1-3. a) ¿Tleka kuajli tikmatstokej ika tejuamej uelis kuajli iuan touikaskej toTajtsin? b) ¿Tlenon tikitaskej ipan yejuin tlamachtijli?

IPAN Biblia, yexkan uajnestiuj ika Abrahán iuan onouikak toTajtsin (2 Crónicas 20:7; Isaías 41:8; Santiago 2:23). San yejua akin okitokayotijkej ipan Biblia ken akin kuajli iuan onouikak toTajtsin. ¿Kijtosneki ika san Abrahán kuajli onouikak iuan toTajtsin? Ka. Biblia kijtoua ika tinochimej uelis kuajli iuan touikaskej Jehová.

² Ipan iTlajtol toTajtsin kijtoua ika miyekej tlakamej niman siuamej okimojkaitakej Jehová, otlaneltokakej itech niman kuajli iuan onouikakej (xpoua Salmo 25:14). * Yejuamej akin Pablo kinteneua ken “sanoyej miyek tlakatl”. Nochimej yejuamej kuajli iuan onouikakej toTajtsin (Hebreos 12:1).

³ Aman matikitakan yeyimej akin kinteneua Biblia ika kuajli onouikakej iuan Jehová. Kachtopa, se siuakauajli ualeua Moab, itoka Rut. Ika ome, se kuajli tekiuaj ipan Judá, itoka Ezequías. Niman ika yeyi, inan Jesús akin yolyemanki  katka, itoka María. ¿Tlenon uelis tomachtiskej itech ken onouikakej iuan toTajtsin?

4, 5. ¿Tlenon melak ouijtika kitlapejpeniskia kichiuas Rut niman tleka? (Xkita tlaixkopinajli kampa peua tlamachtijli).

⁴ Noemí oneua Moab niman nejnemi iuan ome isiuamonuan, Rut iuan Orpá, hasta ajsis Israel. Ipan ojtli, Orpá okinemili yas ichan, Moab. San ika, Noemí kuajli yokinemilijka nokuepas Israel kampa ualeuaya. ¿Tlenon kichiuaskia Rut? Yejua nonekiya kitlapejpenis itech tlen melak ouijtika. Nokuepas Moab kampa nemij ichanejkauan noso nokauas iuan imonan Noemí, niman iuan nokuepas Belén (Rut 1:1-8, 14).

⁵ Ichanejkauan Rut chantiyaj Moab. Yejua ueliskia oksejpa nokuepas kampa nemij, niman yejuamej uelis kipaleuiskiaj. Yejua kixmatiya kenon ikalpan, tlenon tlajtojli tlajtouaj niman okseki tlemach. Noemí xueliskia kijlis Rut ika noijki ijkon yeskia ipan ueyikalpan Belén. Noijki Noemí najmanaya ika Rut xok uelis kinextiskia akin iuan nonamiktis noso kampa chantis. Kuakon, Noemí okijli manokuepa ichan, Moab. Ken yotikitakej, Orpá onokuep “ipan ikalpan niman itech itajtsitsinuan” (Rut 1:9-15). San ika, Rut okitlapejpeni xnokuepas Moab nion xias kinueyichiuas tajtsitsintin.

6. a) ¿Kenon Rut melak kuajli okitlapejpeni tlen kichiuas? b) ¿Tleka okijto Boaz ika Rut okitejtemo tlapaleuilistli itech imastlakapaluan Jehová?

⁶ Nesi ika Rut onomachti itech Jehová itech iueuentsin noso itech Noemí. Yejua okasikamat ika Jehová xijkon ken tajtsitsintin akin kinueyichiuaj Moab. Yejua opeuj kitlasojtla Jehová niman okasikamat ika san yejua noneki kitlasojtlas niman kiueyichiuas. Kuakon Rut melak kuajli tlen okitlapejpeni. Yejua okijli Noemí: “Mokalpan, nokalpan yes. niman moTajtsin noijki noTajtsin yes” (Rut 1:16). Melak tikmojkaitaj Rut ijkuak titlanemiliaj kenon kitlasojtlaya Noemí. San ika, ken kitlasojtlaya Jehová, yejon tlen melak tikmojkaitaj. Boaz noijki ijkon okitak, akin sakin okijto ika ouajla itech Jehová kampa onopaleuiko itech imastlakapaluan (xpoua Rut 2:12). * Tlen okijto Boaz techtlanemililtia ijkuak se tototsintli niyana itsintlan imastlakapaluan inan (Salmo 36:7; 91:1-4). Noijki ijkon, Jehová okipaleui Rut niman okimakak tlaxtlauijli ipampa itlaneltokil. Rut xkeman onoyolkuep itech tlen okitlapejpeni kichiuas.

