¡Tejua uelis tijkajkauas ika tipoki!

“¡XMOYOLCHIKAUA niman xpeualti on tekitl!” (1 Crónicas 28:10). ¿Tlenon mitspoloua tikchiuas niman ijkon xok tipokis?

Xkijto kemanon xok tipokis. Departamento de Salud y Servicios Humanos de Estados Unidos kijtoua ika ijkuak yotikijto xok tipokis noneki tiktlalis se tonajli ijkuak tipeuas achto ika mapanokan ome semanas. Tla ijkon tikchiua, ok tiknektos tikchiuas tlen yotikijto. Xkijkuilo ipan mocalendario, xkimijli moamigos niman maka xmotsinkixti maski san tlenon mapano.

Xchijchiua se tarjeta. Xkijkuilo tlen nikan tikteneuaskej niman tlen tiknemilia ika uelis mitspaleuis.

● Xkijkuilo tleka xok tikneki tipokis

● Teléfonos itech akin uelis tikominnotsas ijkuak oksejpa tipokisnekis

● Tlen mitspaleuis xchiua ijkon ken yotikijto (kanaj uelis yes se texto itech Biblia, ken Gálatas 5:​22 niman 23).

Nochipa xkitkitinemi yejuin tarjeta niman miyekpa xkita ipan se tonajli. Maski tla yopanok tiempo ika xok tipoki, oksejpa xkita tla tipokisneki.

Tlen uelis tikchiuas. Achto mayejko tonajli ijkuak otikijto ika xok tipokis xpatla nochi tlen kichiuaya ika xpoki. Tla tejua yotimomat tipokis nochipa ijkuak timokuiteua ika kualkan, aman xpoki se hora sakin. Noso tla yotimomat tipoki ijkuak titlakua noso ijkuak yotixuik, maka sa ijkon xchiua. Noijki, maka sa xuiya kampa pokilo. San moselti xmomachti tikijtos: “Tlaxtlaui, xok nipoki”. Yejuin mitspaleuis xpeua ipan tonajli tlen yotikijto niman noijki mitspaleuis xmatsto ika kema uelis tijkajkauas ika tipokis.

Okseki tlen uelis tikchiuas. Ijkuak iyejkotos tonajli ijkuak otikijto ika xok tipokis, xsentlali tlen uelis tijkuas: kentla chicles noso nueces. Xkintlalnamikti moamigos noso mochanejkauan kemanon tipeuas niman tlenon uelis kichiuaskej para mitspaleuiskej. Achto ika yejkos tonajli xkintlajkali cigarros tlen tikinpiya mochan, ipan mocarro, ipan motlaken, kampa titekiti niman noijki ceniceros, encendedores niman okseki tlen uelis kichiuas oksejpa xpokisneki. Más ouijtika tias tikonkouas se cigarro noso tiktlajtlanilis se moamigo, xijkon ken san tikontilanas kampa tikimejyeua. Noijki, xtlajtlanili toTajtsin mamitspaleui niman más tla yotikpokik sa ika tlami cigarro (Lucas 11:13).

Melak miyekej yokasikamatkej ika cigarro melak kimijtlakoua niman youel yokikajkaujkej. Tejua noijki uelis tijkajkauas ika tipoki. Niman melak kuajli timomachilis.

[Tlaixkopinajli]

Nochipa xkitkitinemi yejuin tarjeta niman miyekpa xkita ipan se tonajli