1, 2. ¿Kenon techpaleuiya tla tomachtiaj itech inemilis Sansón?

 ¿TLENON tiknemilia ijkuak tikaki itoka Sansón? Kanaj tikilnamiki ika melak kojtik katka. Yejon melauak; san ika, Sansón okitlapejpeni itlaj tlen melak okitlajyouilti. Maski ijkon, Jehová okitak kenon kipiaya chikauak itlaneltok, niman okichiuj manoijkuilo ipan Biblia tlen ipan onochiuj niman ijkon itlaj matiuelikan.

² Jehová okitekitilti Sansón niman ijkon kipaleuis ikalpan, Israel. Maski yopanokaj miyek xiujtin ika yomijka, Jehová okichiuj ika apóstol Pablo makijkuilo itoka Sansón ipan se lista kampa nestokej akin chikauak okipixkej intlaneltok (Heb. 11:​32-34). Yejua nochipa okitlajtlanili Jehová makipaleui, hasta ijkuak kixnamiktoya tlen melak ouijtika. Ipan yejuin tlamachtijli tikitaskej ika tla tomachtiaj itech Sansón melak techyolchikauas niman miyek tlen techmachtis.

3. ¿Tleka Jehová okitlapejpeni Sansón?

³ Ijkuak Sansón otlakat, filisteos akin tlayekanayaj ipan kalpan Israel (Juec. 13:1). Pampa filisteos melak tlauelejkej katkaj, israelitas tlajyouiayaj. Kuakon Jehová okitlapejpeni Sansón niman ijkon “yejua peuas kinmanauis on israelitas inmak on filisteos” (Juec. 13:5). ¡Yejuin melak ouijtika katka! Yejua ika, Sansón nonekiya nopaleuis itech Jehová.

4. ¿Kenon Jehová okipaleui Sansón? (Jueces 15:​14-16).

⁴ Matikitakan sejpa ijkuak Sansón okiteititi ika tlaneltokaya  itech Jehová. Para kajsiskej Sansón, sekimej filisteos oyajkej Lehí, se kalpan tlen onkatka Judá. Pampa tlakamej akin chantiyaj Judá onomojtikej, okijtokej ika kitemaktiliskiaj Sansón itech itlauelikniuan. San no yejuamej ikniuan israelitas okisalojkej ika ome yenkuik mekatl niman okuikakej kampa filisteos (Juec. 15:​9-13). San ika, “iespíritu toTEKO ouajlaj ipan Sansón niman okimakak fuerza”, ijkon ouel onomakixti. Sakin, “okontilan sen ikamachal poloko yejuan ompaka tlajkaltoya nion xe kuajli uakiya”, niman ika okinmikti 1,000 filisteos (xpoua Jueces 15:​14-16).

5. ¿Kenon Sansón okiteititi ika tlaneltokaya itech Jehová?

⁵ ¿Tleka Sansón okitekitilti se ikamachal poloko? ¡Xakaj kinemiliskia kitekitiltis yejon ken se arma! Kuajli tikmatstokej ika Sansón kimatstoya ika Jehová kipaleuiskia maski san ika tlenon tlaixnamikiskia. Yejuin tlakatl akin kipiaya chikauak itlaneltok okitekitilti tlen nisiuj onkatka niman ijkon kichiuas tlen Jehová kineki. Yejua kuajli okisato pampa onopaleui itech Jehová.

6. ¿Tlenon tiuelij itech Sansón?

⁶ Jehová noijki uelis techkojtilis para matikchiuakan tekitl tlen tikpiyaj ipan ikalpan, maski kanaj tikitaj ika xtiueliskej. Yejua uelis techpaleuis ken nion xtiknemiliayaj niman uelis techmojkatlachialtis. Tla tejua timopaleuiya itech Jehová, uelis kuajli tikmatstos ika yejua mitspaleuis xchiua tlen kineki niman mitskojtilis ijkon ken okichiuj iuan Sansón (Prov. 16:3).

