1. ¿Tlenon ueliskia techtlajtoltiskiaj akin imiuan tomachtiaj noso imiuan titekitij?

 ¿KENON timomachilia tla akin iuan timomachtia noso iuan titekiti mitstlajtoltia itech tlen tikneltoka? ¿Timomojtia? Miyekej ijkon tomachiliaj. San ika, tlen techtlajtoltiaj techpaleuis matikmatikan tlen kinemiliaj niman tlen kimachiliaj. Noijki, ijkon uelis tikinnojnotsaskej. San ika, kemantika uelis yakaj itlaj techtlajtoltis niman san kinekis techpijpinaujtis noso techkualanis, niman yejon xnoneki techmojkatlachialtis. Kemantika ijkin panoua pampa yejuamej san yokitekakilijkej itech tlen tejuamej tikneltokaj (Hech. 28:22). Niman pampa itinemij ipan itlamiyan tonaltin, miyekej “xteikneliskej” niman noijki “xipanteitaskej” (2 Tim. 3:​1, 3).

2. ¿Tleka melak noneki matiyolyemankej?

² Kanaj timotlajtoltia, ¿kenon uelis kualtsin nitenankilis niman xnikualanis ijkuak yakaj san nechpijpinaujtis itech tlen nikneltoka? Onka itlaj tlen uelis mitspaleuis: yolyemanilistli. Se akin yolyemanki xnimantsin kualani niman ueli noteltia ijkuak san kikualanisnekij noso ijkuak xkimati kenon tenankilis (Prov. 16:32). Kanaj tiknemilia ika melak ouijtika tikchiuas yejuin. San ika, kema uelis tikchiuas. ¿Kenon? ¿Tlenon techpaleuis matiyolyemankej ijkuak yakaj san kinekis touan nokualanis itech tlen tikneltokaj? Niman tla tejua tikinpiya mokoneuan, ¿kenon uelis tikinpaleuis makiteijlikan tlen kineltokaj ika yolyemanilistli? Matikitakan.

3. ¿Tleka tikijtouaj ika akin yolyemankej noijki kojtikej? (2 Timoteo 2:​24, 25).

³ Se akin yolyemanki xkijtosneki tla xkojtik. Noneki melak timokojtilis niman ijkon xtikualanis ijkuak tikixnamikis tlen ouijtika. Yolyemanilistli ualeua itech itlakilyo espíritu santo (Gál. 5:​22, 23). Ipan Biblia tlajtojli griego “yolyemanilistli” yeuejkaui nokuiya niman ijkon noteititis kenon se caballo akin melak mojki okimajmachtijkej maka nimantsin manotlalojteua. ¡San xkonnemili kenon yejon caballo onopatlak! Kachtopa nimantsin notlalojteuaya niman aman xok ijkon kichiua, san ika, ok kojtik. ¿Niman tejuamej? ¿Kenon uelis tikteititiskej ika tiyolyemankej niman tikojtikej? Noneki tiktlajtlaniliskej toTajtsin espíritu santo niman ijkon uelis tiyolyemankej yeskej pampa san tejuamej xuelis tikchiuaskej. Niman yonoitak ika kema uelis tiyolyemankej yeskej. San matikonteneuakan yejuin, miyekej iteixpantijkauan Jehová kuajli okinnankilijkej akin san kinekiyaj kinkualaniskej, niman yejon yokinpaleui oksekimej kuajli matlanemilikan totech (xpoua 2 Timoteo 2:​24, 25). ¿Tlenon uelis tikchiuas niman ijkon tikteititis ika tiyolyemanki?

4. ¿Tlenon techmachtia tlen okichiuj Isaac?

⁴ Biblia kinteneua miyekej akin okiteititijkej ika yolyemankej, ken Isaac. Ijkuak yejua chantiya Guerar, filisteos opeujkej kinexikolitaj niman hasta okimintlalpachouilijkaj pozos tlen itlakeualuan itaj okimichkuakaj. Isaac ximiuan onokualani, yejua oksekan oyaj niman oksejpa okimichkuato okseki pozos (Gén. 26:​12-18). San ika, filisteos opeuj kijtouaj ika yejon atl noijki intlatki katka. Maski ijkon, Isaac xokualan (Gén. 26:​19-25). ¿Tlenon okipaleui makiteititi ika yolyemanki maski melak kinekiyaj kikualaniskej? Yejua okitak tlen kichiuayaj itajuan niman yejon melak okipaleui. Abrahán xkeman yakaj iuan nokualaniaya, niman Sara katka “yolyemanki niman tenotski” (1 Ped. 3:​4-6; Gén. 21:​22-34).

5. ¿Tlenon kiteititia ika tajtin uelis kinmachtiskej inkoneuan makiteititikan ika yolyemankej?

