1. ¿Tlenon okijto Pedro ijkuak Jesús okichiuj makimajsikan miyekej michimej?

 PEDRO yotekitka nochi yeuajli niman xkajsiya nion se michin. San ika, Jesús okijli: “Xkuika in barco ne kampa más uejkatlan niman ompa xkonchapanikan nemomatlauan para nenkimajsiskej michimej” (Luc. 5:4). Maski Pedro xkineltokaya tla ueliskia kinmajsis michimej, okichiuj tlen okijli. Melak miyekej michimej okimajsikej, hasta inmatlauan opeuj kojkotonij. Pedro niman akin iuan nemiyaj okitakej ika yejon katka se milagro, yejua ika, otlamojkaitakej. Pedro okijto: “Xnechtlalkaui noTEKO, pampa nejua nitlajtlakolej” (Luc. 5:​6-9). Nesiya ika kimachiliaya ika nion xkinamikiya nemis ixpan Jesús.

2. ¿Kenon techpaleuiya tla tomachtiaj itech Pedro?

² Melauak, Pedro tlajtlakole katka. Biblia kijtoua ika kemantika okijto noso okichiuj itlaj niman sakin onoyolkuep. ¿Noijki timomachilia ijkon ken Pedro? ¿Youejkauj ika tikneki más kuajli tikchiuas itlaj? Tla ijkon mopan nochiua, maka xmosiaujkaua. Uelis mitspaleuis tla timomachtia tlen okichiuj apóstol Pedro. Xnemili nochi tlen xkuajli okichiuj. Yejuin ueliskia xnoijkuilos ipan Biblia, san ika, toTajtsin okichiuj manoijkuilo niman ijkon techmachtis itlaj tlen ueyi kijtosneki (2 Tim. 3:​16, 17). Ijkuak tomachtiaj itech Pedro, se tlakatl akin tlajtlakole niman kimachiliaya tlen tejuamej  tikmachiliaj, tikitaj ika Jehová xkichia maka keman matopopolokan. Yejua kineki maka matosiaujkauakan niman matitlaxikokan maski titlajtlakolejkej.

3. ¿Tleka xnoneki tosiaujkauaskej?

³ ¿Tleka xnoneki tosiaujkauaskej? Pampa tla itlaj miyekpa tikchiuaj, sakin más kuajli tiueliskej. Matitlanemilikan itech yejuin: yakaj akin kineki itlaj kitsotsonas kanaj uejkauis para kuajli uelis. Kanaj kachtopa miyekpa xkuajli kintsotsonas seki notas, san ika, tla kuajli nomajmachtia, kipaleuis más maueli. Maski tla kuajli youel, sakin kanaj ok nopopolos. San ika, yejua xnosiaujkaua, más nomajmachtia. Tejuamej noijki ijkon topan nochiua. Maski tiknemiliaj ika itlaj xok tikchiuaj, sakin oksejpa uelis tikchiuaskej. San ika, kema uelis tikchiuaskej tlen kuajli. Tinochimej tikijtouaj noso tikchiuaj itlaj niman sakin toyolkuepaj, san ika, tla xtosiaujkauaj, Jehová techpaleuis matiktlakamatikan (1 Ped. 5:10). Matikitakan kenon Pedro xonosiaujkauj. Ken Jesús okikneli maski onopopolo, uelis techpaleuis matiktekichiuilijtokan Jehová.

4. ¿Tlenon okijto Pedro itech yejua, niman kenon okiyolseui Jesús? (Lucas 5:​5-10).

⁴ Biblia xkijtoua tleka Pedro okijto ika melak tlajtlakole nion ipan tlen tlajtlakojli tlanemilijtoya (xpoua Lucas 5:​5-10). San ika, kanaj yejua okichiuj tlen melak xkuajli. Jesús okitak ika Pedro nomojtiaya. Pedro kanaj ijkon nomachiliaya pampa xitech tlaneltokaya. San ika, Jesús noijki kimatstoya ika Pedro ueliskia itech melajkanemis. Kuakon, okiyemankaijli: “Maka xmomojti”. Pampa Pedro okitak ika Jesús itech tlaneltokaya melak okipaleui. Sakin, yejua niman ikniuj, Andrés, okikaujkej intekiyo niman ijkon más tenojnotsaskej iuan Jesús. Pampa ijkon okichiujkej, melak okinteochiujkej (Mar. 1:​16-18).

