1. ¿Tlenon kichiuas Jesús?

 TINEMIJ ipan se tiempo ijkuak panos miyek tlemach. Sa achijtsin poliui ijkuak Jesús kintlajtlakolmakas nochimej akin nemij ipan tlaltikpaktli. ¿Niman kenon tikmatij ika sa achijtsin poliui ika ijkon panos? Pampa Jesús okimijli inomachtijkauan se teotlajtojli, niman ipan yejuin teotlajtojli okimijli tlen “tlamauisojli” nesis ijkuak yejua oksejpa uajlas niman ijkuak tlapopolos (Mat. 24:3). Tlen okijto Jesús nesi ipan Mateo capítulos 24 niman 25, Marcos capítulo 13 niman Lucas capítulo 21.

2. ¿Tlenon tikitaskej ipan yejuin tlamachtijli, niman tleka?

² Jesús okimijto yeyi neskayotl tlen techititiaj tlenon noneki tikchiuaskej: otlajto itech borreguitos niman chivos, itech 10 ichpokamej niman itech tomin tlen okinmakakej yeyimej tlakeualtin. Tlen okijto techititia tlenon kitas itech yakaj ijkuak yejua tetlajtlakolmakas. Ipan yejuin tlamachtijli titlajtoskej itech yejon niman tikitaskej tlenon techmachtiaj. Matipeuakan ika neskayotl itech borreguitos niman chivos.

BORREGUITOS NIMAN CHIVOS

3. ¿Kemanon tetlajtlakolmakas Jesús?

³ Jesús otemachti ika ijkuak yakaj kitlajtlakolmakas, kitas tla okineltokak tlen okijlijkej ijkuak okinojnotskej niman tla okinpaleui ikniuan tlapejpeniltin (Mat. 25:​31-46). ¿Niman kemanon kitas Jesús tla yakaj okichiuj ken se borreguito noso se chivo? Ipan ueyi tlajyouilistli, achto peuas  Armagedón (Mat. 24:21). Ijkon ken se tlajpixketl kinxeloua borreguitos itech chivos, Jesús noijki ijkon kichiuas. Yejua kitas akinomej okinpaleuijkej tokniuan tlapejpeniltin niman akinomej xokinpaleuijkej, niman kinxelos.

4. Ijkon ken kijtoua Isaías 11:​3, 4, ¿tleka uelis kuajli tikmatstoskej ika Jesús tetlajtlakolmakas ika melajkayotl? (Noijki xkimita tlaixkopinaltin).

⁴ Jehová yokitekitlali Jesús para matetlajtlakolmaka, niman Biblia kuajli techijlia ika Jesús tetlajtlakolmakas ika melajkayotl (xpoua Isaías 11:​3, 4). Yejua kuajli kita tlenon kinemiliaj, tlenon kijtouaj niman tlenon kichiuaj tlaltikpakchanejkej. Yejuin kijtosneki ika noijki kita tla kuajli kinseliaj niman kinpaleuiyaj tlapejpeniltin (Mat. 12:​36, 37; 25:40). a Akin tenojnotsaj kiteititiaj ika kinpaleuiyaj tlapejpeniltin. Niman akin kinpaleuiskej kimitaskej ika “yolchipajkej” niman uelis kiseliskej nemilistli tlen xkeman tlamis ipan tlaltikpaktli (Mat. 25:46; Apoc. 7:​16, 17). Niman tla melajkanemij ipan ueyi tlajyouilistli niman tla yopanok, intoka xpopoliuis ipan on “amamoxtli yejuan kijtoua akinomej kipiyaj yenkuik nemilistli” (Apoc. 20:15).

5. ¿Tlenon techmachtia neskayotl itech borreguitos niman chivos, niman akinomej noneki kuajli kitaskej tlen temachtia yejuin neskayotl?

⁵ Xteititi ika timelajkanemi. Neskayotl itech borreguitos niman chivos más tlajtoua intech akin kichiaj nochipa nemiskej ipan tlaltikpaktli. Yejuamej kiteititiaj ika melajkanemij ijkuak tenojnotsaj pampa ijkon kinpaleuiyaj ikniuan Cristo. Noijki melajkanemij ijkuak kitlakamatij “tekitketl” yolmelauak niman tlamachilise akin Jesús yokitlapejpeni (Mat. 24:45). San ika, akin yaskej ne iluikak noijki noneki kuajli kitaskej tlen techmachtia yejuin neskayotl. ¿Tleka? Pampa Jesús kitstok tlenon kichiuaj, tlenon kinemiliaj niman tlenon kijtouaj. Kuakon, yejuamej noijki noneki kiteititiskej ika melajkanemij. Aman matikimitakan ome neskayotl tlen Jesús okimijto ipan Mateo capítulo 25. Kachtopa matikitakan neskayotl itech 10 ichpokamej.

