TLAMACHTIJLI 39
Ijkuak yakaj akin tiktlasojtlaj kikaua Jehová
“Sanoyej miyek xipan [...] okiyolajmankej” (SAL. 78:40).
TLAKUIKAJLI 102 Matikinpaleuikan akin xkojtikej
TLEN TIKITASKEJ *
1. ¿Kenon nomachiliaj inchanejkauan akin kikauaj Jehová?
IJKUAK yakaj kikixtiaj itech tlanechikojli, ichanejkauan melak noyolkokouaj. Tokniuj Hilda * kijtoua: “Noueuentsin nochipa oyolmelajkanen itech Jehová, yejua omik ijkuak itikuikayaj 41 xiuitl ika yotonamiktijkaj. Niknemiliaya ika xoniaskia itlaj tlen más nechyolkokoskia. San ika, ijkuak notelpoch okikauj Jehová niman noijki okikauj isiuauj niman ikoneuan, más onechyolkoko xijkon ken ijkuak omik noueuentsin”.
Jehová kasikamati ika melak teyolkoko ijkuak yakaj akin melak tiktlasojtlaj kikaua. (Xkimita párrafos 2 niman 3). *
2, 3. Itech tlen kijtoua Salmo 78:40, 41, ¿kenon nomachilia Jehová ijkuak itekipanojkauan kitlalkauiyaj?
2 San matikonnemilikan kenon melak onoyolkoko Jehová ijkuak miyekej ángeles, akin kimitaya ken ikoneuan, okitlalkauijkej (Jud. 6). Noijki xkonnemili kenon melak onoyolkoko ijkuak okitak kenon israelitas miyekpa kixnamikiyaj niman kitlalkauiayaj (xpoua Salmo 78:40, 41). Tla yakaj akin tiktlasojtla yokitlalkaui Jehová, kuajli xmatsto ika toTajtsin noijki melak kiyolkokoua. Yejua kasikamati ken timomachilia niman mitsyolchikauas niman mitspaleuis.
3 Ipan yejuin tlamachtijli, tikitaskej tlenon noneki tikchiuaskej tla tiknekij ika Jehová matechpaleui ijkuak yakaj akin tiktlasojtlaj kikixtiaj itech tlanechikojli. Noijki, tikitaskej kenon uelis tikinpaleuiskej tokniuan akin kixnamiktokej yejuin. San ika, kachtopa matikitakan tlenon xnoneki tiknemiliskej ijkuak yakaj akin tiktlasojtlaj kikaua Jehová.
MAKA XMOTLAJTLAKOLTI
4. ¿Kenon nomachiliaj sekimej tajtin ijkuak se inkoneuj kikaua Jehová?
4 Miyekej tajtin, ijkuak se inkoneuj kikaua Jehová, kinemiliaj ika kanaj más ueliskia kipaleuiskiaj para xkikajkauaskia toTajtsin. Tokniuj Luke, yejuin tlen okijto sakin ika ikoneuj okikixtijkej itech tlanechikojli: “Ninotlajtlakoltiaya, hasta kemantika niktemikiya tlen xkuajli. Kemantika nichokaya niman hasta nechkokouaya noyoltitlan”. Tokniuj Elizabeth, akin noijki yejon kixnamiktoya, nochipa kinemilijtoya: “¿Tlenon xkuajli onikchiuj? Niknemiliaya ika xkuajli onikmachti nokoneuj nochi tlen Jehová kitlajtlani”.
5. ¿Akinon itlajtlakol ijkuak yakaj kikaua Jehová?
5 Noneki tikilnamikiskej ika Jehová yotechkauili matiktlapejpenikan tlenon tikchiuaskej. Yejua ika, toseselti uelis tiktlapejpeniskej tla tiktlakamatiskej noso ka. Miyekej telpokamej xkuajli ken intajuan okinmiskaltijkej, san ika, yokitlapejpenijkej kitekichiuiliskej Jehová niman itech yolmelajkanemij. Oksekimej telpokamej, intajuan onokojtilijkej kuajli kimititiskej tlen kijtoua Biblia, san ika, ijkuak onoskaltijkej okikaujkej Jehová. Kuajli nesi ika toseselti noneki tiktlapejpeniskej tla tiktekichiuiliskej Jehová noso ka (Jos. 24:15). Ika yejon, tajtin, tla nemokoneuj kikaua Jehová, maka xmotlajtlakoltikan.