7. ¿Tlenon uelis kinpaleuis akin okpa kinemiliaj nosentemakaskej itech Jehová?

⁷ Miyekej tlaltikpakchanejkej nomachtiaj itech Jehová, san ika, xkitlapejpeniaj nopaleuiskej itech. Yejuamej okpa kinemiliaj nosentemakaskej itech toTajtsin niman noapolaktiskej. Tla tejua ijkon mopan nochiua, xnemili tleka okpa titlanemilia. Nochimej kitekichiuiliaj se intajtsin noso okse tlemach (Josué 24:15). Kuajli tikchiua tla tejua tiktlapejpenia tiktekichiuilis toTajtsin akin melauak. Ijkuak timosentemakas itech Jehová, tikteititis ika titlaneltoka ika itech yejua uelis timopaleuis. Niman yejua mitspaleuis niman ijkon nochipa tiktekichiuilis maski san tlenon tikixnamikis. Yejon tlen toTajtsin okichiuj ipampa Rut.

8. Xkijto tlenon opanok ijkuak Ezequías onoskalti.

⁸ Ezequías tlamantik noso sejneka katka,  xijkon ken Rut. Pampa Ezequías onoskalti kampa kiueyichiuayaj toTajtsin. Yejua teuan nopouaya itech kalpan tlen yonosentemakaka itech toTajtsin. San ika, xnochimej israelitas oyolmelaujkanenkej. Itaj Ezequías, tekiuaj Acaz, melak xkuajli katka. Yejua xkitlakaitaya iteopan toTajtsin niman okichiuj ika oksekimej makinueyichiuakan tajtsitsintin. Noijki Acaz hasta okintlati sekimej ikniuan Ezequías niman okiuentlalili itajtsin. Melak xkuajli tlen opanok ijkuak Ezequías onoskalti (2 Reyes 16:2-4, 10-17; 2 Crónicas 28:1-3).

9, 10. a) ¿Tleka ueliskia xkuajli nomachiliskia Ezequías? b) ¿Tleka xnoneki tikualaniskej iuan toTajtsin? c) ¿Tleka xnoneki tiknemiliskej ika tlen kichiuaj tochanejkauan yejon kichiuas matikchiuakan tlen xkuajli noso tlen kuajli?

⁹ Xkuajli ineskayo Acaz ueliskia kichiuas ika ikoneuj Ezequías makixnamiki Jehová. Ipan yejuin tonajli, sekimej maski xijkon inpan nochiua ken Ezequías, kinemiliaj ika kinamiki kualaniskej noso kixnamikiskej Jehová noso ikalpan (Proverbios 19:3). Oksekimej kinemiliaj ika pampa inchanejkauan xkuajli tlen okichiujkej, yejuamej noijki xkuajli kichiuaskej noso noijki nopopoloskej ken intajuan (Ezequiel 18:2, 3). San ika ¿melak ijkon panoua ken kinemiliaj?

¹⁰ Tlen okichiuj Ezequías teititia ika xijkon panoua. Xkeman onka tlen ika tikualaniskej iuan Jehová. Yejua xkipiya tlajtlakojli itech tlen inpan nochiua tlaltikpakchanejkej (Job 34:10). Yemelak ika tajtin uelis kinmachtiskej inkoneuan makichiuakan tlen kuajli noso tlen xkuajli (Proverbios 22:6; Colosenses 3:21). San ika, yejuin xtikijtoskej ika ken kichiuaj tochanejkauan noijki ijkon tikchiuaskej tejuamej ika tlayekapan. ¿Tleka? Pampa Jehová otexchijchiuj matiuelikan tiktlapejpeniskej tlenon tikchiuaskej, tla tiktlapejpeniskej tikchiuaskej tlen kuajli noso tlen xkuajli (Deuteronomio 30:19). ¿Tlenon okitlapejpeni kichiuas Ezequías?

