1, 2. ¿Tlenon yokijtojka Ageo 2:6 ika nochiuaskia ipan yejuin tonaltin?

SEKIMEJ akin omakiskej ijkuak otlalolin ne Nepal ipan 2015, okijtokej ika san ipan seki minutos opeuj xoxotonij uejueyimej kaltin niman kampa tlanemakalo. ¡Nochimej melak mojkamiktoyaj! Niman maski otlalolin san seki minutos, miyekej okimachilijkej ika melak ouejkauj. Tla tejuamej ompa tinemiskiaj, noijki xkeman tikilkauaskiaj.

² Ijkon ken yejuin tlalolinalistli okitsejtselo Nepal, ipan yejuin tonaltin, Jehová noijki kentla kintsejtselojtika nochi kalpamej. Yejua youejkauj ijkon kuajchiujtiuj. Teotlajtoketl Ageo okijto ika Jehová yokijtojka ika ijkon kichiuaskia. Jehová okijto: “Sa achijtsin poliui ijkuak nikchiuas ma uiuixka [noso matsejtseliui] cielo, tlaltikpaktli, mar niman on tlaluakan” (Ageo 2:6).

3. ¿Tleka ken Jehová kintsejtselojtika kalpamej xijkon ken ijkuak tlalolini?

³ Ijkuak se tlalolinalistli kitsejtseloua se kalpan, melak tlaijtlakoua. San ika, ijkuak Ageo kijtoua ika Jehová tlatsejtseloua xtlaijtlakoua, yej tepaleuiya. Jehová okijto: “Nikchiuas ma uiuixkakan [noso nikintsejtselos] nochimej naciones, niman kuajkiskej iminriquezas, niman noueyitiopan ika noueyilis”  (Ageo 2:7). ¿Kenon onochiuj yejuin teotlajtojli ipan itonaluan Ageo? ¿Niman kenon nochiujtika ipan yejuin tonaltin? Ipan yejuin tlamachtijli, tiknankiliskej yejuin niman tikitaskej kenon uelis tikpaleuiskej Jehová makintsejtselo nochi kalpamej.

4. ¿Tlenon okijli Jehová makichiua Ageo?

⁴ Jehová okinauati Ageo makichiua se ueyi tekitl. Matikitakan tleka. Nesi ika Ageo oajsik Jerusalén ipan xiuitl 537 ijkuak xipeuaya xiuitl se, imiuan akin ouajkiskej Babilonia. Sakin ika oajsikej Jerusalén, opeujkej kichijchiuaj ikal Jehová (Esd. 3:8, 10). San ika, opeuj kimixnamikij, onomojtijkej niman okikajkaujkej intekiyo (Esd. 4:4; Ageo 1:1, 2). Yejua ika, ipan xiuitl 520 Jehová okijli Ageo makinyolchikauati judíos para matlamikan makichijchiuakan ikal (Esd. 6:14, 15). *

5. ¿Tleka melak okinyolchikauj judíos tlen okimijli Ageo?

⁵ Tlen kiteijliskia Ageo kinpaleuiskia judíos más matlaneltokakan itech Jehová. Ageo onoyolchikauj niman okimijli judíos akin nomojtiayaj: “‘Nemochimej xmoyolchikauakan, akin nenchantij ipan yejuin tlajli [...] niman xtekitikan. Pampa nejua nemouan ninemi’, kijtoua Jehová akin kinyekana akin tlaixnamikij” (Ageo 2:4, TNM). Kanaj judíos melak onoyolchikaujkej ijkuak Ageo okimijli: “Jehová akin kinyekana akin tlaixnamikij”. Tla kinekiyaj kitlamiskej intekiyo, judíos nonekiya tlaneltokaskej itech Jehová, akin kinyekana miyekej ángeles.

6. ¿Tlenon okasikamatkej judíos ijkuak Ageo okimijli ika Jehová kintsejtseloskia nochi kalpamej?

