1, 2. a) ¿Tlenon okseki tlemach kijtosneki tetlayokolijli tlen toTajtsin yotechmakak? b) ¿Katlejua tlajtoltilistin tikinnankiliskej ipan yejuin tlamachtijli?

JEHOVÁ melak techtlasojtla. Ika yejon, okuajtitlan iKoneuj Jesucristo makitemakaki inemilis topampa (Juan 3:16; 1 Juan 4:9, 10). Pablo, itlatitlankauj Cristo, okitokayoti ken “se ueyi tetlayokolijli yejuan xakaj ueli kipantlantia ikan tlajtojli” (2 Corintios 9:15). ¿Tleka ijkon okijto Pablo?

² Pablo kuajli kimatiya ika imikilis Jesús techpaleuiya kuajli matikmatstokan ika nochi tlen toTajtsin yokijto melauak nochiuas (xpoua 2 Corintios 1:20). Yejuin “tetlayokolijli yejuan xakaj ueli kipantlantia ikan tlajtojli” noijki kijtosneki inemilis Jesús tlen okitemakak, nochi tlemach tlen kuajli techmaka toTajtsin niman itlasojtlalis. Yejuin tetlayokolijli melak kualtsin, xtikpiyaj tlajtojli tlen ika uelis tikijtoskej. ¿Kenon noneki tomachiliskej ika yejuin ueyi tetlayokolijli? ¿Kenon yejuin tetlayokolijli techmapeuas matikchiuakan tlen  kuajli ijkuak noilnamikis imikilis Cristo? Ipan xiuitl 2016 tikilnamikiskej ipan tonajli miércoles 23, metstli marzo.

3, 4. a) ¿Kenon tomachiliaj ijkuak yakaj techmaka se tetlayokolijli? b) ¿Kenon uelis se tetlayokolijli kipatlas tonemilis?

³ Melak techyolpaktia ijkuak yakaj techmaka se tetlayokolijli. San ika, seki tetlayokolijli melak ueyi kijtosneki, pampa hasta uelis kipatlas tonemilis. Matitlanemilikan itech yejuin: tejua tikchiua itlaj tlen xkuajli niman aman noneki tiktlaxtlauas ika monemilis. San ika, uajlauj yakaj akin nion xtikixmati niman yejua notemaka makimiktikan. ¿Kenon timomachiliskia itech tlen kichiua?

⁴ Kanaj tiknemilis tikpatlas itlaj ipan monemilis. Kanaj uelis peuas titetlasojtlas niman melak tikuelitas tiktemakas tlen tikpiya. Noijki tiknekis tikintlapopoluis akin omitschiuilijkej tlen xkuajli. Kema, tiknekis tikteititis ipan nochi monemilis ika melak tiktlasojkamachilia yejon tlaltikpakchane akin onotemakak mopampa maski xtikixmatiya.

5. ¿Tleka tetlayokolijli tlen yotechmakak toTajtsin melak ueyi kijtosneki xijkon ken okseki?

⁵ Tetlayokolijli tlen yotechmakak toTajtsin, noso tlaxtlauijli, melak ueyi kijtosneki xijkon ken tetlayokolijli tlen yotikonteneujkej (1 Pedro 3:18). Tinochimej titlajtlakolejkej, niman ika yejon, tinochimej timikij (Romanos 5:12). San ika, toTajtsin okiteititi itlasojtlalis ijkuak okuajtitlan iKoneuj ipan tlaltikpaktli niman ijkon “omik ipampa nochi tlakatl” (Hebreos 2:9). Ika imikilis Jesús uelis nochiuas miyek tlemach. Popoliuis mikilistli niman xok keman onias (Isaías 25:7, 8; 1 Corintios 15:22, 26). Nochimej akin kineltokaskej Jesús nochipa nemiskej ika paktli niman yolseuilistli. Sekimej yaskej ipan iluikak, ompa tekiuajtiskej iuan Jesucristo, niman oksekimej nemiskej nikan ipan tlaltikpaktli (Romanos 6:23; Apocalipsis [Revelación] 5:9, 10). ¿Tlenon okseki tlateochiualistin kitemaka itetlayokolil toTajtsin?

6. a) ¿Tlenon tlateochiualistin tikselis ipan yenkuik tlaltikpaktli? b) ¿Kenon uelis tikteititiskej ika tiktlasojkamatij itetlayokolil toTajtsin?