10 ICHPOKAMEJ

6. ¿Kenon okiteititijkej makuiltin ichpokamej ika tlamachilisejkej katkaj? (Mateo 25:​6-10).

⁶ Ipan yejuin neskayotl, Jesús okijto ika 10 ichpokamej okinamikitoj novio (Mat. 25:​1-4). Nochimej yejuamej kinekiyaj iuan kalakiskej kampa nonamiktiskia. Jesús okijto ika makuiltin ichpokamej tlamachilisejkej katkaj niman on oksekimej makuiltin xtlamachilisejkej katkaj. Ichpokamej akin tlamachilisejkej katkaj kuajli yonoyektlalijkaj niman tlatlachixtoyaj, yejuamej kinektoyaj kichiaskej novio maski tla melak itlayoua ajsiskia. Ika yejon, hasta okitkikej aceite niman ijkon xseuis intlauil hasta ijkuak yejkoskia novio (xpoua Mateo 25:​6-10). Ijkuak oyejkok novio, ichpokamej akin tlamachilisejkej katkaj iuan okalakkej kampa nonamiktiskia. Aman noijki ijkon inpan panos tokniuan tlapejpeniltin. Akin kiteititiskej ika melajkanemij niman tlatlachixtokej hasta ijkuak yejkos novio, Jesús, uelis iuan kalakiskej ipan iTekiuajyo tlen onka ne iluikak (Apoc. 7:​1-3). b ¿Niman tlenon inpan opanok ichpokamej akin xtlamachilisejkej katkaj?

7. ¿Tlenon ipan onochiuj makuiltin ichpokamej akin xtlamachilisejkej katkaj, niman tleka?

⁷ Ichpokamej akin xtlamachilisejkej katkaj xkuajli onoyektlalijkej para kichiaskej novio.  Jesús okijto ika ijkuak yejuin ichpokamej okikakkej ika novio iyejkoskia, okitakej ika intlauil iseujtoya. Kuakon, yejuamej okikouatoj más aceite para kitlaliliskej intlauil. San ika, ijkuak oyejkok novio, yejuamej xiuajnokuepayaj. Kuakon, on ichpokamej akin tlamachilisejkej katkaj “yejuan kimachayaj oyajkej iuan on novio ipan on iluitl kampa nonamiktiuaj. Ijkuak yejuamej okalakkej ipan on iluitl, on tsakuijlotl okitsakukej” (Mat. 25:10). Ijkuak ouajnokuepkej ichpokamej akin xtlamachilisejkej katkaj niman kinekiyaj kalakiskej kampa nonamiktilo, novio okimijli: “Nejua xnemechixmati”. Yejon ichpokamej nonekiya kuajli noyektlaliskej para kichiaskej novio maski san kech uejkauiskia ika yejkos. ¿Tlenon kinmachtia yejuin tokniuan tlapejpeniltin?

8, 9. ¿Tlenon kinmachtia tlapejpeniltin neskayotl itech 10 ichpokamej? (Noijki xkimita tlaixkopinaltin).

⁸ Xteititi ika kuajli yotimoyektlali niman ika titlatlachixtok. Jesús xokijtosnek tla oniaskiaj ome grupos: se grupo kampa nemiskiaj tlapejpeniltin akin kuajli noyektlaliskiaj para tlamachiaskiaj hasta ijkuak tlapopoliuis niman okse grupo kampa nemiskiaj tlapejpeniltin akin xkuajli noyektlaliskiaj. Jesús yej kinekiya kimijlis tlapejpeniltin ika noneki kuajli noyektlaliskej niman ijkon uelis melajkanemiskej hasta ijkuak tlapopoliuis, pampa tla xijkon kichiuaj, xkiseliskej tlen yokimijlijkej (Juan 14:​3, 4). ¡Yejuin xsan noneki tikauilmatiskej! Maski tla tikchiaj tiaskej ne iluikak noso tinemiskej nikan ipan tlaltikpaktli, noneki kuajli tikitaskej tlenon techmachtia neskayotl itech 10 ichpokamej: noneki nochipa titlatlachixtoskej niman kuajli toyektlaliskej para uelis titlaxikoskej hasta ijkuak tlapopoliuis (Mat. 24:13).

⁹ Ken yotikitakej, ijkuak Jesús otlajto itech 10 ichpokamej, otechmachti ika melak noneki kuajli matoyektlalikan niman matitlatlachixtokan. Sakin, Jesús okijto neskayotl itech tomin tlen okinmakakej yeyimej tlakeualtin, niman yejuin techmachtia ika melak noneki matitekitkej.

 TOMIN TLEN OKINMAKAKEJ YEYIMEJ TLAKEUALTIN

10. ¿Kenon okiteititijkej omemej tlakeualtin ika melajkanemiyaj? (Mateo 25:​19-23).