11. ¿Tleka Ezequías onochiuj se kuajli tekiuaj ipan Judá?

¹¹ Maski itaj Ezequías melak xkuajli tekiuaj katka itech Judá, yejua melak kuajli tekiuaj katka (xpoua 2 Reyes 18:5, 6). * Yejua xokichiuj tlen itaj okichiuj.  Yejua okinkak iteotlajtokauan Jehová, ken Isaías, Miqueas niman Oseas. Yejua kuajli okikak tlajtolpaleuilistli niman onokauili makiyektlalikan. Yejuin okipaleui makiyektlali miyek tlemach tlen itaj yokijtlakojka. Okichipauj teopan, okitlajtlanili toTajtsin makintlapopoluili intlajtlakoluan israelitas niman okinpopolo tajtsitsintin (2 Crónicas 29:1-11, 18-24; 31:1). Sakin, ijkuak tekiuaj Senaquerib akin ualeua Asiria okijto kixnamikis Jerusalén, Ezequías okiteititi ika kipiaya ueyi itlaneltokil niman yolchikauak katka. Yejua okineltokak ika Jehová kinpaleuiskia niman okinyolchikauj oksekimej (2 Crónicas 32:7, 8). Ijkuak Ezequías inoueyimatstoya, yejua onoyolyemani ijkuak Jehová okiyektlali (2 Crónicas 32:24-26). Ken tikitaj, Ezequías techmaka se kuajli neskayotl. Xokikauili makijtlako inemilis tlen okichiujkej ichanejkauan. Yejua okiteititi ika kuajli onouikak iuan Jehová.

12. Ijkon ken Ezequías, ¿kenon miyekej ipan yejuin tonajli kiteititiaj ika nouikaj iuan Jehová?

¹² Ipan yejuin tonajli, tinemij kampa xtetlasojtlaj niman xteikneliaj. Niman miyekej kokonej ijkuak noskaltiaj xkintlasojtlaj intajuan nion xkintlajpiyaj (2 Timoteo 3:1-5). Maski miyekej ualeuaj itech inchanejkauan akin kipiyaj tlaueltin, yokitlapejpenijkej kuajli iuan nouikaskej Jehová. Ijkon ken Ezequías, xnoneki kimijtlakos ipan innemilis tlen kichiuaj inchanejkauan noso xkijtosneki tla xuelis kichiuaskej tlen kuajli ika tlayekapan. ToTajtsin otexchijchiuj matiuelikan tiktlapejpeniskej tlen tikchiuaskej, tla tiktlapejpeniskej tiktekichiuiliskej niman tikueyichiuaskej, ijkon ken okichiuj Ezequías.

13, 14. ¿Tleka ouijtika kitaya María itech tekitl tlen okimakakej niman kenon okinankili iluikaktekitketl?

¹³ Miyek xiujtin sakin ijkuak yonenka Ezequías, se yolyemanki siuatl itoka María melak kualtsin ken onouikak iuan Jehová niman okimakakej se tekitl. Yejua nonekiya kitlakatilis ikoneuj toTajtsin niman kiskaltis. Jehová melak kitlasojtlaya María niman kimatiya ika ueliskia kichiuas tlen kijlis. San ika ¿kenon onomachili ijkuak okikak itech ueyi tekitl tlen kiseliskia?

¹⁴ San nochipa titlajtouaj itech ueyi tekitl tlen okiseli María. San ika, aman matiknemilikan kenon onomachili noso tlenon kajmanaya ijkuak okijlikej tlen kichiuas. Xnemili, iluikaktekitketl Gabriel okijli María ika kipiyaskia ikoneuj maski xnotekaskia iuan se tlakatl. San ika, iluikaktekitketl xokimijli kenon nochiuaskia yejon ichanejkauan María noso akin kixmatiyaj. ¿Tlenon ueliskia kinemiliskiaj yejuamej? ¿Kenon María kitlaneltokiltiskia José ika xokikajkayauj iuan okse tlakatl? Niman  noijki, ika yejua kipiaya se ueyi tekitl, kiskaltis ikoneuj toTajtsin. Xnochi tikmatij tlen kajmanaya María, san ika, kema tikmatij tlenon okijli iluikaktekitketl ijkuak yotlanka iuan tlajtoua. Yejua okijto: “Nejua niitekichiuilijkau toTeko [Jehová]” (Lucas 1:26-38).