⁵ Tajtin akin iteixpantijkauan Jehová noijki uelis kinmachtiskej inkoneuan makiteititikan ika yolyemankej. Matikitakan tlenon ipan onochiuj Maxence, akin kipiya 17 xiuitl. Ijkuak yejua yaya escuela noso ontenojnotsaya nonekiya tlajtos imiuan akin tlauijuikaltiayaj. Itajuan melak okipaleuijkej makiteititi ika yolyemanki. Yejuamej kijtouaj: “Tokoneuj yokasikamat ika xouijtika tikualantiuetsis noso titeuijsoktiuetsis, san ika, yakaj akin melak kojtik xnimantsin kualani”. ¡Aman Maxence melak yolyemanki!

6. ¿Kenon teoyotl techpaleuiya más matikteititikan ika tiyolyemankej?

⁶ Xnemili ika tijkaki kenon yakaj xkuajli tlajtoua itech Jehová noso kijtoua ika xkuajli tlen Biblia temachtia. ¿Tlenon tikchiuaskiaj? Uelis tiktlajtlaniliskej Jehová matechmaka iespíritu santo niman noijki matechmaka tlamachilistli para kuajli titenankiliskej. ¿Niman tlenon uelis tikchiuaskej tla tikitaj ika kanaj xkuajli ken otitenankilijkej? Oksejpa matitlajtokan iuan Jehová niman matiknemilikan tlenon uelis tikchiuaskej ijkuak oksejpa ijkon topan nochiuas. Tla ijkon tikchiuaj, Jehová techmakas espíritu santo niman ijkon xnimantsin tikualaniskej niman tikteititiskej ika tiyolyemankej.

7. Ijkuak tikixnamikij tlen ouijtika, ¿kenon techpaleuis tla tikintsontekontlaliaj seki tlaxeloltin itech Biblia? (Proverbios 15:​1, 18).

⁷ Seki tlaxeloltin itech Biblia uelis techpaleuiskej matitlajtokan ika yolyemanilistli ijkuak itlaj tikixnamikiskej noso san kinekiskej  techkualaniskej. Espíritu santo uelis kichiuas matikimilnamikikan yejon tlaxeloltin (Juan 14:26). Tlen tiknextiaj ipan Proverbios techpaleuiya matikteititikan ika tiyolyemankej (xpoua Proverbios 15:​1, 18). Noijki techititiaj kenon techpaleuis tla xnimantsin tikualanij ijkuak tikixnamikij tlen ouijtika (Prov. 10:19; 17:27; 21:23; 25:15).

8. ¿Tlenon noneki tikilnamikiskej ijkuak yakaj techtlajtoltia itlaj itech tlen tikneltokaj?

⁸ Noijki melak techpaleuis tla kuajli titlanemiliaj (Prov. 19:11). Se akin kuajli tlanemilia ueli noteltia ijkuak yakaj kitlajtoltia itech tlen kineltoka. Pampa tlen yakaj kinemilia yeskia ken atl tlen melak uejkatlan, kemantika uelis itlaj techtlajtoltiskej, san ika, xtikmatiskej tleka techtlajtoltia yejon. Achto tiknankiliskej, techpaleuis tla tikilnamikij ika kanaj xtikmatij tleka kineki tlajtos itech yejon (Prov. 16:23).

9. ¿Kenon Gedeón okiteititi ika kuajli tlanemiliaya niman ika yolyemanki katka?

⁹ Matitlanemilikan itech Gedeón. Sejpatipan, tlakamej akin ualeuayaj itech itribu Efraín okixkoijlitoj Gedeón tleka xokiminots imiuan makimixnamikitij intlauelikniuan. ¿Tleka ijkon okichiujkej? ¿Kanaj xkuajli  onomachilijkej pampa xokinnotskej? Maski san kenon, Gedeón kuajli otlanemili, okimasikamat niman kuajli okinnankili. ¿Tlenon opanok pampa ijkon okichiuj? “Ijkuak itribu Efraín okakkej on tlen okijto Gedeón, xok okualankej” (Juec. 8:​1-3).

10. ¿Tlenon uelis techpaleuis kuajli matitenankilikan ijkuak techtlajtoltiskej itech tlen tikneltokaj? (1 Pedro 3:15).

