1, 2. a) Itech tlen kijtoua Proverbios 16:31, ¿kenon noneki tikimitaskej tokniuan akin iuejueyimej? b) ¿Tlenon tiknankiliskej ipan yejuin tlamachtijli?

IPAN se parque tlen onka Arkansas (Estados Unidos), uelis tikinnextis diamantes. Maski miyekej akin ompa ompaxalouaj kimitaj yejuin diamantes, yejuamej xkinmajkokuij pampa san nesij ken temej niman xkimatij ika melak patiojkej.

² Tokniuan akin iuejueyimej niman yoyolmelajkanenkej itech Jehová yeskiaj ken on diamantes, yejuamej melak tlasojtij ken se tesoro. Biblia kijtoua ika inkuaistal yejuin tokniuan yeskia “ken itlaj kuaxochitl de ueyi tlakaitalistli” (xpoua Proverbios 16:31; 20:29). San ika, tla xtotlajpiyaj, kanaj nion xtikitaskej ika yejuamej melak tlasojtij. Telpokamej akin kinpatiojkaitaj tokniuan akin iuejueyimej kentla kinextiskiaj itlaj tlen melak patioj, xijkon ken se tesoro. Ipan yejuin tlamachtijli tiknankiliskej yejuin: ¿tleka Jehová kimita ken se tesoro on tokniuan akin iuejueyimej?, ¿kenon Jehová kintekitiltia ipan ikalpan? niman ¿tlenon uelis tikchiuaskej tla tiknekij matechpaleuikan ika tlen yejuamej ikimatij?

3. Itech tlen kijtoua Salmo 92:12-15, ¿tleka Jehová kinpatiojkaita tokniuan akin iuejueyimej?

³ Jehová melak kinpatiojkaita tokniuan akin iuejueyimej. Yejua kimati kenon kipiyaj inyojlo niman nochi tlen kuajli  kichiuaj. Jehová melak yolpaki ijkuak kita ika yejuin tokniuan kimijliaj akin telpokamej nochi tlen yejuamej yokinpaleui ipan innemilis (Job 12:12; Prov. 1:1-4). Noijki, kinpatiojkaita pampa yejuamej melak yotlaxikojkej (Mal. 3:16). Maski tokniuan akin iuejueyimej yokixnamijkej miyek tlen ouijtika, nochipa kiteititiaj ika tlaneltokaj itech Jehová. Aman más kineltokaj ika Jehová kinmakas tlen yokimijli, xijkon ken ijkuak kemach okixmatkej. Jehová noijki melak kintlasojtla pampa, maski yejuamej “ye ueuentsitsimej”, nokojtiliaj kiteijliskej iTlajtol (xpoua Salmo 92:12-15).

4. ¿Tlenon uelis kinyolchikauas tokniuan akin iuejueyimej?

⁴ Tla tejua itiueuentsintitiuj, kuajli xmatsto ika Jehová kilnamiki nochi tlen yotikchiuj (Heb. 6:10). Tejua ika nochi moyojlo tiuajtenojnotstiuj, niman yejon melak kiyolpaktia Jehová. Yotikixnamik miyek tlen ouijtika, yotikpaleui tlen Biblia kijtoua, kuajli yotikchiuj motekiyo ipan tlanechikojli niman yotikinmachtij oksekimej. Timokojtilia tikchiuas nochi tlen ikalpan Jehová mitstlajtlanilia. Noijki, yotikinpaleui niman yotikinyolchikauj tokniuan akin chikauak kitekichiuilijtokej toTajtsin. Jehová melak mitstlasojtla pampa itech tiyolmelajkanemi, niman yejua kuajli kijtoua ika “kimanauiya on yolmelajki para nochipa” (Sal. 37:28). Yejua noijki kijtoua: “Ijkuak nenkipiyaskej nemokuaistal, [...] sanken nemechpaleuis” (Is. 46:4). Ika yejon, maka keman xnemili ika pampa itiueuentsin xok titepaleui ipan ikalpan Jehová, pampa yejon xmelauak. ¡Tejua kema titepaleui!

5. ¿Tlenon xnoneki kilkauaskej tokniuan akin iuejueyimej?