¹⁰ Jesús okijto se neskayotl itech yeyimej tlakeualtin: omemej omelajkanenkej itech inteko niman se xomelajkanen (Mat. 25:​14-18). Inteko oksekan yaskia niman okinmakateuj tomin. Omemej tlakeualtin okiteititijkej ika melajkanemiyaj pampa tekitkej katkaj niman onokojtilijkej kuajli kitekitiltiskej itomin inteko. Kuakon, ijkuak inteko ouajnokuep, yokitlankaj okpatipan itomin inteko, niman yejua melak oyolpak niman cada se okijli: “Nouan xpiya pakilistli” (xpoua Mateo 25:​19-23). ¿Niman tlenon okichiuj on okse tlakeuajli?

11. ¿Tlenon ipan onochiuj tlakeuajli akin “tlatsijki” katka, niman tleka?

¹¹ On ika yeyi tlakeuajli noijki okimakakej tomin para makitekitilti niman ijkon uelis kitlanis itlanka. San ika, yejuin tlakeuajli “tlatsijki” katka, ika yejon, yejua otlaxkuak niman ompa okiyan tomintsin. Ijkuak iteko onokuep, okikuepili itomin tlen okimakaka niman xokitlajtlanili makitlapopolui pampa xtlaj okitlanilijka niman hasta okijli ika xteikneliaya. Kuakon, iteko okajuak, okikuili tomintsin tlen okimakaka niman okuajkixti ichan (Mat. 25:​24, 26-30).

12. ¿Akinomej kinneskayotiaj on omemej tlakeualtin akin omelajkanenkej?

¹² On omemej tlakeualtin akin omelajkanenkej kinneskayotiaj tokniuan tlapejpeniltin akin melajkanemij. Jesús, akin kentla inteko yeskia tlapejpeniltin, cada se ijkin kijlia: “Nouan xpiya pakilistli”. Yejuin kijtosneki ika kinmakaskej tlen kinmelaua kiseliskej: yejuamej kachtopa kinyolitiskej para nemiskej ne iluikak (Mat. 25:​21, 23; Apoc. 20:5a). San ika, aman matikitakan tlenon kinmachtia tokniuan tlapejpeniltin tlen okichiuj tlakeuajli akin tlatsijki katka.

13, 14. ¿Tlenon kinmachtia tlapejpeniltin neskayotl itech tomin? (Noijki xkimita tlaixkopinaltin).

¹³ Xteititi ika titekitki. Ipan neskayotl itech tomin, Jesús xkijtojtoya tla tlapejpeniltin tlatsijkej yeskiaj, yej kijtojtoya tlenon xnonekiya kichiuaskej, ijkon ken ipan neskayotl itech 10  ichpokamej. Yejua kimijlijtoya ika tla xok ika inyojlo tekitij, xuelis kalakiskej kampa okiminotskej niman yokintlapejpenijkej, kijtosneki, xkalakiskej ipan iTekiuajyo toTajtsin ne iluikak (2 Ped. 1:10).

¹⁴ Ijkuak Jesús okijto neskayotl itech 10 ichpokamej niman itech tomin, okinmasikamachilti tokniuan tlapejpeniltin ika nonekiya kuajli noyektlaliskej, tlatlachixtoskej niman tekitkej yeskej. San ika, Jesús xsan yejon okimijli tlapejpeniltin. Matikitakan tlenon más okimijli ipan Mateo 24:​40, 41.

AKIN “KUIKASKEJ”

15, 16. Ijkon ken kijtoua ipan Mateo 24:​40, 41, ¿tleka melak noneki ika tlapejpeniltin matlatlachixtokan?

¹⁵ Achto ika Jesús kimijtoskia yeyi neskayotl tlen yotikominteneujkej, yejua otlajto intech omemej tlakamej akin tekititoyaj kampa tokaj niman intech omemej siuamej akin tlakuechojtoyaj ipan se molino. Yejuin omemej tlakamej niman yejuin omemej siuamej nesiya ika san noijki tlen kichiujtoyaj. San ika, Jesús okijto: “Se kuikaskej niman okse kajteuaskej” (xpoua Mateo 24:​40, 41). Sakin, Jesús ijkin okimijli inomachtijkauan: “Xtlachixtiakan tej, pampa xnenkimatij tlen hora uajlas on nemoTEKO” (Mat. 24:42). Yejuin tlajtoltin san noijki kakistisnekij ika tlen okijto Jesús ijkuak otlan kiteneua neskayotl itech 10 ichpokamej (Mat. 25:13). Jesús kijtojtoya ika ajsiskia se tonajli ijkuak noitaskia akinomej melauak yokinselijkaj ken tlapejpeniltin. Niman san “kuikaskej” akin melauak tlapejpenijli niman melajkanemi, yejuin kijtosneki ika Jesús kiselis ne iluikak kampa yejua tekiuajtitos (Juan 14:3).

