1, 2. a) ¿Tlenon okijto Jehová panoskia ipan yejuin tonajli? b) ¿Katlejua tlajtoltilistin tikinnankiliskej ipan yejuin tlamachtijli? (Xkita tlaixkopinajli kampa peua tlen tomachtijtokej)

JEHOVÁ okijto tlen panoskia ipan yejuin tonajli: “Majtlaktli tlakamej itech nochi tlajtoltin tlen onka ipan países kajsiskej, kema, kajsiskej itlaken se judío, kijtojtoskej: ‘Tiknekij nemouan tiaskej, pampa yotiktekakilijkej ika toTajtsin nemouan nemiʼ” (Zacarías 8:23). Judío kijtosneki akin toTajtsin yokintlapejpeni ika iespíritu santo. Yejuamej noijki notokayotiaj ken ikoneuan toTajtsin (Gálatas 6:16). Majtlaktli tlakamej kijtosneki akin kichiaj nemiskej nochipa ipan tlaltikpaktli. Yejuamej kimatij ika Jehová okinteochiuj yejuin grupo akin yokintlapejpeni niman kitaj melak kualtsin kiueyichiuaskej toTajtsin iuan yejuamej.

² Ijkon ken teotlajtoketl Zacarías, Jesús okijto ika akin kitekichiuiliaj toTajtsin san sekan nemiskiaj. Yejuamej okintokayoti ken “xnenmiyekej” akin kichiaj yaskej iluikak. Niman akin kichiaj nemiskej ipan tlaltikpaktli okintokayoti ken “oksekimej borregos”. San ika, Jesús okijto ika yejuin ome grupo “san sekan nemiskej” niman kipiyaskej “san se tlapixki” (Lucas 12:32; Juan 10:16). Pampa nemi ome grupo, kanaj totlajtoltiaj yejuin: ¿Noneki makimatikan “oksekimej borregos” intoka nochimej akin yokintlapejpenijkej ipan yejuin tonajli? ¿Kenon noneki nomachiliskej akin yokintlapejpenijkej?  ¿Kenon tikitaskej tla yakaj ipan totlanechikol peua kikua pan niman koni vino ijkuak noilnamiki imikilis Cristo? ¿Noneki tajmanaskej tla miyekixtiuej akin toTajtsin yokintlapejpeni? Ipan yejuin tlamachtijli tikinnankiliskej yejuin tlajtoltilistin.

3. ¿Tleka xuelis tikmatiskej intoka nochimej akin teuan nopouaj itech 144,000?

³ ¿Noneki matikmatikan intoka nochimej akin yokintlapejpenijkej ipan yejuin tonajli? Ka. ¿Tleka? Pampa xuelis kuajli tikmatiskej tla nochimej yaskej ipan iluikak ^[1] (xkita nota kampa ontlami). Maski toTajtsin yokinnots noso yokintlapejpeni mauiyan ipan iluikak, yejuamej kiseliskej intlaxtlauil san tla yolmelaujkanemij itech. Satanás kimatstika yejuin, niman yejua kinkui “tlakajkayajkej yejuan noteneuaskej [...] tiotlajtojkej” niman ijkon kinkajkayauas (Mateo 24:24). Akin yokintlapejpenijkej uelis kuajli kimatiskej ika yaskej iluikak hasta ijkuak Jehová kimijlis ika oyolmelaujkanenkej itech. Jehová kichiuas makimatikan yejuin ijkuak san achijtsin poliui ika mikiskej noso ijkuak achijtsin poliui ika peuas “[ueyi] tlajyouilistli” (Apocalipsis [Revelación] 2:10; 7:3, 14).

4. Tla xuelis tikmatiskej intoka nochimej akin yokintlapejpenijkej ipan yejuin tonajli, ¿kenon uelis kijtojtoskej “tiaskej nemouan”?

