1. ¿Tlenon okijli Jehová makichiua Pedro achto mikiskia?

 APÓSTOL Pedro chikauak okitekichiuili Jehová miyek xiujtin. Otenojnots iuan Jesús, okinnojnots akin xkeman kinnojnotsayaj niman teuan katka itech Grupo akin tlayekana. San ika, ijkuak sa achijtsin poliuiya para mikiskia, Jehová okijli makichiua itlaj okse. Kanaj ipan xiuitl 62 niman 64, toTajtsin okichiuj makimijkuilo ome cartas: 1 niman 2 Pedro. Apóstol Pedro kinekiya ika yejuin ome cartas makinpaleui tokniuan sakin ika mikiskia (2 Ped. 1:​12-15).

2. ¿Tleka tokniuan melak okinpaleui cartas tlen Pedro okimijkuilo?

² Pedro okimijkuilo yejuin ome cartas ijkuak tokniuan kixnamiktoyaj “miyek tlajtlamach tetlatlatalistli” (1 Ped. 1:6). Miyekej tlakamej akin xkuajkualtin kimijlitoyaj tokniuan tlen xmelauak niman kinekiyaj ika ipan tlanechikojli maka manoueyichiua toTajtsin ken nonekiya (2 Ped. 2:​1, 2, 14). Tokniuan akin chantiyaj Jerusalén kitaskiaj kenon “tlamis nochi tlajtlamach”. Kijtosnekiya ika kitaskiaj kenon romanos kipopoloskiaj Jerusalén niman itemplo (1 Ped. 4:7). Kuajli tikmatstokej ika tlen Pedro okijkuilo melak okinpaleui tokniuan mayolmelajkanemikan maski kixnamiktoyaj tlen ouijtika niman manoyektlalikan ipampa tlen sakin kixnamikiskiaj. b

3. ¿Tleka noneki tomachtiskej cartas tlen Pedro okimijkuilo?

 ³ Maski yejuin cartas Pedro okimijkuilouili tokniuan akin nemiyaj ipan kachtopa siglo, Jehová okichiuj manoijkuilokan ipan Biblia niman ijkon tinochimej uelis techpaleuis tlen ompa kijtoua (Rom. 15:4). Tejuamej noijki tichantij kampa miyekej kuelitaj auilnemiskej, niman tikixnamikij miyek tlen uelis kichiuas maka sa matiktekichiuilikan Jehová. Noijki, sa achijtsin poliui ijkuak melak techtlajyouiltiskej xijkon ken ijkuak okipopolojkej Jerusalén niman itemplo. Kuakon, yejuin ome cartas techpaleuiskej matitlatlachixtokan ijkuak yejkos itonal Jehová, maka matechmojti tlen uelis kijtoskej noso texchiuiliskej oksekimej niman más matikintlasojtlakan tokniuan. Yejuin noijki kinpaleuis tlayekankej makinyolchikauakan tokniuan ipan tlanechikojli.

4. ¿Tlenon uelis kichiuas maka sa matitlaneltokakan? (2 Pedro 3:​3, 4).

⁴ Miyekej xkineltokaj tlen kijtoua Biblia ijkuak tlajtoua itech tlen panos ika tlayekapan. Tejuamej youejkauj tikteijliaj ika iyejkos tonajli ijkuak Jehová kinpopolos akin xkuajkualtin. Kanaj miyekej akin techtlauelitaj techpijpinaujtiaj niman kijtouaj ika yejon tonajli xkeman yejkos (xpoua 2 Pedro 3:​3, 4). Tla ijkuak tiknojnotsaj se akin iuan titekitij noso se tochanejkauj techijlia yejuin, kanaj uelis kichiuas maka sa matitlaneltokakan. San ika, tlen okijkuilo Pedro uelis techpaleuis matitlaxikokan.

5. ¿Tlenon noneki tikilnamikiskej para titlaxikoskej maski xiyejko itonal Jehová? (2 Pedro 3:​8, 9).

