1, 2. ¿Tleka toTajtsin okitak Daniel ken se tlakatl melak notlasojkaita niman kenon uelis titetlakamatiskej ken Daniel?

IJKUAK judíos okinuikakej Babilonia, yejuamej oajsikej ipan se ueyi kalpan kampa kiueyichiuayaj tajtsitsintin niman onkatka naualyotl. Maski ijkon, judíos yolmelaujkej, ken Daniel niman yeyi iuan akin nouikaya, xokinejkej kichiuaskej ken nochiuaya ompa (Daniel 1:6, 8, 12; 3:16-18). Daniel niman iuan akin nouikaya okiselijkej Jehová ken iTlalchijchiujketl niman san yejua okiueyichiujkej. Maski Daniel melak ouejkauj onen kampa onkatka tlen xkuajli, iiluikaktekitkauj toTajtsin okijto ika yejua se tlakatl melak notlasojkaita (Daniel 10:11, 19).

² Yeuejkaui, se tlalchijchiujketl ika sokitl ueliskia kiyektlalis itlaj ken yejua kinekis. Ipan yejuin tonajli, akin melauak tikueyichiuaj toTajtsin tikmatij ika Jehová yejua toueyi Tekiuaj niman yejua kipiya tlanauatijkayotl ika kinyektlalis kalpamej (xpoua Jeremías 18:6). * Noijki toTajtsin kipiya tlanauatijkayotl ika techyektlalis tinochimej.  San ika, Jehová xakaj kichiualtia manopatla. Yejua kineki ika nochi toyojlo matijkauilikan techyektlalis. Ipan yejuin tlamachtijli, tomachtiskej kenon tochiuaskej ken yemanki sokitl ipan imauan toTajtsin. Tikitaskej yeyi tlajtoltilistin: 1) ¿Kenon uelis tikmapeuaskej tlen uelis kichiuas maka matikselikan itlajtolpaleuilis niman tochiuaskej ken xyemanki sokitl? 2) ¿Kenon uelis tikpiyaskej kualneskayomej tlen techpaleuis nochipa matitetlakamatikan niman tochiuaskej ken yemanki sokitl? 3) ¿Kenon tajtin uelis tekitiskej iuan toTajtsin ijkuak kinyektlaliskej inkoneuan?

3. ¿Tlenon uelis kichiuas maka matiyolyemankej? Xteneua se neskayotl.

³ “Itech nochi tlemach tlen noneki notlajpiyas, xtlajpiya moyojlo, pampa ompa peujtika nemilistli”, kijtoua Proverbios 4:23. Noneki matikmapeuakan tlemach tlen xnoneki, ken toueyimatiskej, tikchiuaskej tlajtlakojli niman xtikpiyaskej totlaneltokil niman ijkon tiyolyemankej yeskej. Tla xtotlajpiyaj, nochi yejon uelis kichiuas maka matitetlakamatikan (Daniel 5:1, 20; Hebreos 3:13, 18, 19). Yejon tlen ipan onochiuj tekiuaj Uzías (xpoua 2 Crónicas 26:4, 16, 19). * Ika ipeujyan, Uzías otetlakamat niman kuajli iuan nouikaya toTajtsin. Ika yejon toTajtsin okimakak chikaualistli. San ika, “nimantsin ijkuak opeuj kipiya ueyilistli, iyojlo onoueyimat”. Sakin okiyejyeko kitlatis tlen ajuiyak ipan teopan tlen teopixkej kichiuayaj yejon tekitl. Ijkuak teopixkej okijlikej ika yokichiujka tlen xkuajli, Uzías melak okualan. Jehová okichiuj manoyolyemani niman okichiuj makipiya lepra hasta ijkuak omik (Proverbios 16:18).

4, 5. ¿Tlenon ueliskia panos tla peua toueyimatij? Xkijto se neskayotl.

