1, 2. ¿Tleka se ueyi neskayotl ken Jonatán onouikak iuan David niman ika xkeman onokaujkej?

JONATÁN kimojkaitaya David pampa yolchikauak katka. David okimikti se uejkapan tlakatl filisteo, itoka Goliat, niman okitkili itsontekon itaj Jonatán, Saúl, tekiuaj ipan Israel (1 Samuel 17:57). Jonatán kuajli kimatstoya ika toTajtsin nemiya iuan David, niman opeuj melak kuajli nouikaj. Yejuamej okinoijlikej ika xkeman nokauaskej (1 Samuel 18:1-3). Jonatán nochipa onen iuan David, xkeman okikauj.

² Jonatán xkeman okikauj David maski Jehová yokitlapejpenijka David manochiua tekiuaj ipan Israel, niman xokitlapejpeni Jonatán. Niman ijkuak Saúl okiyejyeko kimiktis David, Jonatán melak onajman. Yejua kimatiya ika David nemiya ipan tlaluaktli nisiuj Hores. Kuakon Jonatán oyaj ompa niman okiyolchikauato matlaneltoka itech Jehová. Jonatán okijli David: “Maka xmomojti, pampa notaj Saúl xmitsnextis; tejua titekiuaj yes itech Israel, niman nejua ompa nimitsontokas” (1 Samuel 23:16, 17).

3. ¿Tlenon kitaya Jonatán ika melak ueyi kijtosneki niman kenon tikmatij? (Xkita tlaixkopinajli kampa peua tlen tomachtijtokej).

 ³ Nochipa tikinmojkaitaj akin xkeman tekauaj. San ika ¿san tikmojkaitaj Jonatán pampa xkeman okikauj David? Ka. Tikmojkaitaj pampa yejua nochipa onen iuan toTajtsin ipan inemilis, niman yejuin melak ueyi okijtosnek itech Jonatán. Niman ika yejon xkeman okikauj David niman xokinexikolitak, maski David nochiuaskia tekiuaj niman yejua ka. Jonatán hasta okipaleui David matlaneltoka itech Jehová. Yejon omemej tlakamej nochipa iuan onenkej Jehová niman yejuamej xkeman onokaujkej. Yejuamej okinoijlikej kichiuaskej yejuin: “Jehová nochipa manemi motech niman notech niman itech mochanejkauan niman nochanejkauan” (1 Samuel 20:42).

4. a) ¿Tlenon kichiua melak matipakikan niman kuajli matomachilikan? b) ¿Tlenon tikitaskej ipan yejuin tlamachtijli?

⁴ Noijki tejuamej noneki maka matijkauakan tochanejkauan, akin imiuan touikaj niman tokniuan ipan tlanechikojli (1 Tesalonicenses 2:10, 11). San ika, Jehová akin melak noneki maka matijkauakan, nochipa matinemikan itech. Yejua akin techmaka tonemilis (Apocalipsis [Revelación] 4:11). Ijkuak tejuamej tikteititiaj ika nochipa tinemij itech Jehová, melak kuajli tomachiliaj niman tiyolpakij. Tikmatstokej ika noneki nochipa tinemiskej itech toTajtsin hasta ijkuak ouijtika tipanouaj. Ipan yejuin tlamachtijli, tomachtiskej kenon ineskayo Jonatán uelis techpaleuis nochipa matinemikan itech Jehová: kachtopa, ijkuak tikitaj ika ouijtika tikintlakaitaskej akin kipiyaj tlanauatijkayotl. Ika ome, ijkuak noneki tiktlapejpeniskej akinon itech tinemiskej. Ika yeyi, ijkuak se tokniuj akin tlayekana texchiuilia tlen xkinamiki. Niman ika naui, ijkuak tikitaj ouijtika tikchiuaskej tlen yotikijtokej.

5. ¿Tleka ouijtika kitayaj israelitas nemiskej itech toTajtsin ijkuak Saúl nemiya ken tekiuaj?

