TLAMACHTIJLI 40
Miyekej kinyekanaj ipan “kuajli ojtli”
“Yejuan okiyekankej miyek tlakatl ipan kuajli ojtli [...] petlaniskej kenon sitlalimej yejuan petlanij para nochipa” (DAN. 12:3).
TLAKUIKAJLI 151 Jehová kinnotsas
TLEN TIKITASKEJ a
1. ¿Tlenon panos ijkuak Jesús tekiuajtitos Mil xiuitl ipan tlaltikpaktli?
IJKUAK Jesús tekiuajtitos Mil xiuitl nikan ipan tlaltikpaktli, peuas kinyolitis akin yomijkej. ¡San xkonnemili kenon kualtsin yes yejon tonajli! Tejuamej tiknekij oksejpa tikimitaskej tochanejkauan niman toamigos akin yoliuiskej. Niman Jehová noijki kimitasneki (Job 14:15). San xkonnemili kenon miyekej oksejpa kimitaskej inchanejkauan akin yomijkej. Ipan okse tlamachtijli otikitakej ika akin “yolmelajkej”, akin inestokej ipan amoxtli tlen kijtoua akinomej kipiyaskej nemilistli, “yoliskej [...] para kipiyaskej nemilistli yejuan para nochipa” (Hech. 24:15; Juan 5:29). Kanaj miyekej toamigos noso tochanejkauan, yejuamej akin kachtopa kinyolitiskej ipan tlaltikpaktli. b Noijki akin “xyolmelajkej”, noso akin xokixmatkej Jehová noso xokitekichiuilijkej ijkuak yoltoyaj, “yoliskej niman nokuiteuaskej para kintlajtlakolmakaskej”.
2, 3. a) Ken kijtoua Isaías 11:9, 10, ¿katlejua tekitl nochiuas? b) ¿Tlenon tikitaskej ipan yejuin tlamachtijli?
2 Nochimej akin yoliuiskej nonekis miyek tlen nomachtiskej (Is. 26:9; 61:11). Ika yejon, nonekis chikauak titenojnotsaskej niman titemachtiskej (xpoua Isaías 11:9, 10). Akin xyolmelajkej nonekis nomachtiskej itech Jesús, itech iTekiuajyo toTajtsin niman itech ken Jesús otechmakixti. Noijki, nonekis kasikamatiskej tlenon kijtosneki itoka Jehová niman nonekis kasikamatiskej ika san yejua kimelaua tlayekanas. Niman akin yolmelajkej noijki nonekis nomachtiskej itech tlen Jehová yotechuajmachtijtia itech tlen kineki manochiua ipan tlaltikpaktli. Sekimej itekipanojkauan toTajtsin omijkej ijkuak xitlamiya noijkuilouaya Biblia. Kuakon, nochimej akin yoliuiskej, akin “yolmelajkej” niman akin “xyolmelajkej”, nonekis miyek nomachtiskej.
3 Ipan yejuin tlamachtijli tiknankiliskej yejuin: ¿kenon titenojnotsaskej niman titemachtiskej?, ¿tlenon inpan nochiuas akin kinekiskej matikinmachtikan itech Jehová? niman ¿tlenon inpan nochiuas akin xkinekiskej matikinmachtikan itech Jehová? Tla tiknankiliaj yejuin melak techpaleuis. Amantsin tikimitaskej seki teotlajtoltin tlen uajlauej ipan amoxtli Daniel niman Apocalipsis. Yejon teotlajtoltin techpaleuiskej matikmatikan tlenon panos ijkuak peuas yoliuiskej akin yomijkej. Kachtopa matikitakan tlen Daniel 12:1, 2 kijtoua ika panos.
“YEJUAN YOMIKKEJ, YEJUAN NEMIJ IPAN INTLALKON, OKSEJPA YOLIUISKEJ”
4, 5. Ijkon ken kijtoua Daniel 12:1, ¿tlenon panoskia itlamiyan tonaltin?
4 (Xpoua Daniel 12:1). Amoxtli Daniel techijlia tlenon kachtopa panoskia itlamiyan tonaltin. Daniel 12:1 kijtoua ika Miguel noso Jesucristo, “kinmanauiya” itekipanojkauan toTajtsin. Yejuin teotlajtojli opeuj nochiua ipan 1914, ijkuak Jesús opeuj tekiuajti ipan iTekiuajyo toTajtsin.