⁴ Tla xuelis tikmatiskej intoka akin yokintlapejpenijkej akin ok nemij ipan tlaltikpaktli, ¿kenon uelis akin tikchiaj tinemiskej ipan tlaltikpaktli tikijtoskej “tiaskej nemouan”? Biblia kijtoua ika “majtlaktli tlakamej” kajsiskiaj itlaken se “judío” niman kijtojtoskej: “Tiknekij nemouan tiaskej, pampa yotiktekakilijkej ika toTajtsin nemouan nemi”. Biblia kiteneua se “judío”. San ika, sakin kijtoua “nemouan”. Kuakon judío xkijtosneki san se tlaltikpakchane, kineskayotia grupo ika tlapejpeniltin. Akin kichiaj nemiskej ipan tlaltikpaktli kimatij yejuin, niman yejuamej kitekichiuiliaj Jehová iuan yejuin grupo akin yokintlapejpenijkej. Yejuamej xnoneki makimatikan intoka nochimej akin nemij ipan yejon grupo niman ijkon kintokaskej. Jesús yejua intlayekankauj niman Biblia kijtoua ika san yejua noneki makitokakan (Mateo 23:10).

5. ¿Katlejua tlajtolyekanalistli noneki itech matlanemilikan akin yokintlapejpenijkej niman tleka?

⁵ Akin yokintlapejpenijkej melak noneki matlanemilikan itech tlen kijtoua 1 Corintios 11:27-29 (xpoua). ¿Kenon ueliskia se akin yokitlapejpenijkej “xkitlakaitas” tla kikua pan niman koni vino ijkuak noilnamiki imikilis Cristo? Tla yejua xkuajli iuan nouika Jehová niman xyolmelaujkanemi itech, kuakon ijkuak yejua kikuas pan niman konis vino kiteititis ika xtetlakaita (Hebreos 6:4-6; 10:26-29). Yejuin tlajtoltin melak ueyi kijtosneki tlen kimilnamiktia akin yokintlapejpenijkej ika noneki yolmelaujkanemiskej itech toTajtsin tla kinekij kiseliskej intlaxtlauil “ne iluikak” kampa tlanauatiskej “san sekan iuan Cristo Jesús” (Filipenses 3:13-16).

6. ¿Kenon noneki nomachiliskej akin yokintlapejpenijkej?

⁶ Pablo, itlatitlankauj Cristo, okimijli akin yokintlapejpenijkej: “Nemechtlajtlanilia ika xmouikakan ken kitokaroua nenkichiuaskej para kuajli iuan nemokauaskej ijkon ken Dios omechnots”. ¿Kenon kichiuaskia yejuin? Pablo okintomili: “Ikan yolyemanalistli. Xkimijyouikan semej iuan oksekimej niman xkimpaleuikan  ika on tetlajsojtlalistli yejuan nenkipiaj. Xchiuakan kanika para xmejeuakan ijkon ken aman san sekan nennemij itechkopa on Espíritu. Niman xkauilikan on Espíritu ma mechmaka yolseuilistli” (Efesios 4:1-3). Iespíritu santo Jehová kinpaleuiyaj itekipanojkauan manochiuakan yolyemankej, maka manoueyimatikan (Colosenses 3:12). Kuakon akin yokintlapejpenijkej xkinemiliaj tla yejuamej uejueyixtokej itech oksekimej. Yejuamej kimatstokej ika xkijtosneki tla  Jehová kinmaka miyek iespíritu santo xijkon ken oksekimej. Yejuamej xkinemiliaj tla san yejuamej melak kuajli kasikamatij tlen temachtia Biblia. Noijki yejuamej xkeman kijliaj yakaj ika yejua noijki yokitlapejpenijkej niman noneki mapeua makikua pan niman makoni vino ijkuak noilnamiki imikilis Cristo. Yejuamej yolyemankej niman kimatij ika san Jehová uelis kintlapejpenis akin yaskej ipan iluikak.

7, 8. ¿Tlenon xkichiuaj akin yokintlapejpenijkej niman tleka?

