1, 2. ¿Tleka akin tiktekichiuiliaj Jehová melak tiyolpakij? (Santiago 1:​22-25).

 JEHOVÁ niman iKoneuj kinekij matiyolpakikan. Akin okijkuilo Salmo 119:2 okijto: “Melauak kipiyaj paktli on yejuan kichiuaj on itlanauatiluan, niman kitejtemouaj toTEKO ikan nochi iminyojlo”. Niman Jesús noijki okijto: “¡Dios más kintiochiua [noso yolpakij] on yejuan kakij itlajtoltsin niman kitlakamatij!” (Luc. 11:28).

² Akin tiktekichiuiliaj Jehová melak tiyolpakij. ¿Tleka? Pampa miyek onka tlen kichiua matiyolpakikan, ken ijkuak mojmostla tikamapouaj iTlajtol toTajtsin niman tokojtiliaj tikchiuaskej tlen ompa tiuelij (xpoua Santiago 1:​22-25).

3. ¿Kenon techpaleuiya ijkuak tikchiuaj tlen tiuelij ipan iTlajtol toTajtsin?

³ ¿Kenon techpaleuiya ijkuak tikchiuaj tlen tiuelij ipan iTlajtol toTajtsin? Kachtopa, tikyolpaktiaj Jehová, niman pampa tikyolpaktiaj, tejuamej noijki tiyolpakij (Ecl. 12:13). Noijki, ijkuak tikchiuaj tlen kijtoua iTlajtol toTajtsin, techpaleuiya kuajli matouikakan imiuan tochanejkauan niman imiuan tokniuan akin nemij ipan tlanechikojli. Kanaj tejua yotikitak ika Biblia ijkon yomitspaleui. Noijki, xtitlajyouiyaj ken sekimej akin xkitlakamatij itlanauatiluan Jehová. Sejpa, ipan se tlakuikajli, David okiteneuj ken tetlajtlakolmaka Jehová niman  tlen kitlajtlani, niman ijkuak otlan kiteneua nochi yejuin, ijkin onokuikati: “Tla nikintlakamati, ueyi tetlayokolijli nikpiyas” (Sal. 19:​7-11).

4. ¿Tleka kemantika ouijtika tikitaj tikchiuaskej tlen kijtoua iTlajtol toTajtsin?

⁴ San ika ¿xmelak ika kemantika ouijtika tikitaj tikchiuaskej tlen kijtoua iTlajtol toTajtsin? Maski melak miyek tekitl tikpiyaj, noneki tikxeloskej tiempo niman ijkon tikamapouaskej niman tomachtiskej Biblia niman tikasikamatiskej tlenon kineki Jehová matikchiuakan. Ika yejon, ipan yejuin tlamachtijli tikitaskej tlenon techpaleuis mojmostla matikamapouakan iTlajtol toTajtsin. Noijki tikitaskej tlenon techpaleuis matitlanemilikan itech tlen tikamapouaj niman kenon uelis tikchiuaskej tlen tiuelij.

XKITA KEMANON UELIS TIKAMAPOUAS ITLAJTOL TOTAJTSIN

5. ¿Tlen tekitl tikchiuaj akin tiktekichiuiliaj Jehová?

⁵ Akin tiktekichiuiliaj Jehová melak miyek tikpiyaj tekitl. Tejuamej tikchiuaj tlen Biblia kijtoua ika melak noneki matikchiuakan. San seki matikteneuakan. Noneki titekitiskej para uelis tijkouaskej tlen noneki niman para tikinmakaskej tochanejkauan tlen kinpoloua (1 Tim. 5:8). Miyekej tokniuan noneki kintlajpiyaskej inchanejkauan akin kualoj noso akin iuejueyimej. Noijki, tinochimej noneki tikxeloskej tiempo para uelis totlajpiyaskej niman xtikualoskej noso para topajtiskej. Noijki tikchiuaj seki tekitl ipan tlanechikojli, ken titenojnotsaskej. Ken tikitaj, melak miyek tekitl tikchiuaj, niman kanaj timotlajtoltia: “¿Tlenon uelis nikchiuas niman ijkon nikxelos tiempo para nochipa nikamapouas Biblia, itech nitlanemilis niman nikchiuas tlen niueli?”.