6. ¿Kenon nomachilia se tekoneuj ijkuak itaj noso inan kikaua Jehová?
6 Kemantika, tajtli noso nantli akin kikaua Jehová niman kemantika hasta ichanejkauan kinkaua (Sal. 27:10). Ijkuak ijkon panoua, tekoneuan melak noyolkokouaj pampa yejuamej kitstiayaj kenon kuajli kitekichiuiliayaj Jehová. Esther kijtoua kenon onomachili ijkuak itaj okikixtijkej itech tlanechikojli. Yejua kijtoua: “Melak nichokaya pampa onikitak ika notaj xika yolik okitlalkauijtia Jehová, yej okitlapejpeni xok keman kitekichiuilis. Melak niktlasojtla notaj. Ika yejon, ijkuak okikixtijkej itech tlanechikojli nochipa ninajmantoya ipampa. Kemantika hasta najmankamikiya”.
7. ¿Tlenon kimachilia Jehová inpampa telpokamej akin intajuan yokinkixtijkej itech tlanechikojli?
7 Telpokamej, tla nemotaj noso nemonan yokikixtijkej itech tlanechikojli, kuajli xmatstokan ika noijki techyolkokoua. Niman xkilnamikikan ika Jehová noijki kitstika kenon nemomachiliaj. Yejua mechtlasojtla niman yolpaki pampa itech nenyolmelajkanemij. Niman tejuamej noijki melak tiyolpakij. Noijki, xkilnamikikan ika nemejuamej xnenkipiyaj tlajtlakojli ipampa tlen nemotajuan yokichiujkej. Ijkon ken yotikteneujkaj, Jehová techkauilia toseselti matiktlapejpenikan tla tiktekichiuiliskej noso ka. Niman nochimej itekipanojkauan toTajtsin akin itech yonosentemakakej niman yonoapolaktijkej “cada se noneki kinomamaltis on tlajtlamach pajsolouilistli yejuan ipan uajlau” (Gál. 6:5).
8. ¿Tlenon uelis kichiuaskej ichanejkauan akin yokikixtijkej itech tlanechikojli chika uajnokuepa? (Noijki xkita recuadro “ Xmokuepa itech Jehová”).
8 Ijkuak yakaj akin tiktlasojtlaj kikaua Jehová, tinochimej tiknekiskiaj oksejpa mauajnokuepa. ¿Tlenon uelis tikchiuaskej chika uajnokuepa? Matikchikaujtokan totlaneltokil. Tla ijkon tikchiuaj, uelis tikinpaleuiskej oksekimej tochanejkauan niman kanaj hasta akin yokikixtijkej itech tlanechikojli. Yejon noijki techpaleuis maka sajnoye matoyolkokokan. Matikitakan kenon uelis tikchikauaskej totlaneltokil.
¿KENON UELIS TIKCHIKAUASKEJ TOTLANELTOKIL?
9. ¿Tlenon mitspaleuis machikaujto motlaneltokil? (Noijki xkita recuadro “ Textos tlen mitsyolchikauaskej tla yakaj akin tiktlasojtla yokikauj Jehová”).
9 Nochipa xchiua tlen kichikauas motlaneltokil. Melak noneki kuajli xmouika iuan Jehová niman mochanejkauan. ¿Kenon uelis tikchiuas? Tla tikneki machikaujto motlaneltokil, mojmostla xpoua iTlajtol toTajtsin, itech xtlanemili niman nochipa xuiya tlanechikoltin. Matikitakan tlenon okichiuj tokniuj Joanna, akin itaj niman ikniuj okikaujkej Jehová. Yejua kijtoua: “Ijkuak nikamapoua ipan Biblia itech Abigaíl, Ester, Job, José niman Jesús, niuajyolseui. Tlen yejuamej okichiujkej nechyolchikaua niman nechpaleuiya kuajli manitlanemili. Noijki, melak yonechpaleuijkej tlakuikaltin tlen onkatij ipan jw.org”.