¹⁰ Kanaj yakaj akin iuan titekitij noso akin iuan tomachtiaj ipan escuela techtlajtoltis tleka tikintlakamatij itlanauatiluan Biblia. Maski tiknekij tikteijliskej tleka tikintlakamatij, noneki tiktlakaitaskej tlen kinemilia akin touan tlajtojtika (xpoua 1 Pedro 3:15). Ijkuak itlaj techtlajtoltiskej, maka matiknemilikan ika san kinekij techixnamikiskej noso techtejteneuaskej. Matikitakan ika tlen techtlajtoltiaj techpaleuis matikmatikan tlenon kajmana akin iuan titlajtotokej. Maski xtikmatij tleka itlaj techtlajtoltiaj, kuajli tla tejuamej kualtsin titlanankiliaj niman xtikualanij. Tla ijkon tikchiuaj, akin touan nonojnotstok kanaj san no yejua kitas ika xkuajli ken tlanemilia. Maski tla sekimej xkuajli technotsaj noso techpijpinaujtiaj, tejuamej nochipa kualtsin matitenotsakan (Rom. 12:17).

11, 12. a) ¿Tlenon noneki tikilnamikiskej achto titenankiliskej tlen techtlajtoltiaj? (Noijki xkita tlaixkopinajli). b) ¿Tlenon uelis tikchiuaskej para kualtsin tonojnotsaskej imiuan akin itlaj techtlajtoltiaj? Xkijto se neskayotl.

¹¹ Matikonnemilikan ika yakaj akin iuan titekitij techtlajtoltia tleka xtikinpanoltiaj cumpleaños. ¿Itech tlenon uelis titlanemiliskej achto titenankiliskej? ¿Kanaj yejua kinemilia ika xtechkauiliaj matoyolpaktikan? ¿Noso kinemilia ika san topampa oksekimej xuelis noyolpaktiskej? Uelis tikijliskej ika melak kuajli ika najmana inpampa akin imiuan tekiti niman ika tejuamej noijki tikuelitaj toyolpaktiskej imiuan akin titekitij. Tla ijkon tikchiuaj, kanaj xkualanis niman sakin kinekis matikijlikan tlen kijtoua Biblia itech cumpleaños.

¹² Noijki uelis ijkon tikchiuaskej ijkuak itlaj okse techtlajtoltiskej. Matiknemilikan yejuin, kanaj se akin iuan tomachtiaj ipan escuela techijlia ika xkuajli pampa iteixpantijkauan Jehová xkiseliaj tlen kichiuaj tlakamej akin kinuelitaj tlakamej niman siuamej akin kinuelitaj siuamej. ¿Kanaj ijkon kijtoua pampa kipiya se iamigo noso ichanejkauj akin ijkon kichiua? ¿Noso pampa xkuajli kasikamati tlen kineltokaj iteixpantijkauan Jehová? Uelis tikijliskej ika tejuamej noijki tajmanaj inpampa oksekimej niman ika tiktlakaitaj tlen kitlapejpeniaj (1 Ped. 2:17). b Tla ijkon tikchiuaj, kanaj kinekis matikijlikan tleka kuajli tla tikintlakamatij itlanauatiluan Biblia.

13. ¿Kenon uelis tikpaleuis yakaj akin kijtoua ika akin tlaneltokaj itech toTajtsin xtlamachilisejkej?

¹³ Tla yakaj akin xkuelita tlen tikneltokaj itlaj techijlia, maka nimantsin matiknemilikan ika itikmatij tlen kinemilia (Tito 3:2). Matikonnemilikan ika yakaj akin iuan timomachtia ipan escuela mitsijlia ika san akin xtlamachilisejkej tlaneltokaj itech toTajtsin. ¿Tiknemiliskia ika yejua tlaneltoka itech evolución niman ika nochi kimati? Kanaj yejua san kijtoua tlen yokinkakili oksekimej. Ika yejon, maka iuan xmokualani itech evolución, más kuajli tla tikijlia itlaj tlen makitlanemililti. Kanaj uelis tiktitlanilis itlaj tlen onka ipan jw.org, itlaj tlen matlajto itech tlen okichijchiuj toTajtsin. Ijkon, kanaj sakin kinekis mouan tlajtos itech se tlamachtijli noso se video. Tla tikititia ika tiktlakaita, kanaj sakin kinekis nomachtis itech tlen kijtoua Biblia.

14. ¿Kenon Niall okitekitilti topágina tlen onka ipan internet niman ijkon kipaleuis yakaj akin xkuajli tlanemiliaya totech?

 ¹⁴ Se telpochtli akin itoka Niall okitekitilti topágina tlen onka ipan internet niman ijkon kipaleuis yakaj akin xkuajli tlanemiliaya totech. Niall okijto: “Se akin iuan ninomachtiaya ipan escuela nochipa nechijlitoya ika nejua xnikneltokaya tlen ciencia kiteititia niman ika nitlaneltokaya itech se libro tlen san kinpiya cuentos”. Ijkuak icompañero xkikauiliaya makijli tlen kineltoka, Niall kijliaya makita ipan jw.org kampa tlajtoua itech “Biblia niman ciencia”. Sakin, Niall okasikamat ika icompañero yokipoujka tlen yokijlika makita niman xok más ouijtika okitak tlajtos itech ken opeuj nemilistli. Tla ijkon tikchiuaj, noijki uelis kuajli tonkisaskej.