6. ¿Tlenon uelis tikchiuas niman ijkon mojmostla tikamapouas moBiblia? (Noijki xkita tlaixkopinajli).

⁶ Melak noneki nochipa matikamapouakan Biblia pampa yejon tlen más noneki makichiuakan akin kichiuaj ken Cristo (Filip. 1:10). Ipeujyan Salmos kijtoua ika sajnoye paki akin “kuelita itlanauatil toTEKO niman  ipan tlanemilia ikan tonajli niman ikan yeuajli” (Sal. 1:​1, 2). Yejon techititia ika melak noneki matikxelokan tiempo niman ijkon tikamapouaskej. Niman, ¿tlen hora noneki tikamapouaskej Biblia? Yejon san tejuamej noneki tikijtoskej. San ika, ijkuak tikijtoskej tlen hora, noneki matiktlapejpenikan ijkuak tiueliskej niman ijkon uelis nochipa tikamapouaskej. Se tokniuj akin itoka Víctor kijtoua: “Ika kualkan xmás itlaj kakisti niman yonikitak ika ijkuakon más kuajli ninomachtia. Ika yejon, nikuelita san kualkantsin nikamapouas noBiblia maski xmás nikuelita saniman ninokuiteuas”. ¿Ijkon timomachilia ken Víctor? Xmotlajtolti: “¿Tlen hora más kuajli yeskia nikamapouas noBiblia?”.

XTLANEMILI IPAN TLEN YOTIKAMAPOUJ

7, 8. ¿Tlenon xnoneki tikchiuaskej ijkuak tikamapouaskej toBiblia? Xkijto se neskayotl.

⁷ Melak kuajli tla yotikijtojkej tlen hora tikamapouaskej toBiblia. San ika, noneki totlajpiyaskej. ¿Tleka? ¿Mopan yopanoka ika itlaj otikamapouj, san ika, sakin xok otikilnamik? Melak xkuajli yeskia tla ijkon topan nochiua ijkuak tikamapouaj toBiblia. Kanaj yotikijtojkej kech capítulos mojmostla tikamapouaskej, niman melak kuajli tla tikchiuaj tlen otikijtojkej (1 Cor. 9:26). San ika, xsan yejon tlen noneki tikchiuaskej. Matikitakan tlenon uelis tikchiuaskej niman ijkon matechpaleui tlen tikamapouaskej.

⁸ Matontlanemilikan itech yejuin: ijkuak kiyaui, melak kinpaleuiya xiujtsitsintin. San ika, tla melak chikauak kiyaui, atemi kampa onkatij xiujtsitsintin pampa tlajli xueli kichichina nochi atl. Kuakon, más kuajli tla xchikauak kiyaui niman ijkon tlajli uelis kichichinas atl. Ijkon, xiujtsitsintin uelis noskaltiskej. Noijki ijkon, ijkuak tikamapouaskej toBiblia, xnoneki melak miyek capítulos tikamapouaskej, pampa tla ijkon tikchiuaj, xuelis nochi tikasikamatiskej, xtikilnamikiskej tlen otikamapoujkej niman xuelis tikchiuaskej tlen otiuelkej (Sant. 1:24).

9. ¿Tlenon uelis tikchiuaskej tla tikitaj ika totoka tikamapouaj toBiblia?

