1, 2. ¿Kenon okiteititi David ika nemiya itech toTajtsin? (Xkita tlaixkopinajli kampa peua tlen tomachtijtokej).

SAÚL iuan 3,000 soldados okitejtemotoj David ipan tlaluaktli itoka Judea pampa kinekiyaj kimiktiskej. San ika, ipan se yeuajli David iuan sekimej tlakamej akin kipaleuiayaj oyajkej kampa Saúl niman isoldados noseuiayaj. Nochimej yokochkaj, kuakon David iuan Abisai san yolik opanokej kampa nemiyaj soldados niman ijkon oajsikej kampa nemiya Saúl. Aman Abisai san ichtaka okijli David: “Xnechkauili maniktsopini ika lanza ipan tlajli san sejpa, niman xnonekis nikchiuas okpa”. San ika, David xokikauili makimikti Saúl. Yejua okijli Abisai: “Maka itlaj xchiuili, ¿akinon itlaj kichiuilia akin Jehová yokitlapejpeni niman xtlaj ipan nochiua?”. Kuakon David okijto: “¡Ijkon ken kinemilia Jehová, xuelis niknemilis itlaj manikchiuili akin Jehová yokitlapejpeni!” (1 Samuel 26:8-12).

 ² David kasikamatiya tlen nonekiya kichiuas niman ijkon iuan nemis Jehová. Yejua kimatiya ika noneki kitlakaitas Saúl niman yejua nion xokinemili kichiuilis itlaj. ¿Tleka? Pampa toTajtsin yokitlapejpenijka Saúl manochiua tekiuaj itech Israel. Ipan yejuin tonajli, ijkon ken yeuejkaui, Jehová kineki ika nochimej akin kitekichiuiliaj makintlakaitakan niman makimititikan tlasojtlalistli tlen xtekaua akin kinkauilia makipiyakan tlanauatijkayotl (xpoua Miqueas 6:8). *

3. ¿Kenon okiteititi Abisai ika xkeman okikauj David?

³ Abisai kitlakaitaya David pampa kimatiya ika yejua akin toTajtsin yokitlapejpenijka nochiuas tekiuaj. San ika, ijkuak yonochiujka tekiuaj, David okichiuj se ueyi tlajtlakojli. Yejua oauilnen iuan isiuauj Urías niman sakin okinauati Joab makita kenon Urías makimiktikan kampa tlaixnamikiskej (2 Samuel 11:2-4, 14, 15; 1 Crónicas 2:16). Joab ikniuj katka Abisai. Kuakon kanaj Abisai okimat tlen David okichiuj, san ika, yejua nochipa okitlakaitak. Niman noijki, Abisai kinyekanaya akin tlaixnamiki niman ueliskia nochiuaskia tekiuaj pampa kipiaya tlanauatijkayotl. San ika, yejua xokichiuj yejon. Abisai okipaleui David niman okitlajpix itech akin kitlauelitayaj (2 Samuel 10:10; 20:6; 21:15-17).

4. a) ¿Kenon okiteititi David ika xkeman okikauj toTajtsin? b) ¿Tlenon tomachtiskej ipan yejuin tlamachtijli?

⁴ David nochipa onen itech toTajtsin. Ijkuak telpochtli katka, okimikti Goliat akin melak noueyimatiya itech Jehová niman okinpaleui israelitas (1 Samuel 17:23, 26, 48-51). Ijkuak tekiuaj David otlajtlako, Jehová okititlan iteotlajtokauj Natán, makiyektlaliti David. Nimantsin, yejua okijto ika yotlajtlakojka niman onoyolkuep (2 Samuel 12:1-5, 13). Sakin, ijkuak David youeuentsintiaka, okitemakak miyek tlemach tlen patioj iuan ijkon manochijchiua kampa noueyichiuas Jehová (1 Crónicas 29:1-5). Ken tikitaj, maski David okichiuj tlajtlakojli, xkeman okitlalkaui toTajtsin (Salmo 51:4, 10; 86:2). Ipan yejuin tlamachtijli, tomachtiskej ineskayo David niman itech oksekimej akin onenkej ijkuak yejua onen. Noijki tomachtiskej kenon uelis tinemiskej nochipa san itech Jehová. Niman tikitaskej seki kualneskayomej tlen techpaleuiskej matinemikan nochipa itech Jehová.

5. ¿Tlenon techmachtia itech tlen kinekiya kichiuas Abisai?