⁷ Maski akin yokintlapejpenijkej kitaj se tlateochiualistli ika toTajtsin yokinnots mauiyan iluikak, yejuamej xkichiaj ika oksekimej melak makinueyikaitakan (Efesios 1:18, 19; xpoua Filipenses 2:2, 3). Noijki kimatij ika ijkuak Jehová okintlapejpeni, yejua xokichiuj makimatikan oksekimej. Ika yejon, se akin yokitlapejpenijkej xkimojkatlachialtia tla yakaj xueli kineltoka ika se tokniuj yokitlapejpenijkej. Yejua kimati ika Biblia kijtoua maka matikneltokakan nimantsin tla yakaj kijtoua ika toTajtsin yokimakak yejuin tekitl (Apocalipsis 2:2). Pampa se akin yokitlapejpenijkej xkichia ika oksekimej melak makiueyikaitakan, xkiteijlia ika yejua noijki yokitlapejpenijkej ijkuak kemach kimixmati oksekimej. Kema, kanaj yejua xakaj uelis kijlis. Noijki xkiteijlia tlemach tlen kualtsin tlen yejua kichiuas ipan iluikak (1 Corintios 1:28, 29; xpoua 1 Corintios 4:6-8).

⁸ Akin yokintlapejpenijkej xkinemiliaj san noneki nemiskej imiuan akin noijki yokintlapejpenijkej, kentla se grupo akin san yejuamej nosentlaliaj. Xkitejtemouaj oksekimej akin yokintlapejpenijkej niman ijkon imiuan tlajtoskej noso imiuan nosentlaliskej ken se grupo niman ijkon nomachtiskej Biblia (Gálatas 1:15-17). Tokniuan ipan tlanechikojli xueliskiaj san sekan nemiskej tla akin yokintlapejpenijkej kichiuaskiaj yejon. Tla ijkon kichiuaskiaj, kixnamikiskiaj iespíritu santo toTajtsin, tlen techpaleuiya matikpiyakan yolseuilistli niman san sekan matinemikan (xpoua Romanos 16:17, 18).

9. ¿Tlenon uelis panos tla tejuamej melak tikinueyikaitaj akin yokintlapejpenijkej? (Xkita recuadro “ Tlasojtlalistli ‘xsan kenon noyekana’”)

⁹ ¿Kenon noneki tikimitaskej tokniuan akin yokintlapejpenijkej? Jesús okimijli inomachtijkauan: “Nochimej nemejuamej nemikniutin”. Yejua okijto ika akin noueyimati xkuajli onkisas. San ika, akin yolyemanki kiueyiliskej (Mateo 23:8-12). Kuakon xkuajli yeskia tla yakaj melak tikueyikaitaj, maski tla yejua se akin yokitlapejpenijkej. Ijkuak Biblia tlajtoua itech tlayekankej, techyolchikaua matikixkopinakan intlaneltokil, niman xtlaj techijlia tla uelis tikpiyaskej se tlaltikpakchanejkej ken totlayekankauj (Hebreos 13:7). Melauak ika Biblia techijlia ika sekimej noneki “ma[ti]kintlakaitakan”. Yejuin ijkon noneki pampa yejuamej “kuajli tlayekanaj” niman “san ika nokauaj kiteijliaj niman temachtiaj”, xpampa yejuamej yokintlapejpenijkej (1 Timoteo 5:17). Tla tejuamej melak tikinueyikaitaj akin yokintlapejpenijkej, kanaj tikchiuaskej xkuajli manomachilikan. Noso hasta uelis tikchiaskej ika yejuamej manoueyimatikan (Romanos 12:3). Tejuamej xtlaj tiknekij tikchiuaskej tlen uelis kichiuas matlajtlakokan akin yokintlapejpenijkej (Lucas 17:2).

10. ¿Kenon tikteititiaj ika tikintlakaitaj tokniuan akin yokintlapejpenijkej?