⁹ Xkonnemili ika tikamapoujtika moBiblia,  san ika, tikita ika melak totoka tikamapoua, ¿tlenon uelis tikchiuas? Xyejyeko san yolik xkamapoua para uelis noijki titlanemilijtias. ¿Xtikmati kenon uelis tikchiuas yejuin? Maka xmajmana, matikitakan tlen uelis tikchiuas: 1) Xxelo más tiempo para uelis titlanemilijtias itech tlen tikamapoujtiuj noso 2) maka melak miyek versículos xkinamapoua niman tla yotitlan, aman xtlanemili itech tlen otikamapouj. Víctor, akin otikteneujkej ipan párrafo 6, kijtoua: “Nikyejyekoua san seki versículos noso san se capítulo nikamapouas. Pampa san kualkantsin nikamapoua noBiblia, nochi tonajli ueli nitlanemilia itech tlen onikamapouj”. Tejua xkita kech tlaxeloltin tikinamapouas ipan se tonajli, san ika, xkilnamiki ika xnoneki melak miyek tlaxeloltin tikinamapouas, yej más noneki xkasikamati tlen tikamapouas (Sal. 119:97; noijki xkita recuadro “ Tlen mitspaleuis xtlanemili itech tlen tikamapoua”).

10. Xteneua tlenon uelis tikchiuas ijkuak tikamapouas 1 Tesalonicenses 5:​17, 18.

¹⁰ Maski san kemanon niman maski san kech tiempo yotikijto tikamapouas moBiblia, noijki melak noneki xkita kenon uelis tikchiuas tlen yotimomachti. Ijkuak tikamapouas iTlajtol toTajtsin, xmotlajtolti: “¿Kenon uelis nechpaleuis aman niman ika tlayekapan tlen yoninomachti?”. Matikonnemilikan ika yotikamapouj 1 Tesalonicenses 5:​17, 18 (xpoua). Sakin xtlanemili itech kenon tiknotstika toTajtsin. ¿Tikijlia nochi tlen nikmachilia? ¿Kechpa tiknotsa? ¿Tlenon yomitsmakak Jehová noso kenon yomitspaleui? Kanaj tikilnamiki yeyi tlemach tlen Jehová yokichiuj mopampa niman tiknekis tiktlasojkamachilis. Tla tikxeloua tiempo niman ijkon titlanemilis itech yejuin, xsan mitspaleuis xkasikamati iTlajtol toTajtsin noijki mitspaleuis xchiua tlen yotikasikamat. Niman tla mojmostla ijkin tikchiua ijkuak tikamapoua moBiblia, mitspaleuis más kuajli xtekichiuili toTajtsin. San ika ¿tlenon uelis tikchiuas tla tikita ika xijkon tikamapoujtika moBiblia?

XKITA TLENON UELIS TIKCHIUAS

11. ¿Tleka kemantika ueliskia tajmanaskej ijkuak tikamapouaskej Biblia? Xkijto se neskayotl.

¹¹ Kanaj ijkuak tikamapouas moBiblia, tikitas ika seki onka tlen xtikchiujtika, niman kanaj yejon kichiuas xmajmana. Matikonnemilikan yejuin: Se tonajli tejua tikinamapoua tlaxeloltin kampa kijtouaj ika xkuajli titechikoitas (Sant. 2:​1-8). Kuakon, aman timokojtilia nochimej kuajli tikinnotsas niman xtitechikoitas, ¡niman melak kuajli ika ijkon tikchiua! Uajmostla tikinamapoua tlaxeloltin kampa kijtouaj ika melak noneki timotlajpiyas itech  tlen tikijtoua (Sant. 3:​1-12). Kuakon, tikita ika kemantika tikijtouani tlen xmás tepaleui noso xkualtsin titenotsani. Kuakon, aman timokojtilia tikijtos tlen kuajli niman tlen mateyolchikaua. Uajuiptla tikinamapoua tlaxeloltin kampa kijtouaj ika xnoneki tikileuiskej tlen onka ipan tlaltikpaktli (Sant. 4:​4-12). Kuakon, tikita ika noneki más timotlajpiyas itech tlen películas tikimita niman tlen tlakuikaltin tikinkaki. Ika naui tonajli kanaj melak timajmana pampa tikita ika melak noneki timopatlas.

12. ¿Tleka xnoneki timajmanas tla tikita ika noneki más timopatlas? (Noijki xkita nota).

