1, 2. a) ¿Kenijki nemiyaj tokniuan akin chantiyaj Judea ijkuak apóstol Pablo okintitlanili se carta? b) ¿Tleka melak kuajli ika ijkuakon okintitlanili yejon carta?

 SAKIN ika omik Jesús, tokniuan hebreos okixnamijkej tlen xkuajli. Ijkuak kemach yonochijchiujka tlanechikojli ne Jerusalén, miyekej opeujkej kintlaueltokaj (Hech. 8:1). Niman 20 xiuitl sakin, tokniuan akin chantiyaj Judea xkipiayaj tomintsin, niman kanaj ijkon inpan opanok pampa kampa chantiyaj xonkatka tlakuajli (Hech. 11:​27-30). San ika, kanaj ipan xiuitl 61, tokniuan xok más tlajyouijtoyaj. Ijkuakon, apóstol Pablo okintitlanili se carta niman yejon carta melak okinpaleui pampa sa achijtsin poliuiya ijkuak kixnamikiskiaj tlen melak xkuajli.

² Sa achijtsin poliuiya ijkuak tokniuan hebreos xok yolseujtoskiaj. Ipan carta tlen apóstol Pablo okintitlanili, okimijli tokniuan tlenon ueliskia kichiuaskej niman ijkon tlaxikoskej ijkuak kixoxotoniskiaj Jerusalén, ijkon ken Jesús yokijtojka (Luc. 21:20). Pablo niman tokniuan akin chantiyaj Judea xkimatiyaj tlen tonajli ijkon panoskia. San ika, chika kichiayaj ijkon mapano, yejuamej ueliskiaj kichikaujtoskej intlaneltok niman ueliskiaj noyektlaliskej para kimatiskej tlenon kichiuaskej ijkuak ijkon panoskia. Nochi yejon kinpaleuiskia matlaxikokan (Heb. 10:25; 12:​1, 2).

3. ¿Tleka melak kuajli tla tomachtiaj carta tlen okintitlanilijkej tokniuan hebreos?

³ Sa achijtsin poliui ijkuak tejuamej tikixnamikiskej se tlajyouilistli  tlen más ueyi xijkon ken tlen okixnamijkej tokniuan hebreos (Mat. 24:21; Apoc. 16:​14, 16). Tlen Jehová okimijli yejuin tokniuan noijki melak techpaleuis. Kuakon, matikitakan seki tlen kijtoua carta tlen okintitlanilijkej.

“MA TITOCHIKAUAKAN”

4. ¿Tlenon okixnamijkej tokniuan akin judíos katkaj? (Noijki xkita tlaixkopinajli).

⁴ Judíos akin opeuj kichiuaj ken Cristo ouijtika okitakej nopatlaskej. ¿Tleka? Matikilnamikikan ika Jehová okintlapejpenijka judíos para yejua maikalpan. Niman melak ouejkauj ika miyekej konueyichiuayaj Jehová ne Jerusalén pampa ompa onkatka teopan, niman ompa tekiuajtiya se tekiuaj akin Jehová yokitlapejpenijka matlayekana. Noijki, nochimej judíos akin melajkanemiyaj kitlakamatiyaj Tlanauatijli tlen okimakakej Moisés niman tlanauatiltin tlen kinmachtiayaj akin tlayekanayaj ipan tlaneltokijli. Yejuin tlanauatiltin katkaj itech tlenon nonekiya kikuaskej, itech circuncisión niman itech kenijki kinnotsaskej akin xjudíos katkaj. San ika, desde ijkuak Jesús omik, Jehová xok kinseliaya uentin tlen kinuentlaliayaj ipan teopan. Nochimej judíos akin opeuj kichiuaj ken Cristo ouijtika okitakej xok kichiuaskej nochi yejuin pampa yonomatkaj kitlakamatiskej Tlanauatijli (Heb. 10:​1, 4, 10). Hasta tokniuan akin chikauak kipiayaj intlaneltok ouijtika okitakej nopatlaskej, ken apóstol Pedro (Hech. 10:​9-14; Gál. 2:​11-14). Niman akin kinyekanayaj judíos opeuj kintlaueltokaj tokniuan ipampa tlen yopeujkaj kineltokaj.