¹⁰ ¿Kenon uelis tikteititiskej ika tikintlakaitaj akin yokintlapejpeni Jehová? Kachtopa, xtikintlajtoltiskej kenon okintlapejpenijkej. Pampa yejuin san yejuamej kimatstokej, tlen xnoneki matikmatikan tejuamej (1 Tesalonicenses 4:11; 2 Tesalonicenses 3:11). Maka matiknemilikan ika imixnamik noso intajuan niman inchanejkauan noijki yokintlapejpenijkej. Yejuin tlateochiualistli ika notlapejpenia se tokniuj xkinpanoltilia ichanejkauan (1 Tesalonicenses 2:12). Niman noijki xtikintlajtoltiaj itlaj tlen makichiua xkuajli manomachilikan. Se neskayotl, xtiktlajtoltiaj isiuauj se tokniuj akin yokitlapejpenijkej kenon nomachilia ika xiuan nemis  iueuentsin nochipa ipan tlaltikpaktli. Pampa tejuamej kuajli tikmatstokej ika ipan yenkuik tlaltikpaktli, Jehová kitlapos ima niman nochi tlen yoltika kimakatos tlen kipoloua (Salmo 145:16).

11. ¿Tleka melak noneki maka matikinueyiteneuakan tlaltikpakchanejkej?

¹¹ Tla tikimitaj akin yokintlapejpenijkej ijkon ken oksekimej tokniuan, san no tejuamej totlajpiyaj. Biblia kijtoua ika nemiskiaj akin “xmelauak tokniuan” ipan tlanechikojli hasta akin kijtoskiaj ika yejuamej noijki yokintlapejpenijkej (Gálatas 2:4, 5; 1 Juan 2:19). Noijki kanaj sekimej akin yokintlapejpenijkej uelis xyolmelaujkanemiskej itech toTajtsin (Mateo 25:10-12; 2 Pedro 2:20, 21). San ika, tla tejuamej xtikinueyiteneuaj tokniuan akin nemij itech tlanechikoltin, maski tla yejuamej akin yokintlapejpenijkej noso melak kuajli kimixmatstokej noso melak youejkauj kitekichiuiliaj Jehová, xtikintokatinemiskej itech tlen kichiuaj. Kuakon tla yejuamej xok yolmelaujkanemij itech Jehová noso kikauaj tlanechikojli, tejuamej xtikpoloskej totlaneltokil itech Jehová nion xtijkauaske tiktekichiuiliskej (Judas 16).

12, 13. ¿Tleka xnoneki tajmanaskej kechmej kikuaj pan niman konij vino ijkuak noilnamiki imikilis Cristo?

¹² Ipan miyek xiuitl, xok miyekej katkaj akin kikuaj pan niman konij vino ijkuak noilnamiki imikilis Cristo. San ika, itech xiujtin tlen youajpanokej melak yomiyekiyakej. ¿Noneki tajmanaskej itech yejon? Ka. Matikitakan tleka.

¹³ Jehová “kimixmatstikaj yejuan melauak iyaxkauan” (2 Timoteo 2:19). Jehová yejua kimati akinon yokitlapejpeni niman akinon ka. San ika, tokniuan akin kinpouaj akin kikuaj pan niman konij vino ijkuak noilnamiki imikilis Cristo yejuamej xkimatij akinon yemelak yokintlapejpenijkej. Kuakon kinpouaj noijki akin kinemiliaj ika yokintlapejpenijkej maski yejuamej xkitlapejpeniaj. Se neskayotl, sekimej kikuaj pan niman konij vino niman sakin xok kichiuaj. Oksekimej xkuajli tlanemiliaj pampa kipiyaj se kokolistli noso nopapatla ken nomachiliaj. Kuajli nesi ika tejuamej xuelis kuajli tikmatiskej kechmej nokauaj tlapejpeniltin ipan tlaltikpaktli.

14. ¿Tlenon kijtoua Biblia itech kechmej nokauaskej ipan tlaltikpaktli akin yokintlapejpenijkej ijkuak peuas ueyi tlajyouilistli?