⁵ Ijkuak Abisai kinekiya kimiktis Saúl, kinekiya nemis iuan David. San ika, David kimatiya ika tla itlaj kichiuilia tlen xkuajli Saúl “akin Jehová yokitlapejpeni”, xteititiskia ika iuan nemi toTajtsin. Ika yejon xokikauili Abisai makimikti Saúl (1 Samuel 26:8-11). ¿Tlenon techmachtia yejuin? Ika ijkuak noneki tiktlapejpeniskej akinon itech tinemiskej, noneki titlanemiliskej itech tlen kijtoua tlajtolyekanalistin itech Biblia niman yejon matechpaleui.

6. ¿Tleka noneki matotlajpiyakan maski tinochimej tiknekij tinemiskej itech se tochanejkauj noso akin iuan kuajli touikaj?

⁶ Tinochimej xtiknekij tijkauaskej yakaj akin tiktlasojtlaj, ken se akin iuan touikaj noso se tochanejkauj. San ika, pampa tikpiyaj tlajtlakojli, uelis techkajkayauas tlen tikmachiliaj (Jeremías 17:9). Kuakon, tla yakaj akin tiktlasojtlaj kichiua tlen xkuajli niman kikaua ikalpan toTajtsin, matikilnamikikan  ika melak noneki maka matijkauakan Jehová (xpoua Mateo 22:37).

7. ¿Kenon okiteititi se tokniuj ika xokikauj toTajtsin ijkuak okixnamik tlen ouijtika?

⁷ Tla yakaj itech tochanejkauan kisa itech tlanechikojli, uelis tikteititiskej ika tiknekij tinemiskej itech Jehová. Se neskayotl, se tonajli Anne okuajnots inan ipan teléfono, akin yokiska itech tlanechikojli, niman okijli ika kinekiya kontlajpalos ^[1] (xkita nota kampa ontlami). Kuakon inan okijli ika melak najmanaya pampa oksekimej ichanejkauan xkinekij iuan tlajtoskej. Yejuin okichiuj ika Anne noijki manajmana. Yejua okijli ika kontitlaniliskia se carta itech tlen kinemilia. Ijkuak xikijkuilouaya yejon carta, Anne otlanemili itech seki tlajtolyekanalistin itech Biblia (1 Corintios 5:11; 2 Juan 9-11). Kuakon, ipan yejon carta, okijli ika tlasojtlalistli ika yejua yokinkaujka ichanejkauan pampa okichiuj tlajtlakojli niman xonoyolkuep. Anne noijki okijli ika tla kineki oksejpa pakis noneki nokuepas itech Jehová (Santiago 4:8).

8. ¿Tlenon kualneskayomej techpaleuis maka tijkauaskej toTajtsin?

⁸ Ipan itonaluan David, nemiyaj itekipanojkauan toTajtsin akin okipixkej yolyemanilistli, tlasojtlalistli niman yolchikaualistli. Matikitakan kenon yejon kualneskayomej techpaleuiskej maka tijkauaskej Jehová.

9. ¿Tleka Abner okiyejyeko kimiktis David?

⁹ Saúl ikoneuj Jonatán niman akin kinyekana akin tlaixnamikij, Abner, okitakej ijkuak David okitkili Saúl itsontekon Goliat. Jonatán opeuj kuajli nouika iuan David niman xkeman okikauj (1 Samuel 17:57–18:3). San ika, Abner xijkon okichiuj. Sakin yejua hasta okipaleui Saúl, akin kinekiya kimiktis David (1 Samuel 26:1-5; Salmo 54:3). Jonatán niman Abner kimatiyaj ika toTajtsin yokitlapejpenijka David matekiuajti itech Israel. Sakin ijkuak yomijka Saúl, Abner xokipaleui David. Yejua okiyejyeko ika Is-bóset, ikoneuj Saúl, manochiua tekiuaj. Sakin, Abner kanaj kinekiya nochiuas tekiuaj niman kanaj ika yejon oauilnen iuan se isiuauj tekiuaj Saúl (2 Samuel 2:8-10; 3:6-11). ¿Tleka Jonatán niman Abner tlamantik noso sejneka okitakej David? Pampa Jonatán kinekiya nemis nochipa itech Jehová niman  yolyemanki katka. San ika, Abner xijkon katka.

10. ¿Tleka Absalón xonen itech toTajtsin?

