1. ¿Kenon okiteititi Abrahán ika tlaneltokaya itech imelajkayo Jehová? (Xkita tlaixkopinajli kampa peua tlen tomachtijtokej).

“¿XKICHIUAS tlen melajki akin Teyolkuitijketl ipan nochi tlaltikpaktli?” (Génesis 18:25). Abrahán xotetlajtolti yejuin pampa ometlamatiya. Tlen otetlajtolti okiteititi ika yejua kineltokaya ika Jehová kintlajtlakolmakaskia ika melajkayotl uejueyimej kalpamej Sodoma niman Gomorra. Yejua kuajli kimatstoya ika Jehová xkeman kichiuas ika akin melajki mamiki iuan akin kichiua tlen xkuajli. Yejuin nion xuelis kinemiliskia Abrahán. Sakin, Jehová okijto itech yejua: “Yejua kentla se Tetl, melaktik tlen kichiua, pampa nochi iojuiuan melaktikej. ToTajtsin akin xkeman tekaua, xkichiua tlen xkinamiki; yejua kichiua tlen melaktik niman tlen kinamiki” (Deuteronomio 31:19; 32:4).

2. ¿Tleka Jehová xuelis kichiuas tlen xkinamiki?

² ¿Tleka Abrahán kineltokaya ika Jehová nochipa kichiuaskia tlen melajki? Pampa Jehová yejua temaka melak  ueyi neskayotl itech melajkayotl niman tlen melajki. Kema, tlajtoltin “melajkayotl” niman “melajki” miyekpa san sekan notekitiltiaj ipan Tlajkuiloltin ika hebreo pampa san noijki tlen kijtosnekij. Ika yejon, pampa Jehová itlanauatiluan nochipa melaktikej, nochipa tetlajtlakolmaka ken kinamiki. Biblia kijtoua: “Yejua kitlasojtla tlen melaktik niman melajkayotl” (Salmo 33:5).

3. Xkijto se neskayotl itech tlen xkinamiki manochiua ipan yejuin tonajli.

³ Techyolseuiya tikmatiskej ika Jehová nochipa kichiua tlen kinamiki. San ika, ipan yejuin tlaltikpaktli melak nochiua tlen xkinamiki. Se neskayotl, sekimej tlaltikpakchanejkej yokintlajtlakoltijkej niman yokintsajkej ipampa tlen xokichiujkej. Sakin ijkuak yenkuik nesi tlen melauak opanok, yonoitak ika sekimej xkipiayaj tlajtlakojli, san ika, ijkuak yopanok miyek xiuitl ika tsauktokej. Yejuin tlen xkinamiki mapano kichiua ika maonia tlauejli niman maka kuajli manemilo. San ika, onka itlaj tlen xkinamiki panos tlen tejuamej uelis tikitaskej ika ouijtika tikxikoskej. ¿Katlejua yejon?

4. ¿Tlenon uelis kitlatlatas itlaneltokil se akin kichiua ken Cristo?

⁴ Akin tikchiuaj ken Cristo tikmatij ika kiyauak itech tlanechikojli topan nochiuas tlen xkinamiki. San ika, totlaneltokil uelis notlatlatas tla tikitaj ika tlen xkinamiki topan nochiua ipan tlanechikojli. Tla ijkon panoua, ¿tlenon tikchiuaskej? ¿Tijkauiliskej ika yejon matechtlajkali?

5. ¿Tleka xkipiya ika timojkatlachiaskej tla tikitaj noso topan nochiua tlen xkinamiki ipan tlanechikojli?

⁵ Tinochimej titlajtlakolejkej niman topopolouaj. Ika yejon, uelis yakaj texchiuilis tlen xkinamiki noso tejuamej uelis yakaj tikchiuiliskej tlen xkinamiki ipan tlanechikojli (1 Juan 1:8). Yejuin san kemantika panoua. Maski ijkon, akin tikchiuaj ken Cristo xkipiya ika timojkatlachiaskej noso techtlajkalis ijkuak panoua itlaj tlen xkinamiki. Jehová yotechmakak tlajtolpaleuilistli ipan Biblia tlen techpaleuis matiyolmelaujkanemikan tla se tokniuj texchiuilia itlaj tlen xkinamiki (Salmo 55:12-14).

6, 7. ¿Tlenon okixnamik se tokniuj ipan tlanechikojli niman tlenon kualneskayomej okipaleuijkej?

