1, 2. ¿Kenon Eclesiastés 11:6 techpaleuiya matikasikamatikan ika noneki titenojnotstoskej?

IPAN seki países melak kuelitaj kikakiskej iTlajtol toTajtsin. Miyekej tlaltikpakchanejkej sa kichiatokej makinnojnotsakan. San ika, ipan okseki países miyekej xmás kuelitaj tlajtoskej itech toTajtsin noso itech Biblia. Maski tla kuajli techkakij noso xtechkakij kampa titenojnotsaj, Jehová kineki matitenojnotstokan hasta ijkuak yejua kijtos ika xok nonekis tikchiuaskej yejuin tekitl.

² Jehová yokitlali se tonajli ijkuak xok nonekis titenojnotsaskej niman ijkuak kipopolos nochi tlen xkuajli ipan yejuin tlaltikpaktli (Mat. 24:14, TNM; Mat. 24:36). ¿Tlenon uelis tikchiuaskej niman ijkon titenojnotstoskej hasta ijkuak Jehová kijtos ika xok nonekis? (Xpoua Eclesiastés 11:6).

3. ¿Tlenon tikitaskej ipan yejuin tlamachtijli?

³ Ipan tlamachtijli tlen youajpanok, otikitakej naui tlemach tlen techpaleuis kuajli matitenojnotsakan (Mat. 4:19). Ipan yejuin tlamachtijli, tikitaskej yeyi tlemach tlen techpaleuis nochipa matiknektokan titenojnotsaskej maski tikixnamikiskej tlen ouijtika. Tikitaskej tleka melak noneki maka itlaj matijkauilikan makitelti totenojnotsalis, tleka xnoneki tosiaujkauaskej niman tleka noneki tikchikauaskej totlaneltokil.

4. ¿Tleka noneki totlajpiyaskej maka itlaj kiteltis totenojnotsalis?

⁴ Jesús okijto tlenon panoskia ipan itlamiyan tonaltin niman kenon yeskiaj tlaltikpakchanejkej. Noijki okijto ika tlen panotoskia ueliskia kichiuas ika inomachtijkauan makiteltikan intenojnotsalis. Ika yejon, okimijli: “Xtlachixtiakan” (Mat. 24:42). Ijkuak nemiya Noé, onkatka miyek tlemach tlen kichiuaya ika tlaltikpakchanejkej maka makikakikan tlen Noé kimijliaya.  Ipan yejuin tonaltin, noijki onka miyek tlemach tlen uelis kichiuas maka kuajli matiktekichiuilikan Jehová (Mat. 24:37-39; 2 Ped. 2:5). Ika yejon, noneki totlajpiyaskej maka itlaj kiteltis totenojnotsalis.

5. Ijkon ken kijtoua Hechos 1:6-8, ¿hasta kanon notenojnotsaskia?

⁵ Ipan yejuin tonaltin, noneki chikauak matitenojnotsakan itech iTekiuajyo toTajtsin. Jesús okijto ika nochiuiyan notenojnotsaskia niman ika yejuin nochiujtoskia maski yejua mikiskia (Juan 14:12). Ijkuak Jesús yomijka, sekimej inomachtijkauan oksejpa opeuj tekitij ken michajsikej. Sakin ika oyoliuj, Jesús okichiuj se milagro niman ijkon sekimej inomachtijkauan makimajsikan miyekej michimej. Niman sakin ika okichiuj yejon milagro, Jesús okimititi inomachtijkauan ika más ueyi kijtosnekiya matenojnotsakan (Juan 21:15-17). Achto nokuepaskia iluikak, okimijli inomachtijkauan ika xsan notenojnotsaskia ipan kalpan Israel (xpoua Hechos 1:6-8). Sakin, Jesús okititi apóstol Juan ipan se tlatlachalistli tlenon panoskia ijkuak yejkoskia itonal toTeko. * Juan okitak itlaj tlen melak temojkatlachialti: okitak ika itechkopa iluikaktekitkej, nochiuiyan noteijliaya “on kuajli tlajtojli”, kinnojnotsayaj tlaltikpakchanejkej “de nochi tribus, de nochi raza, de nochi kech sesekneka tlajtoltin, niman nochi países” (Apoc. 1:10, TNM; Apoc. 14:6). Kuajli nesi ika Jehová kineki chikauak matitenojnotsakan hasta ijkuak yejua kijtos ika xok nonekis.