5. ¿Tlenon opanok pampa Pedro onochiuj inomachtijkauj Cristo?

⁵ Pampa Pedro onochiuj inomachtijkauj Cristo, okitak miyek tlen kualtsin. Okitak kenon Jesús otepajti, okintekixtili demonios niman hasta oteyoliti (Mat. 8:​14-17; Mar. 5:​37, 41, 42). b Noijki, ipan se tlatlachalistli okitak kenon Jesús ueyixtoskia ijkuak tekiuajtiskia. Yejua xkeman okilkauj yejuin tlen okitak (Mar. 9:​1-8; 2 Ped. 1:​16-18). Pedro okitak tlen xkeman kinemiliaya. Tla  yejua nosiaujkauaskia, xkitaskia kenon toTajtsin kiteochiuaskia.

6. ¿Pedro nimantsin okikajkauj ika nopopoloua?

⁶ Maski Pedro miyek okikak niman miyek okitak, miyekpa onopopolo. Ijkuak Jesús okijto ika nonekiya tlajyouis niman mikis niman ijkon nochiuas tlen kijtoua Biblia, Pedro okajuak (Mar. 8:​31-33). Miyekpa, Pedro niman oksekimej apóstoles onokualanijkej itech akinon más ueyixtoya (Mar. 9:​33, 34). Ipan yeuajli ijkuak imikiskia Jesús, Pedro melak okualan niman okitekili inakas se tlakatl (Juan 18:10). Noijki, ipan yejon yeuajli melak onomojti niman yexpa okijto ika xkixmatiya Jesús (Mar. 14:​66-72). Sakin, melak ochokak (Mat. 26:75).

7. Sakin ika oyoliuj Jesús, ¿tlenon okijli Pedro makichiua?

⁷ Pedro melak najmantoya, san ika, Jesús xokinemili tla xok keman ueliskia nopatlas. Sakin ika oyoliuj, okikauili Pedro makititi ika kitlasojtla. Okijli kuajli makinyekana iborreguitos (Juan 21:​15-17). Niman Pedro okinek ijkon kichiuas. Yejua ika, nemiya ne Jerusalén ipan iluitl Pentecostés niman ompa noijki okitlapejpenijkej ika espíritu santo.

8. ¿Tlenon xkuajli okichiuj Pedro ne Antioquía?

⁸ Maski Pedro okiseli espíritu santo, ok nopopolouaya. Ipan xiuitl 36 Pedro okitak ika Cornelio, se tlakatl akin xjudío katka, okiseli espíritu santo. Yejuin kuajli okiteititi ika toTajtsin xtechikoita niman ika akin xjudíos noijki ueliskia nemiskiaj ipan tlanechikojli (Hech. 10:​34, 44, 45). Ijkuakon, Pedro opeuj tlakua imiuan akin xjudíos, yejuin itlaj tlen yeuejkaui xkeman kichiuaskia (Gál. 2:12). Sekimej tokniuan kinemiliayaj ika akin judíos xnonekiya tlakuaskej imiuan akin xjudíos. Ijkuak sekimej akin ijkon tlanemiliayaj oajsikej Antioquía, Pedro xok otlakua imiuan akin xjudíos. Kanaj yejua ijkon okichiuj pampa xkinekiya kinyolkokos tokniuan akin judíos katkaj. Ijkuak apóstol Pablo okitak yejuin, okajuak Pedro imixpan nochimej (Gál. 2:​13, 14). Maski Pedro onopopolo, xonosiaujkauj. ¿Tlenon okipaleui?

9. Ken kijtoua Juan 6:​68, 69, ¿kenon okiteititi Pedro ika melajkanemiya itech Jesús?

⁹ Pedro xkeman onosiaujkauj pampa kinekiya yolmelajkanemis itech Jesús. Sejpatipan, ijkon okiteititi ijkuak Jesús okijto itlaj tlen inomachtijkauan xokasikamatkej (xpoua Juan 6:​68, 69). Miyekej okikaujkej Jesús niman xokichiakej makintomili tlenon kijtosnekiya tlen okimijlika. San ika, Pedro xokikauj. Yejua, ijkin okijli Jesús imixpan nochimej: “San motlajtoltsin yejuan tikijtoua yejua kitemaka nemilistli yejuan para nochipa”.

10. ¿Kenon okiteititi Jesús ika tlaneltokaya itech Pedro? (Noijki xkita tlaixkopinajli).

