ONITLAKAT Crooksville, Ohio (Estados Unidos), ipan 1926. Nikpiaya chikome nokniuan. Maski notajuan xkipiayaj se tlaneltokijli, technauatiayaj matiakan teopan. Nejua niaya ipan Iglesia Metodista. Ijkuak nikpiaya 14 xiuitl, onechmakakej se premio pampa ipan se xiuitl xkeman oninopolouili nias teopan nochi domingos.

Ipan yejon tonaltin, se siuatl itoka Margaret Walker chantiya nisiuj kampa tichantij. Yejua katka se iteixpantijkauj Jehová. Opeuj kuajtlapaloua nonan niman kinojnotsaya itech Biblia. Se tonajli, oniknemili imiuan ninokauas. San ika, nonan onechijli ika maniuiya kiyauak pampa xkinekiya manikintlajtolkotona. Nejua melak niknekiya nijkakis itech tlen tlajtlatouayaj. Sakin, ijkuak kanaj ika okpa ouajla Margaret, onechtlajtolti tla nikmatiya kenon itoka toTajtsin. Onikijli ika nochimej kimatij ika itoka, toTajtsin. Kuakon onechijli maniktejtemo ipan noBiblia Salmo 83:18. Ompa onikitak ika toTajtsin itoka, Jehová. Nimantsin oniaj kampa nemiyaj akin imiuan ninouika niman onikimijli ika tla kinekiyaj kimatiskej itoka toTajtsin, makitakan Salmo 83:18. Uelis tikijtoskej ika ijkon opeuj nitenojnotsa.

Opeuj ninomachtia Biblia niman oninoapolakti ipan 1941. Xuejkaujtipan opanok, onechijlikej manikyekana Tlamachtijli itech Biblia iuan Tlanechikojli. Onikijli nonan niman nokniuan mayakan ipan tlanechikojli, niman opeuj yauej. San ika, notaj xokinek yas.

Ipan tlanechikojli opeuj nikselia miyek tekitl. Oniksentlalij nochan miyek amatlajkuiloltin itech iteixpantijkauan Jehová. Se tonajli, notaj onechijli manikinkixti yejon amatlajkuiloltin niman manikisa. Ijkon opanok, onikis niman oniaj inonochantito nisiuj Zanesville, Ohio. San ika, ok nikontlajpalouaya nonan niman nokniuan niman ijkon nikinyolchikauaya.

Notaj xkikauiliaya nonan mauiya ipan tlanechikoltin. Kemantika, ijkuak nonan yaya ipan ojtli, kitokaya niman kichiuaya oksejpa manokuepa. Nonan kisaya itech okse puerta niman ijkon yaya ipan tlanechikojli. Onikijli ika maka manajmana, pampa ajsis  tonajli ijkuak notaj xok ijkon kichiuilis. Niman ijkon opanok, sakin kikauiliaya mauiya ipan tlanechikojli.

Ipan xiuitl 1943, opeuj tlanechikojli Kampa Tomachtiaj iTekiyo toTajtsin. Opeuj niktemaka tlamachtiltin ipan notlanechikol. Tlajtolpaleuilistin tlen nechmakayaj sakin ijkuak yoniktemakak se tlamachtijli, onechpaleui kuajli manitlajto teixpan.

Ipan xiuitl 1944, onechnauatijkej manitlapaleui ipan ika okpa Guerra ipan nochi tlaltikpaktli. Oniaj ipan cuartel general tlen onka Columbus (Ohio). Ompa onechitakej tla kuajli ninemi niman onikintemilti seki amamej. Onikteijli ika xninochiuaskia soldado. Onechkauilijkej maniuiya, san ika, xmiyek tonaltin opanok, se policía ouajla nochan niman onechuikak.

Ijkuak yopanoka ome semana, onechuikakej itech juez. Yejua onechijli ika tla san yejua kijtoskia, nechtsakuaskiaj niman xok keman nikisas. Yejon juez onechtlajtolti tla itlaj niknekiya nikijtos. Oniknankili: “Kema, ueyixtika tlakatl. Nejua nitlapaleuijketl itech se tlaneltokijli. Nitemachtia techajchan ipan puertas kuajli tlajtoltin itech Tekiuajyotl niman yonikinnojnots miyekej tlaltikpakchanejkej”. Kuakon juez okimijli oksekimej jueces: “Nemejuamej xninnemij nikan onenkijtokoj tla yejuin telpochtli se tlapaleuijketl itech tlaneltokijli noso ka. Ninnemij nikan onenkijtokoj tla yejua kineki tlapaleuis ipan guerra noso ka”. Nion xopanok tlajko hora onechijlikej ika nejua nikpiya tlajtlakojli. juez okijto ika nipanos makuijli xiuitl ipan se cárcel tlen onka Ashland (Kentucky).