6. ¿Tlenon techpaleuis maka keman matijkajkauakan ika titenojnotsaj?

⁶ Tla xtiknekij itlaj makitelti totenojnotsalis, noneki titlanemiliskej itech nochi tlen Jehová kichiujtika topampa niman ijkon techpaleuis. San matikonnemilikan yejuin, yejua melak miyek tlen techmaka niman ijkon machikaujto totlaneltokil: techinmaka amatlajkuiloltin, grabaciones ika audio  niman video, niman tlamachtiltin ipan JW Broadcasting. Niman página tlen tikpiyaj ipan Internet yonotlajtolkuep ipantsin mil tlajtoltin (Mat. 24:45-47). Maski aman tlaltikpakchanejkej xexeliujtokej ipampa política, religión niman ipampa tomin, on ipantsin 8 millones iteixpantijkauan Jehová san sekan nemij. Ipan tonajli viernes 19 de abril de 2019, nochimej akin tiiteixpantijkauan Jehová otikitakej se video kampa onotetomili yejon tlaxelojli itech Biblia tlen uajnestiaya ipan amatlajkuilojli Mojmostla matomachtikan iTlajtol toTajtsin. Yejon yeuajli onosentlalijkej 20,919,041 tlaltikpakchanejkej niman ijkon okilnamijkej imikilis Jesús. Nochi yejuin tlen aman nochiujtika techyolchikaua maka keman matijkajkauakan ika titenojnotsaj.

7. ¿Kenon techpaleuiya tlen okichiuj Jesús maka matijkajkauakan ika titenojnotsaj?

⁷ ¿Tlenon noijki techpaleuis maka keman matijkajkauakan ika titenojnotsaj? Tla tikchiuaj ijkon ken Jesús. Yejua xokikauili itlaj makitelti itenojnotsalis (Juan 18:37). Yejua xokichiuj tlen Satanás okijli ijkuak okitekiuilti “nochi on países yejuan onkaj ipan in tlaltikpaktli niman on miyek ueyilistli yejuan kipiyaj”, nion xokinek makitlalikan ken tekiuaj (Mat. 4:8, 9; Juan 6:15). Yejua xokinek notomintis niman xnomojtiaya maski oksekimej kitlauelitayaj (Luc. 9:58; Juan 8:59). Ijkuak tikixnamikiskej tlen ouijtika, matikilnamikikan tlen apóstol Pablo okijto. Yejua okimijli nochimej akin kichiuaj ken Cristo: “Xtlanemilikan itech Jesús, [...] para maka nensiauiskej nion nenkipoloskej nemoyoleualis” (Heb. 12:3).

8. ¿Tleka xnoneki nimantsin tosiaujkauaskej?

⁸ Maski san tlenon tikchiaj manochiua ika tlayekapan, xnoneki tosiaujkauaskej. Kanaj tejuamej tiknekij matlantiuetsi tlen tikixnamiktokej noso manochiua tlen yeuejkaui tikchiatokej. Teotlajtoketl Habacuc kinekiya matlantiuetsi nochi tlen xkuajli nochiuaya ipan Judá (Hab. 1:2). Inomachtijkauan Jesús kinemiliayaj ika iTekiuajyo toTajtsin nimantsin peuaskia tlayekanas niman ika kinmakixtiskia itech romanos (Luc. 19:11). Niman tejuamej tikchiatokej yejon tonajli ijkuak iTekiuajyo toTajtsin kikixtis nochi tlen xkuajli niman ijkuak nochiuas tlen melajki (2 Ped. 3:13). Kuakon, xnoneki tosiaujkauaskej, yej noneki tikchiaskej yejon tonajli ijkuak Jehová kichiuas tlen yokijto. Matikitakan kenon Jehová techititia maka matosiaujkauakan.

