Ijkuak Jesús okipeualti iTlakualis, xompa nemiyaj 70 inomachtijkauan, san ika, xnoneki tiknemiliskej tla yejuamej yokitlalkauijkaj noso tla Jesús xok kinseliaya. Ipan yejon tonajli, Jesús san kinekiya nemis imiuan iapóstoles.

Jesús yokinselijka on 12 niman on 70 inomachtijkauan. Intech nochimej inomachtijkauan, okintlapejpeni 12 tlakamej niman okintokayoti apóstoles (Luc. 6:​12-16). Ijkuak nemiya Galilea, yejua “okinsentlalij on majtlaktli uan ome” niman “okintitlan ma kiteijlitij on temachtijli ika Dios kineki tlamandaros” niman para makinpajtikan “on kokoxkej” (Luc. 9:​1-6). Sakin, ne Judea, okintlapejpeni 70 inomachtijkauan niman ojomemej okomontitlan matenojnotsatij (Luc. 9:51; 10:1). Kuakon, nochiuiyan kampa notenojnotsaya nemiyaj inomachtijkauan.

Judíos akin kichiuayaj ken Cristo kipanoltiayaj Pascua nochi xiujtin, niman kanaj kipanoltiayaj imiuan inchanejkauan (Éx. 12:​6-11, 17-20). Ijkuak sa achijtsin poliuiya para kimiktiskej Jesús, oyaj Jerusalén imiuan iapóstoles. San ika, yejua xnochimej okimijli inomachtijkauan akin chantiyaj Judea, Galilea niman Perea iuan makipanoltikan Pascua. Nesi ika ijkuakon, Jesús san kinekiya nemis imiuan iapóstoles. Ika yejon, okimijli: “¡Sanoyej niknekiya nemouan nitlakuas ipan in iluitl pascua, chika xe nitlajyouiya!” (Luc. 22:15).

¿Niman tleka Jesús san kinekiya nemis imiuan iapóstoles? Pampa yejua nouentlaliskia ken “sen borreguito para Dios kintlapojpoluilis intlajtlakoluan nochimej on tlaltikpaktlakamej” (Juan 1:29). Yejua mikiskia Jerusalén kampa desde yeuejkaui kitlauentlaliliayaj toTajtsin. Borreguito tlen kikuayaj ipan Pascua kimilnamiktiaya israelitas ika Jehová okinmakixti itech Egipto. San ika, tlen Jesús kichiuaskia más ueyi kijtosnekiskia: imikilis techmakixtiskia itech tlajtlakojli niman mikilistli (1 Cor. 5:​7, 8). Ipampa imikilis Jesús, 12 apóstoles ueliskiaj tlapaleuiskej manochijchiua tlanechikojli (Efes. 2:​20-22). Temojkatlachialti ika kampa peua itsintepanuan Jerusalén tlen onka ne iluikak onkatij “majtlaktli uan ome temej” niman ipan cada tetl tlajkuilolnestika “itoka de on majtlaktli uan ome iapóstoles on Borreguito” (Apoc. 21:​10-14). Apóstoles akin omelajkanenkej melak tlapaleuiskiaj manochiua tlen toTajtsin kineki. Ika yejon, Jesús kinekiya imiuan nemis niman kipanoltis sa ika tlami Pascua niman kipeualtis iTlakualis.

Yejon 70 niman oksekimej inomachtijkauan xonenkej iuan Jesús ijkuak okipeualti iTlakualis. San ika, nochimej inomachtijkauan akin melajkanemiskiaj melak kinpaleuiskia iTlakualis. ¿Tleka? Pampa nochimej akin kintlapejpeniskiaj para mauiyan iluikak, tekiuajtiskej iuan Jesús ijkon ken onotlajtolkauj imiuan iapóstoles ipan yejon yeuajli (Luc. 22:​29, 30).