⁵ Sekimej kinemiliaj ika toTajtsin melak youejkauj ika xkinpopoloua akin xkuajkualtin. San ika, Pedro okijto itlaj tlen melak techtlanemililtia. Otechilnamikti ika Jehová xsan noijki kita tiempo ijkon ken tejuamej tikitaj (xpoua 2 Pedro 3:​8, 9). Jehová kita mil xiuitl kentla yeskia se tonajli, yejua melak teijyouiya niman xkineki yakaj makipopolokan. San ika, itonal kema yejkos. . . , niman akin xkuajkualtin popoliuiskej. ¿Xmelak ika tikpatiojkaitaj ika ok ueli titenojnotsaj?

6. ¿Kenon uelis titlatlachixtoskej chika tikchiaj mayejko itonal Jehová? (2 Pedro 3:​11, 12).

⁶ Pedro techijlia ika noneki titlatlachixtoskej “chika tikchaj ma yejko” itonal Jehová (xpoua 2 Pedro 3:​11, 12). ¿Kenon uelis tikchiuaskej yejuin? Tla titlanemiliaj itech kenon kualtsin tinemiskej ipan yenkuik tlaltikpaktli. San xkonnemili kenon kualtsin tinemiskej kampa tlachipaujtok, kenon tikuaskej tlen melak uelik, kenon tikinseliskej tochanejkauan akin yomijkej niman kenon tikimititiskej akin onenkej yeuejkaui ika onochiujkej teotlajtoltin. Tla titlanemiliaj itech nochi yejuin, techpaleuis matikmatstokan ika itonal Jehová iyejkotika. Pampa itikmatij tlenon panos ika tlayekapan, xtijkauiliaj ika akin temachtiaj tlen xmelauak matechkajkayauakan (2 Ped. 3:17).

7. ¿Kenon uelis techijtlakos tla techmojtia tlen uelis kijtoskej noso texchiuiliskej oksekimej?

⁷ Pampa inonisiuiya itonal Jehová tiknekij ika tlaltikpakchanejkej makimatikan itech iTekiuajyo toTajtsin. San ika, kemantika ouijtika tikitaj titenojnotsaskej. ¿Tleka? Pampa techmojtia tlen oksekimej uelis kinemiliskej noso texchiuiliskej. Yejon tlen ipan onochiuj Pedro ijkuak okitlajtlakolmakakej Jesús. Xokiteijli ika katka se inomachtijkauj Cristo niman miyekpa okijto ika xkixmatiya (Mat. 26:​69-75). San ika, sakin xok onomojti niman okijto yejuin: “Maka xmomojtikan ika on tlen  kijtouaj niman kichiuaj, nion maka xkomatstiakan” (1 Ped. 3:14). Itlajtoluan techititiaj ika xnoneki techmojtis tlen uelis kijtoskej noso texchiuiliskej oksekimej.

8. ¿Tlenon techpaleuis maka matechmojti tlen oksekimej uelis kijtoskej noso texchiuiliskej? (1 Pedro 3:15).

⁸ ¿Tlenon techpaleuis niman ijkon maka matechmojti tlen uelis kijtoskej noso texchiuiliskej oksekimej? Pedro okijto: “Ipan nemoyojlo xtlakaitakan Cristo yejuan nemoTEKO” (xpoua 1 Pedro 3:15). Yejuin kijtosneki ika noneki titlanemiliskej itech kenon melak kojtik Jesucristo, akin toTeko niman toTekiuaj. Tla ijkuak titenojnotsa tikmachilia ika timomojtia, xtlanemili itech toTekiuaj. Xkonnemili kenon tekiuajtitok ne iluikak niman kenon iyeualiujyan nemij miyekej ángeles. Xkilnamiki ika yejua yokimakakej “nochi tekiuajyotl” para tlanauatis “ne iluikak niman nikan ipan in tlaltikpaktli”, noijki ika mouan nemis hasta ijkuak yejkos itonal Jehová (Mat. 28:​18-20). Pedro techijlia: “Nochipa xnemikan listos”. Tla ijkon tikchiuaj, tikteititiskej ika titlaneltokaj. ¿Tikuelitaskia titenojnotsas ipan motekiyo, ipan moescuela noso oksekan? Kuakon, xnemili kemanon uelis tikchiuas niman xkita tlenon uelis tikijtos. Xtlajtlanili Jehová mamitsyolchikaua, niman xtlaneltoka ika yejua mitspaleuis maka mamitsmojti tlen oksekimej uelis kijtoskej noso mitschiuiliskej (Hech. 4:29).