⁶ Jehová okinauati Ageo makimijli judíos ika yejua kintsejtseloskia nochi kalpamej. Tlen okiteijli Ageo, okimasikamachilti judíos akin kichijchiujtoyaj teopan, ika Jehová kitsejtseloskia Persia, akin kinyekantoya miyekej kalpamej ipan yejon tonaltin. ¿Kenon tepaleuiskia yejuin? Kachtopa, judíos tlamiskiaj kichijchiuaskiaj ikal Jehová. Noijki, miyekej, hasta akin xjudíos katkaj, peuaskiaj kiueyichiuaskiaj Jehová ipan yenkuik ikal. Tlen okiteijli Ageo, melak okiyolchikauj ikalpan toTajtsin (Zac. 8:9).

7. ¿Itech tlen tekitl titepaleuijtokej?

⁷ ¿Kenon nochiujtika ipan yejuin tonaltin tlen okijto Ageo? Jehová oksejpa kintsejtselojtika nochi kalpamej niman aman tejuamej tikpaleuiyaj. San matontlanemilikan itech yejuin: ipan 1914, Jehová okitlali Jesucristo ken tekiuaj itech iTekiuajyo (Sal. 2:6). Akin tlayekanaj ipan yejuin tlaltikpaktli xokuelitakej yejuin. Pampa yejon okijtosnek ika yoajsika on tonajli ijkuak “tlamis nocumpliros on tonaltin kech okintlalilijkej”. Yejon kijtosneki ika inemiskia yakaj akin tlayekanaskia ijkon ken Jehová kineki ipan yejuin tlaltikpaktli (Luc. 21:24). Yejua ika, itekipanojkauan Jehová kiteijliaj, más desde 1919, ika san iTekiuajyo toTajtsin uelis kipopolos nochi tlen techtlajyouiltia. Yejuin “kuajli tlajtoltin itech Tekiuajyotl” kitsejtselojtika nochi tlaltikpaktli (Mat. 24:14, TNM).

8. Itech tlen kijtoua Salmo 2:1-3, ¿tlenon kichiuaj miyekej akin tikinnojnotsaj?

⁸ Ijkuak tejuamej tikinnojnotsaj oksekimej, miyekej xtechkakisnekij (xpoua Salmo 2:1-3). Miyekej kalpamej kualanij niman xkinekij matlayekana akin Jehová yokitlali ken tekiuaj. Yejuamej kinemiliaj ika xkuajli tlen tikteijliaj ijkuak titenojnotsaj. Sekimej tekiuajkej  hasta xok techkauiliaj matitenojnotsakan. Niman maski miyekej tekiuajkej kijtouaj ika kitekichiuiliaj toTajtsin, xkinekij makintekipatla iTekiuajyo. Ijkon ken ipan itonaluan Jesús, ipan yejuin tonaltin miyekej tekiuajkej kimixnamikij itekipanojkauan toTajtsin pampa xkinekij makinyekana akin yejua yokitlapejpeni (Hech. 4:25-28).

9. ¿Tlenon kichiua Jehová maski kita ika miyekej xkinekij makinyekana iTekiuajyo?

⁹ ¿Tlenon kichiua Jehová maski kita ika miyekej xkinekij makinyekana iTekiuajyo? Salmo 2:10-12 kijtoua: “Yejua ika, nemejuamej reyes niman tekiuajkej de in tlaltikpaktli, ¡xselikan in tlaixkuitijli tlen mechmachtiaj! ¡Xtlakamatikan toTEKO [Jehová], xmakajsikan niman xtlakaitakan! Xmauistilikan [iKoneuj] ikan miyekej paktli [...] para maka yej kualanis, niman amanaman nenmikiskej. ¡Sanoyej pakiskej yejuan itech yejua nomanauiyaj!”. Jehová melak teiknelia niman kinmakatika tiempo akin kixnamikij para manopatlakan niman makinokauilikan makinyekana iTekiuajyo. San ika, yejon tiempo itlantika pampa tinemij ipan “itlamiyan tonaltin” (2 Tim. 3:1, TNM; Is. 61:2). Melak noneki ika nochimej makixmatikan tlen melauak niman san no yejuamej makitlapejpenikan tla kitekichiuiliskej Jehová noso ka.