¹⁶ Xteititi ika titlatlachixtok. Tla se tlapejpenijli xtlatlachixtok, xkuikaskej imiuan oksekimej tlapejpeniltin (Mat. 24:31). San ika, tlen okijto Jesús noijki kinpaleuiya akin xyaskej iluikak pampa yejuamej noijki noneki melajkanemiskej niman tlatlachixtoskej.

17. ¿Tleka xtechajmana ika Jehová san kemach yokintlapejpeni sekimej tokniuan para mauiyan iluikak?

¹⁷ Tejuamej kuajli tikixmatstokej Jehová, tikmatstokej ika yejua nochipa kichiua tlen kuajli. Yejua ika, xtechajmana tla Jehová san kemach yokintlapejpeni sekimej para mauiyan ne iluikak. c Matikilnamikikan ika Jesús otlajto itech se akin kitokaya uvas, niman ijkuak iteotlak katka, yejua okintejtemoto oksekimej tlakeualtin (Mat. 20:​1-16). Akin opeujkej tekitij ika teotlak san noijki okintlaxtlauilijkej ken akin opeujkej tekitij ika kualkan. Noijki ijkon, nochimej tlapejpeniltin akin melajkanemiskej yaskej ne iluikak maski sekimej san kemach yokintlapejpenijkej.

MATIKCHIUAKAN TLEN OTECHMACHTI JESÚS

18, 19. ¿Tlenon otikitakej ipan yejuin tlamachtijli?

¹⁸ Ipan yejuin tlamachtijli, otikitakej ika neskayotl itech borreguitos niman chivos kimititia akin xyaskej iluikak ika noneki melajkanemiskej aman niman ijkuak panotos ueyi tlajyouilistli. Ijkon, Jesús kitas akinomej omelajkanenkej para uelis “nochipa kipiyaskej on nemilistli” (Mat. 25:46).

¹⁹ Noijki otikitakej ome neskayotl tlen Jesús okimijto para kinpaleuis tokniuan tlapejpeniltin. Ipan neskayotl itech 10 ichpokamej, san makuiltin okiteititijkej ika kuajli yonoyektlalijkaj niman ika tlatlachixtoyaj. Yejuamej tlamachilisejkej katkaj niman san kichiatoyaj novio maski xkimatiyaj tlen hora ajsiskia. Niman on oksekimej ichpokamej akin xtlamachilisejkej katkaj niman xkuajli onoyektlalijkaj xok okalakkej kampa ononamiktilok  pampa novio xokinkauili makalakikan. ¿Tlenon techmachtia? Ika noneki kuajli toyektlaliskej para tikchiaskej Jesús hasta ijkuak kipopolos nochi tlen xkuajli. Ipan neskayotl itech tomin tlen okinmakakej yeyimej tlakeualtin, Jesús okijto ika omemej tlakeualtin melak tekitkej katkaj. Yejuamej omelajkanenkej niman chikauak otekitkej para kitlaniskej itlanka itomintsin inteko, niman inteko okuelitak tlen okichiujkej. San ika, tekitketl akin tlatsijki katka okikixtijkej. ¿Tlenon techmachtia? Ika noneki chikauak titekititoskej ipan ikalpan Jehová hasta ijkuak tlapopoliuis. Noijki otikitakej ika Jesús okimijli tlapejpeniltin ika melak noneki matlatlachixtokan niman ijkon uelis yaskej iluikak. Niman yejuamej san kichiatokej mayejko tonajli ijkuak nosentlaliskej iuan Jesús ne iluikak. Niman tla yopanok Armagedón, “nonamiktis on Borreguito” imiuan tlapejpeniltin akin yeskej ken inovia Jesús (2 Tes. 2:1; Apoc. 19:9).

20. ¿Tlenon kichiuas Jehová tla tikchiuaj tlen techijlia?

²⁰ Xok ueyi poliui ijkuak Jesús techtlajtlakolmakas, san ika, xnoneki tomojtiskej. Tla tejuamej timelajkanemij, toTajtsin iluikakchane techmakas “ueyi poder” niman ijkon uelis tinemiskej ixpan Jesús ijkuak techtlajtlakolmakas (2 Cor. 4:7; Luc. 21:36). Kuakon, maski tla tikchiaj tiaskej iluikak noso tinemiskej nikan ipan tlaltikpaktli, tinochimej noneki kuajli tikilnamiktoskej tlen Jesús otemachti ijkuak okimijto seki neskayomej. Tla ijkon tikchiuaj, toTajtsin techselis niman yejua techititis iueyiteiknelilis niman totoka nestos “ipan on amamoxtli, yejuan kijtoua akinomej kipiyaj on yenkuik nemilistli para nochipa” (Dan. 12:1; Apoc. 3:5).