⁵ Jonatán iuan kalpan Israel ouijtika tlen kitlapejpeniskej kichiuaskej. Pampa tekiuaj Saúl, itaj Jonatán, xok tetlakamatiya niman Jehová xok kiteochiuaya (1 Samuel 15:17-23). Maski ijkon, toTajtsin ok okikauili matekiuajti miyek xiuitl. Ika yejon ouijtika katka ika tlaltikpakchanejkej manemikan itech toTajtsin pampa tekiuaj kichiujtoya tlemach tlen xkuajli. Se tekiuaj akin Jehová yokitlapejpenijka matlayekana (1 Crónicas 29:23).

6. ¿Kenon tikmatij ika Jonatán xkeman okikauj Jehová?

⁶ Jonatán xkeman okikauj Jehová. Matiknemilikan itech tlenon nimantsin okichiuj Jonatán ijkuak Saúl opeuj xkitlakamati toTajtsin (1 Samuel 13:13, 14). Ipan yejon tonaltin, filisteos uajlayaj ipan 30,000 carros pampa kixnamikiskiaj Israel. Saúl san kipiaya 600 soldados, niman san yejua iuan Jonatán kipiayaj tlen ika tlaixnamikiskiaj. San ika, Jonatán xnomojtiaya. Yejua kilnamikiya tlen okijto teotlajtoketl Samuel: “Ipampa itoka ueyixtika, Jehová xkikauas ikalpan, pampa Jehová yokitlapejpeni notlatkitis yejon kalpan” (1 Samuel 12:22). Jonatán okijli se soldado: “Xtlaj uelis kitsakuilis Jehová temakixtis ika miyekej noso ika achijtsitsintin”. Kuakon Jonatán iuan yejon soldado okimixnamijkej filisteos niman okinmiktijkej kanaj 20. Jonatán tlaneltokaya itech Jehová niman yejua okiteochiuj. Jehová okichiuj matlalolini  niman filisteos melak onomojtijkej. Kuakon israelitas okimixnamijkej niman okinmiktijkej filisteos. Ijkon israelitas otetlankej kampa otlaixnamijkej (1 Samuel 13:5, 15, 22; 14:1, 2, 6, 14, 15, 20).

7. ¿Kenon Jonatán kitaya itaj?

⁷ Maski Saúl xkitlakamatiya Jehová, Jonatán ok kitlakamatiya itaj nochipa ijkuak ueliya. Se neskayotl, yejua iuan itaj san sekan kitlajpiayaj ikalpan Jehová (1 Samuel 31:1, 2).

8, 9. ¿Kenon tikteititiaj ika tinemij itech toTajtsin ijkuak tikintlakaitaj akin kipiyaj tlanauatijkayotl?

⁸ Ijkon ken Jonatán, uelis tinemiskej nochipa itech Jehová ijkuak kampa tichantij tikintlakamatij tekiuajkej, nochipa ijkuak uelis. Jehová kinkauilia yejon tekiuajkej makipiyakan tlanauatijkayotl ika techyekanaskej niman yejua kineki matikintlakaitakan (xpoua Romanos 13:1, 2). Ika yejon, noneki tikintlakaitaskej tekiuajkej maski yejuamej xkichiuaj tlen melauak. Kema, noneki tikintlakaitaskej nochimej akin Jehová yokinmakak tlanauatijkayotl (1 Corintios 11:3; Hebreos 13:17).

⁹ Olga, se tokniuj akin chanti Sudamérica okiteititi ika nochipa nemiya itech Jehová ijkuak kitlakaitaya iueuentsin maski yejua xkuajli tlen kichiuiliaya ^[1] (xkita nota kampa ontlami). Kemantika iueuentsin xkinekiya iuan tlajtos noso kijtouaya itlaj tlen kiyolkokouaya pampa yejua katka iteixpantijkauj Jehová. Hasta okijlika ika kikauaskia niman kinuikas ikoneuan. San ika, Olga xkikuepiltiaya ken yejua kichiuiliaya. Yejua okichiuj  nochi tlen nonekiya kichiuas se kuajli tesiuauj. Kichijchiuiliaya tlakuajli, kinpakaya itlakenuan niman kuajli kimitaya nochimej ichanejkauan (Romanos 12:17). Niman ijkuak yejua ueliya, yaya iuan iueuentsin kontlajpalouayaj ichanejkauan niman akin kuajli imiuan nouika. Se tonajli, ijkuak iueuentsin nonekiya yas ipan okse ueyikalpan kampa kontokaskia itaj, yejua okiyektlali nochi tlen nonekiya kitkiskej. Niman ijkuak okuikakej mijkatsintli ipan teopan, yejua onokauj san kiyauak kampa kichiaya iueuentsin. Sakin ijkuak yopanoka miyek xiuitl, iueuentsin opeuj kuajli iuan nouika. Ijkon opanok pampa Olga kijyouiyaya niman nochipa kitlakaitaya. Aman iueuentsin hasta kijlia mauiya ipan tlanechikoltin niman konkaua. Niman kemantika hasta nokaua iuan tokniuj Olga ipan tlanechikojli (1 Pedro 3:1).