9. ¿Kemanon Pedro xokiteititi ika tetlasojtla? (Noijki xkita tlaixkopinajli).

⁹ Pedro okasikamat tlenon kijtosnekiya sajnoye titetlasojtlas. Yejua ompa nemiya ijkuak Jesús okijto: “Nemechmaka in yenkuik tlanauatijli: ‘Xmotlajsojtlakan inuan oksekimej. Ijkon ken nejua nemechtlajsojtla, nemejuamej no ijki xmotlajsojtlakan inuan oksekimej’” (Juan 13:34). Maski apóstol Pedro kimatstoya yejuin, sakin okiteititi ika xtetlasojtlaya. Xok okinek otlakua imiuan tokniuan akin xjudíos katkaj pampa kimojtiaya tlenon ueliskia kinemiliskej oksekimej. Ika yejon, apóstol Pablo okijli Pedro ika okichiujka ijkon ken yakaj akin kipiya ome ixayak (Gál. 2:​11-14). Pedro okiseli ken okimelajkatlali Pablo niman onopatlak. Ipan ome cartas tlen okimijkuilo okijto ika xsan noneki tikijtoskej ika tikintlasojtlaj tokniuan noijki noneki tikimititiskej.

10. ¿Kenon uelis tikimititiskej tokniuan ika tikintlasojtlaj ika nochi toyojlo? (1 Pedro 1:22).

¹⁰ Pedro okijto ika noneki tikintlasojtlaskej tokniuan ika nochi toyojlo (xpoua 1 Pedro 1:22). Uelis tikintlasojtlaskej tokniuan tla tiktlakamatij Biblia, iTlajtol toTajtsin. Niman Biblia kijtoua ika toTajtsin xtechikoita (Hech. 10:​34, 35). Tla tikintlasojtlaj san sekimej tokniuan ipan totlanechikol, xtiktlakamatstoskiaj Jesús. Yemelak, kanaj uelis más kuajli touikaskej imiuan sekimej tokniuan ipan totlanechikol, ijkon ken Jesús más kuajli onouikak san iuan sekimej inomachtijkauan (Juan 13:23; 20:2). San ika, Pedro otechilnamikti ika noneki tikimititiskej nochimej tokniuan kenon sajnoye tikintlasojtlaj. Yejuin kijtosneki ika tikintlasojtlaskej ijkon ken tikintlasojtlaskiaj tochanejkauan (1 Ped. 2:17).

11. ¿Tlenon kijtosneki “sanoyej xmotlajsojtlakan”?

¹¹ Pedro okijto: “Sanoyej xmotlajsojtlakan inuan oksekimej ikan nochi nemoyojlo”. Ijkuak nikan noijtoua “sanoyej”, kijtosneki ika noneki tiktlasojtlas akin ouijtika tikitas tiktlasojtlas. San matontlanemilikan itech yejuin. ¿Tlenon kichiuaskia yakaj tla itlaj kichiuiliaj noso kikualaniaj? Kanaj kinekiskia notlakuepiltis niman xkiteititiskia ika tetlasojtla. San ika, yejon xkiyolpaktiskia Jehová, ijkon ken Jesús okimachti Pedro (Juan 18:​10, 11). Apóstol Pedro okijkuilo: “Tla yakaj itlaj mechchiuilis tlen xkuajli, maka no ijki nenkuepiltiskej, noso tla yakaj mechteneuilia on tlen xkuajli, maka no nenkiteneuiliskej on tlen xkuajli. Yej xkuepiltikan ikan tlatiochiualistli” (1 Ped. 3:9). Tla tejua sajnoye titetlasojtla, kualtsin tikinnotsas niman tikintlakaitas hasta akin mitsyolkokouaj.

