1. ¿Tleka Jehová yejua toueyi Tlalchijchiujketl?

IPAN noviembre itech xiuitl 2010, se kontsintli tlachijchiujtli ika sokitl tlen yeuejkaui okichijchiujkej China okijtokej ika nonemaka kanaj 70 millones ika dólares ipan Londres. Yejon techmokatlachialtia kenon se tlalchijchiujketl ueli kiyektlalia ika sokitl itlaj melak kualtsin ken se kontsintli. Jehová ijkon ken yejon tlalchijchiujketl, san ika, yejua melak ueyi Tlalchijchiujketl xijkon ken se tlakatl akin tekiti ika sokitl. Biblia kijtoua ika Jehová okichijchiuj se tlakatl xtlajtlakole “ika tlalpoktli” noso sokitl (Génesis 2:7). Yejuin tlakatl ikoneuj katka toTajtsin niman yejua okichijchiujkej maueli makixkopina ikualneskayouan toTajtsin (Lucas 3:38).

2, 3. ¿Kenon uelis tikpiyaskej totlanemilil ijkon ken israelitas akin onoyolkuepkej?

² Pampa Adán xok okitlakamat toTajtsin, xok yeskia ikoneuj. San ika, miyekej ikoneuan Adán okitlapejpenijkej Jehová makinyekana (Hebreos 12:1). Ijkuak ika yolyemanilistli kitlakamatij akin okinchijchiuj, kiteititiaj ika kinekij  yejua manochiua inTajtsin niman inTlalchijchiujketl, niman maka Satanás (Juan 8:44). Pampa yejuamej nemij itech toTajtsin techilnamiktia tlen okijtokej israelitas akin onoyolkuepkej: “Jehová, tejua titoTajtsin. Tejuamej tisokimej, niman tejua titoTlalchijchiujketl; tinochimej tejuamej texchijchiuaj momauan” (Isaías 64:8).

³ Ipan yejuin tonajli, akin yemelak kiueyichiuaj toTajtsin noijki nochikauaj yeskej yolyemankej niman tetlakamatkej. Yejuamej kitaj se tlateochiualistli kitokayotiskej Jehová inTajtsin niman kinekij yejua manochiua inTlalchijchiujketl. ¿Tiknekij tejuamej tochiuaskej ken yemanki sokitl tlen toTajtsin uelis kiyektlalis itlaj kualtsin ken se kontsintli? ¿Tikimitaj nochimej tokniuan ken itlaj tlen ok noyektlalijtika, ika ok kiyektlalijtika toTajtsin? Matikitakan kenon Jehová kintlapejpenia akin kinyektlalia, tleka kinyektlalia niman kenon kichiua. Yejuin techpaleuis matitlanemilikan ken kinamiki.

4. ¿Kenon kintlapejpenia Jehová akin manonisiuikan itech? Xkijto seki neskayomej.

⁴ Jehová xkimita tlaltikpakchanejkej ken tejuamej tikimitaj. Yejua kita tlen tikpiyaj ipan toyojlo niman kenon yemelak tejuamej (xpoua 1 Samuel 16:7b). * Yejua okiteititi yejuin ijkuak okitlali tlanechikojli ipan kachtopa siglo. Yejua okichiuj ika miyekej tlaltikpakchanejkej manonisiuikan itech niman itech iKoneuj akin nesiyaj ika xtlasojtij (Juan 6:44). Se yejon tlaltikpakchane katka se fariseo itoka Saulo, akin teuijuikaltiaya, tetlaueltokaya niman tepijpinaujtiaya (1 Timoteo 1:13). San ika, Jehová okitak iyojlo Saulo niman xokitak ika yejua ken sokitl tlen xtlaj ika tepaleui (Proverbios 17:3). Jehová okitak Saulo ika ueliskia kiyektlalis kentla se vaso niman ijkon makinnojnotsa nochimej tlaltikpakchanejkej (Hechos 9:15). Jehová noijki okintlapejpeni oksekimej akin ueliskia kinyektlalis manochiuakan ken itlaj tlen melak tepaleui. Okinyektlali hasta akin tlauaniyaj, auilnemiyaj niman akin tlachtekiyaj (Romanos 9:21; 1 Corintios 6:9-11). Pampa yejuamej onomachtijkej iTlajtol toTajtsin, okichikaujkej intlaneltokil niman okikauilijkej makinyektlali.

5, 6. Tla tikmatstokej ika Jehová toTlalchijchiujketl, ¿kenon noneki tikimitaskej tlaltikpakchanejkej kampa titenojnotsaj niman tokniuan ipan tlanechikojli?