⁵ Tokniuan akin iuejueyimej melak miyek ken tepaleuiyaj. Maski aman kanaj xok más kojtikej, yejuamej miyek tlen kimatij pampa youejkauj yonenkej. Jehová miyek ken uelis kintekitiltis yejuin tokniuan. Amantsin tikitaskej kenon yeuejkaui okintekitilti sekimej itekipanojkauan akin iuejueyimej katkaj niman kenon aman noijki kintekitiltijtikaj.

6, 7. Xkinteneua sekimej itekipanojkauan toTajtsin akin iuejueyimej katkaj niman okinteochiujkej.

⁶ Ipan Biblia tikinnextiaj miyekej itekipanojkauan Jehová akin okitekichiuilijkej hasta  ijkuak iueuentsitsintin katkaj. Ompa tlajtoua itech Moisés, akin kipiaya kanaj 80 xiuitl ijkuak Jehová okitlali ken teotlajtoketl niman okinyekan israelitas. Noijki kiteneua Daniel, akin kanaj kipiaya ipantsin 90 xiuitl ijkuak ok kitekichiuilijtoya Jehová ken teotlajtoketl. Niman nesi ika apóstol Juan kipiaya ipantsin 90 xiuitl ijkuak Jehová okichiuj makijkuilo Apocalipsis.

⁷ Miyekej itekipanojkauan toTajtsin xmás kimixmatiyaj, niman kanaj nion xkinpatiojkaitayaj. San ika, Jehová kema okitak tlen okichiujkej niman yejua okinteochiuj pampa itech oyolmelajkanenkej. Biblia xmás kiteneua Simeón, akin “kuajli tlakatl katka, niman kuajli kitlakaitaya Dios”. San ika, Jehová kema kuajli kixmatiya niman okikauili makita Jesús, akin ok konetsintli katka. Niman noijki okichiuj ika Simeón makijto se teotlajtojli itech Jesús iuan inan (Luc. 2:22, 25-35). Noijki, matitlanemilikan itech Ana, yejua kitekichiuiliaya Jehová ken teotlajtoketl, “yejua kauajli katka hasta ye kipiyaya 84 xipan” niman “xkaman kisaya ipan on ueyitiopan”. Jehová okiteochiuj pampa itech oyolmelajkanen niman noijki okikauili makita Jesús ijkuak konetsintli katka. Kuajli nesi ika Jehová melak kinpatiojkaitaya Simeón niman Ana (Luc. 2:36-38).

8, 9. ¿Kenon tepaleuiyaj tokniuan siuamej akin yokaualtikej?

⁸ Ipan yejuin tonaltin, miyekej tokniuan akin iuejueyimej melak kinpaleuiyaj akin telpokamej. Matikitakan tlen ipan onochiuj se tokniuj siuatl akin itoka Lois Didur. Ijkuak kipiaya 21 xiuitl, opeuj tlapaleuiya ken precursora especial ne Canadá. Sakin, yejua iuan iueuentsin, John, melak ouejkaujkej kintlajpalojtinemiyaj tlanechikoltin ipan circuito. Sakin otlapaleuitoj ipan Betel tlen onka Canadá, kampa ouejkaujkej ipantsin 20 xiuitl. Ijkuak tokniuj Lois Didur ikipiaya 58 xiuitl, okimijlikej tla ueliskiaj ontlapaleuiskej ne Ucrania. ¿Tlenon okichiujkej? ¿Okinemilijkej ika melak iuejueyimej katkaj niman ika xueliskiaj ontlapaleuiskej ipan okse país? Ka, yejuamej oyajkej niman ompa, tokniuj John, otlapaleui ipan Grupo akin tlayekana ipan se Sucursal. John omik chikome xiuitl sakin, niman tokniuj Lois ompa onokauj. Aman ikipiya 81 xiuitl niman ok chikauak kitekichiuilijtika Jehová ipan Betel tlen onka Ucrania, niman nochimej melak kitlasojtlaj.

