Nion se tlaltikpakchane xkuajli kimati kenon yemelak tlachiaya Pablo. Ken tikixkopinaj ipan toamatlajkuiloluan san se neskayotl, yejuin xnokixtia itech itlaj tlen yononexti tlen kuajli kiteititia kenon yemelak tlachiaya.

San ika, onka seki tlen techijlia kanaj kenon tlachiaya. Se neskayotl, ipan yejuin revista itech 1 marzo 1902, onoijto ika ipan Hechos de Pablo y Tecla, se amoxtli tlen onoijkuilo kanaj itech xiuitl 150, melak kuajli kiteneua kenon tlachiaya Pablo, niman notlajtolnamiki iuan ken yeuejkaui uajnoneltokatiuj. Ompa kijtoua ika yejua: “Se tlakatl akin xuejkapan, kipiya achijtsin itson, ikxichijchikipeltik, kojtik, ixmonajnamijtok, ueyak iyejkatsol”.

Se diccionario kijtoua ika amoxtli Hechos de Pablo y Tecla xnopopoloua ijkuak kiteneua tlen yeuejkaui opanok (The Oxford Dictionary of the Christian Church [tlen okis ipan 1997]). Itech kachtopa siglos ijkuak opeuj totonaluan, yejuin amoxtli melak kitlakaitayaj, ijkon tikmatij pampa onka 80 amatlajkuiloltin ika griego itech yejuin amoxtli, niman noijki onka ika okseki tlajtoltin. Yejua ika, ken tejuamej tikixkopinaj Pablo ipan toamatlajkuiloluan, notlajtolnamiki iuan yejuin amatlajkuiloltin tlen yeuejkaui okijtokej kenon tlachiaya yejuin apóstol.

San ika, noneki matikmatstokan ika onka tlen melak ueyi kijtosneki xijkon ken tikmatiskej kenon tlachiaya Pablo. Ijkuak yejua tenojnotstinemiya, miyekej kitejteneuayaj niman kijtouayaj ika ijkuak nemiya iuan oksekimej yejua xyolchikauak katka niman ika xtikuelkakis itlajtol (2 Cor. 10:10). San ika, maka matikilkauakan ika yejua opeuj kichiua ken Cristo pampa Jesús okinotiti ika se milagro. Noijki kipiya ika titlanemiliskej itech nochi tlen okichiuj ijkuak okitlapejpenijkej niman ijkon tenojnotsas itech Jesús ipan kalpamej (Hech. 9:3-5, 15; 22:6-8). Niman noneki matiknemilikan kenon melak techpaleuiyaj amatlajkuiloltin itech Biblia tlen Pablo okijkuilo ika itlapaleuilis toTajtsin.

Pablo xkeman okijto kenon tlachiaya nion xonoueyimat ipampa tlen okichiujka achto ika kitokas Cristo (Hech. 26:4, 5; Filip. 3:4-6). Yejua okijto: “Nejua, tej, xniueyixtikaj ken on oksekimej apóstoles, niman nion achijtsin xnechmelaua nechtokayotiskej apóstol” (1 Cor. 15:9). Niman sakin okijkuilo: “Maski más nipitentsin xken on yejuan pipitikej iyaxkauan Dios, yejua ikan iteiknelilis onechmakak in tekitl para nikimijlis on yejuan xhebreos ika irriquezas Cristo yejuan xuelis tiktemachiuaskej” (Efes. 3:8). Kema, tlen okijto melak ueyi kijtosneki xijkon ken tikmatis ken tlachiaya.