⁴ Tla xtikteltiaj ika toueyimatij, uelis peuas tiknemiliskej ika tejuamej melak kuajli tikchiuaj xijkon ken oksekimej niman uelis tikmapeuaskej tlajtolpaleuilistli itech Biblia tlen techmakaskej (Proverbios 29:1; Romanos 12:3). Yejon tlen ipan onochiuj se tlayekanketl itoka Jim. Yejua okualan iuan oksekimej tlayekankej ipan tlanechikojli. Yejua kijtoua: “Onikimijli tokniuan ika xtetlasojtlaj niman onikisteuj itech totlanechikol”. Kanaj chikuasen metstli sakin, yejua onopatlak ipan okse tlanechikojli, san ika, xok okitlalijkej tlayekanketl ompa. Jim kimatstoya ika ken tlanemilijtoya kuajli katka niman melak onajman. Kuakon okikajkauj ika kitekichiuiliaj Jehová ipan majtlaktli xiuitl. Yejua kijtoua ika noueyimatiya niman opeuj kitlajtlakoltia Jehová ipampa tlen panotoya. Ipan majtlaktli xiuitl tokniuan kontlajpalouayaj niman kiyejyekouayaj kipaleuiskej. San ika, yejua xkiseliaya makipaleuikan.

⁵ Jim kijtoua: “San nikitstoya tlen  nesiya xkuajli kichiutoyaj oksekimej”. Tlen ipan onochiuj yejuin tokniuj techititia ika tla se noueyimati uelis kinemilis ika nochi kuajli kichiua. Ijkuak ijkon panoua, xtochiuaskej ken yemanki sokitl (Jeremías 17:9). ¿Itlaj yomitschiuili se tokniuj? ¿Timajmana pampa xok tikpiya se tekitl ipan tlanechikojli? ¿Kenon otimomachili? ¿Otimoueyimat noso otikasikamat ika melak noneki tinemis ika yolseuilistli iuan tokniuan niman xtijkauas Jehová? (Xpoua Salmo 119:165; * Colosenses 3:13).

6. ¿Tlenon uelis panos tla tikchiua tlajtlakojli?

⁶ Ijkuak yakaj xkikaua ika kichiua tlajtlakojli niman kiyana tlen kichiujtika, yejon uelis kichiuas maka mayolyemanki niman maka makiseli itlajtolpaleuilis toTajtsin. Niman xouijtika kichiuas tlajtlakojli. Se tokniuj okijto ika oajsik tonajli ijkuak xok kajmanaya nion achijtsin tlen xkuajli kichiuaya ipan inemilis (Eclesiastés 8:11). Okse tokniuj akin kitaya tlemach tlen kichiua se makileui auilnemis kijtoua ika opeuj xkuajli tlajtoua itech tlayekankej. Yejuin okijtlako ken iuan nouika Jehová. Ijkuak oksekimej okimatkej tlen kichiuaya, yejua okiseli intlapaleuilis tlayekankej. Tinochimej titlajtlakolejkej niman topopolouaj. San ika, tla xkuajli titlajtouaj itech akin kitemakaj tlajtolpaleuilistli noso tikiyanaj ika tikchiujtokej tlajtlakojli niman xtiktlajtlaniliaj toTajtsin matechtlapopolui niman matechpaleui, uelis xok tiyolyemankej yeskej.

7, 8. a) ¿Kenon israelitas okiteititijkej ika xyolyemankej katkaj yejon okichiuj makipolokan intlaneltokil? b) ¿Tlenon techmachtiaj yejuin?