12. a) ¿Tlenon tikchiuaskej tla sajnoye tikintlasojtlaj tokniuan? b) ¿Tlenon mitsyolchikaua xchiua video Maka matoxelokan intech tokniuan?

¹² Ipan kachtopa carta tlen Pedro okijkuilo, okijto ika tla sajnoye titetlasojtlaj techpaleuis tiktlapopoluiskej se tokniuj maski miyekpa nopopolos (1 Ped. 4:8). Ijkuak Pedro okijkuilo yejuin, kanaj okilnamik tlen yeuejkaui Jesús okimachtijka itech kenon nonekiya tetlapopoluis. Ijkuak Pedro okijli ika ueliskia tetlapopoluis “hasta chikomepa”, kanaj okinemili ika melak kuajli iyojlo kipiaya. San ika, Jesús okimachti ika nonekiya tetlapopoluis “hasta kampa xok uelis” kipouas. Niman yejuin itlaj tlen tejuamej noijki noneki tikchiuaskej (Mat. 18:​21, 22). ¿Ouijtika tikita titetlapopoluis? Maka xmosiaujkaua. Pampa titlajtlakolejkej, nochimej itekipanojkauan Jehová kemantika yotikitakej ouijtika titetlapopoluiskej. Kuakon, ¿tlenon uelis tikchiuas? Xmokojtili xtlapopolui mokniuj niman oksejpa iuan kuajli xmouika. c

13. ¿Tleka tlayekankej kemantika ouijtika kitaj kinpaleuiskej tokniuan?

¹³ Tikmatstokej ika Pedro xkeman okilkauj tlen okijli Jesús sakin ika oyoliuj: “Xkincuidaro noborregos” (Juan 21:16). Tla tejua titlayekanketl, noijki noneki ijkon tikchiuas. San ika, kanaj kemantika ouijtika pampa tlayekankej xmás kipiyaj tiempo. Kachtopa, tlayekankej noneki kinmakaskej tlen kinpoloua inchanejkauan niman kinchikauiliskej intlaneltok. Noijki, noneki kuajli tenojnotsaskej, kiyektlaliskej tlen kipanoltiskej ipan tlanechikoltin niman ipan uejueyimej tlanechikoltin. Sekimej tlayekankej kinpaleuiyaj tokniuan ipan hospitales noso tlapaleuiyaj ipan tekitl tlen nochiua itech Diseño niman Construcción. Kuajli nesi ika tokniuan tlayekankej kipiyaj miyek tekitl.

14. ¿Tlenon uelis kinpaleuis tlayekankej makintlajpiyakan borreguitos? (1 Pedro 5:​1-4).

¹⁴ Pedro okimijli oksekimej tokniuan tlayekankej: “Xkincuidarokan ikoneuan Dios” (xpoua 1 Pedro 5:​1-4). Tikmatstokej ika tlayekankej kintlasojtlaj imikniuan niman kinekij kintlajpiyaskej. San ika, kanaj kemantika kimachiliaj ika xueli kichiuaj nochi yejon pampa kipiyaj miyek tekitl noso siaujtokej. ¿Tlenon uelis tikchiuas tla ijkon mitspanoua? Xkijli Jehová kenon timomachilia. Pedro okijkuilo: “Ijkuak yakaj kintekichiuilia oksekimej, ma kichiua ikan on chikaualistli yejuan Dios kimaka” (1 Ped. 4:11). Kanaj mokniuan kixnamiktokej itlaj tlen aman xuelis noyektlalis. San ika, xkilnamiki ika Jesucristo, akin nochimej techyekana, más uelis kinpaleuis aman niman ipan yenkuik tlaltikpaktli. Jehová kichia ika tlayekankej makintlasojtlakan imikniuan, makintlajpiyakan niman makimititikan kenon kuajli kitekichiuiliskej.