⁵ Tikneltokaj ika Jehová kuajli kintlapejpenia tlaltikpakchanejkej akin kinamiki manonisiuikan itech. Ika yejon tejuamej xtechmelaua matikijtokan tlen melajki ipampa oksekimej kampa titenojnotsaj noso ipan tlanechikojli. Matikitakan se neskayotl, se tlakatl itoka Michael ijkuak iteixpantijkauan Jehová okitlajpalotoj, kijtoua: “Nejua niktsakuaya puerta niman nikchiuaya kentla xnikimitaya. Xnikteititiaya tlakaitalistli. Sakin onikixmat se familia niman onikuelitak kenon kichiuaya. Sakin onikmat ika yejuamej katkaj iteixpantijkauan Jehová. Niman melak onitlamojkaitak. Ken yejuamej kichiuayaj okichiuj maninotlajtolti tleka xkuajli ken nikimitaya. Kuakon ken nitlanemiliaya katka pampa xtlaj nikmatiya niman san itech tlen yoniktekakilijka”.  Michael okinek kimatis okseki itech iteixpantijkauan Jehová niman okinek makimachtikan itech Biblia. Sakin onoapolakti niman opeuj chikauak kitekichiuilia Jehová.

⁶ Tla tikmatstokej ika Jehová toTlalchijchiujketl, tikimitaskej tokniuan ken kinamiki. Tikimitaskej ken itlaj tlen ok noyektlalijtika. Jehová ijkon kimita. Yejua kimita ika kenon yejuamej niman kimati ika xnochipa tlajtlakolejkej yeskej. Noijki, yejua kimita kenon yeskej yejuamej (Salmo 130:3). Tejuamej uelis titlanemiliskej ken Jehová tlanemilia itech tokniuan. Hasta uelis titekitiskej iuan toTajtsin niman tikinpaleuiskej tokniuan ok manopatlatiakan (1 Tesalonicenses 5:14, 15). Itech yejuin, tlayekankej ipan tlanechikojli noneki kitlaliskej se kuajli neskayotl (Efesios 4:8, 11-13).

7. ¿Tleka noneki tiktlasojkaitaskej ika Jehová techmelajkatlalia?

⁷ Sekimej kijtouaj ika xkeman okitlasojkaitakej ijkuak okinmelajkatlalijkej intajuan. Opeuj kitlasojkaitaj hasta ijkuak okinpixkej inkoneuan. Ijkuak itiuejueyimej opeuj tiktlasojkaitaj ika otechyektlalijkej pampa aman tikasikamatij ika yejon kijtosneki tlasojtlalistli (xpoua Hebreos 12:5, 6, 11). Kema, Jehová techtlasojtla ken ikoneuan. Ika yejon yejua techmelajkatlalia noso techyektlalia. Yejua kineki matochiuakan titlamachilisejkej, matiyolpakikan niman matiktlasojtlakan (Proverbios 23:15). ToTajtsin xkineki matitlajyouikan niman noijki xkineki ika tejuamej matimikikan ken akin tlajtlakolejkej tlen xnoyolkuepaj (Efesios 2:2, 3).

8, 9. a) ¿Kenon Jehová techmachtijtika ipan yejuin tonajli? b) ¿Kenon yejuin tlamachtijli ok onias ipan yenkuik tlaltikpaktli?

⁸ Ijkuak xitikixmatiyaj Jehová, kanaj tikchiuayaj ipan tonemilis tlen xkuelita. San ika, Jehová otechyektlali niman otechpaleui matopatlakan. Niman aman tikpiyaj kualtsitsintin kualneskayomej (Isaías 11:6-8; Colosenses 3:9, 10). Aman tinemij ipan ikalpan toTajtsin kampa onka yolseuilistli, kampa techyektlalijtika Jehová. Ompa melak kuajli tomachiliaj maski toyeualiyan onka tlen xkuajli ipan yejuin tlaltikpaktli. Sekimej akin xokipixkej tlasojtlalistli ijkuak onoskaltijkej aman kimachiliaj ika kipiyaj tlasojtlalistli itech tokniuan (Juan 13:35). Tejuamej yotomachtijkej matikintlasojtlakan oksekimej. San ika, tlen melak ueyi kijtosneki ika tejuamej yotikixmatkej Jehová niman tikmachiliaj iueyitlasojtlalis (Santiago 4:8).

⁹ Ipan yenkuik tlaltikpaktli, ok melak kuajli yes tinemiskej ipan ikalpan toTajtsin kampa onka yolseuilistli. Noijki tiyolpakiskej tinemiskej kampa yemelak yes xochitlalpan ijkuak tlayekanas iTekiuajyo toTajtsin. Ipan yejon tonajli Jehová ok techyektlalijtias niman ok techmachtijtias melak kualtsin tlen aman nion xueli tiknemiliaj kenon yes (Isaías 11:9). Jehová noijki kichiuas ika matikpiyakan totlanemilil niman totlalnakayo tlen xok kipiyas tlajtlakojli. Kuakon xouijtika tomachtiskej itech yejua niman uelis tiktlakamatiskej nochi itlanauatiluan. Ika yejon matijkauilikan ika ok matechyektlalijto aman. Matikititikan ika tiktlasojkamatij ken techititia itlasojtlalis (Proverbios 3:11, 12).