10. Itech tlen kijtoua Salmo 32:6-8, ¿tlenon uelis tikchiuaskej tla melak toyolkokouaj?
10 Xkijli Jehová nochi tlen tikmachilia. Ijkuak melak timajmanas, xchiuili teoyotl Jehová. Xtlajtlanili mamitspaleui kuajli xtlanemili niman mamitsititi tlenon noneki tikchiuas (xpoua Salmo 32:6-8). Melauak, kanaj ouijtika tikitas tikijlis Jehová nochi tlen tikmachilia, san ika, yejua kuajli mitsasikamati. Jehová melak mitstlasojtla niman kineki xkijli nochi tlen tikmachilia (Éx. 34:6; Sal. 62:7, 8).
11. Itech tlen kijtoua Hebreos 12:11, ¿tleka noneki tikseliskej ken Jehová temelajkatlalia? (Noijki xkita recuadro “ Jehová kiteititia ika tetlasojtla ijkuak kikixtiaj itech tlanechikojli yakaj akin otlajtlako”).
11 Xtlakaita tlen tlayekankej yokitlapejpenijkej. Ijkuak kikixtiaj itech tlanechikojli yakaj akin yotlajtlako, Jehová techititia ika techtlasojtla niman ika kitlasojtla akin kikixtiaj (xpoua Hebreos 12:11). Kanaj kemantika sekimej uelis kijtoskej ika tlayekankej nopopolouaj ijkuak kikixtiaj yakaj itech tlanechikojli. San ika, matikilnamikikan ika akin ijkon kijtouaj xkeman techijliskej tlen xkuajli okichiuj akin otlajtlako. Tejuamej xtikmatij nochi tlen onochiuj. Más kuajli tla titlaneltokaj intech tlayekankej akin temelajkatlaliaj pampa yejuamej noyekanaj ika tlen kijtoua Biblia niman temelajkatlaliaj ipampa “itokatsin toTEKO” Jehová (2 Crón. 19:6).
12. ¿Kenon yokinpaleui sekimej pampa okitlakaitakej tlen tlayekankej okitlapejpenijkej?
12 Tla tejua tiktlakaita tlen kitlapejpeniaj tlayekankej ijkuak kikixtiaj itech tlanechikojli se mochanejkauj, yejon uelis kipaleuis manokuepa itech Jehová. Elizabeth, akin otikteneujkaj ipan párrafo 4, kijtoua: “Melak ouijtika onikitak xok niknotsas notelpoch. San ika, ijkuak ouajnokuep itech Jehová, yejua okijto ika kinamikiya makikixtikan. Sakin, okijto ika miyek tlen ouel. Yejon onechpaleui maniktlasojkamati pampa Jehová kinmelajkatlalia itekipanojkauan”. Iueuentsin, akin itoka Mark, kijtoua: “Seki xiujtin sakin, totelpoch otechijli ika yejua onokuep itech Jehová pampa tejuamej otimelajkanenkej. Melak niktlasojkamachilia Jehová pampa otechpaleui matiktlakamatikan”.
13. ¿Tlenon uelis mitspaleuis maka sajnoye xmoyolkoko?
13 Xtlajto imiuan moamigos akin mitsasikamatij. Tla timouika imiuan tokniuan akin kipiyaj chikauak intlaneltokil, melak mitsyolchikauas (Prov. 12:25; 17:17). Joanna, akin otikteneujkaj ipan párrafo 9, kijtoua: “San noselti ninomachiliaya. San ika, ijkuak onitlajto imiuan noamigos melak onechpaleui”. Aman tej, ¿tlenon uelis tikchiuas tla se tokniuj mitsijlia itlaj tlen más mitsyolkokoua?
14. ¿Tleka noneki toijyouiskej niman totlapopoluiskej?