5 Daniel noijki okijlikej ika Jesús kinpaleuiskia itekipanojkauan toTajtsin ijkuak “on tlajyouilistli yes kenon yejuan xkaman oonyak desde ijkuak opeu onokej on naciones”. ¿Katlejua tlajyouilistli noteneujtika? Ueyi tlajyouilistli tlen noteneua ipan Mateo 24:21. Jesús kinmakixtis itekipanojkauan toTajtsin itlamiyan ueyi tlajyouilistli noso ijkuak peuas Armagedón. Amoxtli Apocalipsis kintokayotia ken “sajnoye miyek tlakatl” akin Jesús kinmakixtis ipan “temojtij tlajyouilistli” (Apoc. 7:9, 14).
6. ¿Tlenon panos ijkuak yejon “sajnoye miyek tlakatl” makisaskej itech ueyi tlajyouilistli, niman tleka ijkon tikijtouaj? (Noijki xkita ipan yejuin revista tlamachtijli “Tlen notlajtoltiaj akin kitaj revistas” kampa tlajtoua itech akin yoliuiskej ipan tlaltikpaktli).
6 (Xpoua Daniel 12:2). ¿Tlenon panos ijkuak yejon “sajnoye miyek tlakatl” makisaskej itech ueyi tlajyouilistli? Teotlajtojli tlen uajlauj ipan Daniel 12:2 kijtoua ika yoliuiskej. Kachtopa tikijtouayaj ika yejuin teotlajtojli kiteneujtoya tlen ipan opanok ikalpan Jehová. Itekipanojkauan Jehová chikauak tenojnotstoyaj, san ika, ipan 1918 okinteltilijkej intekiyo. Ika yejon, tikijtouayaj ika yejuamej kentla oksejpa oyoliujkej pampa sakin oksejpa opeuj chikauak tenojnotsaj. c San ika, aman tikasikamatij ika ijkuak yejuin teotlajtojli kijtoua “oksejpa yoliuiskej”, kinteneujtika nochimej akin yoliuiskej ipan yenkuik tlaltikpaktli. ¿Tleka ijkon tikijtouaj? Pampa ika tlajtojli hebreo ipan Job 17:16 niman Daniel 12:2, kitekitiltia sa no yejua tlajtojli. Kitekitiltia tlajtojli “tlalkuechtli” ijkuak kijtoua ika kinyolitiskej oksekimej. Ika yejon, ueli tikijtouaj ika Daniel 12:2 kinteneujtika akin yoliuiskej nikan ipan tlaltikpaktli sakin ika yotlan ueyi tlajyouilistli niman sakin ika yopanok Armagedón.
7. a) ¿Tlenon kijtosneki Daniel 12:2 ijkuak kijtoua ika sekimej yoliuiskej “para nochipa nemiskej”? b) ¿Tleka más kuajli yoliuiskej?
7 Aman tej, ¿tlenon kijtosneki Daniel 12:2 ijkuak kijtoua ika sekimej yoliuiskej “para nochipa nemiskej”? Kijtosneki ika akin kitlakamatiskej Jehová niman Jesús ipan 1,000 xiuitl kiseliskej nemilistli tlen xkeman tlamis. Kuakon, akin yoliuiskej noneki kinektoskej kixmatiskej Jehová noso tla ikixmatiyaj, noneki kinektoskej más kixmatiskej niman ijkon uelis nochipa nemiskej (Juan 17:3). Yejuamej más kuajli yoliuiskej xijkon ken akin yeuejkaui okinyolitijkej (Heb. 11:35). ¿Tleka? Pampa maski okinyolitijkej, oksejpa omijkej pampa tlajtlakolejkej katka.
8. ¿Tlenon kijtosneki ika sekimej yoliuiskej “para nopijpinajtiskej niman para nochipa tlajyouiskej”?