⁶ Itetlayokolil toTajtsin noijki kijtosneki ika yejuin Tlaltikpaktli nochiuas se xochitlalpan, akin kualoj pajtiskej niman akin yomijkej yoliuiskej (Isaías 33:24; 35:5, 6; Juan 5:28, 29). Melak tiktlasojtlaj Jehová niman iKoneuj ipampa “tetlayokolijli yejuan xakaj ueli kipantlantia ikan tlajtojli”. ¿Tlenon techmapeuas matikchiuakan yejuin tetlayokolijli? Kachtopa, tikchiuaskej ijkon ken Jesús. Ika ome, tikintlasojtlaskej tokniuan. Niman ika yeyi, titetlapopoluiskej ika nochi toyojlo.

7, 8. ¿Kenon noneki tomachiliskej ika itetlasojtlalis Cristo niman tlenon noneki matikchiuakan?

⁷ Kachtopa, itlasojtlalis toTajtsin techmapeuas tikchiuaskej ipan tonemilis nochi tlen kiyolpaktia Jesús. Pablo okijto: “Itetlajsojtlalis Cristo techchiualtia” (xpoua 2 Corintios 5:14, 15). Pablo kimatiya ika tla tiktlasojkamatij itlasojtlalis Jesús, tiknekiskej tiktlasojtlaskej Jesús niman tikchiuaskej tlen kiyolpaktia. Kema, ijkuak kuajli tikasikamatij tlen Jehová yokichiuj topampa, kichiuas matinemikan ken Jesús kuelita. ¿Kenon tikchiuaj yejuin?

⁸ Itlasojtlalis Jehová techmapeuas matikchiuakan ipan tonemilis ijkon ken okichiuj Jesús (1 Pedro 2:21; 1 Juan 2:6). Ijkuak tiktlakamatij toTajtsin niman Cristo, tikteititiaj ika tikintlasojtlaj. Jesús okijto: “Dios omechnots para nenkichiuaskej on tlen kuajli maski  nentlajyouiskej. San yejua Cristo otlajyouij nemopampa, niman ijkon omechititij ken ijki no noneki nenkichiuaskej” (Juan 14:21; 1 Juan 5:3).

9. ¿Tlenon uelis topan nochiuas?

⁹ Ipan tonaltin ijkuak noilnamikis imikilis Cristo, noneki titlanemiliskej tlenon tikchiujtokej ipan tonemilis. Matotlajtoltikan yejuin: “¿Itech tlenon yopeuj nikchiua ken Jesús? ¿Onka itlaj kampa noneki ninoyektlalis?”. Yejuin melak noneki matotlajtoltikan, pampa tlen onka ipan yejuin tlaltikpaktli uelis kichiuas matinemikan ken miyekej nemij (Romanos 12:2). Tla xtotlajpiyaj uelis peuas tikchiuaskej ijkon ken kichiuaj uejueyimej tlamachtijkej, akin melak kimixmatij niman uejueyixtokej nauiltijkej (Colosenses 2:8; 1 Juan 2:15-17). ¿Kenon uelis tikmapeuaskej nochi yejuin?

10. a) ¿Tlenon uelis totlajtoltiskej ipan tonaltin ijkuak noilnamikis imikilis Cristo? b) ¿Tlenon uelis tikpatlaskej itech tlen tikchiuaj? (Xkita tlaixkopinajli kampa peua tlen tomachtijtokej)

¹⁰ Ipan tonaltin ijkuak noilnamikis imikilis Cristo, melak kuajli yes matikitakan kenon totlakentiaj, tlen tlakuikajli tijkakij, tlen películas tikitaj, tlen tikpiyaj ipan tocelular, computadora noso tableta. Ika yejon, matotlajtoltikan: “¿Nipinauiskia tla niknamikiskia Jesús niman nechitaskia ken ninotlakentia?” (xpoua 1 Timoteo 2:9, 10). “¿Nesi ika nikchiua ken Cristo ken ninotlakentia? ¿Kuelitaskia Jesús kitas nopelículas? ¿Kuelitaskia kikakis tlakuikajli tlen nijkaki? ¿Nipinauiskia niktlaneujtis Jesús nocelular noso notlableta? ¿Kenon nikijliskia Jesús tleka nikuelita novideojuegos?”. Tla tiktlasojtlaj Jehová, tikmapeuaskej nochi tlen xuelis techkauilis tinemiskej ken akin kichiuaj ken Cristo, maski melak maouijtika (Hechos 19:19, 20). Ijkuak otosentemakakej itech Jehová, otikijlikej ika nochipa tikchiuaskej tlen kiyolpaktia Cristo. Kuakon, maka itlaj matechtsakuili tikchiuaskej ken Jesús (Mateo 5:29, 30; Filipenses 4:8).

11. a) ¿Tlenon uelis tikchiuaskej tla tiktlasojtlaj Jehová niman Jesús? b) ¿Tlenon uelis tikchiuaskej inpampa oksekimej ipan tlanechikojli?