¹² Tla tikita ika noneki timopatlas, maka xmajmana. Yejon kijtosneki ika tiyolyemanki niman tikyejyekoua tikchiuas tlen tikamapoua ipan Biblia. a Xkilnamiki, tla tejua tikneki timotlakentis ika on yenkuik nemilistli, mojmostla noneki tikitas kenon tikchiuas tlen yotikamapouj (Col. 3:10). ¿Tlenon mitspaleuis nochipa xchiujtiuj tlen tiueltiuj ipan Biblia?

13. ¿Tlenon mitspaleuis xchiua tlen yotimomachti? (Noijki xkimita tlaixkopinaltin).

¹³ Melak mitspaleuis tla tikilnamiki ika xnochi uelis tikchiuas tlen tiueltiuj ipan Biblia (Prov. 11:2). Kuakon, uelis ijkin tikchiuas: xkijkuilo nochi tlen noneki tikpatlas. Sakin, xtlapejpeni se noso ome tlen tikuelitaskia kachtopa tikchiuas niman sakin uelis tikchiuas on okseki tlen otikijkuilo. ¿Itikmatstok tlenon kachtopa tikneki tikchiuas?

14. ¿Tlenon kachtopa uelis tikchiuas?

¹⁴ Kachtopa uelis tikchiuas tlen xouijtika noso tlen tikita ika más noneki tikpatlas. Noijki uelis timomachtis toamatlajkuiloluan, uelis tiktekitiltis Índice de las publicaciones Watch Tower noso Tlen kinpaleuiya ika nomachtia  iteixpantijkauan Jehová. Xnotsa Jehová niman xkijli mamitspaleui xneki xchiua “on tlen yejua kineki” (Filip. 2:13). Sakin xchiua tlen yotimomachti. Ijkuak tikitas ika yotikchiuj tlen yotikijtojka, mitspaleuis xneki xchiua okseki tlen otikijkuilo, niman kanaj hasta xok ouijtika tikitas tikchiuas.

XKAUILI ITLAJTOL TOTAJTSIN MAMITSPALEUI

15. ¿Tlenon tlamantik tikchiuaj akin tiiteixpantijkauan Jehová ijkuak tikamapouaj Biblia? (1 Tesalonicenses 2:13).

¹⁵ Sekimej kijtouaj ika miyekpa yokiamapoujkej inBiblia. San ika ¿kineltokaj tlen ompa ijkuiliujtok? ¿Kichiuaj tlen kijtoua Biblia? Teajman ika yejuamej xkichiuaj tlen kiamapouaj. San ika, akin tiiteixpantijkauan Jehová xijkon tikchiuaj. Tejuamej tikchiuaj ijkon ken tokniuan akin onenkej ipan kachtopa siglo: tokojtiliaj tikchiuaskej tlen kijtoua Biblia pampa kuajli tikmatstokej ika tlen ompa kijtoua yemelak iTlajtol toTajtsin (xpoua 1 Tesalonicenses 2:13).

16. ¿Tlenon mitspaleuis xchiua tlen tiueltiuj ipan Biblia?

¹⁶ Kemantika ouijtika tikitaj tikamapouaskej Biblia niman tikchiuaskej tlen ompa tiuelij. Kanaj xtikpiyaj tiempo para uelis tomachtiskej. Noso kanaj yotomatkej san totoka tikamapouaskej Biblia niman hasta xtikilnamikij tlen otikamapoujkej. Niman ijkuak tikitaj ika melak miyek onka tlen noneki tikpatlaskej, kanaj peua tajmanaj. San ika, kuajli xmatsto ika Jehová mitspaleuis xchiua tlen yotikijto. Kuakon, xmokauili mamitspaleui Jehová. Maka san xkaki iTlajtol toTajtsin, noijki xchiua. Ijkuak más tikamapouas Biblia niman tikchiuas nochi tlen ompa tiueltiuj, más tiyolpakis (Sant. 1:25).