9. ¿Tlenon techititia ika Jehová xnimantsin nosiaujkaua?

⁹ Jehová kuajli kiteititia ika xnosiaujkaua. Okimakak Noé miyek tiempo niman ijkon makichijchiua se akajli niman matenojnotsa (2 Ped. 2:5; 1 Ped. 3:20). Jehová kuajli okikak Abrahán ijkuak yejua miyekpa okitlajtolti tla melauak kichiuaskia tlen yokijtoka kinchiuilis akin chantiyaj Sodoma niman Gomorra (Gén. 18:20-33). ToTajtsin noijki uejkaujtipan okimijyoui israelitas akin xtetlakamatiyaj (Neh. 9:30, 31). Ipan yejuin tonajli, Jehová noijki kiteititia ika xnimantsin nosiaujkaua pampa kinkauilijtika nochimej tlaltikpakchanejkej manoyolkuepakan niman ijkon iuan manouikakan (Juan 6:44; 1 Tim. 2:3, 4; 2 Ped. 3:9). Tlen kichiua Jehová techititia ika xnoneki tosiaujkauaskej ijkuak tikinnojnotsaskej niman tikinmachtiskej oksekimej. Ipan iTlajtol onka se neskayotl tlen techititia ika xnoneki tosiaujkauaskej. Matikitakan.

10. ¿Tlenon tiuelij itech se tokaketl akin noteneua ipan Santiago 5:7, 8?

¹⁰ (Xpoua Santiago 5:7, 8). Ijkon ken “sen tokaketl”, tejuamej xnoneki nimantsin tosiaujkauaskej. Melauak, seki tlen notoka nimantsin noskaltia, san ika, okseki más uejkauij,  ken yejon plantas tlen kipiyaj intlakilyo. Ne Israel, akin tokaya nonekiya tlamachias chikuasen metstli niman ijkon uelis pixkas. Israelitas tokayaj itlajkotian octubre, ijkuak peuaya kiyauiya, niman pixkayaj itlajkotian abril, sakin ika yopanoka ika kiyauiya (Mar. 4:28). Tla titlamachilisejkej, xnimantsin tosiaujkauaskej, ijkon ken se tokaketl. San ika, kanaj ouijtika tikitaskej tikchiuaskej yejuin.

11. ¿Tlenon panos tla xnimantsin tosiaujkauaj?

¹¹ Pampa titlajtlakolejkej, tejuamej tiknekij nimantsin manesi tlen tikchiuaj. San ika, tla se tokaketl kineki matlaki tlen kitoka, noneki kichiuas miyek tlemach: tlachkuas, tokas, kikixtis xkuajli xiujtli niman tlaatekis. Tejuamej akin titenojnotsaj noijki noneki tikchiuaskej miyek tlemach. Noneki tokojtiliskej niman ijkon tikinpaleuiskej akin tikinmachtiaj maka matechikoitakan, yej matetlasojtlakan. Tla xnimantsin tosiaujkauaj, xtajmanaskej ijkuak xkinekiskej techkakiskej akin tikinnojnotsaj. Noijki xnoneki tosiaujkauaskej ijkuak akin tikinmachtiaj itech Biblia xnimantsin kichiuaj tlen kijtoua Biblia. Kemantika, hasta inomachtijkauan Jesús xnimantsin okasikamatkej tlen kinmachtiaya (Juan 14:9). Matikilnamikikan ika tejuamej san tiktokaj on xinachtli niman tikatekiyaj, san ika, toTajtsin yejua kiskaltia (1 Cor. 3:6).

12. ¿Kenon tikteititiaj ika xtosiaujkauaj ijkuak tikinpaleuiyaj tochanejkauan makixmatikan Jehová?