10. Itech tlen kijtoua Ageo 2:7-9, ¿tlenon panoskia ijkuak Jehová kintsejtseloskia nochi kalpamej?

¹⁰ Pampa Jehová kintsejtselojtika kalpamej, ijkon ken Ageo okijto, miyekej kinpaleuijtika. Ageo okijto ika ijkuak Jehová kintsejtseloskia kalpamej, “nochimej naciones [...] kuajkiskej iminriquezas”, kijtosneki ika akin kipiyaj kuajli inyojlo peuaskiaj kiueyichiuaskej Jehová (xpoua Ageo 2:7-9). * Isaías niman Miqueas noijki yokijtokaj ika yejon panoskia ipan “itlamiyan tonaltin” (Is. 2:2-4; Miq. 4:1, 2).

11. ¿Tlenon okichiuj tokniuj Ken ijkuak okikak iTlajtol toTajtsin?

¹¹ Tokniuj Ken, akin tlapaleuiya ipan Oficina  kampa noyekanaj nochi Sucursales, kijtoua kenon okitsejtselo tlen okikak itech on “kuajli tlajtoltin itech Tekiuajyotl”. Maski yopanok kanaj 40 xiuitl ika okinojnotskaj, kilnamiki kentla yaloua yeskia. Yejua kijtoua: “Ijkuak kemach onechnojnotskej itech iTlajtol toTajtsin, melak oniyolpak ijkuak onikmat ika tinemij ipan itlamiyan tonaltin. Onikasikamat ika, tla niknekiya nikyolpaktis toTajtsin niman manechmaka nemilistli tlen xkeman tlamis, nonekiya nikajkauas nochi tlen xkuajli niman itech nimelajkanemis. Nimantsin onikchiuili teoyotl Jehová, onijkajkauj nochi tlen xkuajli niman oninopaleui itech iTekiuajyo toTajtsin, tlen xakaj ueli kitsejtseloua”.

12. ¿Kenon Jehová kiteochiujtika ikalpan ipan yejuin sa itlamiyan tonaltin?

¹² Kuajli nesi ika Jehová kiteochiujtika ikalpan. Ipan yejuin itlamiyan tonaltin, más miyekixtiuej akin kiueyichiuaj Jehová. Ipan 1914 melak tiachijtsitsintin katkaj, san ika, aman itinemij ipantsin ocho millones. Niman nochi xiujtin melak miyekej touan nosentlaliaj ijkuak tikilnamikij imikilis Cristo. Ijkon, “nochimej naciones” kuajkuij “iminriquezas” ipan ikalpan Jehová, kampa tinochimej tikueyichiuaj ijkon ken yejua kitlajtlani. Ijkuak akin kinisiuiyaj Jehová peua nopatlaj, noijki kiueyichiuaj itoka (Efes. 4:22-24).

13. ¿Tlen teotlajtoltin noijki nochiujtokej? (Xkita tlaixkopinajli tlen onka ixpan yejuin revista).

¹³ Tlen aman panotika techititia ika noijki nochiujtika tlen kijtoua Isaías 60:22. Kampa kijtoua: “In keskimej nokoneuan miyekiyaskej hasta ajsiskej miles; in keskimej tlapoualtin aman, nochiuaskej sen ueyi nación. Ijkuak yejkos on tonajli yejuan yoniktlalij, nejua nemoTEKO nikchiuas para ma nochiua saniman”. Miyekej akin peujtokej kitekichiuiliaj toTajtsin melak miyek tlen ueli kichiuaj niman kinektokej tenojnotsaskej. Nochi tlen yejuamej ueli kichiuaj melak kipaleuiya ikalpan Jehová. Yejua ika, Isaías okijto ika yejon yeskia ken on “más kuajli tlakuajli” (Is. 60:5, 16). Pampa nochimej yejuin tokniuan tlapaleuijtokej, aman titenojnotsaj ipan 240 países niman toamatlajkuiloluan notlajtolkuepaj ika ipantsin 1,000 tlajtoltin.

