman kenon yemelak tiyolpakiskej. Ijkuak tikasikamatij nochi tlen temachtia toTajtsin niman tikchiuaj ipan tonemilis, xok tikneltokaj niman xok tikchiuaj tlen temachtiaj tlaneltokiltin tlen xmelajkej, niman noijki tichipaujkanemij (1 Cor. 6:9-11).

⁴ Noijki, tlen toTajtsin techmachtia ipan iTlajtol melak ueyi kijtosneki pampa yejua xnochimej kimititia, san kimititia akin yolyemankej niman akin kinektokej kitlakamatiskej (Hech. 13:48). Yejuin tlaltikpakchanejkej kimatstokej ika toTajtsin kitekitiltia on “tekitketl” yolmelauak niman tlamachilise niman ijkon  techmachtis (Mat. 11:25; 24:45). San toselti xuelis tikixmatiskej on tlen melauak temachtia Biblia. Ika yejon, ijkuak tikasikamatij iTlajtol toTajtsin, kentla tikseliskiaj se kualtsin tetlayokolijli (Prov. 3:13, 15).

5. ¿Tlenon noijki yotechmakak Jehová?

⁵ Jehová noijki yotechmakak se kualtsin tekitl: yotechnauatij matikteijlikan tlen yejua kineki kichiuas ika tlayekapan niman matikinpaleuikan oksekimej makixmatikan (Mat. 24:14). Tlen tikteijliaj melak ueyi kijtosneki pampa kinpaleuiya miyekej manonisiuikan itech ikalpan Jehová niman mauelikan makipiyakan se nemilistli tlen xkeman tlamis (1 Tim. 4:16). Tla tokojtilijtokej titenojnotsaskej, titlapaleuijtokej ipan yejuin tekitl tlen melak ueyi kijtosneki ipan yejuin tonaltin (1 Tim. 2:3, 4). ¡Melak kualtsin pampa tiuelij titekitij iuan toTajtsin! (1 Cor. 3:9).

6. ¿Tlenon inpan onochiuj sekimej tokniuan akin xok okipatiojkaitakej intekiyo?

⁶ Ipan itonaluan Timoteo, sekimej tokniuan xokipatiojkaitakej intekiyo tlen kichiuayaj ipampa toTajtsin. San matikonnemilikan yejuin, Demas “más okeleuij tlen onkaj ipan in tlaltikpaktli”, ipampa yejon, okitlalkaui Pablo (2 Tim. 4:10). Figelo niman Hermógenes okikajkaujkej ika tenojnotsaj pampa nesi ika kinmojtiaya makintlaueltokakan ijkon ken Pablo okitlaueltokakej (2 Tim. 1:15). Himeneo, Alejandro niman Fileto opeuj temachtiaj tlen xmelauak niman okikaujkej ikalpan toTajtsin (1 Tim. 1:19, 20; 2 Tim. 2:16-18). Nesi ika nochimej yejuamej chikauak kipiayaj intlaneltokil, san ika, xnochipa okipatiojkaitakej on tlen más ueyi kijtosneki.

7. ¿Tlenon kichiua Satanás niman ijkon maka sa matikpatiojkaitakan tlen Jehová yotechmakak?

⁷ ¿Tlenon kichiua Satanás niman ijkon maka sa matikpatiojkaitakan tlen Jehová yotechmakak? San seki matikinteneuakan. Yejua kitekitiltia tlen ika noyolpaktilo niman tlen uajnesi ipan televisión noso Internet niman ijkon techkajkayauas, yejua kineki matitlanemilikan niman matikchiuakan tlen xkuajli. Niman noijki kintekitiltia oksekimej tlaltikpakchanejkej niman ijkon kichiuas matomojtikan niman matijkajkauakan ika titenojnotsaj. Niman noijki kineki matijkakikan on tlen kiteijliaj akin temachtiaj tlen xmelauak itech ikalpan Jehová niman ijkon matijkauakan tlen melauak (1 Tim. 6:20, 21).

8. ¿Tlenon tiuelij itech tlen ipan onochiuj Daniel?