Kachtopa ome semanas onipanok ipan cárcel tlen onka Columbus. Ipan kachtopa tonajli xonikis. Onikijli Jehová: “Xuelis nikijyouis nitsauktos makuijli xiuitl niman xnikmati tlenon nikchiuas”.

Uajmostla, akin ompa tlajpiyaj onechkauilijkej manikisa. Opeuj ninejnemi kampa nemi okse akin tsauktoya, yejua melak uejkapan niman kojtik katka. San totlajtlatayaj ipan se ventana. Yejua onechtlajtolti: “¿Niman tejua tleka omitstsajkej, tsatsapa?”. Onikijli: “Nejua niiteixpantijkauj Jehová”. Niman onechijli: “¿Niman ika yejon nikan tinemi?”. Onikijli ika iteixpantijkauan Jehová xtiauej ipan guerra nion xakaj tikmiktiaj. Yejua okijto: “Tejua omitsuajuikakej nikan pampa xtikneki yakaj tikmiktis. San ika, nikan kintsakuaj akin temiktiaj. ¿Ueli nasikamati yejuin?”. Onikijli ika ka.

Yejon tlakatl itoka katka Paul. Onechijli ika yokitsajkaj 15 xiuitl ipan okse cárcel. Ompa yokipoujka seki amatlajkuiloltin tlen kinchijchiuaj iteixpantijkauan Jehová. Ijkuak onechijli yejon, oniktlajtlanili Jehová makichiua ika yejon tlakatl manechpaleui. Kuakon Paul onechijli: “Tla yakaj kineki itlaj mitschiuilis, xtsajtsi. Nejua nikitas ken nimitspaleuis”. Ijkuak ompa ninemiya ipan yejon cárcel, xtlaj onexchiuilijkej 50 akin noijki ompa tsauktoyaj kampa ninemiya.

Sakin onechuikakej ipan okse cárcel tlen onka, Ashland. Ompa onikimixmat seki tokniuan akin chikauak kipiayaj intlaneltokil. Yejuamej onechpaleuijkej iuan oksekimej tokniuan maka matijkauakan  Jehová. Nochi semanas techijliayaj matikpouakan seki tlaxeloltin itech Biblia. Sakin, tikchiuayaj tlajtoltilistin niman tlanankilistin itech Biblia. Titsauktoyaj kampa melak miyek onkatkaj camas. Se tokniuj techijliaya kanon titenojnotsaskej. Nechijliaya: “Robison, tejua titenojnotsas ipan yejuin camas. Xtlajto imiuan ijkuak xiyauej”. Ijkon titenojnotsayaj ompa.

Ika okpa Guerra ipan nochi tlaltikpaktli otlan ipan 1945. Maski ijkon, xnimantsin onikis kampa nitsauktoya. Ninajmanaya ipampa nochanejkauan, pampa notaj yonechijlika ika tla nejua xok imiuan ninemiskia, ueliskia kichiuas ika nochanejkauan makikauakan nomachtiskej Biblia. San ika, melak onitlamojkaitak ijkuak onikis. Maski notaj ok xkinekiya, chikomemej nochanejkauan yayaj ipan tlanechikoltin niman se nokniuj siuatl yonoapolaktijka.

Ipan 1950 opeuj nochiua guerra ipan Corea. Pampa Estados Unidos tlaixnamikiya ipan yejon guerra, oksejpa onechtlajtlanilijkej manitlapaleui. Oniaj oksejpa ipan cuartel general tlen onka Columbus. Ijkuak yonikteititi tlenon niueltika nikchiua, se akin ompa tlayekana, onechijli ika nejua melak niueli xijkon ken oksekimej. Kuakon onikijli ika yejon kuajli, san ika, xniknemiliaya ninochiuas soldado. Sakin, onikteneuj tlen kijtoua 2 Timoteo 2:3 niman onikijli: “Nejua ninemi ken soldado itech Jesucristo”. Xok onauat, niman sakin onechijli ika ueliskia nias.

Xuejkaujtipan opanok, oniaj ipan se ueyi tlanechikojli Cincinnati (Ohio). Oniaj kampa nosentlaliaj akin kinekij yaskej Betel. Ompa, tokniuj Milton Henschel okijto ika Betel nonekiyaj tokniuan akin kinekij tekitiskej ipampa Tekiuajyotl. Nejua oniktemilti amatl tlen notlajtlani niman sakin onechnotskej maniuiya Betel. Ipan agosto xiuitl 1954 opeuj nitlapaleuiya Betel tlen onka Brooklyn niman hasta aman ompa ninemi.

Nochipa yonikpix miyek tekitl ipan Betel. Melak ouejkauj nitekitiya kampa kitotonia atl tlen kikuij ipan imprenta niman oficinas. Noijki nikinyektlaliaya máquinas niman cerraduras. Onitlapaleui ipan Kaltin kampa tikpiyaj Toueyitlanechikoluan ipan ueyikalpan Nueva York.