15. ¿Kenon tajtin uelis kinpaleuiskej inkoneuan matenankilikan ika yolyemanilistli?

¹⁵ Tajtin uelis kinmachtiskej inkoneuan kualtsin matenankilikan ijkuak yakaj itlaj kintlajtoltis (Sant. 3:13). Sekimej tajtin san sekan nomajmachtiaj ijkuak kiueyichiuaj toTajtsin imiuan inchanejkauan. Kitaj tlenon ueliskia kintlajtoltiskej inkoneuan ipan escuela niman nomajmachtiaj kenon tlanankiliskej. Noijki, kinmachtiaj inkoneuan matenankilikan ika yolyemanilistli niman makichiuakan ika akin kinkakij okseki makinekikan kimatiskej (xkita recuadro “ Melak mechpaleuis tla san sekan nemomajmachtiaj”).

16, 17. ¿Kenon kinpaleuiya telpokamej ijkuak san sekan nomajmachtiaj imiuan inchanejkauan?

¹⁶ Tla san sekan nemomajmachtiaj, xsan kinpaleuis nemokoneuan kualtsin matenankilikan itech tlen kintlajtoltiaj, noijki kinpaleuis makitakan ika melauak tlen kineltokaj. Tlamachtiltin “Tlen notlajtoltiaj telpokamej”,  tlen onka ipan jw.org, kinpaleuiya telpokamej makichikauakan intlaneltok niman kuajli makiteijlikan tlen kineltokaj. Tla san sekan tomachtiaj yejuin imiuan tochanejkauan, tinochimej techpaleuis matikteijlikan tlen tikneltokaj ika yolyemanilistli. ¡Hasta itlaj okse uelis techtlajtoltiskej!

¹⁷ Se telpochtli akin itoka Matthew kijtoua ika melak yokipaleui pampa san sekan nomajmachtia imiuan ichanejkauan. Ijkuak san sekan kiueyichiuaj toTajtsin, miyekpa nomachtia iuan itajuan itech tlen ueliskia panos ipan escuela. Yejua kijtoua: “Kachtopa tomachtiaj itech tlen ueliskia nechtlajtoltiskiaj niman sakin tikchiuaj kentla yemelak ijkon panotoskia. Ijkuak kuajli yonikasikamat tlen nikneltoka, xok ninomojtia niman xok más ouijtika nikita nitenankilis ika yolyemanilistli”.

18. Ken kijtoua Colosenses 4:​6, ¿tlenon noneki tikchiuaskej?

¹⁸ Maski tla kuajli titenankiliskej, xuelis tikchiuaskej matechasikamatikan noso matechneltokakan. San ika, melak tepaleuis tla tikteititiaj ika titetlakaitaj niman kualtsin titenankiliaj (xpoua Colosenses 4:6). Ijkuak titlajtouaj iuan yakaj itech tlen tikneltokaj, kentla tikontlajkaliliskiaj se pelota. Uelis melak chikauak noso san yoliktsin tikontlajkaliliskej. Ijkuak san yoliktsin tikontlajkaliliaj, uelis kajsis niman uelis oksejpa techuajpanoltilis. Noijki ijkon, tla tikteititiaj ika titetlakaitaj niman kualtsin titenotsaj, kinekiskej techkakiskej. San ika, tla yakaj san kineki touan nokualanis noso techpijpinaujtis, xok noneki iuan titlajtoskej (Prov. 26:4). San ika, xnochimej ijkomej, miyekej kanaj kema techkakiskej.

19. ¿Tlenon techpaleuis matikteititikan ika tiyolyemankej ijkuak yakaj itlaj techtlajtoltis?

¹⁹ Ken yotikitakej, tla tiyolyemankej melak techpaleuis. Xkijli Jehová mamitspaleui ijkuak oksekimej mitstlajtoltiskej itlaj noso san mitstejteneuaskej. Maka xkilkaua ika, maski xtimotlajtolnamiki iuan yakaj, tla tikteititia ika tiyolyemanki kichiuas maka iuan xmokualani. Niman tla tikteititia ika titetlakaita niman kuajli titenankilia, kichiuas ika oksekimej más makinekikan kimatiskej totech niman itech tlen temachtia Biblia. Kuakon, nochipa xteititi ika tiyolyemanki niman titetlakaita ijkuak yakaj itlaj mitstlajtoltis (1 Ped. 3:15). ¡Xteititi ika tiyolyemanki niman tikojtik!