⁸ Tla xtotlajpiyaj, ika yolik uelis tijkauaskej tlen melauak. Matikitakan tlen ipan onochiuj Daniel, * akin melak kuelitaya nauiltis videojuegos. Yejua kijtoua: “Opeuj ninauiltia  videojuegos ijkuak nikpiaya kanaj majtlaktli xiuitl. Kachtopa, ninauiltiaya ika videojuegos tlen xteijtlakouaj. San ika, ika yolik opeuj ninauiltia ika videojuegos kampa nochiuaya tlen xkuajli niman kipiayaj naualyotl”. Oajsik se tiempo ijkuak mojmostla nauiltiaya más de 15 horas. Daniel noijki kijtoua: “Nejua nikmatstoya ika yejuin videojuegos kichiujtoyaj maniktlalkaui Jehová, melak miyek tiempo ninauiltiaya. San ika, noijki opeuj nikmachilia ika tlen Biblia kijtoua xnechpaleuiskia”. Tlen miyekej ika noyolpaktiaj uelis kichiuas matijkauakan tlen melauak. Tla ijkon topan nochiuaskia, uelis tikpoloskej nochi tlen Jehová yotechmakak.

9. Itech tlen kijtoua 1 Timoteo 1:18, 19, ¿tlenon okijto Pablo itech Timoteo?

⁹ (Xpoua 1 Timoteo 1:18, 19). Pablo okijto ika Timoteo yeskia kentla “sen kuajli soldado” niman okijli manokojtilijto kuajli makichiua itekiyo. Pablo xtlajtotoya itech se guerra kampa nonekiya nouisokis imiuan oksekimej soldados. ¿Tleka noijtoua ika akin tiktekichiuiliaj Cristo tiyeskiaj kentla soldados akin nemij ipan se guerra? ¿Tlenon techpaleuis matochiuakan kuajli soldados? Tlen okijto Pablo techmachtia makuijli tlemach tlen noneki tikchiuaskej niman ijkon xkeman tijkauaskej tlen melauak. Matikimitakan.

10. ¿Tleka noneki matokojtilikan tiktlasojtlaskej toTajtsin niman nochipa tiktekichiuiliskej?

¹⁰ Matokojtilikan tiktlasojtlaskej toTajtsin niman nochipa matiktekichiuilikan. Se kuajli soldado xkeman kikaua iteko. Nokojtilia kitlajpiyas akin kitlasojtla noso tlen yejua kipatiojkaita. Pablo okijli Timoteo manokojtili nochipa kitlasojtlas toTajtsin niman nochipa makitekichiuili (1 Tim. 4:7). Tla tejuamej noijki ijkon tikchiuaj, xkeman tiknekiskej tijkauaskej on tlen melauak (1 Tim. 4:8-10; 6:6).

11. ¿Tleka kipiya ika tokojtiliskej tikchiuaskej tlen noneki?

¹¹ Matokojtilikan tikchiuaskej tlen noneki. Se soldado kipiya ika nokojtilis kichiuas tlen noneki niman ijkon kuajli kichiuas itekiyo. Timoteo kuajli okichiuj itekiyo ken isoldado Cristo pampa okitlakamat tlen Pablo okijli, kema, yejua okintlalkaui on xkuajkualtin ileuilistin, onoyekan ken noneki niman nochipa onosentlali imiuan oksekimej inomachtijkauan Cristo (2 Tim. 2:22). Timoteo ononek nokojtilis kichiuas tlen noneki niman ijkon kitlakamatis toTajtsin. Niman tejuamej noijki noneki tokojtiliskej ijkon tikchiuaskej tla xtiknekij tiuetsiskej ipan tlajtlakojli (Rom. 7:21-25). Noijki, kipiya ika tokojtiliskej tikchiuaskej tlen noneki niman ijkon tijkajkauaskej tlen tikchiuayaj yeuejkaui niman tikpatlaskej tonemilis (Efes. 4:22, 24). Niman ijkuak tisiaujtoskej, kanaj nonekis melak tokojtiliskej niman ijkon tiaskej totlanechikol (Heb. 10:24, 25).

12. ¿Tlenon techpaleuis más kuajli matitemachtikan itech Biblia?