Melak nikuelita tlen tomachtiaj Betel. Ika kualkan tikitaj Examinando las Escrituras diariamente. Noijki san sekan tomachtiaj Amatl Tekakistilijketl. Niman melak nikuelita nitenojnotsas imiuan tokniuan tlen nemij ipan tlanechikojli. Ijkuak nitlanemilia itech yejuin, niknemilia ika nochimej familias noneki kichiuaskej yejuin. Tajtin iuan tekoneuan noneki kipouaskej san sekan Examinando las Escrituras diariamente, kiueyichiuaskej toTajtsin ken familia nochi semanas, yaskej ipan tlanechikoltin niman ontenojnotsaskej. Tla kichiuaj yejuin, xkeman kikauaskej Jehová.

 Miyek yonikinnexti akin kuajli imiuan ninouika ipan Betel niman ipan tlanechikojli. Sekimej tokniuan tlapejpeniltin katkaj niman aman nemij ipan iluikak. Oksekimej xtlapejpeniltin. San ika, tinochimej akin tiktekichiuiliaj Jehová titlajtlakolejkej, hasta akin titekitij ipan Betel. Ika yejon, ijkuak itlaj panoua iuan se tokniuj, ninokojtilia nochipa nikyektlalis yejon tlauejli. Nitlanemilia ipan Mateo 5:23, 24, kampa kijtoua kenon tikyektlaliskej se tlauejli. Miyekpa ueli noyektlaliaj se tlauejli tlen panoua iuan se tokniuj tla tikijtoskej “xnechtlapopolui”. Maski kemantika ouijtika tikijtoskej.

Pampa inikpiya miyek xiuitl, melak ouijtika nontenojnotsas techajchan. San ika, xninokajkaua ika nitenojnotsa. Yoniuel san achijtsin chino mandarín niman nikuelita nikinnojnotsas itech Biblia akin tlajtouaj chino ijkuak nikimita ipan calle. Kemantika, san ipan se kualkan niktemaka kanaj 30 noso 40 revistas.

Hasta yonitlajto oksejpa iuan se akin nemiya China. Se tonajli, se ichpochtli onechuetskili ijkuak nipanotiaya kampa yejua nemiya. Yejua kitemamakatoya amamej itech kampa tekitiya. Nejua noijki oniuetskak niman onikmakak Amatl Tekakistilijketl niman ¡Despertad! ika itlajtol, chino. Yejua okinseli yejon revistas niman onechijli ika itoka Katie. Sakin, nochipa ijkuak nechitaya, uajlaya notech pampa kinekiya nouan tlajtos. Nejua onikmachti kenon kijtos ika inglés seki tlakilyotl niman verduras. Noijki, oniktomili seki textos ipan Biblia niman onikmakak amoxtli Temachtia Biblia. Ijkuak opanok seki semanas xok keman onikitak.

Ijkuak yopanoka seki metstin, onikinmakak revistas okse ichpochtli akin noijki tlajtoua chino niman noijki kitemamakaya amamej kampa tekiti. Opanok se semana niman oksejpa onikitak, yejua onechmakak iteléfono niman onechijli: “Xontlajto China”. Onikijli ika nejua xakaj nikixmati China. San ika, yejua oksejpa onechijli ika manontlajto. Kuakon, onontetlajpalo ipan teléfono. Akin onechuajnankili onechijli ika itoka Katie niman okijto ika nemi China. Yejua onechijli ika yejon ichpochtli akin yonechmakaka iteléfono, ikniuj. Sakin onechtlajtlanili noijki manikmachti ikniuj itech tlen kuajli yonikmachtijka yejua. Onikijli ika nikchiuas tlen niuelis. Oniktlasojkamachili ika onechijli kanon nemiya. Xouejkauj, san sejpa iuan onitlajto ikniuj Katie noijki xok keman onikitak. Ipan yejuin tonajli xnikmati kanon nemij. Nikchia ika manomachtikan okseki tlemach itech Jehová.

Ikipiya 73 xiuitl ika onipeuj niktekichiuilia Jehová. Melak niktlasojkamachilia ika onechpaleui maniyolmelaujkanemi ijkuak nitsauktoya. Nokniuan onechijlikej ika melak okinyolchikauj ijkuak okitakej ika xonikajkauj niktekichiuilis Jehová maski kualaniya totaj. Ika yolik, nonan niman chikuasen nokniuan onoapolaktijkej. Noijki notaj okipatlak achijtsin ken tlanemiliaya niman hasta ouel oyaj ipan seki tlanechikojli ijkuak ximikiya.

Tla toTajtsin kineki, nochanejkauan niman akin imiuan ninouika akin yomijkej oksejpa nikimitas ipan yenkuik tlaltikpaktli. ¡Melak kualtsin yes ipan yejon tonajli ijkuak tinochimej san sekan nochipa tikueyichiuaskej Jehová! * (Xkita nota).