14 Xkimijyoui tokniuan. Maka matiknemilikan ika yejuamej nochipa techijliskej tlen tejuamej tiknekiskiaj tijkakiskej (Sant. 3:2). Tinochimej topopolouaj, yejua ika, xnoneki techmojkatlachialtis tla tikitaj ika sekimej xkimatij tlenon techijliskej noso tla techijliaj itlaj tlen techyolkokoua, maski yejuamej xkinekiyaj. Nochipa matikilnamikikan tlen apóstol Pablo okijto: “Xpiyakan ijyouilistli iuan oksekimej, niman xtlapojpoluikan tla yakaj xkuajli itlaj mechchiuilia” (Col. 3:13). Se tokniuj siuatl, akin kipiya se ichanejkauj akin okikixtijkej itech tlanechikojli, kijtoua: “Jehová yonechpaleui manikintlapopolui tokniuan akin kinekiyaj nechpaleuiskej, san ika, yej más nechyolkokouayaj”. Aman matikitakan kenon tinochimej uelis tikinpaleuiskej tokniuan akin kinpiyaj inchanejkauan akin yokinkixtijkej itech tlanechikojli.
TINOCHIMEJ UELIS TITLAPALEUISKEJ
15. ¿Kenon uelis tikinpaleuiskej tokniuan akin kipiyaj se inchanejkauj akin kemach yokikixtijkej itech tlanechikojli?
15 Matikintlasojtlakan tokniuan akin yolmelajkanemij itech Jehová. Tokniuj Míriam, kijtoua ika melak nomojtiaya yas tlanechikoltin sakin ika ikniuj okikixtijkej itech ikalpan Jehová. Yejua kijtoua: “Nechmojtiaya tlen oksekimej ueliskia kijtoskiaj. San ika, nemiyaj sekimej noamigos akin noijki najmantoyaj niman xkitejteneuayaj nokniuj. Yejuamej onechpaleuijkej maka san noselti maninomachili”. Okse tokniuj siuatl kijtoua: “Ijkuak okikixtijkej tokoneuj itech tlanechikojli, tokniuan otechyolchikauakoj. Sekimej otechijlikej ika xkimatiyaj tlenon techijliskej. Sekimej nouan ochokakej niman oksekimej onechinuajtitlanilijkej seki cartas tlen melak onechyolchikaujkej. Tlen okichiujkej melak onechpaleui”.
16. ¿Kenon tinochimej uelis tikinpaleuiskej tokniuan akin yolmelajkanemij itech Jehová?
16 Nochipa matikinpaleuikan tokniuan akin yolmelajkanemij itech Jehová. Aman más noneki matikintlasojtlakan niman matikinyolchikauakan yejuin tokniuan (Heb. 10:24, 25). Sekimej tokniuan akin kipiyaj se inchanejkauj akin yokikixtijkej itech tlanechikojli yokitakej ika sekimej xok kinnotsaj, kentla yejuamej noijki xok iteixpantijkauan Jehová yeskiaj. ¡Maka keman ijkon matikchiuakan! Melak noneki matikinyolchikauakan telpokamej akin intajuan yokinkixtijkej itech tlanechikojli niman matikimijlikan ika kuajli ken yejuamej kitekichiuilijtokej toTajtsin. Tokniuj María, techijlia tlenon ipan onochiuj ijkuak iueuentsin okikixtijkej itech tlanechikojli niman noijki okinkauj: “Sekimej noamigos ouajlajkej nochan, otlakualchiujkej niman san sekan otomachtijkej imiuan nokoneuan. Onechititijkej ika nechasikamatiyaj niman hasta nouan ochokakej. Niman noijki onechpaleuijkej ijkuak sekimej opeuj nechtejteneuaj. Melak onechyolchikaujkej” (Rom. 12:13, 15).
Tinochimej uelis tikinpaleuiskej tokniuan akin kipiyaj se inchanejkauj akin yokikixtijkej itech tlanechikojli. (Xkita párrafo 17). *
17. ¿Tlenon uelis kichiuaskej tlayekankej para kinyolseuiskej akin tlajyouijtokej?
