Tla ka, kanaj yotikitak ika miyekej kema yokinchiuilijkej itlaj tlen xkuajli pampa kintlauelitaj. Ipan noticias miyekpa tikitaj ika miyekej kintlauelitaj pampa oksekan ualeuaj, pampa tlamantik noso sejneka tlachiaj noso pampa sekimej kinuelitaj san no insiuaikniuan noso intlakaikniuan. Ika yejon, tekiuajkej kintlaliaj tlanauatiltin para maka sa manochiua tlen xkuajli.

Ijkuak yakaj tetlauelita, kichiua maonia más tlauejli. Ijkon tikijtouaj pampa, miyekpa, akin kitlauelitaj kineki notlakuepiltis. Kuakon, ijkuak yakaj tetlauelita, kipeualtia se tlauejli tlen xueli tlami.

Kanaj tejua yakaj yomitspijpinaujtijka, yomitstsajtsatsilijka noso kanaj yakaj yomitsijlijka ika mitschiuilis itlaj tlen xkuajli. San ika, sekimej akin melak tetlauelitaj kintlajyouiltiaj oksekimej, kinchiuiliaj tlen xkuajli, kinmojtiaj, kinuijsokij niman hasta kinmiktiaj.

Ipan yejuin revista tikitas ika kema uelis xok titetlauelitaskej niman noijki tikasikamatis yejuin:

• ¿Tleka notlauelitalo?

• ¿Tlenon uelis tikchiuaskej niman ijkon xok titetlauelitaskej?

• ¿Ajsis se tonajli ijkuak xok notlauelitalos?