⁶ Matikitakan tlen ipan onochiuj tokniuj Willi Diehl. Ipan xiuitl 1931, tokniuj Diehl opeuj tlapaleuiya ipan Betel tlen onka Berna (Suiza). Ipan 1946, okiseli iTlamachtil Galaad ipan Nueva York (Estados Unidos). Ijkuak otlan kiselia tlamachtijli, opeuj tlapaleuiya ken tlayekanketl ipan circuito ne Suiza. Ijkuak tokniuj Diehl otlajto itech inemilis, okijto ika ipan mayo xiuitl 1949, okiteijli ipan sucursal tlen onka Suiza ika kinemiliaya nonamiktis. Kuakon tokniuan okijlijkej ika kikixtiliskia nochi tekitl tlen kipiaya. Yejua san ueliskia tekitis ken precursor. Tokniuj Diehl okijto: “Xnechkauiliayaj maniktemaka tlamachtiltin. Miyekej xok techtlajpalouayaj, niman techitayaj ken akin yokinkixtijkej itech tlanechikojli”.

⁷ ¿Tlenon okichiuj tokniuj Diehl? Yejua okijto: “San ika, tikmatiyaj ika timonamiktis  xkixnamiki tlen kijtoua Biblia. Kuakon otopaleuijkej itech teoyotl niman otitlaneltokakej itech Jehová”. Maski sekimej tokniuan xkasikamatiya kenon kita Jehová namiktilistli, ika yolik okasikamatkej. Niman tokniuj Diehl oksejpa opeuj kipiya tekitl ken kachtopa. Jehová okiteochiuj pampa xkeman okikauj * (xkita nota). Aman matotlajtoltikan: “Tla nejua nopan nochiuaskia yejon tlen xkinamiki, ¿noijki nikpiyaskia ijyouilistli niman nitlamachiaskia ika Jehová makiyektlali tlen panotok? ¿Noso nitlaneltokaskia notech niman nikyejyekoskia nikyektlalis tlen opanok?” (Proverbios 11:2; xpoua Miqueas 7:7). *

8. ¿Tleka uelis topopoloskej ijkuak tiknemiliskej ika topan noso ipan oksekimej onochiuj tlen xkinamiki?

⁸ Tla tiknemiliaj ika onochiuj itlaj tlen xkinamiki ipan tlanechikojli, matikilnamikikan ika uelis topopoloskej. ¿Tleka? Pampa tinochimej titlajtlakolejkej niman kanaj xtikasikamatij ken noneki tlen opanok. Noijki kanaj xnochi tikmatij tlen opanok. San ika, tla kuajli ken tikasikamatij noso ka, noneki matikchiuilikan teoyotl Jehová itech tlen opanok, matitlaneltokakan itech niman matiyolmelaujkanemikan. Yejuin techpaleuis maka matikualanikan iuan Jehová (xpoua Proverbios 19:3). *

9. ¿Tlenon neskayomej tikimitaskej ipan yejuin tlamachtijli niman ipan okse?

⁹ Matikitakan yeyi neskayotl itech tlen xkinamiki inpan onochiuj yeuejkaui itekipanojkauan toTajtsin. Ipan yejuin tlamachtijli, tikitaskej ineskayo José ixuiuj Abrahán niman tlen okichiuilijkej ikniuan. Ipan okse tlamachtijli, tikitaskej tlenon okichiuj Jehová iuan tekiuaj Acab niman tlen ipan onochiuj Pedro itlatitlankauj Cristo ne Antioquía de Siria. Ijkuak tomachtijtiaskej, matikitakan kenon uelis tikitaskej tlen panoua ijkon ken kita Jehová niman kenon uelis kuajli touikaskej iuan, niman yejuin melak noneki tla tiknemiliaj ika yotexchiuilijkej tlen xkinamiki.

10, 11. a) ¿Tlenon xkinamiki ipan onochiuj José? b) ¿Tlenon ouel okichiuj José ijkuak tsauktoya?