10. ¿Kenon Jonatán ouel okitlapejpeni akinon xkeman kikauas?

¹⁰ Ijkuak Saúl okijto ika yas konmiktis David, Jonatán nonekiya kitlapejpenis tlen melak ouijtika. Yejua kinekiya nemis iuan itaj, san ika, noijki kinekiya nemis iuan David. Jonatán kimatiya ika toTajtsin nemiya iuan David niman xnemiya iuan itaj. Ika yejon, okitlapejpeni xkeman kikauas David. Yejua okijlito David ika maniyana niman sakin okijli itaj tleka xnonekiya kimiktis David (xpoua 1 Samuel 19:2, 4). *

11, 12. ¿Kenon tla tiktlasojtlaj toTajtsin uelis techpaleuis matiktlapejpenikan tinemiskej nochipa itech?

¹¹ Alice, se tokniuj akin chanti Australia, nonekiya kitlapejpenis akinon itech nemis. Ijkuak yejua nomachtijtiaya Biblia, okimijli ichanejkauan ika yokasikamatka seki tlamachtiltin. Noijki okimijli ika yejua xok kipanoltiskia navidad imiuan niman okimijli tleka. Ijkuak ijkon okimijli, ichanejkauan onajmankej niman sakin opeuj kitlauelitaj. Pampa yejuamej kinemiliayaj ika Alice xok najmanaya inpampa. Kuakon inan okijli ika xok kinekiya kitas oksejpa. Alice okijto: “Xnikasikamatiya tlen nopan nochiujtoya niman melak oninoyolkoko pampa melauak nikintlasojtlaya nochanejkauan. Maski ijkon, oniknemili ika noneki nikintlakamatis Jehová niman Jesucristo, niman ijkon ouel oninoapolakti sakin ipan se ueyi tlanechikojli” (Mateo 10:37).

¹² Tejuamej noneki maka matiknemilikan ika xnoneki tijkauaskej se equipo, se kaltlamachtijli noso se país. Noneki tinemiskej itech Jehová niman san yejua xkeman tijkauaskej. Matitlanemilikan tlen ipan onochiuj se telpochtli itoka Henry. Yejua melak kuelitaya nauiltis ajedrez, tlen nauiltiaj ipan mesa, imiuan akin nomachtiaya. Niman kinekiya tetlanis ijkuak nauiltiaya ipampa kaltlamachtijli kampa nomachtiaya. San ika, pampa nauiltiaya ajedrez chijchikueyi, xok ueliya yaya tlanechikoltin nion xok ueliya ontenojnotsaya. Henry okijto ika tlen kichiuaya, kitaya kentla kinekiya nemis itech kaltlamachtijli niman xnemis itech toTajtsin. Kuakon okinemili xok nauiltis ajedrez ipampa kaltlamachtijli kampa nomachtia (Mateo 6:33).

13. ¿Kenon tinemiskej itech toTajtsin techpaleuiya ijkuak tikpiyaskej tlauejli iuan tochanejkauan?