¹⁰ Absalón, ikoneuj tekiuaj David, xonen itech toTajtsin pampa xyolyemanki katka. Yejua kinekiya nochiuas tekiuaj. Ika yejon, “okinochijchiuili se carro niman caballos niman cincuenta tlakamej akin notlalouayaj iyekapan” (2 Samuel 15:1). Yejua noijki okintlaneltokilti miyekej israelitas ika manemikan itech. Noijki hasta okiyejyeko kimiktis itaj, maski kimatiya ika Jehová yokitlalijka ken tekiuaj itech Israel (2 Samuel 15:13, 14; 17:1-4).

11. ¿Kenon uelis techpaleuis tlen Biblia kijtoua itech Abner, Absalón niman Baruc?

¹¹ Ijkuak yakaj xyolyemanki niman kineki kipiyas tlanauatijkayotl, melak ouijtika nemis itech toTajtsin. Kema, tejuamej tiktlasojtlaj Jehová niman xtiknekij san totech titlanemiliskej niman xtiknekij tochiuaskej ken Abner niman Absalón. San ika, noneki matikitakan maka peuas melak tiknekiskej miyek tomin noso se ueyi tekitl tlen uelis kichiuas matomachilikan tiuejueyixtokej. Pampa yejuin uelis kijtlakos ken touikaj iuan Jehová. Ipan seki tonaltin, Baruc, akin tekitiya ken secretario itech Jeremías, okinek kipiyas tlajtlamach tlen xkipiaya niman xok kitekichiuiliaya toTajtsin ika pakilistli. Kuakon Jehová okijli Baruc: “¡Xkita! Tlen yonikchijchiuj nikxoxotonijtika niman tlen yoniktokak nikuijuitlatika, itech tlajli. San ika, tejua tiktejtemojtika tlemach tlen ueyi. Maka xtejtemojto yejon” (Jeremías 45:4, 5). Baruc okikak Jehová. Tejuamej noijki noneki tijkakiskej tlen techijlia Jehová, pampa xok uejkaujtipan yejua kipopolos nochi tlen xkuajli onka ipan yejuin tlaltikpaktli.

12. Xkijto tleka xuelis tinemiskej itech toTajtsin ijkuak san totech titlanemiliaj.

¹² Daniel, se tokniuj chanej México, nonekiya kitlapejpenis akinon itech nemis. Yejua kinekiya nonamiktis iuan se ichpochtli akin xkiueyichiuaya Jehová. Daniel kijtoua: “Ok niktlajkuilouiliaya maski yonipeujka nitekiti ken precursor”. San ika, okitak ika san itech tlanemiliaya niman kichiuaya san tlen yejua kineki. Xkiteititiaya tla nemiya itech Jehová niman nonekiya nochiuas yolyemanki. Kuakon yejua otlajto iuan se tokniuj tlayekanketl. Daniel kijtoua: “Yejua onechpaleui ika maninemi itech Jehová. Nonekiya nijkauas  ika niktlajkuilouiliskia yejon ichpochtli. Sakin ijkuak yonikchiuj miyek teoyotl niman melak yonichokak, ouel onikchiuj yejon. Nimantsin opeuj niyolpaki itech notekiyo”. Daniel aman kipiya isiuauj akin kitlasojtla Jehová niman yejua tlapaleuiya ken tlayekanketl ipan circuito.

13. Ijkuak David otlajtlako, ¿kenon Natán onen itech toTajtsin niman itech David?

¹³ Ijkuak tinemij itech Jehová, noijki uelis tinemiskej itech tokniuan niman melak kuajli tikinpaleuiskej. Teotlajtoketl Natán onen itech Jehová niman noijki itech David. Ijkuak David okikuili isiuauj se tlakatl niman sakin otlanauati makimiktikan, Jehová okititlan Natán makitlajtolpaleuiti David. Natán okichiuj ika yolchikaualistli niman okitlakamat Jehová. San ika, noijki okiteititi tlamachilistli niman otlajto iuan David ika tlasojtlalistli. Yejua kinekiya kipaleuis David makasikamati ika yokichiujka melak ueyi tlajtlakojli. Kuakon yejua opeuj kitomilia itech se tlakatl akin kipiaya melak miyek tomin. Niman yejon tlakatl okichtekili iborreguito akin xkipiya tlen ika nopanoltis. Ijkuak David okikak yejuin, melak okualan itech tlen okichiuj yejon tlakatl akin kipiaya miyek tomin. Kuakon, Natán okijli: “¡Tejua yejon tlakatl!”. David okasikamat ika yokichiujka ueyi tlajtlakojli ixpan Jehová (2 Samuel 12:1-7, 13).

14. ¿Kenon uelis tinemiskej itech Jehová niman itech akin imiuan touikaj noso tochanejkauan?