5. Xkinteneua ome grupos akin kimixnamikiyaj tokniuan.

⁵ Onkatkaj ome grupos akin okimixnamijkej tokniuan akin chantiyaj Judea. Ipan se grupo nemiyaj judíos akin tlanauatiayaj ipan tlaneltokiltin niman kiteijliayaj ika tokniuan temachtiayaj tlen xmelauak itech ikalpan Jehová, noso, ika apóstatas katkaj. Niman ipan okse grupo nemiyaj akin kijtouayaj ika kichiuayaj ken Cristo, san ika, kinekiyaj manotlakamati Tlanauatijli tlen okimakakej Moisés, niman kanaj kinekiyaj ijkon  manochiua san para xkintlaueltokaskej (Gál. 6:12). ¿Tlenon kinpaleuiskia tokniuan matlaxikokan niman mamelajkanemikan?

6. ¿Tlenon okimijli Pablo makichiuakan tokniuan hebreos? (Hebreos 5:​14–6:1).

⁶ Ipan carta tlen Pablo okintitlanili tokniuan hebreos, okimijli más kuajli manomachtikan iTlajtol toTajtsin (xpoua Hebreos 5:​14–6:1). Yejua miyekpa okiteneuj tlen kijtoua Tlajkuiloltin ika Hebreo niman ijkon kimijlis ika ken aman kiueyichiuayaj toTajtsin más kuajli katka xijkon ken kichiuayaj judíos. a Apóstol Pablo kimatstoya ika nonekiya más manomachtikan iTlajtol toTajtsin pampa yejon kinpaleuiskia makitakan tlen sekimej xkuajli temachtiayaj niman ijkon xkinkajkayauaskiaj niman xkitlalkauiskiaj Jehová.

7. ¿Tlenon tikixnamikij aman?

⁷ Aman, miyekej kijtouaj ika xtlaj tlenon tla tikchiuaj tlen Jehová kijtoua ika xkuajli. Niman techixnamikij pampa kijtouaj ika akin tiiteixpantijkauan Jehová xkuajli tlen tikchiuaj pampa tiktlakamatij tlen Biblia kijtoua itech sexo. Niman aman más tikitaj ika ken tlanemiliaj niman tlen kichiuaj tlaltikpakchanejkej xkuelita Jehová (Prov. 17:15). Kuakon, tla xtiknekij tiktlalkauiskej Jehová, noneki matomajmachtikan nimantsin matikitakan tlen sekimej xkuajli temachtiaj noso maka matechajmana tlen sekimej xkuajli kijtouaj (Heb. 13:9).

8. ¿Kenijki uelis tikchikauaskej totlaneltok?

⁸ Pablo okimijli tokniuan ika nonekiya makichikauakan intlaneltok, niman tejuamej noijki noneki ijkon tikchiuaskej. ¿Kenijki? Tla nochipa tomachtiaj Biblia niman tla tokojtiliaj titlanemiliskej ken Jehová. Niman yejuin ok noneki tikchiujtoskej sakin ika yotosentemakakej itech Jehová niman yotoapolaktijkej. Kuakon, maski tla yotiuejkaujkej noso xitiuejkauij ika tiktekichiuiliaj, noneki nochipa tomachtiskej iTlajtol toTajtsin (Sal. 1:2). Tla ijkon tikchiuaj, melak chikauis totlaneltok; niman Pablo miyekpa okiteneuj ipan icarta ika melak noneki matitlaneltokakan (Heb. 11:​1, 6).

“TIKPIYAJ TLANELTOKTLI NIMAN IJKI TIKEJEUAJ TOALMA”

9. ¿Tleka nonekiya melak machikaujto intlaneltok tokniuan?