¹² Tla se soldado kineki kuajli kikuis tlen ika tlauisoki, noneki miyekpa nomajmachtis. Noijki ijkon, akin tiktekichiuiliaj Cristo noneki tikmatiskej kenon kuajli tijkuiskej iTlajtol toTajtsin (2 Tim. 2:15). Ipan totlanechikoluan techmachtiaj kenon uelis tijkuiskej. San ika, tla tiknekij ika oksekimej makitakan ika melak tepaleui iTlajtol toTajtsin, noneki tejuamej tokojtiliskej toselti tomachtiskej Biblia. Noneki tikchikauaskej totlaneltokil ika tlen techijlia iTlajtol toTajtsin. San ika, xsan noneki tikamapouaskej. Noneki titlanemiliskej itech tlen tikamapouaj niman tiktejtemoskej tlenon kijtouaj toamatlajkuiloluan itech yejon tlaxeloltin niman ijkon uelis tikimasikamatiskej niman tikmatiskej kenon tikintetomiliskej (1 Tim. 4:13-15). Tla ijkon tikchiuaj, nochipa kuajli titemachtiskej ika Biblia. Yemelak, xsan noneki tikinpouiliskej se tlaxelojli itech Biblia. Tiknekij tikinpaleuiskej makasikamatikan niman makitakan  kenon uelis kinpaleuis ipan innemilis. Kuakon, tla nochipa tokojtiliaj toselti tomachtiskej, más kuajli titemachtiskej (2 Tim. 3:16, 17).

13. Ijkon ken kijtoua Hebreos 5:14, ¿tleka noneki matikasikamatikan tlenon kuajli niman tlenon xkuajli?

¹³ Matikasikamatikan tlenon kuajli niman tlenon xkuajli. Se soldado noneki kasikamatis kemanon uelis kixnamikis itlaj tlen xkuajli niman ijkon uelis nejkuanis. Tejuamej noijki noneki tikasikamatiskej ijkuak itlaj uelis techijtlakos niman ijkon uelis tikmapeuaskej (Prov. 22:3; xpoua Hebreos 5:14). Se neskayotl, noneki kuajli tiktlapejpeniskej tlenon ika toyolpaktiskej. Miyekpa, tlen uajnesi ipan televisión niman películas kipiya tlen tsokuiltik. Akin tikchiuaj ken Cristo xtoyolpaktiaj ika yejuin, pampa tikmatij ika uelis kichiuas matiktlalkauijtiakan Jehová. Tikmatstokej ika toTajtsin kitlauelita auilnemilistli niman ika, akin auilnemij, san no yejuamej notlajyouiltiaj niman noijki kintlajyouiltiaj oksekimej (Efes. 5:5, 6).

14. ¿Kenon okipaleui Daniel pampa okasikamat tlenon kuajli niman tlenon xkuajli?

¹⁴ Daniel, akin otikteneujkej ipan párrafo 8, opeuj kita ika xkuajli katka pampa noyolpaktijtoya ika videojuegos kampa nochiuaya tlen xkuajli niman tlen kipiayaj naualyotl. Okitejtemo ipan Watchtower Library tlen ueliskia kipaleuis makinkajkaua yejon videojuegos. ¿Kenon okipaleui yejuin? Yejua okinkajkauj yejon videojuegos tlen kijtlakojtoyaj, okis itech yejon páginas ipan Internet kampa nauiltiaya niman okintlalkaui iamigos akin imiuan nauiltiaya. Yejua kijtoua: “Onikajkauj ika ninauiltia videojuegos, xok san nikaltsauktoya, aman más opeuj ninosentlalia imiuan tokniuan akin nemij ipan tlanechikojli”. Aman, Daniel precursor niman tlayekanketl.

15. ¿Tleka uelis techijtlakos tlen kiteijliaj akin kitlajtolchijchiuiliaj ikalpan Jehová?