⁹ Kanaj sekimej tokniuan siuamej, ijkon ken Lois, xok más kinpatiojkaitaj pampa yokaualtikej, san ika, Jehová kema kinpatiojkaita. Yejua kipatiojkaita ken okinpaleuijkej inueuentsitsinuan niman pampa ok itech melajkanemij (1 Tim. 5:3). Noijki, tlen kichiuaj melak kinyolchikaua telpokamej niman ichpokamej.

10. ¿Tlenon tiuelij itech Tony?

¹⁰ Miyekej tokniuan akin iuejueyimej chantij  ipan se kajli kampa kintlajpiyaj akin iueuentsitsintin. Yejuamej noijki melak tlasojtij, ijkon ken se tesoro. Ijkon ken tokniuj Tony. Yejua onoapolakti ijkuak kipiaya 20 xiuitl ne Pensilvania (Estados Unidos) ipan agosto de 1942. Pampa xokinek tlapaleuis ipan guerra okitsajkej ome xiuitl iuan tlajko. Yejua iuan isiuauj, Hilda, okinmiskaltijkej ipan ikalpan toTajtsin on omemej inkoneuan. Ipan yeyi tlanechikoltin, Tony otlapaleui ken tlayekanketl akin kixeloua tekitl itech tlayekankej niman okinyekan seki uejueyimej tlanechikoltin. Noijki, kinpanoltiaya tlanechikoltin niman temachtiaya itech Biblia ipan se cárcel. Aman, maski ikipiya 98 xiuitl, ok chikauak kitekichiuilijtika Jehová niman tlapaleuiya ipan tlanechikojli.

11. ¿Kenon uelis tikimititiskej tokniuan akin iueuentsitsintin ika tikintlasojkaitaj?

¹¹ ¿Kenon uelis tikimititiskej tokniuan akin iueuentsitsintin ika tikintlasojkaitaj? Tlayekankej uelis kinpaleuiskej para matenojnotsakan niman mayakan noso makinkakikan tlanechikoltin. Tejuamej noijki uelis tikimititiskej ika tikintlasojtlaj tla tikomintlajpalouaj noso tikominnotsaj ipan videollamada. Melak noneki ijkon matikchiuakan imiuan akin uejka chantij itech tlanechikojli. ¡Maka keman matikimilkauakan yejuin tokniuan! Sekimej itech yejuin tokniuan, ouijtika kitaj tlajtoskej itech tlen inpan yonochiuj noso kinemiliaj ika xnoneki kiteijliskej. San ika, melak techpaleuis tla tikintlajtoltiaj tlenon yokinyolpakti ipan ikalpan toTajtsin niman tla kuajli tikinkakij.

12. ¿Akinomej uelis tikinnextiskej ipan totlanechikol?

¹² Kanaj techmojkatlachialtis ijkuak tikitaskej ika ipan totlanechikol noijki nemij miyekej tokniuan akin iuejueyimej, akin yoyolmelajkanenkej. Tokniuj Harriette, akin chanti Estados Unidos, melak ouejkauj tlapaleuiya ipan se tlanechikojli tlen onka Nueva Jersey. Sakin, yejua ochantito iuan ichpoch. Ipan tlanechikojli kampa oajsik, tokniuan okixelojkej tiempo para kixmatiskej niman okitakej ika yejua katka kentla se tesoro. Okintlajtlajtouili kenon tenojnotsayaj kanaj ipan xiuitl 1925, ijkuak yejua okixmat tlen melauak. Okimijli ika ijkuak opeuj tenojnotsa nochipa kitkitinemiya icepillo tlen ika notlanpajpakaya pampa kimatstoya ika ueliskia san totoka kitsakuaskiaj. Ipan 1933 okpa okitsaujkaj, niman nochipa ouejkauj se semana ipan cárcel. Ijkuak yejua tsauktoya, iueuentsin, akin xiteixpantijkauj Jehová katka, kipaleuiaya niman kintlajpiaya on yeyi inkoneuan. Kuajli nesi ika noneki tikinpatiojkaitaskej tokniuan akin yoyolmelajkanenkej ijkon ken Harriette.

13. ¿Kenon Jehová kintekitiltia ipan ikalpan tokniuan akin iuejueyimej?

