Se siuatl itoka Haykanush chanti iuan iueuentsin ipan país Armenia. Yejuamej tenojnotsayaj, san ika, xinoapolaktiayaj. Se tonajli, Haykanush okinexti se pasaporte nisiuj inchan. Ipan yejon pasaporte onkatka tarjetas itech banco niman miyek tomin. Yejua okijli iueuentsin tlen okinexti.

Yejuamej xkipiayaj tomin niman nonekiya kitlaxtlauaskej tlen teuikiliayaj. San ika, yejuamej okitemakatoj tomin tlen yokinextijkan. Niman yejon tlakatl iuan ichanejkauan otlamojkaitakej niman xuelij kineltokayaj. Haykanush iuan iueuentsin okimijlikej ika yejuamej nomachtijtoyaj Biblia niman yonomachtijkaj melajki noyekanaskej. Niman ijkon ouel okinnojnotskej itech iteixpantijkauan Jehová niman okinmakakej seki amatlajkuiloltin.

Yejon familia kinekiya kimakas tomin Haykanush, san ika, yejua xokiseli. Uajmostla, isiuauj akin itlatki pasaporte okintlajpaloto Haykanush iuan iueuentsin. Pampa melak kitlasojkamatiya, okijli Haykanush makiseli se anillo tlen kipiya diamante.

Ijkon ken yejon familia, miyekej kimojkaitaskiaj ika okichiujkej tlen melajki Haykanush iuan iueuentsin. San ika ¿noijki tlamojkaita toTajtsin? ¿Tlenon kinemilia yejua ika okichiujkej tlen melajki? ¿Kenon okinpaleui pampa okichiujkej tlen melajki?

Ken nonankiliaj yejon tlajtoltilistin xouijtika. ¿Tleka? Pampa itekipanojkauan toTajtsin kimatij ika kixkopinaskej ikualneskayouan yejon tlen melak kitlasojkaita xijkon ken oro, diamantes noso itlaj okse. Jehová kitlasojkaita itlaj tlen tlaltikpakchanejkej xkitlasojkaitaj (Isaías 55:8, 9). Yejua melak kitlasojkaita nochi tlen kichiuaj itekipanojkauan ijkuak kixkopinaj ikualneskayouan.

Ueli tikitaj yejuin ipampa tlen kijtoua Biblia itech asikamatilistli niman tlamachilistli. Proverbios 3:13-15 kijtoua: “Yolpaki se tlakatl akin kinextia tlamachilistli niman tlakatl akin kuajli kasikamati itlaj; nopiyas yejon melak kuajli xijkon ken nopiyas plata, niman nopiyas ken tlen notlani xijkon ken nopiyas oro. Yejon melak tlasojtij xijkon ken corales; xtlaj tlen tiktlasojtla uelis kipanauis ika tlasojti”. Kuajli nesi ika Jehová melak kitlasojkaita yejuin kualneskayomej xijkon ken itlaj okse.

¿Tlenon uelis tikijtoskej ijkuak se kichiua tlen melajki?

Jehová yejua kichiua tlen melajki. Yejua “xueli tekajkayaua” (Tito 1:2). Niman ika iespíritu santo okichiuj Pablo makimijkuilouili tlaneltokakej ipan kachtopa siglo: “Topampa xchiuakan teoyotl, pampa kuajli tikmatstokej ika tikpiyaj totlamachilis melajki, pampa tiknekij toyekanaskej melajki itech nochi tlemach” (Hebreos 13:18 TNM).

Jesucristo noijki okichiuj tlen melajki. Se neskayotl, ijkuak ueyi teopixki Caifás okijto: “Ikan itokatsin Dios yejuan nochipa nemi, xtechijli ikan tlajtolpaleuilistli tla tejua tiCristo, on iKoneu Dios”. Jesús xotekajkayauj, okijto ika yejua katka Mesías. Yejua okijto tlen melauak maski kimatiya ika akin ueyixtoyaj itech judíos kitlajtlakoltiskia ika xkuajli tlajtoua itech toTajtsin niman yejon kichiuaskia makimiktikan (Mateo 26:63-67).

¿Tlenon uelis tikijtoskej tejuamej? Tla tikitaskiaj ika uelis itlaj tikpiyaskej, maski yejon kijtosnekis xtikijtoskej nochi tlen melauak noso tikpatlaskej tlen tikijtouaj, ¿ok tikchiuaskej tlen melajki?

Ouijtika tikchiuaskej tlen melajki ipan yejuin sa itlamiyan tonaltin ijkuak miyekej san tlanemiliaj intechkopa niman “kejeleui[ya]j tomin” (2 Timoteo 3:2). Ijkuak xonka tomin noso ouijtika tiknextis tekitl, miyekej tlachtekij, tekajkayauaj noso kichiuaj itlaj okse tlen xmelajki. Pampa nochiuiyan ijkon tlanemiliaj, miyekej kitaj ika san uelis tikpiyas itlaj tla tikchiua tlen xmelajki. Sekimej tokniuan ijkon yokichiujkej. Niman ika yejon, xok kinneltokiliaj ipan tlanechikojli (1 Timoteo 3:8; Tito 1:7).