¹⁰ José se kuajli itekipanojkauj toTajtsin akin okixiko tlen xkinamiki. San ika, tlen melak okiyolkoko tlen xkinamiki okichiuilijkej ikniuan. Ijkuak José kipiaya 17 xiuitl, okichtejkej niman okinemakakej ken tlakeuajli ipan Egipto (Génesis 37:23-28; 42:21). Sakin, ipan yejon país tlen uejka nokaua, José okitlajtlakoltijkej ika okiyejyeko  kichiualtis se siuatl iuan manoteka niman okitsajkej maski nion xokitakej tla melauak katka (Génesis 39:17-20). José otlajyoui kanaj 13 xiujtin pampa nemiya ken tlakeuajli niman tsauktoya. ¿Tlenon uelis tomachtiskej itech tlen ipan onochiuj José tlen uelis techpaleuis tla tokniuan texchiuilia tlen xkinamiki?

¹¹ Ijkuak José ok tsauktoya, tlayekanketl itech coperos akin kitekichiuiliaya tekiuaj noijki okitsajkej. Se yeuajli, yejon tlakatl otemik, niman ika itlapaleuilis Jehová José okijli tlenon kijtosnekiya. José okijli copero ika kisaskia kampa tsauktoya niman oksejpa kitekichiuiliskia Faraón. Kuakon José okitak ika ueliskia kijlis tlenon ipan nochiujtoya. Tejuamej xsan uelis tomachtiskej itech tlen José okijto noijki itech tlen xokijto (Génesis 40:5-13).

12, 13. a) ¿Kenon tikmatij ika José xsan ijkon onokauj itech tlen ipan nochiujtoya? b) ¿Itech tlenon José xokijli copero?

¹² (Xpoua Génesis 40:14, 15). * Tla tikitaj José okijto: “Onechixtejkej”. Tlajtojli tlen nikan notekitiltia ipan Biblia noijki kijtosneki “tlachtekijli”. Kuajli  nesi ika yejua okichiuilijkej tlen xkinamiki. José noijki kuajli okijto ika yejua xkipiaya tlajtlakojli itech tlen kitlajtlakoltiayaj. Ika yejon, okijli copero makinotsa itech yejua Faraón. ¿Tlenon kinekiya mapano? Yejua okijto: “Niman ijkon tinechkixtis nikan kampa nitsauktika”.

¹³ ¿Tikijtoskia ika xtlaj okiyejyeko kichiuas José itech tlen ipan nochiujtoya? Ka, xijkon. José kimatiya ika ipan yonochiujka miyek tlen xkinamiki. Ika yejon, yejua okijli copero tlen ipan nochiujtoya, pampa kinekiya ika yejon tlakatl makipaleui. San ika, Biblia xkijtoua tla José okimijli oksekimej, nion Faraón xokijli, ika ikniuan katkaj akin okichtejkej. Ika yejon, ijkuak ikniuan oajsikej Egipto niman iuan onoyolseuijkej, Faraón kuajli okinseli niman okinnots ika manochantikan Egipto niman mayolpakikan ipan tlajli (Génesis 45:16-20).

14. Tla topan nochiua tlen xkinamiki ipan tlanechikojli, ¿tlenon techpaleuis maka matikijtokan tlen kinyolkokos oksekimej?

¹⁴ Tla tiknemiliaj ika topan yonochiuj tlen xkinamiki ipan tlanechikojli, noneki melak kuajli matikitakan ika maka titlajtotinemiskej iuan oksekimej itech yejon. Kema melauak ika tla se tokniuj yokichiuj se ueyi tlajtlakojli, noneki tikimijliskej tlayekankej niman tikintlajtlaniliskej tlapaleuilistli (Levítico 5:1). San ika, miyekpa xse ueyi tlajtlakojli tlen nochiua. Ijkuak ijkon panos, uelis toyolseuiskej iuan tokniuj niman nion xnonekis tikijliskej yakaj okse tlen opanok, kanaj nion tlayekankej (xpoua Mateo 5:23, 24; 18:15). Matikyolmelaujkanemikan ijkuak ijkon topan nochiuas niman matikchiuakan tlajtolyekanalistin itech Biblia. Kanaj kemantika tikitaskej ika xkuajli otikasikamatkej tlen panotoya niman kanaj xmelauak topan onochiuj tlen xkinamiki. Kuakon tiktlasojkamatiskej ika xotikchiujkej maueyiya tlen panotoya, pampa xotikijtokej tlen xkuajli itech se tokniuj. Matikilnamikikan ika maski tla melauak tlen tikmati noso ka, tikijtoskej itlaj tlen teyolkoko xkeman kiyektlalis tlen panotok. Tla xtijkauaj Jehová nion tokniuan, techpaleuis maka matopopolokan itech yejuin. Salmista okijto ika nemi “akin yolchipaujkanentinemi”. Yejon tlaltikpakchane “xtetlajtolchijchiuilia ika inenepil, xkichiuilia tlen xkuajli tlaltikpakchane” (Salmo 15:2, 3; Santiago 3:5).