8 San ika, akin yoliuiskej xnochimej kinekiskej makinmachtikan itech Jehová. Teotlajtojli tlen uajlauj ipan Daniel kijtoua ika sekimej yoliuiskej “para nopijpinajtiskej niman para nochipa tlajyouiskej”. Pampa yejuamej xkinekiskej nomachtiskej, intoka xkimijkuiloskej ipan amoxtli tlen kijtoua akinomej kipiyaskej nemilistli nion xkipiyaskej nemilistli tlen xkeman tlamis. Yejuamej “nochipa tlajyouiskej” noso kinpopoloskej. Kuakon, Daniel 12:2 tlajtotika itech tlen inpan nochiuas akin yoliuiskej. Niman yejon nomatis ijkuak Jehová kitas tlenon kichiuaj sakin ika yoyoliujkej d (Apoc. 20:12). Sekimej kiseliskej nemilistli tlen xkeman tlamis, niman oksekimej kinpopoloskej.
MIYEKEJ KINUIKAJ IPAN “KUAJLI OJTLI”
9, 10. ¿Tlenon okseki nochiuas sakin ika yopanok ueyi tlajyouilistli, niman akinomej “petlaniskej kenon istak moxtli ipan cielo”?
9 (Xpoua Daniel 12:3). ¿Tlenon okseki nochiuas sakin ika yopanok tlajyouilistli, tlen sa achijtsin poliui ika nochiuas? Ipan Daniel 12:2 yotikitakej seki tlen panos, san ika, ipan tlaxelojli 3 techijlia okse tlen panos sakin ika yopanok ueyi tlajyouilistli.
10 ¿Akinomej “petlaniskej kenon istak moxtli ipan cielo”? Yejuin tiknextiaj ipan Mateo 13:43, kampa Jesús okijto: “On tlakamej kuajkualtin petlaniskej ken on tonaltsintli ne kampa inTajtsin tlamandaroua”. Ijkuak Jesús okijto yejuin, tlajtotoya itech “tekoneuan itech Dios” noso tlapejpeniltin akin iuan tekiuajtiskej ne iluikak ipan iTekiuajyo toTajtsin (Mat. 13:38). Kuakon, Daniel 12:3 tlajtotika itech tlapejpeniltin niman itech tekitl tlen kichiuaskej ipan Mil xiuitl ijkuak Cristo tlayekantos ipan tlaltikpaktli.
144,000 niman Jesucristo kinyekanaskej akin chikauak tenojnotsaskej niman temachtiskej ipan tlaltikpaktli ipan 1,000 xiuitl. (Xkita párrafo 11).
11, 12. ¿Tlen tekitl kichiuaskej on 144,000 ipan Mil xiuitl?
11 Tlapejpeniltin miyekej kinuikaskej ipan “kuajli ojtli”. ¿Kenon? Yejuamej iuan Jesucristo kinyekanaskej akin chikauak tenojnotsaskej niman temachtiskej ipan tlaltikpaktli ipan Mil xiuitl. Niman yejon 144,000 xsan tekiuajkej yeskej, noijki teopixkej yeskej (Apoc. 1:6; 5:10; 20:6). Kuakon, yejuamej kentla kinpajtiskej tlaltikpakchanejkej noso kinpaleuiskej para maka sa makipiyakan tlajtlakojli (Apoc. 22:1, 2; Ezeq. 47:12). ¡Tokniuan tlapejpeniltin melak yolpakiskej ijkuak kichiuaskej yejuin tekitl!
12 ¿Akinomej kinuikaskej ipan “kuajli ojtli”? Akin yoliuiskej, akin makisaskej ipan Armagedón niman kokonej akin uajnemiskej ipan yenkuik tlaltikpaktli. Itlamiyan Mil xiuitl, nochimej akin nemiskej ipan tlaltikpaktli xok kipiyaskej tlajtlakojli. Kanaj aman timotlajtoltia: “¿Kemanon kimijkuiloskej intoka ika lapicero ipan amoxtli tlen kijtoua akinomej kipiyaskej nemilistli?”.
IJKUAK SA IKA TLAMI TETLATLATAS SATANÁS
13, 14. ¿Tlenon nonekis kichiuaskej akin xok kipiyaskej tlajtlakojli tla kinekiskej kipiyaskej nemilistli tlen xkeman tlamis?
13 Matikilnamikikan ika yakaj akin xok tlajtlakole xkijtosneki tla ikiselis nemilistli tlen xkeman tlamis. San matontlanemilikan itech Adán niman Eva. Yejuamej xtlajtlakolejkej katkaj, maski ijkon, nonekiya kitlakamatiskej Jehová tla kinekiyaj kipiyaskej nemilistli tlen xkeman tlamis. San ika, xotetlakamatkej (Rom. 5:12).