¹⁰ Jesús xkeman okikauj Pedro. Ipan yeuajli achto mikiskia Jesús yejua kimatstoya ika Pedro niman oksekimej iapóstoles kitlalkauiskiaj. Maski ijkon, okiteititi ika kineltokaya ika Pedro itech melajkanemiskia (Luc. 22:​31, 32). Jesús kimasikamatiya inomachtijkauan, ika yejon, okijto: “Nemoespíritu kineki kichiuas kuajli, pero nemonakayo xkojtik” (Mar. 14:38). Yejua ika, maski Pedro okijto ika xkixmatiya Jesús, xkeman okinemili tla Pedro xueliskia nopatlas. Sakin ika oyoliuj, Jesús ouajnonexti ixpan Pedro. Yejua ijkon okichiuj kanaj ijkuak Pedro san iselti nemiya (Mar. 16:7; Luc. 24:34; 1 Cor. 15:5). Kuajli tikmatstokej ika yejuin  okipaleui apóstol Pedro maka melak manajmana.

11. ¿Kenon Jesús okititi Pedro ika Jehová kitlajpiyaskia?

¹¹ Jesús kuajli okititi Pedro ika Jehová kitlajpiyaskia. Ijkuak oyoliuj, Jesús okichiuj ika Pedro niman oksekimej apóstoles oksejpa makimasikan miyekej michimej (Juan 21:​4-6). Kuajli tikmatstokej ika yejuin milagro okititi Pedro ika Jehová ueliskia kimakas nochi tlen kipolouaya. Kanaj ijkuakon Pedro okilnamik ika Jesús okijto ika Jehová kintlajpiyaskia akin chikauak kitekichiuiliaj (Mat. 6:33). Yejua ika, Pedro chikauak otenojnots niman xsajnoye otekit. Ipan Pentecostés itech xiuitl 33 melak miyekej okinpaleui makasikamatikan iTlajtol toTajtsin (Hech. 2:​14, 37-41). Niman sakin okinpaleui miyekej samaritanos niman akin xjudíos manochiuakan inomachtijkauan Cristo (Hech. 8:​14-17; 10:​44-48). Kuajli nesi ika Jehová okitekitilti Pedro niman ijkon kichiuas ika oksekimej mauajlakan ipan ikalpan.

12. ¿Kenon techpaleuiya tlen ipan onochiuj Pedro tla tiknekij tijkajkauaskej itlaj tlen xkuajli?

¹² Jehová noijki uelis techpaleuis maka matosiaujkauakan. Kemantika, uelis ouijtika tikitaskej xtosiaujkauaskej, más tla youejkauj tikyejyekojtokej tijkajkauaskej itlaj tlen xkuajli. Niman kanaj uelis tiknemiliskej ika tlen tejuamej tikixnamiktokej más ouijtika xken tlen Pedro okixnamik. San ika, Jehová uelis techpaleuis maka matosiaujkauakan (Sal. 94:​17-19). Matontlanemilikan itech se tokniuj tlakatl akin achto nochiuas iteixpantijkauj Jehová kinuelitaya tlakamej. Maski okikajkauj tlen yeuejkaui kichiuaya, kemantika ok xkuajli tlanemiliaya. ¿Tlenon okipaleui maka manosiaujkaua? Yejua kijtoua: “Jehová techyolchikaua. Yoniuel ika tla yejua techmaka iespíritu santo […], uelis nochipa […] tinemiskej ipan ikalpan”. Yejua noijki kijtoua: “Jehová yonechpaleui maniktekichiuili […], niman maski melak ninopopoloua, yejua nechyolchikaua”.

13. ¿Kenon uelis tikchiuaskej ken Pedro? (Hechos 4:​13, 29, 31; noijki xkita tlaixkopinajli).

¹³ Ken tikmatij, Pedro kimojtiaya tlen oksekimej ueliskia kinemiliskej, san ika, okitlajtlanili Jehová makipaleui niman onoyolchikauj (xpoua Hechos 4:​13, 29, 31).  Tejuamej noijki uelis toyolchikauaskej. Matitlajtokan itech Horst, se tokniuj telpochtli akin ochantik ne Alemania ijkuak panotoya Ika okpa Guerra ipan nochi tlaltikpaktli. Pampa oksekimej kichiualtiayaj makijto Heil Hitler, yejua kemantika ijkon kijtouaya. Itajuan xokajuakej, yej iuan okichiujkej teoyotl niman okitlajtlanilijkej Jehová makiyolchikaua. Pampa itajuan okipaleuijkej niman pampa más onopaleui itech Jehová, Horst ouel omelajkanen ipan escuela. Niman sakin okijto: “Jehová xkeman onechkauj”. c

14. ¿Kenon tlayekankej uelis kinyolchikauaskej tokniuan akin noyolajmanaj?