¹³ Jehová kintekitiltia ipan ikalpan tokniuan akin iuejueyimej. Yejuin tokniuan yokitakej kenon Jehová yokiteochiuj ikalpan niman kenon yejuamej yokinteochiuj. Maski yejuamej miyekpa yonopopolojkej, miyek tlen youelkej. Yejua ika, noneki tikitaskej ika yejuamej melak tlamachilisejkej niman noneki tokauiliskej matechpaleuikan (Prov. 18:4). Tla tikxelouaj tiempo para tikimixmatiskej, chikauis totlaneltokil niman miyek tlen uelis techmachtiskej.

14. ¿Tlenon kinmachtia telpokamej tlen kijtoua Deuteronomio 32:7?

¹⁴ Matitlajtokan imiuan tokniuan akin iuejueyimej (xpoua Deuteronomio 32:7). Melauak, kanaj yejuamej xok más tlachiaj, yolik nejnemij niman kanaj xok chikauak  tlajtouaj. San ika, ipan inyojlo nomachiliaj ken telpokamej niman chikauak kitekichiuiliaj Jehová (Ecl. 7:1). Matikilnamikikan ika Jehová kinpatiojkaita niman ika tejuamej noneki tikintlakaitaskej. Matikchiuakan ijkon ken Eliseo, akin xokinek san iselti kikauas Elías. Yejua, yexpa okijli: “Xnimitskauas” (2 Rey. 2:2, 4, 6).

15. ¿Tlenon uelis tikintlajtoltiskej tokniuan akin iuejueyimej?

¹⁵ ¿Kenon uelis tikimititiskej tokniuan akin iuejueyimej ika melauak tikinpatiojkaitaj? Tla itlaj tikintlajtoltiaj (Prov. 1:5; 20:5; 1 Tim. 5:1, 2). Kanaj yejuin uelis tikintlajtoltiskej: “Ijkuak titelpochtli katka, ¿tlenon omitspaleui xneltoka ika yotiknexti tlen melauak?”, “¿Tlenon yomitspaleui más xnisiui Jehová?”, “¿Tlenon mitspaleuiya ok ika moyojlo xtekichiuilijto Jehová?” (1 Tim. 6:6-8). Sakin, kuajli matijkakikan tlen techijliskej.

16. ¿Tleka ijkuak se telpochtli niman se tokniuj akin iueyi san sekan tlajtlajtouaj noyolchikauaj?

¹⁶ Ijkuak se telpochtli niman se tokniuj akin iueyi san sekan tlajtlajtouaj, noyolchikauaj (Rom. 1:12). On telpochtli más kasikamatis ika Jehová xkeman kinkaua itekipanojkauan akin itech yolmelajkanemij, niman tokniuj akin iueyi kitas ika kitlasojtlaj niman yolpakis ijkuak tetlajtlajtouilis kenon Jehová yokipaleui.

17. ¿Tleka tikijtouaj ika tokniuan akin iuejueyimej sejse xiuitl más kualtsintitiuej?

¹⁷ Ijkuak se ueuentsintitiuj, xok más kualtsin tlachia. San ika, Jehová kita ika sejse xiuitl tlen panoua, itekipanojkauan akin itech yolmelajkanemij, más kuajkualtsitsintin (1 Tes. 1:2, 3). ¿Tleka? Pampa yejuamej yokikauilijkej iespíritu santo toTajtsin makipatlatiuj innemilis niman makinyektlalijtiuj. Tla más tikimixmatij tokniuan akin iuejueyimej, más tikintlakaitaskej, más intech tiueliskej niman más tikinpatiojkaitaskej ijkon ken se tesoro.

18. ¿Tlenon tikitaskej ipan okse tlamachtijli?

¹⁸ Matikilnamikikan ika tlanechikojli xsan noyolchikaua ijkuak telpokamej kinpatiojkaitaj akin iuejueyimej, yej noijki ijkuak akin iuejueyimej kinpatiojkaitaj akin telpokamej. Ipan okse tlamachtijli, tikitaskej kenon akin iuejueyimej uelis kiteititiskej ika kinpatiojkaitaj telpokamej akin nemij ipan tlanechikojli.