15. ¿Tlenon kichiua se tlayekanketl niman ijkon kintlajpiyas iborreguitos toTajtsin? (Noijki xkita tlaixkopinajli).

¹⁵ William, se tokniuj akin youejkauj tlapaleuiya ken tlayekanketl melak nokojtilia kintlajpiyas tokniuan. Ijkuak opeuj kokolistli COVID-19, yejua niman oksekimej tlayekankej akin tlapaleuiyaj ipan itlanechikol nochi semanas kominnotsayaj tokniuan akin nemiyaj ipan ingrupos. ¿Tleka? Yejua kijtoua: “Pampa miyekej tokniuan inselti nemiyaj inchan, ueliskia peuas kinemiliskej tlen xtepaleui”.  Ijkuak se tokniuj kixnamiktika tlen ouijtika, William kuajli kikaki niman ijkon kimatis tlenon kajmana niman tlenon kipoloua. Kuakon yejua kitejtemoua kenon uelis kipaleuis yejon tokniuj. Kemantika kintekitiltia videos tlen tikinpiyaj ipan topágina de internet. William, noijki kijtoua: “Aman más noneki matikintlajpiyakan tokniuan. Tejuamej tokojtiliaj tikinpaleuiskej oksekimej makixmatikan Jehová. Ika yejon, noijki melak noneki tokojtiliskej tikintlajpiyaskej niman tikinpaleuiskej iborreguitos Jehová para nochipa manemikan ipan ikalpan”.

16. ¿Kenon uelis tikchiuaskej tlen otiuelkej ipan ome cartas tlen Pedro okimijkuilo?

¹⁶ Ipan yejuin tlamachtijli san seki yotikitakej itech tlenon techmachtiaj ome cartas tlen Pedro okimijkuilo. Kanaj tejua yotikitak ika onka seki tlemach tlen noneki más kuajli tikchiuas. ¿Tikuelitaskia más titlanemilis itech kenon kualtsin tichantiskej ipan yenkuik tlaltikpaktli? ¿Tikneki titenojnotsas kampa titekiti, ipan moescuela noso oksekan? ¿Yotiknemili kenon más uelis tikimititis tokniuan ika tikintlasojtla? Tla titlayekanketl, ¿tiknektika tikintlajpiyas iborreguitos Jehová ika nochi moyojlo? Tla tikita ika mitspoloua itlaj tikchiuas, maka xmajmana. Xkilnamiki “ika toTEKO melauak kuajli” niman yejua mitspaleuis xchiua tlen mitspoloua (1 Ped. 2:3). Pedro kuajli techijlia: “Dios mechkueltlalis, mechmelajkapiyas, mechkojtilis, niman mechyektlalis ipan nemotlaneltok” (1 Ped. 5:10).

17. ¿Tlenon uelis tikseliskej tla xtosiaujkauaj niman tijkauiliaj ika Jehová matechmajmachti?

¹⁷ Sejpatipan, Pedro okimachili ika xkinamikiya nemis ixpan iKoneuj toTajtsin (Luc. 5:8). San ika, Pedro omelajkanen pampa Jehová niman Jesús okipaleuijkej niman okitlasojtlakej. Yejua ika, ouel okalak kampa tlayekana toTeko, niman “toTemakixtijkau JesuCristo” (2 Ped. 1:11). Okiseli se ueyi tetlayokolijli. Tla tejua xtimosiaujkaua ijkon ken Pedro niman tijkauilia ika Jehová mamitsmajmachti, noijki uelis tikselis se nemilistli tlen xkeman tlamis. Pampa titlaneltoka, tikselis temakixtilistli (1 Ped. 1:9).