⁹ Tokniuan melak nonekiya chikaujtos intlaneltok para ueliskia makisaskej ijkuak panoskia tlen xkuajli ne Judea (Heb. 10:​37-39). Jesús yokimijlijka inomachtijkauan ika ijkuak kitaskiaj ika soldados yokiyeualojkej Jerusalén, nonekiya onnopaleuiskej ipan tepemej. Niman nochimej tokniuan akin chantiyaj Jerusalén niman akin ompa nisiuj chantiyaj nonekiya kichiuaskej tlen Jesús yokimijlijka (Luc. 21:​20-24). San ika, ipan yejon tonaltin, ijkuak kixnamikiyaj se kalpan, sekimej onnopaleuiayaj ipan se ueyikalpan tlen tsauktoya ika tepantin, ken Jerusalén. Ika yejon, tokniuan melak nonekiya chikaujtos intlaneltok pampa xakaj onnopaleuiaya ipan tepemej.

10. ¿Tlenon kichiuaskiaj tokniuan tla kipiayaj chikauak intlaneltok? (Hebreos 13:17).

¹⁰ Tokniuan melak nonekiya tlaneltokaskej intech tokniuan akin Jesús yokintlapejpenijka para makiyekanakan tlanechikojli. ¿Tleka? Pampa yejuin tokniuan kimijliskiaj kemanon niman kenijki choloskiaj (xpoua Hebreos 13:17). Tlajtojli ika griego “xkintlakamatikan” tlen onotekitilti ipan Hebreos 13:17 teasikamachiltia ika yakaj kinektok kitlakamatis akin kinauatia pampa itech tlaneltoka niman xkitlakamati san pampa noneki ijkon kichiuas.  Tokniuan melak nonekiya matlaneltokakan intech tlayekankej achto peuaskia tlajyouilistli. Tla yejuamej tetlakamatiyaj ijkuak kuajli nemiyaj, kuakon, ijkuak panoskia tlen melak xkuajli, xouijtika kitaskiaj tetlakamatiskej.

11. ¿Tleka melak noneki matitlaneltokakan?

¹¹ Melak noneki matitlaneltokakan ijkon ken tokniuan hebreos akin Pablo okintitlanili carta. Aman, miyekej xkineltokaj ika sa achijtsin poliui ijkuak kipopoloskej nochi tlen xkuajli niman hasta techpijpinaujtiaj pampa ijkon tikneltokaj (2 Ped. 3:​3, 4). Noijki, maski Biblia kijtoua seki tlen panos ipan ueyi tlajyouilistli, onka seki tlen xtikmatij. Kuakon, melak noneki matikneltokakan ika Jehová kipopolos tlen xkuajli ijkuak yejua yokijto niman kuajli matikmatstokan ika yejua techtlajpiyas (Hab. 2:3).

12. ¿Tlenon techpaleuis matimakisakan ipan ueyi tlajyouilistli?

¹² Aman tejuamej noijki melak noneki matikneltokakan ika Jehová yokitlali “tekitketl” yolmelauak niman tlamachilise para matechyekana (Mat. 24:45). Kanaj tokniuan hebreos okimijlijkej tlenon nonekiya kichiuaskej ijkuak soldados romanos okiyeualojkej Jerusalén. Niman kanaj tejuamej noijki techijliskej tlenon noneki tikchiuaskej ijkuak peuas ueyi tlajyouilistli niman ijkon timakisaskej. Kuakon, desde aman melak noneki matitlaneltokakan intech tokniuan akin Jehová yokintlali makiyekanakan ikalpan. Tla aman xtikintlakamatij niman xintech titlaneltokaj, melak ouijtika tikitaskej tikintlakamatiskej ipan ueyi tlajyouilistli.

13. ¿Tleka melak kinpaleuiskia tokniuan tlen kijtoua Hebreos 13:5?

¹³ Tokniuan hebreos xnonekiya melak notomintiskej nion kitlasojtlaskej tomintsin pampa yejuamej san kichiatoyaj makimijlikan kemanon choloskej (xpoua Hebreos 13:5). Sekimej tokniuan ouijtika yopanokaj pampa xkipiayaj tomintsin nion tlen kikuaskej (Heb. 10:​32-34). Niman maski se tiempo tokniuan okinejkej tlaxikoskej para tenojnotsaskej, sekimej kanaj opeuj más tekitij para más kitlaniskej tomintsin niman ijkon xtlaj kinpoloskia. San ika, ijkuak kixoxotoniskiaj Jerusalén, intomintsin xtlaj ika kinpaleuiskia (Sant. 5:3). Niman tla yakaj melak kitlasojtlaya tomintsin, más ouijtika kitaskia choloskia niman kikauas ikal niman nochi tlen kipiaya.

