Matikitakan tlen techijlia Biblia.

Hechos 24:15 kijtoua “ika on mikatsitsimej yoliuiskej nochimej yejuan yolmelajkej niman on yejuan xyolmelajkej”. ¿Akinomej on yolmelajkej? Nochimej akin okitlakamatkej toTajtsin ijkuak ximikiyaj. Niman intoka inestika ipan amoxtli kampa kijtoua akinomej kipiyaskej nemilistli (Mal. 3:16). ¿Niman akinomej on xyolmelajkej? Akin xokixmatkej Jehová ijkuak yoltoyaj. Niman intoka xnestika ipan amoxtli tlen kijtoua akinomej kipiyaskej nemilistli.

Juan 5:28, 29 kijtoua ika “yejuan okichijkej tlen kuajli, yoliskej [...] para kipiyaskej nemilistli yejuan para nochipa”. Niman “on yejuan okichijkej tlen xkuajli, yoliskej [...] para kintlajtlakolmakaskej”. Akin nikan okinteneuj Jesús sa no yejuamej akin noteneuaj ipan Hechos 24:15. Akin yolmelajkej okichiujkej tlen kuajli ijkuak ximikiyaj. Yejuamej yoliuiskej para kipiyaskej nemilistli tlen xkeman tlamis pampa intoka inestika ipan amoxtli tlen kijtoua akinomej kipiyaskej nemilistli. San ika, akin xyolmelajkej okichiujkej tlen xkuajli ijkuak yoltoyaj. Yejuamej yoliuiskej para kintlajtlakolmakaskej pampa intoka xinestika ipan amoxtli tlen kijtoua akinomej kipiyaskej nemilistli. Yejuin kijtosneki ika kinmachtiskej itech Jehová, niman ijkon, Jehová kitas tla yejuamej kinmelaua kimijkuilos ipan amoxtli tlen kijtoua akinomej kipiyaskej nemilistli.

Apocalipsis 20:12, 13 kijtoua ika nochimej akin yoliuiskej nonekis kintlakamatiskej “on amamoxtin”, noso, yenkuikej tlanauatiltin tlen techinmakaskej ipan yenkuik tlaltikpaktli. Akin xkintlakamatiskej yejuin tlanauatiltin kinpopoloskej (Is. 65:20).

Daniel 12:2 kijtoua ika “yejuan nemij ipan intlalkon, oksejpa yoliuiskej: sekimej para nochipa nemiskej, niman oksekimej para nopijpinajtiskej niman para nochipa tlajyouiskej”. Yejuin tlaxelojli techijlia tlenon inpan panos akin yoliuiskej itlamiyan mil xiuitl. Sekimej “nochipa nemiskej” niman oksekimej “nochipa tlajyouiskej”. Yejuin kijtosneki ika sekimej kipiyaskej nemilistli tlen xkeman tlamis niman oksekimej kinpopoloskej (Apoc. 20:15; 21:3, 4).

Matikontlalikan ika yejuin ome grupos akin yoliuiskej yeskiaj ken sekimej akin kinekij yaskej ipan okse país. Akin yolmelajkej yeskiaj ken akin kinkauilia gobierno ompa mauejkauikan matekitikan noso machantikan ipan yejon país. Akin xyolmelajkej yeskiaj ken akin san kinkauiliaj ompa mapaxalotij, san ika, xkinkauiliaj ompa melak mauejkauikan. Niman tla yejuamej kinekij ompa chantiskej, noneki kintlakamatiskej nochi tlanauatiltin tlen kinmaka gobierno ipan yejon país. Noijki ijkon, tla akin xyolmelajkej kinekij nemiskej ipan yenkuik tlaltikpaktli, noneki kintlakamatiskej itlanauatiluan Jehová niman kiteititiskej ika yolmelajkej. San ika, tla yejuin ome grupos kinekij nochipa nemiskej ipan yejon país, noneki kintlakamatiskej tlanauatiltin pampa, tla xijkon kichiuaj, kinuajkixtiskej. Noijki ijkon, tla akin yoliuiskej kinekij nochipa nemiskej ipan tlaltikpaktli, noneki tetlakamatiskej niman kiteititiskej ika yemelak tlaneltokaj itech Jehová.

Jehová melak tetlasojtla, san ika, noijki nochipa kichiua tlen melajki (Deut. 32:4; Sal. 33:5). Yejua kiteititis ika melak tetlasojtla ijkuak kinyolitis akin yolmelajkej niman akin xyolmelajkej. San ika, noijki kinekis ika nochimej makintlakamatikan itlanauatiluan itech tlen kuajli niman itech tlen xkuajli. Kuakon, san akin yemelak kitlasojtlaskej Jehová niman kintlakamatiskej itlanauatiluan, nochipa nemiskej ipan yenkuik tlaltikpaktli.