7. Xkijto itlaj tlen makiteititi ika noneki matechyekana Jehová.

⁷ Miyekej tokniuan tlakamej niman siuamej akin tlapaleuiyaj ijkuak nochijchiuaj kaltin kampa tikueyichiuaj Jehová, yokiteititijkej ika tlaneltokaj itech toTajtsin. Yeuejkaui, tokniuan kijtouayaj kenon yeskia niman kenon nochijchiuaskia se Kajli kampa tosentlaliaj noso okseki kaltin kampa tikueyichiuaj toTajtsin. San ika, yejuin yonopatlak pampa más yomiyekiyakej tokniuan.  Tokniuan akin kitaj kenon nochijchiuaj kaltin, okitlajtlanilijkej Jehová makinpaleui niman okitejtemojkej kenon más ueliskia nochiuas yejuin tekitl. Yejuamej opeujkej kinkouaj kaltin tlen ionkatkaj niman opeujkej kinyenkuiliaj. Robert, akin ipan nochi tlaltikpaktli miyekan yotlapaleui kampa kinchijchiuaj kaltin, kijtoua: “Kachtopa, ouijtika otikitakej tikchiuaskej tekitl ijkon ken technauatiayaj. Yejuin xijkon katka ken tlen yeuejkaui tikuajchiujtiayaj. San ika, tokniuan okinejkej kipatlaskej ken kichiuayaj intekiyo, niman kuajli ones ika Jehová kiteochiujtoya yejuin tlen onopatlak. Yejuin kuajli kiteititia ika Jehová kiyekantika ikalpan para makichiua tlen yejua kineki”. Melak techpaleuis tla kemantika totlajtoltiaj: “¿Niktlajtlanilia Jehová manechyekana niman ninokojtilia nikchiuas ijkon ken yejua kineki?”.

8. ¿Tlenon okichiuj Sansón ijkuak melak amikiya?

⁸ Kanaj noijki tikilnamiki kenon Sansón okixnamik se león niman okimikti, niman sakin okinmikti 30 tlakamej akin ualeuayaj ipan se ueyi kalpan filistea de Asquelón (Juec. 14:​5, 6, 19). Sansón kimatstoya ika xueliskia kichiuas nochi yejuin tla Jehová xkipaleuiskia. Sakin ika okinmikti 1,000 filisteos opeuj melak amiki, niman tlen okichiuj okiteititi ika nopaleuiaya itech Jehová. Sansón xsan no yejua okitejtemo atl, yej okitlajtlanili Jehová makipaleui (Juec. 15:18).

9. ¿Kenon okinankili Jehová tlen okitlajtlanili Sansón? (Jueces 15:19).

⁹ ¿Kenon okinankili Jehová tlen okitlajtlanili Sansón? Ika se milagro, okichiuj mauajkisa atl. Ijkuak Sansón oatlik, “okipix yolchikaualistli niman fuerza” (xpoua Jueces 15:19). Nesi ika yejuin ameyajli ok onkatka ijkuak Jehová okichiuj ika Samuel makijkuilo libro de Jueces. Kanaj ijkuak israelitas kitayaj yejuin ameyajli kilnamikiyaj ika tla nopaleuiyaj itech Jehová, yejua kinpaleuiskia ijkuak kixnamiktoskiaj tlen ouijtika.

10. ¿Tlenon noneki tikchiuaskej tla tiknekij matechpaleui Jehová? (Noijki xkita tlaixkopinajli).

¹⁰ Ijkon ken Sansón, tinochimej noneki tiktlajtlaniliskej Jehová matechpaleui. Maski miyek ueli tikchiuaj noso tikpiyaj se ueyi tekitl ipan ikalpan, noneki matechpaleui. Noneki tikilnamikiskej ika xnochi ueli tikchiuaj niman ika san tla Jehová techpaleuiya uelis kuajli tonkisaskej. Sansón oksejpa okajsik kojtilistli ijkuak okonik atl tlen Jehová okimakak. Noijki ijkon, totlaneltok chikaujtos tla tiktekitiltiaj nochi tlen Jehová techmaka (Mat. 11:28).

11. ¿Kenon uelis tikchikauaskej totlaneltok, niman tlenon techmachtia tlen okichiujkej sekimej tokniuan?