14. ¿Tlenon tikchiuaskej tla chikauak tikpiyaj totlaneltok?

¹⁴ Tla melauak tikneltokaj ika sa achijtsin poliui ijkuak kipopoloskej nochi tlen xkuajli, techpaleuis maka san matiknektokan melak totomintiskej. Ijkuak panotos ueyi tlajyouilistli, tomintsin xtlaj ika techpaleuis. Biblia kijtoua tlenon kichiuaskej tlaltikpakchanejkej: “On imimplata niman iminoro kixiniskej ipan ojtli ken tlajsojli yeskia, pampa kimatiskej ika nion iminoro nion imimplata xuelis kinmanauiskej ipan on tonajli ijkuak nejua akin niiminTEKO nikinuajtitlanilis notlauel” (Ezeq. 7:19). Melak xkuajli yeskia tla san tikitstokej kenijki más tiktlaniskej tomintsin, yej más kuajli tla tiknemiliaj tlenon uelis tikchiuaskej para tinemiskej san ika achijtsin niman tlenon techpaleuis kuajli matiktekichiuilikan Jehová. Xnoneki melak matotlaneuikan nion xnoneki melak matitekitikan para tiktlajpiyaskej tlen tikpiyaj niman hasta xok tikpiyaskej tiempo para tikchiuaskej itlaj okse. Noijki noneki totlajpiyaskej para maka melak matiktlasojtlakan tlen tikpiyaj (Mat. 6:​19, 24). Kanaj ijkuak más nonisiuijtias tonajli ijkuak kipopoloskej nochi tlen xkuajli, nonekis tikteititiskej tla más tikneltokaj ika Jehová techpaleuis noso tla tikneltokaj ika techpaleuis tlen tikpiyaj.

 “NEMEJUAMEJ NONEKI NENTLAXIKOSKEJ”

15. ¿Tlenon nonekiskia kixikoskej tokniuan?

¹⁵ Tokniuan hebreos más nonekiya nokojtiliskej kitekichiuiliskej Jehová niman tlaxikoskej pampa sa achijtsin poliuiya ijkuak panoskia tlen más ouijtika (Heb. 10:36). Maski sekimej tokniuan yokintlaueltokakaj, sekimej xkeman ijkon intech panouaya pampa opeuj nomachtiaj ijkuak xkintlaueltokayaj tokniuan. Niman Pablo okimijli ika aman más kintlaueltokaskiaj niman ika nonekiya melajkanemiskiaj hasta ijkuak mikiskiaj, ijkon ken okichiuj Jesús (Heb. 12:4). Miyekej judíos opeuj más kualanij pampa okitakej ika tokniuan más miyekixtiayaj. Seki xiujtin achto, ijkuak Pablo tenojnotstinemiya Jerusalén, sekimej opeuj kixnamikij niman ipantsin 40 judíos okijtojkej ika “xtlakuaskej nion xitlaj koniskej hasta kaman kimiktiaj Pablo” (Hech. 22:22; 23:​12-14). Kuakon, maski tokniuan chantiyaj kampa melak kintlauelitayaj, yejuamej xnonekiya kikajkauaskej ika nosentlaliaj, ika tenojnotsaj niman melak nonekiya tlaneltokaskej.

16. ¿Kenijki techpaleuiya carta tlen okintitlanilijkej tokniuan hebreos niman ijkon kuajli matitlanemilikan ijkuak techtlaueltokaskej? (Hebreos 12:​7, TNM).