¹¹ Tla tiktlasojtlaj Jesús, uelis techmapeuas matitenojnotsakan chikauak niman matitemachtikan (Mateo 28:19, 20; Lucas 4:43). Ipan yejuin tonaltin ijkuak tikilnamikiskej imikilis Jesús, tejuamej uelis tochiuaskej precursores auxiliares niman uelis tiktemakaskej 30 noso 50 horas. Matitlanemilikan itech se tokniuj akin kauajli katka niman ikipiaya 84 xiuitl. Yejua kinemiliaya ika xok ueliskia nochiuas precursor auxiliar pampa kemantika kualouaya. San ika, precursores akin chantiya nisiuj okipaleuijkej niman yejuamej kuikayaj kampa yejua ueliskia tenojnotsas. Kuakon yejon tokniuj ouel otenojnots 30 horas ipan se metstli. ¿Uelis yakaj tikpaleuiskej ipan motlanechikol manochiua precursor auxiliar ipan marzo noso abril? Maski xtinochimej uelis tochiuaskej precursores, kema uelis tokojtiliskej niman tikxeloskej seki totonaluan tikchiuaskej itekiyo Jehová. Tla ijkon tikchiuaj, tikteititiskej ika tiktlasojkamatij itlasojtlalis Cristo, ijkon ken okichiuj Pablo, itlatitlankauj Cristo. ¿Onka okseki tlen uelis tikchiuaskej tla tiktlasojkamatij itlasojtlalis toTajtsin?

12. ¿Tlenon noneki tikchiuaskej tla tiknekij ika toTajtsin matechtlasojtla?

¹² Ika ome, itlasojtlalis toTajtsin noneki matechmapeua matikintlasojtlakan tokniuan. Juan, itlatitlankauj Cristo, okijto: “Notlajsojkaikniuan, tla Dios sanoyej ijkon otechtlajsojtlak, no ijki noneki titotlajsojtlaskej inuan oksekimej” (1 Juan 4:7-11). Tla tiknekij ika toTajtsin  matechtlasojtla, noneki tikintlasojtlaskej tokniuan (1 Juan 3:16). ¿Kenon uelis tikimititiskej ika tikintlasojtlaj?

13. ¿Kenon otechititi Jesús tikintlasojtlaskej oksekimej?

¹³ Ika tlen okichiuj Jesús, otechititi kenon uelis tikintlasojtlaskej oksekimej. Ijkuak onen ipan tlaltikpaktli, okinpaleui tlaltikpakchanejkej akin yolyemankej katkaj. Se neskayotl, yejua okinpajti akin xuelij nejnemiyaj, akin xuelij tlachiayaj, akin xtlakakiyaj niman akin xuelij tlajtouayaj (Mateo 11:4, 5). Jesús melak kuelitaya kinmachtis tlaltikpakchanejkej akin kinekiyaj nomachtiskej itech toTajtsin, yejua xijkon katka ken tlamachtijkej ipan tlanauatijli (Juan 7:49). Yejua kintlasojtlaya akin yolyemankej niman onokojtili kinpaleuis (Mateo 20:28).

14. ¿Tlenon uelis tikchiuaskej niman ijkon tikimititiskej tokniuan ika tikintlasojtlaj?

¹⁴ Ipan tonaltin ijkuak noilnamiki imikilis Cristo, melak kuajli tla tiknemiliaj kenon tikinpaleuiskej tokniuan ipan tlanechikojli. Matiknemilikan kenon tikinpaleuiskej akin ikipiyaj miyek xiuitl. ¿Uelis tikomintlajpaloskej? ¿Uelis tikimitkiliskej tlakuajli ipan inchan? ¿Kanaj uelis tikominpaleuiskej inchan? ¿Kanaj uelis tikinuikaskej ipan tlanechikojli noso imiuan tikisaskej tontenojnotsaskej? (Xpoua Lucas 14:12-14.) Itlasojtlalis toTajtsin noneki techmapeuas matikteititikan ika tikintlasojtlaj tokniuan.

15. ¿Tlenon noneki maka matikilkauakan?

¹⁵ Ika yeyi, itlasojtlalis toTajtsin techmapeua matikintlapopoluikan tokniuan. Tinochimej titlajtlakolejkej niman timikij. Ika yejon, tinochimej techpaleuiya imikilis Jesús. Uelis tikijtoskej ika hasta se tokniuj akin nochipa yolmelaujkanemi itech toTajtsin noijki kipaleuiya. Tinochimej noneki maka matikilkauakan ika toTajtsin yotechtlapopolui. ¿Tleka melak noneki nochipa matikilnamikikan yejuin? Matikitakan ika se neskayotl tlen Jesús okijto.