14. ¿Tlenon noneki kitlapejpeniskej miyekej tlaltikpakchanejkej?

¹⁴ Pampa Jehová kintsejtselojtika nochi kalpamej, ipan yejuin sa ika tlami tonaltin nochimej noneki kitlapejpeniskej tla kipaleuiskej iTekiuajyo toTajtsin, noso tlaneltokaskej intech tekiuajkej akin nemij ipan yejuin tlaltikpaktli. Maski akin tiitekipanojkauan Jehová tikintlakamatij tekiuajkej, xtokalaktiaj ipan política (Rom. 13:1-7). Kuajli tikmatstokej ika san iTekiuajyo toTajtsin uelis kipopolos nochi tlen techtlajyouiltia, niman yejuin Tekiuajyotl xonka ipan yejuin tlaltikpaktli (Juan 18:36, 37).

15. ¿Tlenon kijtoua Apocalipsis ika ipan nochiuas ikalpan toTajtsin?

¹⁵ Ipan amoxtli Apocalipsis kijtoua ika ipan itlamiyan tonaltin kitlatlataskej ikalpan toTajtsin. Yejuin kijtosneki ika ok titlajyouijtoskej niman melak techixnamikiskej. Akin tekiuajtij ipan yejuin tlaltikpaktli texchiualtiskej matikinueyichiuakan niman techtlaueltokaskej tla xtikinpaleuiyaj (Apoc. 13:12, 15). Niman ken kijtoua Apocalipsis 13:16, “nochimej, maski uejueyixtokej noso xuejueyixtokej, maski ricos noso mayankej, maski esclavos noso xesclavos”, kinekiskej kintlaliliskej “sen neskayotl ipan inyekma noso ipan imixkuatipan”. Yeuejkaui, tlakeualtin kintlaliliayaj “sen neskayotl” niman ijkon kimatiskej akinon inteko. Noijki ijkon, ipan yejuin tonaltin, tekiuajkej kinekij nochimej kintlaliliskej kentla “sen neskayotl ipan inyekma noso ipan imixkuatipan”. ¿Kenon kiteititiaj akin kipiyaj yejuin neskayotl ika kinpaleuiyaj yejuin tekiuajkej? Kiteititiaj ika tlen kichiuaj niman ika tlen kinemiliaj.

16. ¿Tleka melak noneki matikitakan tla timelajkanentokej itech Jehová?

¹⁶ Niman tejuamej, ¿tlenon tikchiuaskej? ¿Tikseliskej yejon neskayotl niman tikinpaleuiskej yejon tekiuajkej akin tlayekantokej ipan yejuin tlaltikpaktli? Akin xnokauiliskej makintlalilikan yejon neskayotl, kintlaueltokaskej niman kixnamikiskej tlen ouijtika. Ipan Apocalipsis noijki kijtoua ika akin xkipiya yejon neskayotl xuelis tlakouas nion tlanemakas (Apoc. 13:17). San ika, akin tiitekipanojkauan toTajtsin kuajli tikmatstokej tlenon kinchiuiliskej akin kipiyaj yejon neskayotl tlen noteneua ipan Apocalipsis 14:9 niman 10. Pampa itekipanojkauan toTajtsin xkipiyaskej yejon neskayotl, yejuamej kentla kijkuiloskiaj ipan inma: “Niiyaxka noTEKO” Jehová (Is. 44:5). Aman noneki tikitaskej tla yemelak timelajkanentokej itech Jehová. Tla kema, yejua, ika iyojlo kijtos ika tiiyaxkauan.

17. ¿Tlenon xnoneki tikilkauaskej?