¹⁶ Pablo kimatstoya ika tokniuan nonekiya kuajli tlanemiliskej ijkuak kintlaueltokaskiaj niman ijkon ueliskiaj tlaxikoskej. Ika yejon, okijto ika toTajtsin kitekauilia ika yakaj ipan mapano tlen ouijtika para kipaleuis más kuajli makichiua ken Cristo (xpoua Hebreos 12:​7, TNM). b Ijkuak itlaj kixnamikiyaj tokniuan, yejuamej nonekiya kinemiliskej ika toTajtsin ijkon kinpaleuiyaya para makinpiyakan kualtsitsintin kualneskayomej. Kuakon, yejuamej xmás ouijtika kitaskiaj tlaxikoskej tla kasikamatiyaj ika ijkuak kixnamikiyaj tlen xkuajli, kinpaleuiyaya más kuajli makichiuakan ken Cristo (Heb. 12:11).

17. ¿Tlenon kimatstoya Pablo itech kenijki uelis titlaxikos ijkuak mitstlaueltokaskej?

 ¹⁷ Pablo okinyolchikauj tokniuan matlaxikokan niman maka manosiaujkauakan ijkuak kixnamikiskiaj tlen xkuajli. Niman melak kuajli ika apóstol Pablo yejua akin ijkon okimijli. ¿Tleka? Pampa yeuejkaui yejua okintlaueltokak tokniuan, kuakon, kimatstoya tlenon ueliskia kixnamikiskej. Noijki, ijkuak yejua opeuj kichiua ken Cristo, san tlemach okichiuilijkej niman okitlaueltokakej (2 Cor. 11:​23-25). Kuakon, Pablo kuajli kimatstoya tlenon ueliskia yakaj kipaleuis matlaxiko. Ika yejon, okintlalnamikti tokniuan ika xnonekiya san intech tlaneltokaskej, yej nonekiya tlaneltokaskej itech Jehová. Noijki okijto: “NoTEKO yejua nechpaleuiya. Yejua ika, xnikmakajsis on tlen uelis nechchiuilis yakaj tlakatl” (Heb. 13:6).

18. ¿Tlenon noneki kuajli tikmatstoskej, niman tlenon noneki tikchiuaskej desde aman?

¹⁸ Aman, sekimej tokniuan kintlaueltokatokej niman tlaxikojtokej. Niman tejuamej uelis tikimititiskej ika tikintlasojtlaj tla tikchiuaj teoyotl inpampa. Niman kemantika uelis tikinpaleuiskej tla tikinmakaj tlen noneki (Heb. 10:33). Biblia kijtoua: “Nochimej kintlauelitaskej niman kintlajyouiltiskej on yejuan kinekiskej nouikaskej yolchipajkej itech Cristo Jesús” (2 Tim. 3:12). Yejuin kijtosneki ika desde aman, tinochimej noneki toyektlaliskej para uelis titlaxikoskej ijkuak topan panos tlen xkuajli. Noneki titlaneltokaskej itech Jehová niman noneki kuajli tikmatstoskej ika yejua techpaleuis matitlaxikokan maski san tlenon topan mapano. Niman ijkuak nonekis, yejua kinyolseuis itekipanojkauan akin melajkanemij (2 Tes. 1:​7, 8).

19. ¿Tlenon uelis tikchiuaskej niman ijkon uelis titlaxikoskej ijkuak yejkos ueyi tlajyouilistli? (Noijki xkita tlaixkopinajli).

¹⁹ Carta tlen Pablo okimijkuilouili tokniuan hebreos melak okinpaleui matlaxikokan ijkuak inpan opanok tlen xkuajli. Pablo okinyolchikauj más manomachtikan niman makasikamatikan iTlajtol toTajtsin. Yejon kinpaleuiskia maka makineltokakan tlen sekimej xkuajli temachtiayaj niman tlen ueliskia kichiuas makitlalkauikan Jehová. Noijki okimijli makichikauakan intlaneltok niman ijkon ueliskiaj nochipa kitlakamatiskej Jesús niman kintlakamatiskej akin kiyekanayaj tlanechikojli. Niman okimijli ika xouijtika kitaskiaj tlaxikoskiaj tla kilnamikiyaj ika ijkuak inpan panouaya tlen xkuajli, toTajtsin kinmachtiaya más kuajli makichiuakan ken Cristo. Tla tejuamej noijki tikchiuaj tlen Pablo okimijli tokniuan, uelis titlaxikoskej hasta ijkuak tlapopoliuis (Heb. 3:14).