Se xkuajli amigo

Tejua tikpiya se “amigo” akin desde yeuejkaui otikixmat. Yejua mitspaleuiaya xmachili ika titlamachilise niman noijki mitspaleuiaya kuajli xmouika imiuan oksekimej. Nochipa tiktejtemouaya ijkuak tajmankamikiya pampa tiknemiliaya ika mitspaleuiaya.

San ika, sakin otikitak ika yejon amigo xkuajli tlen mitschiuiliaya. Yejua nochiuiyan kineki mouan yas, maski kemantika xkuajli nesi ika mouan manemi. Maski kachtopa kanaj kichiuaya manesi kentla tejua titlamachilise, aman tikita ika yejua kichiua xkualo niman hasta yomitsichtekili miyek tomin.

Tejua yotikyejyeko tikauas yejon amigo, san ika, yejua xmitskaua. Uelis tikijtoskej ika kentla yonochiuj moteko. Aman tiknemilia ika más kuajli yeskia tla xkeman tikixmatiskia.

MIYEKEJ akin pokij noso tlachichinaj ijkon inpan nochiua. Matontlanemilikan itech tlen ipan onochiuj Earline, se siuatl akin kuikaya 50 xiuitl ika pokiya. Yejua kijtoua: “Más kuajli ninomachiliaya ijkuak nikpiaya se cigarro xijkon ken tla ninemiskia iuan yakaj. Nejua nikitaya cigarro kentla se amigo niman kemantika san yejon tlen nikmachiliaya ika nechpaleuiaya”. San ika, sakin okitak ika tabaco se xkuajli amigo niman melak teijtlako. Tlen otikteneujkej ipeujyan yejuin tlamachtijli, kuajli kiteititia tlen okixnamik Earline. San ika, yejua okikajkauj ika poki ijkuak okimat ika toTajtsin xkuelita pampa kijtlakoua totlalnakayo (2 Corintios 7:1).

Se tlakatl akin itoka Frank, noijki okikajkauj ika poki pampa kinekiya kiyolpaktis toTajtsin. San ika, ijkuak xiuejkauiya ika okikajkauj ika poki, opeuj kintejtemoua itsinkojyouan cigarros ipan ipiso, tlen tlachijchiujtli katka ika kojtli. Frank kijtoua: “Ijkuak onikitak kenon ninoteuilantinemiya ipan piso para nikintejtemos itsinkojyouan cigarros, san no nejua nouan onikualan, niman onikijto ika xok keman nipokiskia”.

¿Tleka ouijtika tijkajkauas tabaco? Ixtlamatkej yokitakej ika ouijtika ipampa yejuin: 1) Nochi tlen kipiya tabaco kichiua xpiya vicio ijkon ken drogas. 2) Nicotina tlen noijyotilana san uejkaui siete segundos para ajsis ipan cerebro. 3) Akin kikuij tabaco miyekpa pokij ijkuak tlakuaj, ijkuak itlaj konij, ijkuak tlajtlajtouaj noso ijkuak melak ajmankamikij.

Maski ijkon, kema ueli nokajkaua yejuin vicio, ijkon ken okichiujkej Earline niman Frank. Tla tejua tikneki tijkajkauas ika tipoki, melak mitspaleuis tla tikimita tlamachtiltin tlen sakin uajlauej.