¹¹ Matitlajtokan itech Alexéi, se tokniuj de Rusia akin tlajyouijtika pampa ipan ipaís kintlaueltokaj iteixpantijkauan Jehová. ¿Tlenon yokipaleui matlaxiko? Yejua niman isiuatsin nokojtiliaj kichikauaskej intlaneltok. Alexéi okijto: “Mojmostla tokojtiliaj tomachtiskej Biblia niman tikamapouaskej. Noijki, ika kualkan, tikamapouaj amatlajkuilojli Mojmostla matomachtikan iTlajtol toTajtsin niman san sekan tikchiuiliaj teoyotl Jehová”. ¿Tlenon techmachtia yejuin? Ika noneki matiktlajtlanilikan Jehová matechpaleui niman maka san totech matitlaneltokakan. Tla tiknekij tikchikauaskej totlaneltok, noneki tomachtiskej Biblia, tikchiuaskej teoyotl, tiaskej tlanechikoltin niman titenojnotsaskej. Tla tikchiuaj nochi yejuin, Jehová melak techteochiuas  niman techpaleuis nochipa matiktekichiuilikan. Yejua okikojtili Sansón niman noijki techkojtilis tejuamej.

12. ¿Tlenon xkuajli okitlapejpeni Sansón, niman tleka yejuin tlen okitlapejpeni xijkon katka ken okseki tlen achto yokitlapejpenijka?

¹² Sansón noijki tlajtlakole katka ken tejuamej, yejua ika, kemantika nopopolouaya ijkuak itlaj kitlapejpeniaya. Sejpatipan okitlapejpeni itlaj tlen okichiuj melak matlajyoui, pampa xotlanemili itech tlen Jehová yokinauatijka. Ijkuak achijtsin youejkaujka ika kinyekantoya israelitas, “Sansón okinek sen siuatl yejuan itoka katka Dalila, yejuan chantiya ipan on ixtlauatl Sorec” (Juec. 16:4). Achto kixmatiskia Dalila, kinekiya nonamiktis iuan se siuatl filistea. San ika, Biblia kijtoua ika “toTEKO yejua ijki kinekiya ma nochiua, pampa kitejtemouaya kenijki peuas kinuijsokis on filisteos”. Sejpatipan, Sansón oyaj Gaza, se kalpan filistea, niman ompa onokauj ichan se “siuaauilnenki”. Pampa Jehová okipaleui, Sansón “okiteuiuitlak itsakuijlou on ueyikalpan san se ueyi iuan nochi ikojyouan yejuan ipan salijtikatka” (Juec. 14:​1-4; 16:​1-3). San ika, tlen onochiuj iuan Dalila xsan noijki katka ken tlen onochiuj iuan yejon omemej siuamej filisteas. ¿Tleka? Pampa Dalila kanaj israelita katka niman tla Sansón iuan nonamiktiaya xkipaleuiskia makimixnamiki filisteos.

13. ¿Kenon Dalila okikajkayauj Sansón?

¹³ Filisteos kinekiyaj ika Dalila makikajkayaua Sansón. Okijlikej ika kimakaskiaj miyek plata, niman yejua okinek. San ika ¿tleka Sansón xkitaya ika Dalila kinekiya kikajkayauas? ¿Kanaj Sansón kentla yoixtlapachiujka  pampa melak kitlasojtlaya Dalila? Maski san kenon, Dalila miyekpa okijli Sansón makijli tleka kojtik katka, niman yejua okijli. Yejuin okitlajyouilti Sansón, pampa okichiuj ika ipan se tiempo makipolo ikojtilis niman maka sa manouika iuan Jehová (Juec. 16:​16-20).

14. ¿Kenon otlamito Sansón pampa otlaneltokak itech Dalila?

¹⁴ Sansón melak xkuajli okisato pampa otlaneltokak itech Dalila niman xotlaneltokak itech Jehová. Filisteos okajsikej, okinkixtilijkej ixtololojuan niman okitsakuatoj Gaza, yejon kalpan tlen Sansón okinkixtili puertas, niman ompa okitlalijkej ken tlakeuajli para matekiti ipan molino. Sakin, filisteos okichiujkej se iluitl niman okiuentlalilijkej intajtsin Dagón pampa kinemiliayaj ika yejua okinpaleui makajsikan Sansón. “Otlanauatijkej ma kuajuikakan Sansón para ika nauiltiskej niman kipijpinauiskej” (Juec. 16:​21-25).

15. ¿Kenon okiteititi Sansón ika oksejpa kinekiya nopaleuis itech Jehová? (Jueces 16:​28-30; xkita tlaixkopinajli tlen nesi ixpan yejuin revista).