⁷ Ijkuak omakiskej israelitas itech Egipto, yejuamej okitakej miyek niman uejueyimej milagros. Maski ijkon, ijkuak sa achijtsin poliuiya ika ajsiskej ipan Tlajli tlen toTajtsin yokimijlikaj kinmakas, xok yolyemankej katkaj. ¿Tleka? Yejuamej xok kipiayaj intlaneltokil itech toTajtsin. Yejuamej opeujkej nomojtiaj niman okualankej iuan Moisés. Kinekiyaj nokuepaskej Egipto, kampa nemiyaj ken tlakeualtin. Ika yejon, Jehová melak onoyolkoko niman okijto: “¿Kech uejkauis yejuin kalpan ika xnechtlakaitas?” (Números 14:1-4, 11; Salmo 78:40, 41). Yejon israelitas omijkej ipan tlaluaktli pampa xonoyolyemanilijkej niman xokipixkej intlaneltokil.

⁸ Ipan yejuin tonajli, tinemij nisiuj itech yenkuik tlaltikpaktli niman totlaneltokil notlatlata. Ika yejon noneki tikitaskej kenon tikpiyaj totlaneltokil. ¿Kenon uelis tikmatiskej ika tikpiyaj chikauak totlaneltokil? Matikitakan itlajtoluan Jesús tlen uajlauj ipan Mateo 6:33 niman matotlajtoltikan: “¿Nesi ika nitlaneltoka itech itlajtoluan Jesús ika tlen nikneki nikchiuas niman tlen niktlapejpenia nikchiuas? ¿Niknopolouilia tlanechikoltin niman xniauj nontenojnotsa san pampa nikneki niktlanis miyek tomin? ¿Tlenon nikchiuas tla ipan notekiyo noneki uejkaujtipan manitekiti niman melak maninochikaua? ¿Tijkauiliskej matechyektlali ken nochiua ipan yejuin tlaltikpaktli niman hasta tijkajkauaskej tiktekichiuiliskej Jehová?”.

9. ¿Tleka noneki matikitakan kenon tikpiyaj totlaneltokil niman kenon uelis tikchiuaskej yejon?

 ⁹ Tla xtikchiuaj tlen kijtoua Biblia itech akin xkinamiki imiuan matouikakan, itech akin yokiskej itech tlanechikojli noso itech tlen ika toyolpaktiaj, xok tiyolyemankej yeskej. ¿Tlenon uelis tikchiuas tla peua ijkon mopan nochiua? ¡Nimantsin noneki tikitas ken tikpiya motlaneltokil! Biblia kijtoua: “Sa no nemejuamej kuajli xmixtlalokan para nenkitaskej tla nenmelajkanemij ipan nemotlaneltok” (2 Corintios 13:5). Matikitakan kenon yemelak tinemij niman nochipa matiktekitiltikan iTlajtol toTajtsin ika matikyektlalikan ken titlanemiliaj.

10. ¿Tlenon uelis techpaleuis tochiuaskej ken yemanki sokitl ipan imauan Jehová?

¹⁰ ToTajtsin techmaka iTlajtol, tlanechikojli niman tenojnotsalistli ika techpaleuiya matochiuakan ken yemanki sokitl. Ijkuak tikpouaj Biblia niman itech titlanemiliaj mojmostla, yejon techpaleuis matochiuakan tiyemankej ipan imauan Jehová niman tijkauiliskej matechyektlali. Jehová okinnauati tekiuajkej ipan Israel makixkopinakan itlanauatil toTajtsin niman makipouakan mojmostla (Deuteronomio 17:18, 19). Itlatitlankauan Jesús kimatiyaj ika kipouaskej iTlajtol toTajtsin niman tlanemiliskej  itech melak nonekiya ipan itekiyo toTajtsin. Yejuamej kikuiyaj miyekpa seki itech Tlajkuiloltin ika hebreo itech intlajkuiloluan niman ijkuak yejuamej tenojnotsayaj, teyolchikauayaj makitakan iTlajtol toTajtsin (Hechos 17:11). Noijki ijkon, tejuamej tikitaj ika melak noneki tikpouaskej iTlajtol toTajtsin mojmostla niman titlanemiliskej itech (1 Timoteo 4:15). Yejuin techpaleuis nochipa matiyolyemankej niman Jehová uelis techyektlalis.