¹⁵ Ijkon ken Timoteo, tejuamej noijki noneki tikasikamatiskej ika uelis techijtlakos tlen kiteijliaj akin kitlajtolchijchiuiliaj ikalpan Jehová (1 Tim. 4:1, 7; 2 Tim. 2:16). San matikonnemilikan yejuin, kanaj yejuamej kinekiskej kiteijliskej tlen xmelauak intech tokniuan noso kanaj kinekiskej kichiuaskej maka sa matitlaneltokakan itech ikalpan Jehová. Tlen yejuamej kijtouaj uelis kijtlakos totlaneltokil. Maka matokauilikan matechkajkayauakan, pampa nochi tlen yejuamej kijtouaj ualeua itech “tlakamej yejuan ijtlakauki intlamachilis niman xkimatij on tlen melauak” niman san kinekij nokualaniskej  imiuan oksekimej (1 Tim. 6:4, 5). Yejuamej kinekij matikinneltokakan niman maka sa matitlaneltokakan intech tokniuan.

16. ¿Tlenon noneki tikchiuaskej niman ijkon kuajli tiktekichiuiliskej Jehová?

¹⁶ Kuajli matiktekichiuilijtokan Jehová. Ijkon “ken se kuajli soldado itech JesuCristo”, Timoteo nonekiya chikauak tenojnotstos niman xkikauilis ika tomin noso okseki tlemach makitsakuilikan ipan itekiyo (2 Tim. 2:3, 4). Ijkon ken yejua, maka matiknekikan tikpiyaskej miyek tlemach, pampa yejon uelis techtsakuilis ipan itekiyo toTajtsin. Tla melak tiktejtemouaj kenon totomintiskej, uelis kichiuas maka sa matiktlasojtlakan Jehová, maka sa matikpatiojkaitakan iTlajtol niman kanaj xok tiknekiskej titenojnotsaskej (Mat. 13:22). Noneki tinemiskej san ika achijtsin niman tijkuiskej totiempo niman tochikaualis niman ijkon tikchiuaskej tlen toTajtsin kineki (Mat. 6:22-25, 33).

17, 18. ¿Tlenon uelis tikchiuaskej niman ijkon maka itlaj kijtlakos totlaneltokil?

¹⁷ Matiknemilijtiakan tlenon tikchiuaskej. Se soldado noneki kuajli kinemilis tlenon kichiuas ijkuak kixnamikiskej. Tla tiknekij tiktlajpiyaskej tlen toTajtsin yotechmakak, noneki nimantsin itlaj tikchiuaskej ijkuak tikitaskej ika itlaj uelis techijtlakos. ¿Tlenon techpaleuis ijkon matikchiuakan? Tla tiknemilijtiuej tlenon tikchiuaskej ijkuak itlaj tikixnamikiskej.

¹⁸ San matikonnemilikan yejuin, ijkuak yakaj kineki kitsontekis se kojtli tlen melak ueyi, kachtopa kita kanon uelis notlalojtikisas. ¿Tleka? Pampa ijkuak uajuetsis on kojtli, yejua ikimatstos kanon notlalojtikisas. Noijki ijkon, tejuamej noneki tiknemilijtiaskej tlenon tikchiuaskej tla ipan televisión, Internet noso ipan se película uajnestiuetsi tlen xkuajli noso tlen tsokuiltik, noso tla ompa peua noijtoua tlen xmelauak itech ikalpan toTajtsin. Yejua ika, tla kuajli tiknemiliaj tlenon tikchiuaskej ijkuak ijkon panos, xtijkauiliskej ika itlaj makijtlako totlaneltokil niman tichipaujkanemiskej ixpan Jehová (Sal. 101:3; 1 Tim. 4:12).

19. ¿Kenon techpaleuis tla tiktlajpiyaj tlen toTajtsin yotechmakak?

¹⁹ Jehová yotechkauili matikixmatikan tlen melauak niman matikimititikan oksekimej. Yejuin se kualtsin tetlayokolijli tlen techmaka Jehová. Akin tikchiuaj ken Cristo noneki tiktlajpiyaskej tlen toTajtsin yotechmakak. Tla ijkon tikchiuaj, kuajli tomachiliskej niman tiyolpakiskej pampa tikinpaleuiyaj oksekimej makixmatikan Jehová. Niman yejua techpaleuis kuajli matiktlajpiyakan tlen yotechmakak (1 Tim. 6:12, 19).