¹⁵ Maski Sansón onopopolo, xonosiaujkauj. Yejua ok kinekiya kimixnamikis filisteos, ijkon ken Jehová yokinauatijka (xpoua Jueces 16:​28-30). Yejua ika, Sansón okitlajtlanili Jehová: “Xnechmaka mopoder para nikintlakuepiltis in filisteos”. ToTajtsin okikak niman oksejpa okichiuj makojtik. Ijkuakon, Sansón okinmikti más filisteos xijkon ken akin okinmikti ipan nochi inemilis.

16. ¿Tlenon tiuelij itech Sansón?

¹⁶ Maski Sansón otlajyoui ipampa tlen okitlapejpeni, nochipa onokojtili kichiuas tlen Jehová kineki. Kuakon, tejuamej noijki xnoneki tosiaujkauaskej tla topopolouaj, tla noneki techyektlaliskej noso tla tikpolouaj se tekitl ipan tlanechikojli. Matikilnamikikan ika Jehová xkinemilia tla xok keman uelis toyektlaliskej (Sal. 103:​8-10). Maski tla topopolouaj, yejua ok uelis techtekitiltis ijkon ken okichiuj iuan Sansón.

17, 18. ¿Tleka mitsyolchikaua tlen ipan onochiuj Michael? (Noijki xkita tlaixkopinajli).

¹⁷ Matikitakan tlen ipan onochiuj se tokniuj telpochtli akin itoka Michael. Yejua tlapaleuijketl katka niman precursor regular, niman chikauak kitekichiuilijtoya Jehová. Teajman ika okichiuj itlaj tlen xkuajli niman  okikuilijkej itekiyo ipan tlanechikojli. Yejua kijtoua: “Nejua chikauak niktekichiuilijtoya Jehová, nikmachiliaya ika xitlaj ueliskia nechteltis. San ika, san isiujkan onikmachili kentla ninotechakuaniskia ipan se tepantli. Nikmatstoya ika Jehová xnechkauaskia, san ika, ninotlajtoltiaya tla oksejpa kuajli ueliskia iuan ninouikas niman tla oksejpa ueliskia nitlapaleuiskia ipan tlanechikojli ijkon ken achto”.

¹⁸ Melak kuajli ika Michael xonosiaujkauj. Yejua kijtoua: “Oninokojtili más kuajli ninouikas iuan Jehová. Nochipa nikchiuiliaya teoyotl, ninomachtiaya niman itech nitlanemiliaya”. Sakin, Michael oksejpa opeuj chikauak kitekichiuilia Jehová ipan tlanechikojli, niman aman tlayekanketl niman precursor regular. Yejua kijtoua: “Onikitak ika Jehová ok nechtlasojtla pampa tokniuan onechpaleuijkej niman onechyolchikaujkej, niman más ijkon okichiujkej tlayekankej. Aman oksejpa ueli kuajli niktekichiuilia Jehová niman xok nechajmana tlen onikchiuj. Tlen nopan onochiuj yonechmachti ika Jehová ueli kitlapopoluiya san akinon, akin yemelak noyolkuepa”. Ijkon ken Michael, uelis kuajli tikmatstoskej ika maski tla topopolouaj Jehová ok uelis techtekitiltis niman techteochiuas tla toyektlaliaj niman tla itech topaleuiyaj (Sal. 86:5; Prov. 28:13).

19. ¿Kenon omitsyolchikauj tlen ipan onochiuj Sansón?

¹⁹ Ipan yejuin tlamachtijli otikitakej san seki tlen okichiuj Sansón. Maski yejua okichiuj tlen xkuajli niman onopopolo iuan Dalila, xonosiaujkauj niman ok okitekichiuili Jehová. Niman Jehová xokinemili tla xok ueliskia noyektlalis, yejua okitekitilti para makichiua itlaj tlen melak otepaleui. Yejua nochipa okitak ken se tlakatl akin melak tlaneltoka, ika yejon, noijki okiteneuj ipan Hebreos capítulo 11. Melak techyolchikaua tikmatiskej ika toTajtsin techtlasojtla niman kineki techkojtilis, más ijkuak tikixnamikij tlen ouijtika niman noneki matechpaleui. Yejua ika, ijkon ken Sansón, noijki matiktlajtlanilikan Jehová: “Nimitstlajtlanilia noTeko, xnechelnamiki maski sa sejpatsin. Niman xnechmaka mopoder” (Juec. 16:28).