Miyekej tokniuan kichiuaj ken Jesús. Kimatij ika kiteititiskej ikualneskayouan toTajtsin melak ueyi kijtosneki, xijkon ken tomin noso itlaj okse. Ika yejon telpokamej akin iteixpantijkauan Jehová akin yauej ipan kaltlamachtijli xtlakajkayauaj ijkuak kichiuaj examen niman ijkon kuajli makisatij (Proverbios 20:23). Kema, xnochipa itlaj tikseliskej tla tikchiuaj tlen melajki ken Haykanush. Maski ijkon, toTajtsin kijtoua ika tla tikchiuaj tlen melajki yejon tlen kinamiki. Yejuin kichiua matikpiyakan chipauak totlamachilis, itlaj tlen notlasojkaita.

 Ineskayo Gagik teititia yejon. Yejua kijtoua ika ijkuak xinochiuaya iteixpantijkauj Jehová, tekitiya ipan se ueyi empresa. Akin itech tekitiya kiteijliaya ika san achijtsin tomin notlaniya niman ijkon xkitlaxtlauas impuestos. Pampa Gagik katka tlayekanketl itech yejon tekitl, nonekiya makimaka tomin akin kontitlaniya tekiuaj makitati intekiyo niman ijkon maka manomati ika tekajkayaujtokej. Ika yejon, Gagik okixmatkej ika kichiuaj tlen xmelajki. San ika, yejua opeuj nomachtiaj Biblia niman xok okinek kichiuas tlen xmelajki, maski melak kuajli kitlaxtlauiliayaj. Kuakon okinemili sa iselti tekititis. Ipan yejon tonajli ijkuak okiteijli kipiyas se empresa, okitlaxtlauj nochi impuestos ken kitlajtlaniyaj tekiuajkej (2 Corintios 8:21).

Gagik kijtoua ika xok ijkon kitlaniya ken kachtopa niman ouijtika katka kinmakas ichanejkauan tlen kinpoloua. San ika, aman melak yolpaki niman kipiya chipauak itlamachilis ixpan Jehová. Noijki kijtoua ika kinmaka se kuajli neskayotl ikoneuan niman kipiya se tekitl ipan tlanechikojli. Niman kuajli tlajtouaj itech akin tekiuaj yokintlali makitakan impuestos niman noijki kuajli kitaj akin iuan tekiti, pampa kimatij ika yejua kichiua tlen melajki.

Jehová kintlasojtla akin kixkopinaj ikualneskayouan kualtsitsintin, ken tikchiuas tlen melajki (Tito 2:10). Niman ijkuak tikchiuaj yejuin, yejua techijlia techpaleuis. Ika iespíritu santo okichiuj ika David makijkuilo ika maski yejua youeuentsintiaka, xkeman okitak yakaj akin kitekichiuilia toTajtsin nion ikoneuan maka makipiyakan tlen kikuaskej (Salmo 37:25).

Tlen opanok ipan inemilis Rut techititia ika yemelak yejon. Yejua xkeman okikauj imonan maski ilamajtsin katka. Rut iuan oyaj onochantito Israel, kampa ueliskia kiueyichiuas toTajtsin akin melauak (Rut 1:16, 17). Yejua okichiuj tlen melajki, pampa chikauak tekitiya ijkuak kisentlaliaya trigo tlen kinkauiliayaj akin xkipiyaj tlen ika nopanoltiskej, ken kijtouaya Tlanauatijli tlen okimakakej Moisés. Jehová nochipa okimakak tlen kipoloua Rut niman imonan, ijkon ken sakin noijki okipaleui tekiuaj David (Rut 2:2-18). San ika, toTajtsin xsan okipaleui niman okimakak tlen kipoloua. Noijki okichiuj ika itech ichanejkauan maualeua David niman Mesías (Rut 4:13-17; Mateo 1:5, 16).

Ipan yejuin tonajli, miyekej itekipanojkauan toTajtsin melak ouijtika kitaj kitlaniskej tomin tlen ika kinextiskej tlen kinpoloua. Maski ijkon, yejuamej nochikauaj tekitiskej, niman pampa xkichiuaj tlen xmelajki nion xkitejtemouaj kichiuaskej tlen xouijtika kiteititiaj ikualneskayouan toTajtsin, ken tikchiuas tlen melajki, melak notlasojkaita xijkon ken itlaj okse (Proverbios 12:24; Efesios 4:28).

Ijkon ken Rut, ipan nochi tlaltikpaktli akin kitekichiuiliaj Jehová kiteititiaj ika kineltokaj yejua kinpaleuis. Tlaneltokaj itech tlen kimijlia Jehová: “Xkeman nimitskauas nion nimitstlalkauis” (Hebreos 13:5). Miyekpa, Jehová yokiteititi ika yejua nochipa kinpaleuiya akin kichiuaj tlen melajki. Nochipa kichiua tlen yokijto ika kinmakas tlen kinpoloua itekipanojkauan (Mateo 6:33).

Kema, tlaltikpakchanejkej melak kitlasojkaitaj diamantes niman okseki tlemach. San ika, kuajli tikmatstokej ika toTajtsin Jehová melak kitlasojkaita matikchiuakan tlen melajki niman matikteititikan okseki kualneskayomej xijkon ken tomin niman okse tlemach tlen patioj.