 ¹³ Kemantika melak ouijtika tinemiskej itech nochimej tochanejkauan. Matitlanemilikan itech Ken, yejua kijtoua: “Nejua niknekiya nochipa nikontlajpalos nonan niman kemantika touan manokaua. San ika, nonan iuan nosiuauj xueliyaj kuajli nouikaskej”. Tokniuj noijki kijtoua yejuin: “Xueliya nikyolpaktis se tla xnikyolkokos okse”. Kuakon Ken onomachti tlen kijtoua Biblia niman okasikamat ika nonekiya kiyolpaktis isiuauj niman yejua akin noneki itech nemis. Ika yejon, isiuauj opeuj yolpaki. Sakin, okijli tleka nonekiya kuajli iuan nouikas inan. Noijki okijli inan tleka nonekiya kitlakaitas isiuauj (xpoua Mateo 19:5; 1 Corintios 13:4, 5).

14. ¿Tlenon Saúl melak xkuajli okichiuili ikoneuj Jonatán?

¹⁴ Noijki uelis tinemiskej itech Jehová tla se tokniuj akin tlayekana texchiuiliaj itlaj tlen xkinamiki. Tekiuaj Saúl yokitlapejpenijka toTajtsin, maski ijkon xkuajli tlen okichiuili ikoneuj Jonatán. Yejua xkasikamatiya tleka Jonatán kitlasojtlaya David. Ijkuak Jonatán kiyejyekouaya kipaleuis David, Saúl melak okualan niman okipinaujti teixpan. San ika, Jonatán ok kitlakaitaya itaj, niman noijki nemiya itech Jehová niman itech David, akin toTajtsin yokitlapejpenijka nochiuas tekiuaj ipan Israel (1 Samuel 20:30-41).

15. ¿Tlenon noneki tikchiuaskej tla se tokniuj texchiuilia tlen xkinamiki?

 ¹⁵ Ipan yejuin tonajli, tokniuan akin tlayekanaj ipan tlanechikojli kiyejyekouaj kimitaskej nochimej ijkon ken noneki. San ika, yejon tokniuan tlajtlakolejkej. Ika yejon, kemantika uelis xkasikamatiskej itech tlen tikchiuaj (1 Samuel 1:13-17). Tla itlaj texchiuiliaj tlen xkinamiki noso xtechasikamatij, matinemikan itech Jehová niman maka matijkauakan.

16. ¿Kemanon noijki noneki tinemiskej itech toTajtsin niman xsan titlanemiliskej totech?

¹⁶ Saúl kinekiya ika Jonatán manochiua tekiuaj ipan Israel niman maka manochiua David (1 Samuel 20:31). San ika, Jonatán kitlasojtlaya Jehová niman kinekiya nemis itech. Kuakon xsan otlanemili itech yejua, opeuj kuajli iuan nouika David niman okichiuj ijkon ken yokijlika. Kema, nochimej akin kitlasojtlaj Jehová niman kinekij nemiskej itech, kichiuaj tlen yokijtokej maski ouijtika tlen kixnamikij (Salmo 15:4). Pampa tiknekij tinemiskej itech toTajtsin, tikchiuaskej tlen yotikijtokej. Se neskayotl, tla itlaj totlajtolkauaj ipan totekiyo, tikchiuaskej ijkon ken otokaujkej, maski tla tikitaj ouijtika tikchiuaskej tlen yotikijtokaj. Niman tla tikpiyaj tlauejli iuan toixnamik, tikteititiskej ika tiktlasojtlaj Jehová tla xkeman tokauaskej (xpoua Mateo 19:6, 9).

17. ¿Kenon yomitspaleui yejuin tlamachtijli?

¹⁷ Tiknekij nochipa tinemiskej itech toTajtsin maski ijkuak tikixnamikiskej tlen ouijtika, ken okichiuj Jonatán. Matikimititikan tlasojtlalistli tlen xtekaua tokniuan ipan tlanechikojli maski ijkuak techyolkokoskej. Tla ijkon tikchiuaj, tikyolpaktiskej Jehová, niman yejon kichiuas matipakikan (Proverbios 27:11). Uelis kuajli tikmatstoskej ika Jehová nochipa kichiuas tlen melak kuajli topampa niman techtlajpiyas. Ipan okse tlamachtijli, tikitaskej tlenon uelis tomachtiskej itech akin okiteititijkej tlasojtlalistli tlen xtekaua niman itech oksekimej akin xijkon okichiujkej ipan itonaluan David.