Nochipa matiktekichiuilikan Jehová ika pakilistli
XNEMILI katlejua tonajli melak otiyolpak. ¿Kanaj ijkuak otimonamikti noso kanaj ijkuak onen kachtopa mokoneuj? Sekimej kema ijkon kinemilia, san ika, tikmatstokej ika tejua melak otiyolpak ijkuak otimoapolakti. Yejon tonajli melak ueyi kijtosneki tlen otikchiuj ipan monemilis. Pampa ipan yejon tonajli noijki oksekimej tokniuan okinpakti ika otikteititi kenon tiktlasojtla toTajtsin ika nochi moyojlo, monemilis, motlanemilil niman mochikaualis (Marcos 12:30).
Kuajli tikmatstokej ika ijkuak otimoapolakti ika tlayekapan, melak yotiyolpak tiktekichiuilia toTajtsin. San ika, miyekej akin tenojnotsaj xok yolpakij ijkon ken kachtopa. ¿Tleka ijkon panoua? ¿Tleka uelis nochipa tiktekichiuiliskej Jehová ika pakilistli?
¿TLEKA SEKIMEJ XOK YOLPAKIJ?
Ijkuak tikmatij tlenon kichiuas iTekiuajyo toTajtsin, melak techyolpaktia. ¿Tleka? Pampa Jehová techijlia ika yejon Tekiuajyotl xok uejkaujtipan kipopolos nochi tlen xkuajli onka aman niman kichiuas maonia se yenkuik tlaltikpaktli. Sofonías 1:14 kijtoua: “¡Iueyi tonal Jehová iyejkotika! ¡Iyejkotika, niman totoka uajlauj!”. San ika, tla tikmachiliaj ika youejkauj titlamachixtokej, uelis xok tiyolpakiskej ijkon ken kachtopa. Yejuin uelis kichiuas xok tiktekichiuiliskej chikauak toTajtsin (Proverbios 13:12).
Ijkuak tinemij imiuan tokniuan, toyolchikauaj niman kichiua matiktekichiuilikan Jehová ika paktli. Uelis kanaj hasta otechpaleui matipeuakan matiktekichiuilikan niman matikueyichiuakan ika otikimitakej kenon noyekanayaj itekipanojkauan toTajtsin (1 Pedro 2:12). San ika, tla se tokniuj kisa itech tlanechikojli pampa xokitlakamat itlanauatiluan toTajtsin, kanaj uelis xok tipakiskej.
Kachtopa tiktejtemoskej miyek tlemach tlen patioj noijki uelis kichiuas xok tipakiskej. ¿Kenon uelis panos yejon? Satanás kineki techtlaneltokiltis ika noneki tijkouaskej itlaj tlen xtechpoloua. Ika yejon noneki matikilnamikikan itlajtoluan Jesús: “Xakaj ueli kintekichiuilia omemej tekomej, pampa se kitlajsojtlas niman okse kitlauelitas, noso se kipialis kuajli iyojlo niman okse kitlalkauis. Ijkon, tej, xakaj uelis kitekichiuilis Dios niman no kinotekimakas on tomin” (Mateo 6:24). Xuelis tiktekichiuiliskej Jehová ika paktli tla noijki tikyejyekoua tikpiyaskej nochi tlen onka ipan yejuin tlaltikpaktli.
UELIS TIPAKISKEJ IJKUAK TIKTEKICHIUILIAJ JEHOVÁ
Tla tejua tiktlasojtla Jehová, xyetik tikitas tiktekichiuilis (1 Juan 5:3). Xkilnamiki tlen okijto Jesús: “Xuajlakan notech nemochimej yejuan yonensiaukej pampa hasta aman xnenkinextiaj temakixtilistli niman pampa on tlajtlamach tepajsoloualistin sanoyej mechyetiliaj, niman nejua nemechmakas neseuijli. Xmokauilikan ma nemechpaleui niman xmokauilikan ma nemechmachti, pampa nejua niyolsejki niman niyolyemanki” (Mateo 11:28-30). Tikchiuas ken Cristo yejon tlen melak kualtsin niman kichiuas xyolpaki. Onka tlen ika uelis tiyolpakiskej ijkuak tiktekichiuiliaj Jehová. Matikitakan san yeyi (Habacuc 3:18).
Tiktekichiuiliaj akin otechmakak tonemilis, toTajtsin akin paktika (Hechos 17:28; 1 Timoteo 1:11). Tikmatij ika toTajtsin yejua akin techmaka tonemilis. Ika yejon, uelis nochipa tiktekichiuiliskej ika paktli, maski tla yopanok miyek xiuitl ijkuak otoapolaktijkej niman opeuj tiktekichiuiliaj.
Héctor yolpaki ijkuak kilnamiki ika kichia Xochitlalpan niman chikauak kitekichiuilia Jehová.
Matitlanemilikan itech se tokniuj itoka Héctor. Yejua yokitekichiuili Jehová ipan 40 xiuitl ken tlayekanketl ipan circuito. Maski ikipiya miyek xiuitl, ok kitekichiuilia Jehová ika paktli (Salmo 92:12-14). Pampa isiuauj kipiya se kokolistli, xok kitekichiuilia toTajtsin ijkon ken yeuejkaui. San ika, kema kitekichiuilia ika paktli. Yejua kijtoua: “Maski ninajmana ijkuak nikita ika nosiuauj xok ueli pajti niman melak ouijtika nikita niktlajpiyas, xnijkauilia yejon manechtsakuili maniktekichiuili toTajtsin ika paktli. Nikmati ika Jehová akin nechmaka nonemilis, kimatstika tleka onexchijchiuj. Ika yejon, melak niktlasojtla niman niktekichiuilia ika nochi noyojlo. Nikyejyekoua nochipa nitenojnotsas niman xnikilkaua ika tikchiaj tinemiskej ipan Xochitlalpan, niman ika yejon nochipa nipaki”.