¹⁴ Jehová niman Jesús xkeman kinemiliskej tla xuelis topatlaskej. Sakin ika Pedro okijto ika xkixmatiya Cristo, ononek kitlapejpenis itlaj tlen ueyi kijtosneki. ¿Nosiaujkauaskia? ¿Noso ok yeskia inomachtijkauj Cristo? Jesús okitlajtlanili Jehová makipaleui Pedro para mamelajkanemi. Sakin, okijli Pedro ika yokichiujka teoyotl ipampa niman ika kuajli kimatstoya ika ueliskia kinyolchikauas tokniuan (Luc. 22:​31, 32). ¡Tikmatstokej ika Pedro melak noyolchikauaya ijkuak kilnamikiya itlajtoluan Jesús! Tejuamej noijki noneki tiktlapejpeniskej tlen ueyi kijtosneki. Ijkuakon, Jehová kanaj kintekitiltis tlayekankej para matimelajkanemikan (Efes. 4:​8, 11). Paul, akin youejkauj tlapaleuiya ken tlayekanketl, nokojtilia kinyolchikauas oksekimej. Ijkuak kita ika se tokniuj inosiaujkauasneki, kiyolchikaua makilnamiki kenon Jehová okuajuikak ipan ikalpan. Noijki kijlia ika pampa Jehová tetlasojtla niman xtekaua, xkeman kinemilis ika xok keman nopatlas. Yejuin tokniuj tlayekanketl  yokitak ika miyekej tokniuan akin najmanayaj yotlaxikojkej pampa Jehová kinpaleuiya.

15. ¿Kenon tlen ipan onochiuj Pedro niman Horst kiteititia ika nochipa nochiua tlen kijtoua Mateo 6:33?

¹⁵ Yotikitakej ika Jehová okipaleui Pedro niman oksekimej apóstoles niman ijkon makipiyakan tlen kinpolouaya. Yejua noijki techmakas tlen techpoloua tla chikauak tiktekichiuiliaj (Mat. 6:33). Sakin ika opanok Ika okpa Guerra ipan nochi tlaltikpaktli, Horst, akin otikteneujkej, okinemili nochiuas precursor. San ika, xkipiaya tomin niman xkimatiya tla ueliskia kipiyas tlen noneki tla nochiuaya precursor. ¿Tlenon okichiuj? Okitak tla Jehová ueliskia kipaleuis. Ijkuak tlayekanketl ipan circuito okitlajpaloto itlanechikol, yejua nochi semana otenojnots. Ijkuak otlan semana, tokniuj tlayekanketl okimakak Horst se amatsintli tlen kipiaya seki tomin tlen yakaj kinekiya kitlayokolis. ¡Horst melak okimojkatlachialti tlen opanok! Ika yejon tomin ueliskia tlapaleuis ken precursor seki metstin. Yejuin tlen opanok okititi Horst ika Jehová kitlajpiyaskia. Niman desde ijkuakon yejua chikauak opeuj kitekichiuilia toTajtsin (Mal. 3:10).

16. ¿Tleka noneki matikitakan tlen okichiuj Pedro niman tlen okijkuilo ipan icartas?

¹⁶ ¡Kuajli tikmatstokej ika Pedro melak okitlasojkamat ika Jesús xokitlalkaui ijkon ken okitlajtlanilijka! Cristo okipaleui Pedro mayolmelajkanemi niman makimititi oksekimej kenon nonekiya kitekichiuiliskej. Miyek tlen tiueliskej tla tikitaj kenon Jesús okipaleui Pedro. Pedro okiteneuj seki tlen techpaleuiya niman okseki tlemach ipan ome cartas tlen okintitlanili tlanechikoltin tlen onkatkaj ipan kachtopa siglo. Ipan okse tlamachtijli tikitaskej tlenon techmachtiaj ome cartas tlen okimijkuilo Pedro niman kenon uelis tikchiuaskej tlen ompa kijtoua.