11, 12. ¿Kenon ueli Jehová kikui tlanechikojli ika techyektlalia ken noneki toseselti? Xteneua se neskayotl.

¹¹ Jehová kimati tlen techpoloua tinochimej niman yejua kikui tlanechikojli ika techyektlalia. Jim, akin otikteneujkej ipeujyan yejuin tlamachtijli, opeuj kipatla ken tlanemilia ijkuak se tlayekanketl okititi ika melak kinekiya kipaleuis. Jim kijtoua: “Nion sejpa xonechtlajtlakolti nion xonechtejteneuj. Kanaj yeyi metstli sakin, yejon tokniuj onechijli maniuiya ipan tlanechikojli”. Jim kijtoua ika ipan tlanechikojli melak kuajli okiselijkej niman intlasojtlalis okipaleui makipatla ken tlanemilia. Yejua opeuj kita ika tlen kimachilia xueyi kijtosneki. Tlayekankej ipan itlanechikol Jim niman isiuauj okiyolchikaujkej niman ika yolik oksejpa opeuj kitekichiuilia Jehová. Jim noijki melak okipaleui tlen okipouj ipan tlamachtiltin “Jehová no tiene la culpa” niman “Sirva a Jehová lealmente” tlen uajlauej ipan Amatl Tekakistilijketl 15 noviembre 1992 (xonka ika náhuatl de Guerrero).

¹² Sakin, Jim oksejpa onochiuj tlayekanketl. Ipan yejon tonajli ika tlayekapan, yokinpaleui oksekimej tokniuan akin noijki ijkon yopanokej niman yokinchikauili intlaneltokil. Yejua kijtoua ika kinemiliaya kuajli nouikaya iuan Jehová, san ika, yejon xmelauak katka. Yejua ok noyolkokoua ika onoueyimat, pampa yejon okichiuj san makita tlen xkuajli kichiuaj oksekimej (1 Corintios 10:12).

13. ¿Tlenon kualneskayomej techpaleuiya matikpiyakan pampa titenojnotsaj niman akinomej kinpaleuiya totenojnotsalis?

¹³ Tenojnotsalistli noijki uelis techyektlalis niman techpaleuis matochiuakan ken noneki. ¿Kenon? Ijkuak titenojnotsaj, noneki matikteititikan kualneskayomej ken yolyemanilistli niman okseki kualneskayomej itech iespíritu santo toTajtsin (Gálatas 5:22, 23). Matitlanemilikan itech kualneskayomej tlen tenojnotsalistli yotechpaleui matikinpiyakan. Ijkuak tikchiuaj ken Cristo, tlaltikpakchanejkej melak kuelitaskej tlen titenojnotsaj niman kipatlaskej ken tlanemiliaj totechkopa. Se neskayotl, omemej tokniuan ipan Australia, kinojnotsaya se siuatl ipan ichan. Yejuin siuatl opeuj kualani niman xkuajli okinseli. San ika, tokniuan kikakiyaj ika tlakaitalistli. Sakin, yejon siuatl onoyolkuep itech ken okichiuj niman oontlajkuilo ipan sucursal. Yejua okijto: “Nejua xnitlamachilise katka ika ninemiya imixpan omemej akin tenojnotsayaj iTlajtol toTajtsin niman xkuajli onikinseli”. Yejuin techmachtia ika melak noneki matikteititikan tlasojtlalistli ijkuak titenojnotsaj. Ken tikitaj, totenojnotsalis kinpaleuiya oksekimej.  San ika, noijki techpaleuiya matoyektlalikan kenon tejuamej.

14. ¿Tlenon noneki tajtin kichiuaskej tla kinekij kuajli kinyektlaliskej inkoneuan?