Jehová yokitemakak tlaxtlauijli niman ijkon uelis tipakiskej ipan tonemilis. Melauak tikitaj ika “Dios sanoyej okintlajsojtlak on tlaltikpaktlakamej hasta okitemakak isenteKonetsin para nochi on akin kineltokas xpoliuis, yej kipias yenkuik nemilistli para nochipa” (Juan 3:16). Kema, yejua uelis kintlapopoluis totlajtlakoluan niman uelis tinemiskej nochipa tla tikteititiaj ika titlaneltokaj itech tlaxtlauijli, itetlayokolil toTajtsin. Yejuin kichiua melauak matiktlasojkamachilikan. Tla tejuamej tiktlasojkamatij yejon tlaxtlauijli, uelis tiktekichiuiliskej Jehová ika pakilistli.
Jesús okinemili kipatlas ken nemi niman okitekichiuili Jehová ika paktli miyek xiuitl.
Okse tokniuj akin chantiya México, itoka Jesús, okijto: “Nejua ninemiya ken se tlakeuajli itech notekiyo. Kemantika nitekitiya melak miyek horas maski xnechtlajtlaniliayaj ijkon manikchiua. Nikchiuaya san pampa niknekiya nikpiyas miyek tomin. Kuakon opeuj ninomachtia itech Jehová niman onikasikamat kenon yejua okitemakak iKoneuj ipampa tlaltikpakchanejkej. Opeuj nikneki niktekichiuilis toTajtsin. Ika yejon, oninosentemakak itech Jehová ijkuak yopanoka 28 xiuitl ika melak yonitekitka ipampa se empresa. Onikis kampa nitekitiya niman opeuj chikauak niktekichiuilia Jehová”. Yejon techititia kenon Jesús opeuj kitekichiuilia Jehová ika paktli.
Ijkuak tikpiyaj chipauak tonemilis, kichiua matipakikan. ¿Tikilnamiki kenon tinemiya ijkuak xitikixmatiya Jehová? Pablo, itlatitlankauj Cristo, okimilnamikti tokniuan akin chantiyaj Roma ika yejuamej katkaj ken tlakeualtin itech tlajtlakojli. San ika, yejuamej yonochiujka tlakeualtin itech tlen kuajli. Pampa yejuamej kipiayaj chipauak innemilis Romanos 6:17-22). Tejuamej noijki tiktlakamatij itlanauatiluan Jehová. Ika yejon, xtinemij ken tlakeualtin itech auilnemilistli noso itech tlen xkuajli onka ipan yejuin tlaltikpaktli. Ika yejon melak tiyolpakij.
niman kichiayaj kiseliskej nemilistli tlen xkeman tlamis (Jaime kijtoua opeuj melak niyolpaki ijkuak opeuj niktekichiuilia Jehová.
Aman matitlanemilikan itech se tokniuj itoka Jaime. Yejua xkineltokaya tla nemi toTajtsin niman tlaneltokaya itech evolución. Yejua noijki se boxeador katka. Yejua opeuj yauj ipan tlanechikojli. Melak okuelitak ijkuak okitak kenon notlasojtlayaj ompa. Okipatlak tlen kichiuaya ipan inemilis niman okitlajtlanili Jehová makipaleui matlaneltoka itech. Jaime kijtoua: “Ika yolik onikitak ika toTajtsin yejua tetlasojtla niman teikneliani”. Noijki kijtoua: “Pampa niktlakamati itlanauatiluan Jehová yonechpaleui kuajli maninemi. Tla xninopatlaskia, kanaj aman xok ninemiskia, ijkon ken akin imiuan ninouikaya yeuejkaui. Opeuj melak niyolpaki ijkuak opeuj niktekichiuilia Jehová”.
MAKA MATISIAUIKAN
¿Kenon noneki tomachiliskej ipan yejuin tonajli ijkuak tikchiaj mapopoliui tlen xkuajli? Matikilnamikikan ika itikchiujtokej tlen toTajtsin kineki niman tikchiaj tinemiskej nochipa. ToTajtsin iTlajtol techijlia: “Ma ka tisiauikan para tikchiuaskej on tlen kuajli, pampa ijkuak ajsis on tonajli para tipixkaskej, tikpixkaskej on kuajli xinachtli tla xtiksiaukauaskej” (Gálatas 6:8, 9). Ika itlapaleuilis Jehová uelis titlaxikoskej, tochikauaskej matikpiyakan kualneskayomej tlen techpaleuis ijkuak yejkos “[ueyi] tlajyouilistli” niman xtijkauaskej tiktekichiuiliskej Jehová ika paktli (Apocalipsis [Revelación] 7:9, 13, 14; Santiago 1:2-4).
Kuajli tikmatstokej ika Jehová techteochiuas pampa titlaxikouaj. Yejua kimati ika tiktekichiuiliaj pampa tiktlasojtlaj. Tla nochipa tiktekichiuiliaj ika paktli tochiuaskej ijkon ken David, akin okijto: “Nochipa notechkopa nemi Jehová. Pampa yejua nemi nonakastlan kampa nomayekma, xkeman itlaj nechtlajkalis. Ika yejon noyojlo paki, nochi nonemilis nemi ika pakilistli. Niman ika noyojlo nimemis” (Salmo 16:8, 9).