¹² Ijkuak tikinpaleuiyaj tochanejkauan makixmatikan Jehová, kanaj tosiaujkauasnekij. Eclesiastés 3:1, 7 uelis techpaleuis, ompa kijtoua: “Kipiya [...] kamanon se xnauatis, niman kamanon se tlajtos”. Melauak, tochanejkauan kanaj kinekiskej matikinnojnotsakan itech Jehová tla kitaj kenon kuajli tinemij. San ika, nochipa matikitakan kemanon uelis tikinnojnotsaskej itech Biblia (1 Ped. 3:1, 2). Tiyolpakij ijkuak titenojnotsaj niman titemachtiaj, san ika, xtosiaujkauaj ika  tikinnojnotsaj tlaltikpakchanejkej niman noijki tochanejkauan.

13, 14. Xkinteneua sekimej itekipanojkauan Jehová akin xonosiaujkaujkej.

¹³ Yeuejkaui onenkej sekimej itekipanojkauan Jehová akin xonosiaujkaujkej, niman, ipan yejuin tonaltin, noijki nemij tokniuan akin xnosiaujkauaj. Habacuc xok kixikouaya kitas tlen xkuajli, san ika, okijto ika tlamachixtoskia (Hab. 2:1). Apóstol Pablo okijto ika ikinekiya tlamis yejon tekitl tlen okimakakaj. Maski ijkon, yejua nochipa onokojtili tenojnotsas niman xonosiaujkauj (Hech. 20:24).

¹⁴ Matikitakan tlenon inpan onochiuj se tokniuj iuan isiuauj akin okiselijkej iTlamachtil Galaad. Yejuamej okintitlankej matenojnotsatij ipan se país kampa xmás miyekej nemij tokniuan niman kampa xmás tlaneltokaj itech Cristo. Melak achijtsitsintin okinejkej makinmachtikan. San ika, akin imiuan okiselijkaj iTlamachtil Galaad niman nemiyaj ipan okseki países kimijliayaj kenon melak miyekej yokinpaleuijkej manoapolaktikan. San ika, yejuin tokniuan xonosiaujkaujkej maski xmiyekej kinekiyaj kinkakiskej. Tokniuan yotenojnotskaj chikueyi xiuitl niman nesiya ika xakaj kinekiya nomachtis, san ika, melak oyolpakej ijkuak se akin kimachtiayaj onochiuj iteixpantijkauj Jehová. ¿Tlenon tiuelij intech itekipanojkauan Jehová akin onenkej yeuejkaui niman intech yejuin tokniuan? Yejuamej xokikajkaujkej ika tenojnotsaj niman xonosiaujkaujkej. Jehová okinteochiuj pampa ijkon okichiujkej. Ika yejon, matikchiuakan ken itekipanojkauan toTajtsin akin chikauak intlaneltokil niman xnosiaujkauaj (Heb. 6:10-12).

15. ¿Tleka tikijtouaj ika, tla chikauak totlaneltokil, xtijkajkauaskej ika titenojnotsaskej?

¹⁵ Pampa tikneltokaj tlen tikteijliaj, melak tiknekij nochimej tikinnojnotsaskej. Tikneltokaj ika yemelak nochiuas tlen toTajtsin yokijto ipan iTlajtol (Sal. 119:42; Is. 40:8). Yotikitakej ika inochiujtokej seki teotlajtoltin tlen uajnestiuej ipan Biblia. Noijki yotikitakej kenon Biblia yokinpaleui miyekej tlaltikpakchanejkej más kuajli manemikan. Nochi yejuin techititia ika melak noneki matitenojnotsakan itech iTekiuajyo toTajtsin.

16. ¿Kenon Salmo 46:1-3 techpaleuiya matikasikamatikan ika, tla titlaneltokaj itech Jehová niman Jesús, xkeman tijkajkauaskej ika titenojnotsaskej?