¹⁴ Ijkuak Jesús uajlas niman ijkon kinuikas ipan iluikak akin tlapejpeniltin, yejuamej nemiskej nochiuiyan ipan tlaltikpaktli. Biblia kijtoua tlenon kichiuas Jesús: “Ika on trompeta chikauak kipitsaskej, nikinuajtitlanis on noiluikaktekitkauan para kinsentlaliskej nochimej on yejuan Dios yokintlapejpenij nochiuiyan ipan in tlaltikpaktli” (Mateo 24:31). Biblia noijki kijtoua ika san itlamiyan tonaltin xok miyekej nemiskej ipan tlaltikpaktli akin yokintlapejpenijkej (Apocalipsis 12:17). San ika, xtlaj kijtoua kechmej nemiskej ipan tlaltikpaktli ijkuak peuas ueyi tlajyouilistli.

15, 16. ¿Tlenon noneki matikasikamatikan itech 144,000 akin Jehová yokintlapejpeni?

¹⁵ Jehová kimati kenon kintlapejpenis (Romanos 8:28-30). Jehová opeuj kintlapejpenia  sakin ijkuak oyoliuj Jesús. Nesi ika kachtopa siglo nochi akin melauak kichiuayaj ken Cristo okintlapejpenijkej. Ipan miyek xiuitl miyekej kijtouayaj ika yejuamej noijki yokintlapejpenijkej san ika, xmelauak. Maski ipan yejon tonaltin, Jehová kema okintlapejpeni san achijtsitsintin akin melauak kichiuayaj ken Cristo. Yejuamej katkaj ijkon ken trigo tlen okijto Jesús ika noskaltiskiaj itsajlan xiuitl tlen xkuajli (Mateo 13:24-30). Ipan san itlamiyan tonaltin Jehová ok kintlapejpenia tlaltikpakchanejkej akin teuan nopouaskej itech 144,000 ^[2] (xkita nota kampa ontlami). Kuakon tla Jehová kinemilia kintlapejpenis sekimej ijkuak san achijtsin poliui ijkuak tlapopoliuis, tejuamej kuajli tikmatstiaskej ika tlen yejua kichiuas melak kuajli (Isaías 45:9; Daniel 4:35; xpoua Romanos 9:11, 16) ^[3] (xkita nota kampa ontlami). Tejuamej xtiknekij tikchiuaskej ken okichiujkej tekitkej itech akin otlajto Jesús. Pampa yejuamej xokuelitakej ken okichiuj akin itech tekitij akin kuajli okimitak akin san se hora otekitkej (xpoua Mateo 20:8-15).

¹⁶ Xnochimej akin kichiaj nemiskej ipan iluikak noixmatij ken “tekitketl” yolmelauak niman tlamachilise (Mateo 24:45-47). Ijkon ken ipan kachtopa siglo, ipan yejuin tonajli Jehová niman Jesús san xmiyekej akin kinkui makinmakakan tlakuajli, noso makinmachtikan, miyekej. San achijtsitsintin akin okintlapejpenijkej ipan kachtopa siglo okijkuilojkej Tlajkuiloltin ika griego. Ipan yejuin tonajli san achijtsitsintin akin yokintlapejpenijkej kinmakaskej itekipanojkauan toTajtsin tlamachtijli ijkuak noneki.

17. ¿Tlenon yotomachtijkej ipan yejuin tlamachtijli?

¹⁷ ¿Tlenon yotomachtijkej ipan yejuin tlamachtijli? Jehová yokinemili kinmakas nemilistli tlen xkeman tlamis ipan tlaltikpaktli melak miyekej itekipanojkauan niman oksekimej yaskej iluikak akin tlanauatiskej iuan Jesús. Jehová kinmaka tlaxtlauijli nochimej akin kitekichiuiliaj, akin “judío” niman noijki “majtlaktli tlakamej”. Yejua kineki ika yejon ome grupo makitlakamatikan niman mayolmelaujkanemikan itech. Nochimej noneki mayolyemankej. Nochimej noneki san sekan makitekichiuilikan. Niman nochimej manochikauakan niman ijkon maonia yolseuilistli ipan tlanechikojli ipan yejuin tonaltin ika xiyejko tlapopolouilistli, tinochimej matiktekichiuilikan Jehová san sekan niman matikchiuakan ken Cristo.