¹⁴ Uelis tikijtoskej kanaj nochimej kokonej yolyemankej niman melak kuelitaj nomachtiskej (Mateo 18:1-4). Ika yejon melak kuajli ika tajtin makinpaleuikan inkoneuan manomachtikan tlen melauak niman makitlasojtlakan ijkuak ok pitentsitsintin (2 Timoteo 3:14, 15). Tla tajtin kinekij kuajli onkisaskej, noneki kitlasojtlaskej yejuamej tlen melauak niman kichiuaskej tlen kijtoua Biblia ipan innemilis. Ijkuak tajtin kichiuaj yejuin, inkoneuan xouijtika kitaskej kitlasojtlaskej tlen melauak. Niman noijki, kokonej kasikamatiskej ika ijkuak intajuan kinyektlaliaj, kichiuaj pampa kintlasojtlaj niman Jehová kintlasojtla.

15, 16. ¿Kenon noneki tajtin kiteititiskej ika tlaneltokaj itech toTajtsin tla inkoneuan kisaj itech tlanechikojli?

¹⁵ San ika, maski ijkuak tajtin kinmachtiaj inkoneuan tlen melauak, sekimej tekoneuan kikauaj Jehová noso kisaj itech tlanechikojli. Tla panoua yejon, inchanejkauan melak tlajyouiyaj. Se tokniuj siuatl chanej Sudáfrica okijto: “Ijkuak nokniuj okis itech tlanechikojli, yeskia kentla omik. ¡Melak teyolkoko!”. San ika ¿tlenon okichiuj yejua niman itajuan? Yejuamej okichiujkej tlen tlanauatia Biblia (xpoua 1 Corintios 5:11, 13). Yejon tajtin kimatiyaj ika tla kitlakamatij itlanauatiluan toTajtsin kinpaleuiskia nochimej. Noijki yejuamej kasikamatiyaj ika ijkuak se kisa itech tlanechikojli ijkon kiyektlalia Jehová ika tlasojtlalistli. Ika yejon, san kinotsayaj inkoneuj ijkuak yemelak nonekiya iuan tlajtoskej itech intekiyo.

¹⁶ ¿Kenon onomachili yejon tekoneuj? Sakin yejua okijto: “Nejua nikmatiya ika nochanejkauan xnechtlauelitayaj. San ika, kitlakamatstoyaj Jehová niman ikalpan”. Noijki okijto: “Ijkuak yemelak tiktlajtlanilis Jehová itlapaleuilis niman tikijlis mamitstlapopolui, tikitas ika yemelak mitspoloua toTajtsin”. ¡Xnemili kenon melak yolpakij ichanejkauan yejuin telpochtli ika oksejpa onokuep itech Jehová! Kema, melak tiyolpakiskej niman melak kuajli tonkisaskej ijkuak tiktlakamatiskej nochipa toTajtsin (Proverbios 3:5, 6; 28:26).

17. ¿Tleka noneki tikchiuaskej tlen kineki Jehová ipan tonemilis niman kenon techpaleuis yejon?

¹⁷ Teotlajtoketl Isaías okijto ika judíos akin nemiyaj ipan Babilonia noyolkuepaskiaj niman kijtoskiaj: “Jehová, tejua titoTajtsin. Tejuamej tisokimej, niman tejua titoTlalchijchiujketl; tinochimej tejuamej texchijchiuaj momauan”. Niman noijki kijtoskiaj: “Maka nochipa xkilnamiki totlajtlakol. Timitstlajtlaniliaj, xtechita, tinochimej tejuamej mokalpan” (Isaías 64:8, 9). Nochipa matiyolyemankej niman matiktlakamatikan Jehová. Nochipa matikchiuakan tlen yejua kineki niman yejua techtlasojkaitas, ijkon ken Daniel. Jehová nochipa techyektlalijtias ika Biblia, espíritu santo niman ikalpan. Ijkon, ika tlayekapan uelis tochiuaskej “ikoneuan Dios” (Romanos 8:21).