¹⁶ Noijki titlaneltokaj itech Jehová, akin itech ualeua tlen tikteijliaj ijkuak titenojnotsaj, niman noijki titlaneltokaj itech Jesús, akin Jehová yokitlali ken Tekiuaj itech Tekiuajyotl (Juan 14:1). Maski san tlenon panos, Jehová nochipa techpaleuis niman techkojtilis (xpoua Salmo 46:1-3). Noijki, kuajli tikmatstokej ika Jesús kuajyekantok tenojnotsalistli desde ne iluikak ika on kojtilistli niman “tekiuajyotl” tlen Jehová yokimakak (Mat. 28:18-20).

17. Xkijto itlaj tlen makiteititi ika xnoneki tijkajkauaskej ika titenojnotsaj.

¹⁷ Pampa titlaneltokaj, kuajli tikmatstokej ika Jehová techteochiuas ipampa tlen tikchiuaj, kemantika yejua techteochiua ken nion xtikchiayaj (Ecl. 11:6). San matikonnemilikan yejuin, mojmostla melak miyekej tlaltikpakchanejkej panouaj kampa onkatij carritos niman mesas tlen kinpiyaj toamatlajkuiloluan. ¿Tepaleui ika ijkin titenojnotsaj? Kema. Amatlajkuilojli Nuestro Ministerio del Reino de noviembre de 2014 otlajto itech se ichpochtli akin nomachtia ipan universidad niman okinek tlajtos itech iteixpantijkauan Jehová. Yejuin ichpochtli xouel okinexti se Kajli kampa tosentlaliaj, san ika, okitak ika tokniuan okitlalijkaj ipan iescuela se mesa kampa onkatkaj toamatlajkuiloluan. Ijkon okinexti tlen kinekiya kijkuilos itech iteixpantijkauan Jehová.  Sakin, yejua onoapolakti niman aman precursora regular. Nochi yejuin, techyolchikaua más matitenojnotsakan pampa tikitaj ika ok nemij akin kinekij kimatiskej itech iTekiuajyo toTajtsin.

18. ¿Tleka kuajli tikmatstokej ika totenojnotsalis tlamis ijkuak Jehová yokijto?

¹⁸ Kuajli tikmatstokej ika totenojnotsalis tlamis ijkuak Jehová yokijto. Matitlanemilikan itech tlen opanok ijkuak nemiya Noé. Jehová okiteititi ika kichiua tlen kijtoua ijkuak noneki. Yejua okijto ika kichiuaskia mapano se Apachiuilistli ijkuak ok poliuiya kanaj 120 xiuitl ika xikichiuaya yejuin. Miyek xiujtin sakin, yejua okijli Noé makichijchiua se akajli. Noé ouejkauj ika kichijchiua yejon akajli kanaj 40 noso 50 xiuitl. Maski miyekej xkeman okinejkej kikakiskej, yejua nochipa okimijli tlenon panoskia. Ijkon okichiuj hasta ijkuak Jehová okijto ika yolkamej inonekiya kalakiskej ijtik akajli. Niman, sakin, Jehová okitsauk “itsakuijlou on akajli” ijkuak okitak ika inonekiya (Gén. 6:3; 7:1, 2, 16).

19. ¿Tlenon uelis tikchiaskej tla xtijkajkauaj ika titenojnotsaj?

¹⁹ Sa achijtsin poliui ijkuak Jehová kijtos ika xok nonekis titenojnotsaskej. Niman sakin kichiuas maka sa matlayekana Satanás ipan yejuin tlaltikpaktli, ijkon san nemiskej ipan tlaltikpaktli akin kitlakamatij toTajtsin. Chika xiyejko yejon tonajli, matikchiujtokan ijkon ken Noé, Habacuc niman oksekimej itekipanojkauan toTajtsin akin nochipa okitekichiuilijkej Jehová. Maka matijkauilikan itlaj makitelti totenojnotsalis, maka keman matosiaujkauakan niman matikchikauakan totlaneltokil itech Jehová niman itech tlen yokijto kichiuas.