14 Ken yotikitakej, itlamiyan 1,000 xiuitl nochimej akin chantiskej ipan tlaltikpaktli xok kipiyaskej tlajtlakojli. ¿Nochimej kipaleuiskej iTekiuajyo Jehová? ¿Noso sekimej xmelajkanemiskej ijkon ken okichiujkej Adán niman Eva? ¿Kenon tikmatiskej akinomej melajkanemiskej itech Jehová?
15, 16. a) ¿Kemanon kiteititiskej nochimej tlaltikpakchanejkej tla melajkanemij itech Jehová? b) ¿Tlenon panos ijkuak Satanás kintlatlatas tlaltikpakchanejkej ijkuak tlamis 1,000 xiuitl?
15 Satanás kitsakuaskej 1,000 xiuitl. Ijkuak tsauktos xuelis tekajkayauas. San ika, ijkuak tlamis 1,000 xiuitl kimakauaskej niman kinekis kinkajkayauas nochimej tlaltikpakchanejkej akin xok tlajtlakolejkej yeskej. Ijkuakon, akin xok kipiyaskej tlajtlakojli nonekis kiteititiskej tla yemelak kinekij ika san iTekiuajyo toTajtsin makinyekana (Apoc. 20:7-10). Akin melajkanemiskej niman kipaleuiskej iTekiuajyo toTajtsin, xkinpopoloskej intoka ipan amoxtli tlen kijtoua akinomej kipiyaskej nemilistli.
16 Sekimej yeskej ken Adán niman Eva, xkinekiskej kipaleuiskej iTekiuajyo Jehová. ¿Tlenon inpan nochiuas? Apocalipsis 20:15 technankilia, ompa kijtoua: “On yejuan xtlajkuilolnestikatka imintoka ipan on amamoxtli yejuan kijtoua akinomej kipiyaj yenkuik nemilistli para nochipa, ompa okominxinijkej ipan on tliko”. Kema, nochimej akin xkitlakamatiskej Jehová kinpopoloskej. San ika, más miyekej nemiskej akin melajkanemiskej itech Jehová niman makisaskej. Intoka nochipa ijkuiliujtos ipan amoxtli tlen kijtoua akinomej kipiyaskej nemilistli.
IPAN “SA IKA NOCHI TONAJLI”
17. ¿Tlenon okijlikej Daniel ika panoskia ipan yejuin tonaltin? (Daniel 12:4, 8-10).
17 ¡Sa tiknektokej tikitaskej tlenon panos ika tlayekapan! San ika, noijki tiknekij tikmatiskej tlenon panos ipan yejuin tonaltin. Niman ipan Biblia tikitaj ika se ángel okijli Daniel tlenon panoskia ipan “sa ika nochi tonajli” (xpoua Daniel 12:4, 8-10; 2 Tim. 3:1-5). Yejon ángel okijli: “On tlaixmatkilistli más miyekiyas”. Kuakon, ikalpan toTajtsin más kuajli kinmasikamatiskia teotlajtoltin tlen uajlauej ipan Daniel. Niman yejon ángel noijki okijto: “On xkuajkualtin tlakamej saken kichiuaskej on tlen xkuajli, niman xkajsikamatiskej on tlen nikan tlajkuilolnestikaj”.
18. ¿Tlenon inpan nochiuas akin xkuajkualtin?
18 Ipan yejuin tonaltin nemij miyekej akin kichiuaj tlen yejuamej kinekij niman xakaj itlaj kinchiuilia (Mal. 3:14, 15). San ika, sa achijtsin poliui Jesús kintlajtlakolmakas chivos niman kinxelos itech borreguitos (Mat. 25:31-33). Akin xkuajkualtin xmakisaskej niman xyoliuiskej ipan yenkuik tlaltikpaktli. Intoka xnestos ipan “amoxtli tlen tetlalnamiktia”, tlen noteneua ipan Malaquías 3:16.
19. ¿Tlenon noneki tikchiuaskej, niman tleka? (Malaquías 3:16-18).