¹⁴ Tla tejuamej titetlasojtlaj, noijki uelis tinemiskej itech Jehová niman itech oksekimej. Se neskayotl, xnemili ika tejua tikmatstika ika se tokniuj yokichiuj se ueyi tlajtlakojli. Kanaj tejua tikneki tinemis itech yejon tokniuj, niman tla yejua se akin kuajli iuan timouika noso se mochanejkauj. San ika, noijki tikmati ika melak noneki tinemis san itech Jehová. Ijkon ken Natán tiktlakamatis Jehová, san ika, tikititis tlasojtlalistli mokniuj. Xkijli ika noneki nimantsin matlajto imiuan tlayekankej niman nimantsin makipaleuikan. Tla yejua xkichiua, kuakon tejua xkichiua. Ijkuak tikchiuas yejuin, tikteititis ika tinemi san itech Jehová. Niman noijki tikteititis ika tiktlasojtla mokniuj, pampa tlayekankej uelis kipaleuiskej oksejpa kuajli manouika iuan Jehová. Yejuamej kiyektlaliskej ika tlasojtlalistli (xpoua Levítico 5:1; * Gálatas 6:1).

15, 16. ¿Tleka ononek kipiyas yolchikaualistli Husai niman ijkon nemis itech toTajtsin?

¹⁵ Husai kuajli iuan nouikaya tekiuaj David niman itech nemiya. Ijkuak tlaltikpakchanejkej okinejkej ika Absalón manochiua tekiuaj, Husai ononek kipiyas chikaualistli niman ijkon nemis itech David niman itech toTajtsin. Yejua kimatiya ika Absalón youajla Jerusalén iuan isoldados niman ika David yocholojka (2 Samuel 15:13; 16:15). San ika ¿tlenon okichiuj Husai? ¿Okikauj David niman opeuj kipaleuiya Absalón? Ka. Maski David iueuentsin katka niman miyekej kinekiyaj kimiktiskej, Husai nochipa onen itech, pampa Jehová yokitlapejpenijka David ken tekiuaj. Ika yejon Husai oyaj ipan tepetl itoka  Olivos kampa nemiya David (2 Samuel 15:30, 32).

¹⁶ David okijli Husai manokuepa Jerusalén niman makichiua kentla kuajli iuan nouika Absalón niman ijkon makinekilti makikaki yejua niman maka tlen kijliskia Ahitofel. Husai yolchikauak katka niman maski ueliskia itlaj ipan nochiuas okitlakamat David niman onen itech toTajtsin. David okichiuili teoyotl Jehová makipaleui Husai niman yejon tlen opanok. Absalón okikak tlen okijli Husai niman xokikak Ahitofel (2 Samuel 15:31; 17:14).

17. ¿Tleka noneki tiyolchikaujkej yaskej niman ijkon uelis tinemiskej itech toTajtsin?

¹⁷ Noneki tiyolchikaujkej yeskej niman ijkon tinemiskej itech Jehová niman tiktlakamatiskej. Niman xtikchiuaskej tlen techijliskej tochanejkauan, akin imiuan titekitij noso tekiuajkej. Matikitakan se neskayotl, Taro, akin chanti Japón, ijkuak ok telpokatsin katka kichiuaya nochi tlen kinpaktiaya itajuan. Yejua kintlakamatiya niman nemiya itech yejuamej pampa yejua kintlasojtlaya. San ika, ijkuak opeuj nomachtia imiuan iteixpantijkauan Jehová, itajuan xkinekiyaj manomachti. Yejuin melak okitekipacho niman melak ouijtika katka kimijlis ika yejua yokinemilijka ika yas ipan tlanechikoltin. Taro kijtoua: “Notajuan ipan miyek xiuitl melak kualaniyaj niman xkinekiyaj manikintlajpaloti inchan. Oniktlajtlanili toTajtsin yolchikaualistli ika nikchiuas ijkon ken yoniknemilijka. Aman ken tlanemiliaj notajuan achijtsin yonopatlak niman ueli nikomintlajpaloua nochipa” (xpoua Proverbios 29:25). *

18. ¿Kenon yomitspaleui yejuin tlamachtijli?

¹⁸ Ijkon ken David, Jonatán, Natán niman Husai kuajli matomachilikan pampa tinemij itech Jehová. Maka keman matochiuakan ken Abner niman Absalón akin xokinejkej nemiskej itech toTajtsin. Tikmatij ika titlajtlakolejkej niman topopolouaj. San ika, uelis tikteititiskej ipan tonemilis ika melak ueyi kijtosneki tinemiskej san itech Jehová.