10. ¿Kenon okiteititi Jesús ika teijyouiya niman kuajli tepaleuiya ijkon ken Ueyi Tlalchijchiujketl?

¹⁰ Ken se tlalchijchiujketl, Jehová kuajli techixmati. Yejua kimati tlen xueli tikchiuaj niman tlen youel yotikchiujkej. Ijkuak techyektlalia yejua kilnamiki nochi yejon tlen kimati totechkopa (xpoua Salmo 103:13, 14). * Uelis tomachtiskej kenon Jehová techita tla tikitaj kenon Jesús okichiuj ijkuak itlatitlankauan xueliyaj kichiuayaj tlen kinamiki. Kemantika, itlatitlankauan nokualaniayaj pampa kinekiyaj kimatiskej akinon melak ueyi itech yejuamej. Tla tejua ompa tinemiskia, ¿kenon tikimitaskia itlatitlankauan Jesús? Kanaj tiknemiliskia ika yejuamej xijkon ken yemanki sokitl. San ika, Jesús kimatiya ika yejuamej ueliskia noyektlaliskej tla kikakij itlajtolpaleuilis ika tlasojtlalistli niman tla nochiuaskiaj yolyemankej ken yejua (Marcos 9:33-37; 10:37, 41-45; Lucas 22:24-27). Sakin ijkuak Jesús yomijka, itlatitlankauan okiselijkej iespíritu santo toTajtsin niman xok san kinemiliayaj akinon ueyi itech yejuamej. Yejuamej aman san tlanemiliayaj kenon kichiuaskej tekitl tlen Jesús okinmakak (Hechos 5:42).

11. ¿Kenon okiteititi David ika katka ken yemanki sokitl niman kenon tejuamej tikchiuaskej ken yejua?

¹¹ Ipan yejuin tonajli, Jehová kikui Biblia, iespíritu santo niman tlanechikojli tlen ika techyektlalia. ¿Kenon uelis techyektlalis Biblia? Noneki tikpouaskej, titlanemiliskej itech tlen tikpouaj niman tiktlajtlaniliskej matechpaleui Jehová matikchiuakan tlen yotomachtijkej. Tekiuaj David okijkuilo: “Nejua nimitsilnamiki ipan notlapech; nitlanemilia motechkopa ijkuak peua tlayoua hasta ijkuak tlanesi” (Salmo 63:6). Noijki okijkuilo: “Nikueyichiuas Jehová, akin nechmaka tlajtolpaleuilistli. Hasta ipan yeuajli, notlanemiluan tlen iyantokej nechyektlalia” (Salmo 16:7). Kema, David otlanemili itech itlajtolpaleuilis Jehová niman okikauili itlajtolpaleuilis makiyektlali itlanemilil niman tlen kimachilia maski ijkuak kitaya ouijtika kichiuas (2 Samuel 12:1-13). David otechmakak kuajli neskayotl itech yolyemanilistli niman ika otetlakamat. Ika yejon matotlajtoltikan: “¿Nitlanemilia itech tlen nikpoua ipan Biblia niman nikakuilia itlajtolpaleuilis toTajtsin maajsi ipan noyojlo niman itech notlanemililuan? ¿Uelis nikchiuas itlaj okse melak kuajli?” (Salmo 1:2, 3).

12, 13. ¿Kenon techyektlalia Jehová ika iespíritu santo niman ika tlayekankej ipan tlanechikojli?

¹² Espíritu santo uelis tlatlamantik noso sesejneka ken techyektlalis. Se neskayotl, uelis techpaleuis matikchiuakan ken Jesús okichiuj niman tikteititiskej miyek kualneskayomej itech espíritu santo (Gálatas 5:22, 23). Tlasojtlalistli se kualneskayotl tlen kisa itech espíritu santo. Tejuamej tiktlasojtlaj toTajtsin niman tiknekij tiktlakamatiskej niman matechyektlali pampa tikmatij ika itlanauatiluan techpaleuiya. Noijki espíritu santo techmaka chikaualistli maka matoyekanakan ken tlanemiliaj tlaltikpakchanejkej (Efesios 2:2). Ijkuak Pablo, itlatitlankauj Cristo, telpochtli katka,  tlanemiliaya ken judíos tlayekankej ipan tlaneltokiltin akin noueyimatij. San ika, espíritu santo okipaleui manopatla. Sakin yejua okijkuilo: “On ueyi poder yejuan topan onkaj xtotech kistikaj, yej ualejtikaj itech Dios” (2 Corintios 4:7). Tejuamej noijki noneki tiktlajtlaniliskej iespíritu santo toTajtsin niman yejua techkakis (Salmo 10:17).