17 Tlayekankej, nochipa xmokojtilikan nenkinyolchikauaskej tokniuan akin yolmelajkanemij itech Jehová. Nemejuamej akin más noneki nenkinyolseuiskej tokniuan akin kipiyaj se inchanejkauj akin yokikauj Jehová (1 Tes. 5:14). Xkinyolchikauakan achto peuas niman sakin ika yotlan tlanechikojli. Xkintlajpalotij inchan niman imiuan xchiuakan teoyotl. Noijki, uelis imiuan nentenojnotsaskej noso nenkinnotsaskej ijkuak nenkiueyichiuaskej toTajtsin iuan nemochanejkauan. Tlayekankej noneki kimititiskej itekipanojkauan Jehová akin tlajyouijtokej ika kimikneliaj, ika kintlasojtlaj niman ika kinekij kinpaleuiskej (1 Tes. 2:7, 8).
XTLANELTOKA ITECH JEHOVÁ NIMAN MAKA XMOSIAUJKAUA
18. Itech tlen kijtoua 2 Pedro 3:9, ¿tlenon kineki Jehová makichiuakan akin yokikaujkej?
18 Jehová “nion se tlakatl xkineki ma poliui, yej kineki para nochimej ma noyolpatlakan” (xpoua 2 Pedro 3:9). Maski yakaj kichiua se ueyi tlajtlakojli, Jehová ok kipatiojkaita inemilis. Matikilnamikikan ika Jehová melak ueyi okitlaxtlauj topampa: okitemakak isenteKonetsin. Pampa Jehová melak tetlasojtla kineki kinpaleuis akin yokitlalkauijkej oksejpa itech manokuepakan. Niman yejua kichia ika makichiuakan ijkon ken on tekoneuj akin Jesús okiteneuj ipan Lucas 15:11-32. Miyekej akin yokikaujkaj Jehová oksejpa itech youajnokuepkej, niman tlanechikojli kuajli okinseli. Elizabeth, akin kemach yotikonteneujkaj, melak oyolpak ijkuak itelpoch oksejpa onokuep itech Jehová. Yejua kijtoua: “Melak nikintlasojkamachilia akin otechyolchikaujkej para maka matosiaujkauakan”.
19. ¿Tleka uelis nochipa titlaneltokaskej itech Jehová?
19 Nochipa uelis titlaneltokaskej itech Jehová. Yejua xkeman techijlis matikchiuakan itlaj tlen techijtlakos. Yejua se toTajtsin akin kuelita kitemakas tlen kipiya, teiknelia niman kintlasojtla akin kitlasojtlaj niman kiueyichiuaj. Kuajli matikmatstokan ika Jehová xkeman techkauas ijkuak tikixnamikiskej tlen ouijtika (Heb. 13:5, 6). Mark, akin otikteneujkaj ipan párrafo 12, kijtoua: “Jehová xkeman otechkauj. Yejua nochipa touan nemiya ijkuak tikixnamiktoyaj tlen ouijtika”. Jehová nochipa techmakas “on ueyi poder” (2 Cor. 4:7). Kema, uelis chikaujtos totlaneltokil niman xtosiaujkauaskej maski yakaj akin tiktlasojtlaj kikaua Jehová.
TLAKUIKAJLI 44 Iteoyouj akin noyolajmana
^ párr. 5 ¡Melak teyolkoko ijkuak yakaj akin tiktlasojtlaj kikaua Jehová! Ipan yejuin tlamachtijli, tikitaskej kenijki nomachilia Jehová ijkuak ijkon panoua. Noijki, tikitaskej tlenon uelis kichiuaskej ichanejkauan akin kikixtiaj itech tlanechikojli para maka sajnoye manoyolkokokan niman tlenon kinpaleuis machikaujto intlaneltokil. Sa ika tlami, tikitaskej kenon tinochimej uelis tikinyolseuiskej niman tikinpaleuiskej ichanejkauan akin okikixtijkej itech tlanechikojli.
^ párr. 1 Ipan yejuin tlamachtijli, tokayomej yonopatlakej.
^ párr. 79 TLEN NESI IPAN TLAIXKOPINAJLI: Ijkuak se tokniuj kinkaua ichanejkauan niman Jehová, isiuauj niman ikoneuan tlajyouiyaj.
^ párr. 81 TLEN NESI IPAN TLAIXKOPINAJLI: Omemej tokniuan tlayekankej komintlajpalouaj sekimej tokniuan para kinyolchikauaskej.