16, 17. a) ¿Tlenon techmachtia tlen Jesús okijto itech se tekiuaj niman itlakeual? b) ¿Tlenon noneki tikchiuaskej tla tiktlasojkamatij ika yotechtlapopolui Jehová?

¹⁶ Jesús otlajto itech se neskayotl: se tlakeuajli kiuikiliaya 60 millones platajtomin se tekiuaj. Yejon tekiuaj okitlapopolui itlakeual maski melak ueyi kiuikiliaya. Sakin, yejon tlakeuajli xokinek kitlapopoluis okse akin kiuikiliaya san 100 platajtomin. Tla yejon tlakeuajli kitlasojkamatiskia ika tekiuaj okitlapopolui, noijki kitlapopoluiskia okse akin kiuikiliaya. Ijkuak tekiuaj okimat tlen yokichiujka yejon tlakeuajli, melak okualan. Kuakon, tekiuaj okinots niman okijli: “¡Xkuajli tekipanojketl! Nejua onimitspojpolouilij nochi kech tinechuikiliaya, pampa tejua ijki otinechiknotlajtlanilij. Ijkon ken nejua onimitsiknelij, tejua no ijki noneki tikiknelis on motetekipanojka[uj]” (Mateo 18:23-35). Ijkon ken yejon tekiuaj, Jehová techtlapopoluilia totlajtlakoluan. Aman, pampa Jehová techtlasojtla niman techiknelia, ¿tlenon tiknekiskej tikchiuaskej?

 ¹⁷ Ijkuak itikilnamikiskej imikilis Cristo, matitlanemilikan itech yejuin: “¿Kanaj se tokniuj itlaj yonexchiuili? ¿Ouijtika nikmachilia niktlapopoluis?”. Tla kema, ipan yejuin tonaltin matikchiuakan ken Jehová akin “nimantsin tetlapopoluiya” (Nehemías 9:17; Salmo 86:5). Tla tiktlasojkamatij ika Jehová yotechtlapopolui, uelis tikintlapopoluiskej oksekimej ika nochi toyojlo. Tla tiknekij ika Jehová matechtlasojtla niman matechtlapopolui, noneki tikintlasojtlaskej niman tikintlapopoluiskej tokniuan (Mateo 6:14, 15). Ijkuak tikintlapopoluiyaj oksekimej, xkipatla tlen yejuamej otexchiuilijkej yeuejkaui. San ika, tla tikintlapopoluiyaj, techpaleuis kuajli tomachiliskej ika tlayekapan.

18. ¿Kenon okipaleui se tokniuj itlasojtlalis toTajtsin makijyoui okse tokniuj?

¹⁸ Kanaj kemantika tikitaskej ika ouijtika tikimijyouiskej tokniuan (xpoua Efesios 4:32; Colosenses 3:13, 14). Matikitakan tlenon opanok itech se tokniuj itoka Lily ^[1] (xkita nota kampa ontlami). Yejua kipaleuiaya se tokniuj siuakauajli itoka Carol. Tokniuj Lily kuikaya nochiuiyan, kipaleuiaya ijkuak ontlakouas niman itech okseki tlemach. Maski Lily melak kipaleuiaya, Carol xkeman itlaj kuelitaya. Kemantika melak ouijtika kitaya kuajli iuan nouikas. San ika, Lyl melak nochikauaya kitas ikualneskayouan tlen kipiaya Carol niman yejuin melak okipaleui iuan nouikas Carol hasta ijkuak opeuj kualo niman omik. Lyli kijtoua: “Melak nikneki maajsi tonajli ijkuak Carol yoliuis. Pampa nikneki kuajli nikixmatis ijkuak yejua xok kipiyas tlajtlakojli”. Kuajli nesi ika itlasojtlalis toTajtsin uelis kichiuas matikimijyouikan tokniuan. Noijki, yejuin tlasojtlalistli techpaleuiya matikchiakan mayejko tonajli ijkuak xok yakaj kipiyas tlajtlakojli niman nochipa tikchiuaskej tlen kuajli.

19. ¿Tlenon techmapeuas tikchiuaskej ika “ueyi tetlayokolijli” tlen Jehová yotechmakak?

¹⁹ Kuajli nesi ika Jehová yotechmakak “se ueyi tetlayokolijli yejuan xakaj ueli kipantlantia ikan tlajtojli”. Nochipa matiktlasojkaitakan yejuin tetlayokolijli. Ipan yejuin tonaltin ijkuak noilnamiki imikilis Cristo, melak kuajli yes tla titlanemiliaj itech tlen Jehová niman Jesús yokichiujkej topampa. Tiknekij ika intlasojtlalis matechmapeua tikchiuaskej ken Jesús okichiuj, tikintlasojtlaskej tokniuan niman tikintlapopoluiskej ika nochi toyojlo.