¹³ Jehová noijki kikui tlanechikojli niman tlayekankej ika techyektlalia. Se neskayotl, tla tlayekankej kitaj ika noneki tikpatlaskej itlaj ipan tonemilis, kiyejyekoskej techpaleuiskej. San ika, xtechtlajtolpaleuiskej san itech tlen yejuamej kinemiliaj (Gálatas 6:1). Yejuamej ika yolyemanilistli kitlajtlaniliaj Jehová asikamatilistli niman tlamachilistli. Kuakon, yejuamej nomachtiaj tlen kijtoua Biblia niman toamatlajkuiloluan niman ijkon kinextiskej tlen techpaleuis. Tla tlayekankej mitsnotsaj niman mitsmakaj tlajtolpaleuilistli ika tlasojtlalistli, kanaj itech ken noneki timotlakentis, xkilnamiki ika ijkon mitsititia toTajtsin ika mitstlasojtla. Tla tejua tikchiua yejon tlajtolpaleuilistli, timochiuas ken yemanki sokitl tlen Jehová uelis kiyektlalis niman tejua kuajli tonkisas.

14. ¿Kenon kiteititia Jehová ika techkauilia matiktlapejpenikan tlen tikchiuaskej maski yejua kipiya tlanauatijkayotl itech sokitl?

¹⁴ Tla tikasikamatij kenon Jehová techyektlalia, uelis techpaleuis kuajli matouikakan iuan tokniuan. Noijki titlanemiliskej ken kinamiki itech tlaltikpakchanejkej kampa titenojnotsaj niman itech akin tikinmachtiaj itech Biblia. Yeuejkaui, se akin tekitiya ika sokitl, kachtopa kichipauaya, kikixtiliaya tetl niman okseki tlemach. Jehová, Ueyi Tlalchijchiujketl, kinpaleuiya akin kinekij makinyektlali. Yejua xkinchiualtia manoyektlalikan, yejua kimititia itlanauatiluan. Kuakon yejuamej noneki kinemiliskej tla kipatlaskej tlen noneki.

15, 16. ¿Kenon akin nomachtiaj itech Biblia kiteititiaj ika kinekij Jehová makinyektlali? Xkijto se neskayotl.

 ¹⁵ Matikitakan tlen ipan onochiuj Tessie, se tokniuj siuatl chanej Australia. Xouijtika kitaya nomachtis itech Biblia. San ika, xkipatlaya inemilis niman xiaya ipan tlanechikoltin. Tokniuj akin kinmachtiaya yokichiuilijka teoyotl Jehová niman yokinemilijka xok kimachtis. Kuakon, ijkuak oksejpa onomachtijkej, Tessie okitomili tokniuj tleka xnopatlaya. Yejua okijli ika nomachilia kentla kipiyaskia ome ixayak pampa melak kuelitaya nauiltis ika tomin. San ika, aman yejua yokinemilijka kikajkauas nauiltis ika tomin.

¹⁶ Xuejkaujtipan, Tessie opeuj yauj ipan tlanechikoltin niman opeuj kiteititia kualneskayomej maski kipijpinaujtiayaj akin iuan nouikaya yeuejkaui. Sakin onoapolakti niman onochiuj precursora regular maski kinpiaya ikoneuan pitentsitsintin. Kuajli nesi ika ijkuak akin nomachtiaj itech Biblia peuaj kipatlaj itlaj ipan innemilis ika kiyolpaktiskej toTajtsin, yejua nonisiuis intech niman kinyektlalis manochiuakan itlaj tlen melak tepaleui.

17. a) ¿Tleka tikneki ika Jehová yejua manochiua moTlalchijchiujketl? b) ¿Tlenon tomachtiskej ipan okse tlamachtijli?

¹⁷ Ipan yejuin tonajli, sekimej akin tekitij ika sokitl ok kichijchiua seki tlemach ika inmauan. Noijki ijkon, Jehová techyektlalia ika itlajtolpaleuilis niman sakin kuajli kita tlenon tikchiuaj (xpoua Salmo 32:8). * ¿Ueli tikita kenon Jehová melak najmana mopampa? ¿Tikita kenon Jehová kineki kuajli mitsyektlalis? ¿Tlenon kualneskayomej uelis mitspaleuis timochiuas ken yemanki sokitl niman ijkon Jehová uelis mitsyektlalis? ¿Kenon xkipiya ika tochiuaskej tla xtiknekij tiyeskej ken sokitl tlen xueli noyektlalia? ¿Niman kenon uelis tajtin tekitiskej iuan Jehová niman ijkon kinyektlaliskej inkoneuan? Ipan okse tlamachtijli nonankiliskej yejon tlajtoltilistin.