¹⁷ Ipan yejuin sa ika tlami tonaltin, Jehová yokiteititi ika melak teijyouiya. Yejua xkineki yakaj mapopoliui (2 Ped. 3:9). Nochimej yokinmakak tiempo para manoyolkuepakan niman makitlapejpenikan tlen kuajli. San ika, maka matikilkauakan ika yejon tiempo itlantika. Akin xkinekiskej noyolkuepaskej nion kitekichiuiliskej toTajtsin, inpan nochiuas tlen ipan onochiuj faraón. Jehová okijli faraón: “Niueliskia nimitsmiktiskia ika sen kokolistli tejua niman nochimej mochanejkauan. Pero onimitskauilij xnemi hasta aman para nimitsititis noueyi poder, niman para nochi on tlakamej ipan tlaltikpaktli ma nechixmatikan akinon nejua” (Éx. 9:15, 16). Ijkuak Jehová tlapopolos, nochimej kimatiskej ika san yejua toTajtsin akin melauak (Ezeq. 38:23). ¿Kenon nochiuas yejuin?

18. a) ¿Tlenon okijto Ageo 2:6, 20-22 ika nochiuas? b) ¿Kenon tikmatij ika tlen okijto Ageo nochiuas ika tlayekapan?

 ¹⁸ Miyek xiujtin sakin ika yomijka Ageo, apóstol Pablo okijto ika tlen ikuiliujtok ipan Ageo 2:6, 20-22 nochiuas ika tlayekapan (xpoua). Pablo okijkuilo: “Pero aman kijtoua: ‘Oksejpa nitlauiuixos, pero xsan in tlaltikpaktli nikuiuixos, yej no nikuiuixos on cielo’. On tlajtojli ‘oksejpa’, kijtosneki ika Dios kejkuanis nochi on tlajtlamach yejuan uelij nouiuixouaj, niman kinkauas on yejuan xkaman uelij nouiuixouaj” (Heb. 12:26, 27). Tlen kijtoua yejuin tlaxelojli xsan noijki ken tlen kijtoua Ageo 2:7, pampa ijkuak nikan kijtoua ika toTajtsin oksejpa tlauiuixos noso tlatsejtselos, kijtosneki ika kinpopolos nochimej akin, ijkon ken faraón, xkinekij makinyekana.

19. ¿Tlenon xkeman popoliuis, niman kenon tikmatij yejon?

¹⁹ ¿Tlenon xkeman kitsejtseloskej noso kipopoloskej? Ipan Hebreos 12:28, Pablo okijkuilo: “Yejua ika tej, ma tikmakakan tlaxtlauijli Dios pampa tikseliaj sen yenkuik lugar yejuan xuelis nejkuanis [noso notsejtselos]. Ma tikmauistilikan Dios ikan nochi cuidado niman ikan tetlakaitalistli ken kipaktia”. Ijkuak Jehová sa ika tlami tlatsejtselos, sa iTekiuajyo nokauas, xkeman popoliuis (Sal. 110:5, 6; Dan. 2:44).

20. ¿Tlenon noneki kitlapejpeniskej tlaltikpakchanejkej, niman kenon uelis tikinpaleuiskej?

²⁰ ¡Itlantika tiempo! Niman tlaltikpakchanejkej noneki kitlapejpeniskej tla xkikajkauaskej tlen aman xkuajli kichiuaj niman kinpopoloskej noso nopatlaskej niman kichiuaskej tlen toTajtsin kineki para nochipa uelis nemiskej (Heb. 12:25). Ijkuak titenojnotsaj, tikinpaleuiyaj tlaltikpakchanejkej makitlapejpenikan tlenon kichiuaskej. Yejua ika, nochipa matitlapaleuikan para más miyekej makineltokakan ika san iTekiuajyo toTajtsin uelis tlayektlalis. Niman nochipa matikilnamiktokan tlen Jesús okijto: “Yejuin kuajli tlajtoltin itech Tekiuajyotl notenojnotsas ipan nochi tlaltikpaktli niman ijkon nochimej kalpamej makimatikan, niman kuakon tlapopoliuis ipan yejuin tlaltikpaktli” (Mat. 24:14, TNM).