19 Aman noneki tikteititiskej ika tejuamej xtikchiuaj ijkon ken akin xkuajkualtin (xpoua Malaquías 3:16-18, TNM). e Jehová kinsentlalijtika iyaxkauan akin “melak tlasojtij”. ¿Xmelak ika tiknekij teuan matechpoua?
¡Melak tiyolpakiskej ijkuak tikitaskej kenon Daniel niman akin melak tikintlasojtlaj yoliuiskej ipan yenkuik tlaltikpaktli! (Xkita párrafo 20).
20. ¿Tlenon okijlikej Daniel, niman tleka tiknekij manochiua tlen okijlikej?
20 Techyolpaktia ijkuak tikitaj ika inochiujtokej seki teotlajtoltin. San ika, sakin nochiuaskej okseki tlen melak techyolpaktiskej. Kachtopa tikitaskej kenon kipopoloskej nochi tlen xkuajli niman sakin tikitaskej kenon nochiuas tlen Jehová okijli Daniel. Yejua okijli: “Ipan on sa ika nochi tonaltin oksejpa tiyoliuis para tikselis motlayokolil” (Dan. 12:13). ¿Sa tiknektika mayejko yejon tonajli ijkuak Daniel niman akin melak tikintlasojtla mayoliuikan? Tla kema, xmokojtili xmelajkanemi itech Jehová niman ijkon yejua xkeman kipopolos motoka ipan amoxtli tlen kijtoua akinomej kipiyaskej nemilistli.
TLAKUIKAJLI 80 Xkitakan kenon Jehová yolkuajli
a Ipan yejuin tlamachtijli tikitaskej ika yonopatlak ken tikasikamatij Daniel 12:2, 3, kampa kijtoua kenon chikauak titenojnotsaskej niman kenon miyekej tikinmachtiskej. Tikitaskej kemanon nochiuas yejuin tekitl niman tikitaskej akinomej kichiuaskej. Noijki tikitaskej kenon yejuin tekitl nochimej kinpaleuis para matlaxikokan ipan itlamiyan Mil xiuitl, ijkuak Satanás tetlatlatas.
b Kanaj kachtopa kinyolitiskej akin omelajkanenkej ipan itlamiyan tonaltin niman sakin ijkon ika yolik kinyolitijtiaskej oksekimej. Ijkon nochimej uelis kinseliskej akin okimixmatkej. Ijkuak ne iluikak kinyolitiaj tlapejpeniltin, kuajli nochiujtiuj pampa Biblia kijtoua: “Cada se ipan nochiuas ijkuak kitocaros”. Ika yejon, tiknemiliaj ika ijkuak kinyolitiskej akin nemiskej nikan ipan tlaltikpaktli noijki kuajli nochiujtias (1 Cor. 14:33; 15:23).
c Yejuin kipatla tlen onoijtojka ipan libro Prestemos atención a las profecías de Daniel capítulo 17 niman ipan La Atalaya del 1 de julio de 1987, páginas 21-25.
d Ijkuak Hechos 24:15 tlajtoua itech akin “yolmelajkej” niman akin “xyolmelajkej” niman ijkuak Juan 5:29 tlajtoua itech akin “on yejuan okichijkej tlen kuajli” niman “on yejuan okichijkej tlen xkuajli” kiteneujtokej nochi tlen okichiujkej akin yoliuiskej achto mikiskiaj.
e Malaquías 3:16-18: “16 Ipan yejon tonaltin akin kimojkaitayaj Jehová otlajtokej se iuan okse, se iuan akin kistinemij, niman Jehová xnoteltiaya ika kuajli kinkakiya. Niman se amoxtli tlen tetlalnamiktia onoijkuilo ixpan inpampa akin kimojkaitayaj Jehová niman akin tlanemiliayaj itech itoka. 17 ‘Niman yejuamej noyaxkauan yeskejʼ, kijtoua Jehová akin kinyekana akin tlaixnamikij, ‘ipan tonajli ijkuak nikchiuas manochiuakan noyaxkauan tlen melak tlasojtij. Nejua nikimititis teiknelilistli, ijkon ken se tlakatl kititia teiknelilistli ikoneuj akin kitekichiuilia. 18 Niman nemejuamej oksejpa nenkitaskej kenon xsan noijki se akin yolmelajki niman se xkuajli tlakatl, se akin kitekichiuilia toTajtsin niman se akin xkitekichiuiliaʼ”.
