Yejuamej kixneskayotiaj akin kipiyaj kojtilistli niman nemij ipan iluikak akin otlapaleuijkej ijkuak opopoliuj Jerusalén niman noijki tlapaleuiskej ijkuak popoliuis tlen kiyekana Satanás ipan Armagedón. Yejuin kipatla ken tikasikamatiyaj kachtopa. ¿Tleka noneki manopatla?

Ijkuak xiajsiya xiuitl 607 i.x.x. 1, Jehová okichiuj ika Ezequiel makita se tlatlachalistli tlen ipan nochiuaskia Jerusalén ijkuak xikipopolouayaj. Ipan tlatlachalistli, Ezequiel okitak miyek tlen xkuajli nochiuaya ompa. Kuakon yejua okitak chikuasen tlakamej tlen kipiayaj ipan inmauan se arma tlen ika temiktiaj. Noijki ompa nemiya imiuan se tlakatl akin kipiya itlaken tlachijchiujtli ika lino niman kipiya tlen kitekitiltia se tlajkuilojketl (Ezequiel 8:6-12; 9:2, 3). Yejuin tlakatl okijlikej mauiya ipan ueyikalpan niman makimixkuaneskayoti tlakamej akin noyolkokouayaj ipampa nochi tlen xkuajli tlen nochiujtoya ipan yejon ueyikalpan. Kuakon, chikuasen tlakamej ika armas tlen kipiayaj okimijlikej makinmiktikan nochimej ipan ueyikalpan akin xokimixkuaneskayotijkej (Ezequiel 9:4-7). ¿Tlenon tomachtiaj itech yejuin tlatlachalistli? ¿Niman akinon yejon tlakatl akin kipiya tlen kitekitiltia se tlajkuilojketl?

Ezequiel okitak yejuin tlatlachalistli ipan xiuitl 612 i.x.x. 1. Yejon teotlajtojli onochiuj kachtopa ijkuak Jehová okinkauili isoldados Babilonia makipopolokan Jerusalén, makuijli xiuitl sakin ika yonoijtoka. Ijkon, Jehová okitekitilti babilonios makinchiuilikan tlen kinamiki akin xtetlakamatij (Jeremías 25:9, 15-18). San ika ¿tlenon inpan onochiuj judíos yolmelaujkej akin xkichiuayaj tlen xkuajli tlen nochiujtoya ipan ueyikalpan? Jehová okichiuj ika mamakisakan.

Ipan tlatlachalistli, Ezequiel xyemelak okimixkuaneskayoti nion xteuan okipopolo ueyikalpan. Iluikaktekitkej yejuamej akin okipopolojkej  ueyikalpan Jerusalén. Ika yejon, yejuin teotlajtojli techpaleuiya matikitakan tlenon nochiua iluikak. Jehová kimijlia iiluikaktekitkauan makitakan kenon manopopolo tlen xkuajli niman makinmakixtikan akin yolmelaujkej. *

Yejuin teotlajtojli noijki nochiuas ika tlayekapan. Tikijtouayaj ika yejon tlakatl akin kipiya tlen kitekitiltia se tlajkuilojketl kixneskayotiaya tlapejpeniltin akin ok yoltokej ipan tlaltikpaktli. Noijki tikijtouayaj ika tlaltikpakchanejkej kimixkuaneskayotiaj niman ijkon makisaskej ijkuak kikakiyaj niman kiseliayaj kuajli tlajtoltin tlen notenojnotsa. San ika, san kemach, kuajli yotikasikamatkej ika yejon noneki manopatla ken tikasikamatij yejuin teotlajtojli. Yotomachtijkej itech Mateo 25:31-33 ika Jesús yejua akin kinyolkuitia tlaltikpakchanejkej. Yejuin kichiuas tlayekapan ipan ueyi tlajyouilistli. Ipan yejon tonaltin, akin Jesús kijtos ika borreguitos makisaskej niman akin kijtos ika cabras popoliuiskej.

Kuakon, ¿tlenon techmachtia tlatlachalistli tlen okitak Ezequiel? Nikan onka makuijli tlamachtiltin:

1. Ijkuak xikipopolouayaj Jerusalén, Ezequiel, ijkon ken Jeremías niman Isaías, okimijli tlaltikpakchanejkej tlen ipan nochiuaskia ueyikalpan. Yejuamej katkaj ken tlakamej akin kitekakistiliaj tlajtojli. Ipan yejuin tonajli, Jehová kintekitiltia san achijtsitsintin tlapejpeniltin makinmachtikan itekipanojkauan niman makimijlikan oksekimej tlenon nochiuas ika tlayekapan aman ika xipeua ueyi tlajyouilistli. Kema yemelak, nochimej itekipanojkauan toTajtsin, akin Cristo kinmaka tlamachtijli, kichiuaj yejuin tekitl ijkuak kiteijliaj tlenon panos ika tlayekapan (Mateo 24:45-47).

2. Ijkon ken Ezequiel, itekipanojkauan Jehová ipan yejuin tonajli xyemelak kimixkuaneskayotiskej akin makisaskej. Yejuamej san kinnojnotsaj oksekimej niman kimijliaj tlenon panos ika tlayekapan. Yejuin tenojnotsalistli tlen nochiujtika ipan nochi tlaltikpaktli nochiua ika intlapaleuilis iluikaktekitkej (Apocalipsis [Revelación] 14:6).

3. Ijkon ken akin omakiskej ipan itonaluan Ezequiel xyemelak okimixkuaneskayotijkej, akin makisaskej ika tlayekapan noijki xyemelak kimixkuaneskayotiskej. ¿Tlenon noneki kichiuaskej tlaltikpakchanejkej niman ijkon makisaskej ipan ueyi tlajyouilistli? Ijkuak yejuamej kikakij tlenon panos ika tlayekapan, noneki nomachtiskej kichiuaskej ken Cristo, nosentemakaskej itech toTajtsin niman kinpaleuiskej ikniuan Cristo ipan tenojnotsalistli (Mateo 25:35-40). Kuakon, ipan ueyi tlajyouilistli, akin kentla kimixkuaneskayotiskej, kintlapejpeniskej mamakisakan.

4. Tlakatl akin kipiya tlen kitekitiltia se tlajkuilojketl kixneskayotia Jesús. Ipan ueyi tlajyouilistli, Jesús kintlapejpenis miyekej tlaltikpakchanejkej ijkuak kijtos ika yejuamej ken borreguitos. Kuakon yejuamej uelis nemiskej nochipa nikan ipan tlaltikpaktli (Mateo 25:34, 46). *

5. Yejuin chikuasen tlakamej ika armas tlen ika temiktiaj kixneskayotia akin tlaixnamikij ipan iluikak niman kinyekanas Jesús. Xok uejkaui poliui yejuamej kinpopoloskej tlaltikpakchanejkej niman nochi tlen xkuajli (Ezequiel 10:2, 6, 7; Apocalipsis 19:11-21).

Yejuin tlatlachalistli techmachtia matitlaneltokakan itech Jehová ika yejua xkinpopolos akin kichiuaj tlen kuajli imiuan akin xkuakualtin (2 Pedro 2:9; 3:9). Yejuin noijki techilnamiktia ika ipan yejuin tonaltin melak noneki matitenojnotsakan. ¡Tinochimej noneki tijkakiskej tlen techijliaj aman ika xiyejko tlapopolouilistli! (Mateo 24:14, TNM).