15. ¿Tleka María kipiaya ueyi itlaneltokil?

¹⁵ María melak chikauak itlaneltokil kipiaya. Yejua kinekiya kichiuas maski san tlenon makitlajtlanilikan ijkon ken se tlakeuajli. María kineltokaya ika Jehová kipaleuiskia niman kitlajpiyaskia. ¿Kenon María okichikauj itlaneltokil? Tejuamej xtiuajtlakatij ika totlaneltokil. San ika, uelis tikpiyaskej tlaneltokijli tla tochikauaj tikpiyaskej niman tiktlajtlaniliaj toTajtsin makiteochiua ijkuak tokojtiliaj itech tlen tikchiuaj (Gálatas 5:22; Efesios 2:8). María melak chikauak otekit niman ijkon okichiuj makipiya ueyi itlaneltokil. ¿Kenon tikmatij? Matikitakan kenon yejua otlakak niman itech tlenon otlajto.

16. ¿Kenon okiteititi María ika kuajli tlakakiya?

¹⁶ Ken María tlakakiya. Ipan Biblia kijtoua ika noneki kuajli titlakakiskej niman xnimantsin titlajtoskej (Santiago 1:19). María kuajli tlakakiya. Ipan Biblia nesi ika yejua kuajli kikakiya ijkuak nomachtiaya itech Jehová. Yejua kixelouaya tonaltin niman ijkon tlanemiliaya itech tlemach tlen melak noneki. Matitlanemilikan ijkuak otlakat Jesús. Tlajpixkej okijlitoj María tlen okimijli se iluikaktekitketl. Sakin, ijkuak Jesús ikipiaya 12 xiuitl, okijto itlaj tlen María melak okimojkaitak. Ijkuak opanok yejuin, María kuajli otlakak, xokilkauj niman kuajli otlanemili itech tlen okikak (xpoua Lucas 2:16-19, 49, 51).

17. ¿Tlenon uelis tomachtiskej itech tlen otlajto María?

¹⁷ Itech tlen tlajtouaya María. Ipan Biblia xmiyek kijtouaj itech María. Ipan Lucas 1:46-55 tiknextiaj kampa yejua otlajto. Ika tlen okijto María nesi ika melak kuajli kixmatiya iTlajtol toTajtsin. ¿Tleka? Pampa tlen okijto María noijki yejon okijto Ana ijkuak okichiuj teoyotl (1 Samuel 2:1-10). Nesi ika ijkuak María otlajto, okiteneuj kanaj 20 veces tlen ijkuiliujtok ipan iTlajtol toTajtsin. Kuajli nesi ika yejua kuelitaya tlajtos itech tlen yonomachtijka itech Jehová, akin kuajli iuan nouikaya.

18. ¿Kenon uelis noijki tikpiyaskej chikauak totlaneltokil ken María?

¹⁸ Ijkon ken María, kemantika tikseliaj seki tekitl itech Jehová tlen uelis noijki ouijtika tikitaskej. Matikchiuakan ken yejua, matiyolyemankej ijkuak tikseliskej se yenkuik tekitl niman matitlaneltokakan ika Jehová techpaleuis. Noijki uelis tikpiyaskej totlaneltokil ijkon ken María tla kuajli tijkaki Jehová niman titlanemiliaj itech tlen yotomachtijkej niman itech tlen kineki kichiuas. Kuakon, ika pakilistli matikinnojnotsakan oksekimej itech tlen yotomachtijkej (Salmo 77:11, 12; Lucas 8:18; Romanos 10:15).

19. Tla tikchiuaj ijkon ken akin kinteneua Biblia, ¿tlenon uelis panos?

¹⁹ Ken yotikitakej ipan yejuin tlamachtijli, Rut, Ezequías niman María kuajli onouikakej iuan toTajtsin, ijkon ken Abrahán. Yejuamej noteneuaj itech “sanoyej miyek tlakatl [noso tlaltikpakchanejkej]” akin ouel onouikakej iuan toTajtsin. Nochipa matikchiuakan ijkon ken yejuamej okichiujkej (Hebreos 6:11, 12). Tla ijkon tikchiuaj nochipa kuajli iuan touikaskej Jehová.