15. ¿Kenon okipaleui José ika iuan nouikaya Jehová?

¹⁵ Uelis tomachtiskej itlaj okse itech José. Ipan 13 xiujtin ijkuak tlen xkinamiki ipan onochiuj José, okiteititi ika kitaya tlen panouaya ijkon ken Jehová kita (Génesis 45:5-8). Yejua xkeman  okitlajtlakolti Jehová itech tlen ipan nochiujtoya. Kema, José xokilkauj tlajyouilistli tlen xkinamiki ipan onochiuj, san ika, yejuin xokichiuj maka mayolpaki. Okse tlen melak ueyi kijtosneki, yejua xokikauili ika intlajtlakol oksekimej niman tlen xkuajli okichiujkej makixelo itech Jehová. Pampa José oyolmelaujkanen, ouel okitak kenon Jehová okipopolo nochi tlen xkinamiki ipan nochiujtoya, okiteochiuj yejua niman ichanejkauan.

16. ¿Tleka noneki melak matonisiuikan itech Jehová tla topan nochiua tlen xkinamiki ipan tlanechikojli?

¹⁶ Ijkon ken José, tejuamej noneki tiktlasojkaitaskej niman tiktlajpiyaskej ken touikaj iuan Jehová. Maka keman matijkauilikan ika intlajtlakoluan tokniuan matechxelo itech toTajtsin akin tikueyichiuaj niman tiktlasojtlaj (Romanos 8:38, 39). Tla tejuamej tikixnamikij itlaj tlen xkinamiki ipan tlanechikojli, matikchiuakan ijkon ken José niman melak matonisiuikan itech Jehová. Matikyejyekokan tikitaskej tlen panoua ijkon ken Jehová kita. Matikchiuakan nochi tlen tiueli niman ijkon tikyektlaliskej tlauejli ika tlajtolyekanalistin itech Biblia. Niman sakin noneki matijkauilikan Jehová tlen panotok. Uelis titlaneltokaskej ika yejua kiyektlalis ken nonekis niman ijkuak kitas kuajli.

17. ¿Kenon uelis tikteititiskej ika titlaneltoka itech “akin Teyolkuitijketl ipan nochi tlaltikpaktli”?

¹⁷ Pampa ok tinemij ipan tlaltikpaktli kampa nochiua tlen xkuajli, uelis tikchiaskej topan manochiua tlen xkinamiki. Kemantika, ipan tlanechikojli uelis tikitaskej ika topan noso ipan yakaj nochiujtika itlaj tlen tiknemiliaj ika xkinamiki. San ika, maka matechtlajkali yejuin (Salmo 119:165). Maka keman matijkauakan Jehová, matiktlajtlanilikan itlapaleuilis niman matitlaneltokakan itech. Matikilnamikikan ika pampa titlajtlakolejkej, kanaj xkuajli tikasikamatij tlen panotok, niman kanaj xtikmatij nochi. Kuakon, matikchiuakan ijkon ken José niman maka matikijtokan tlen xkuajli itech oksekimej, pampa yejuin san kichiuas maueyiya tlen panotok. Ijkon tej, maka matitlaneltokakan san totechkopa. Niman tlen melak noneki, maka matijkauakan Jehová niman matikchiakan yejua makiyektlali tlen panotok. Ijkuak ijkon tikchiuaskej, Jehová kiselis tlen tikchiuaj niman techteochiuas, ijkon ken José. Kuajli matikmatstokan ika Jehová, “akin teyolkuitijketl ipan nochi tlaltikpaktli”, nochipa kichiuas tlen melajki, “pampa nochi iojuiuan melaktikej” (Génesis 18:25; Deuteronomio 32:4).

18. ¿Tlenon tikitaskej ipan okse tlamachtijli?

¹⁸ Ipan okse tlamachtijli, tikitaskej okse ome neskayomej kenon itekipanojkauan toTajtsin yeuejkaui inpan onochiuj tlen xkinamiki. Yejuin neskayomej uelis techpaleuiskej matikitakan kenon ika tla tiyolyemankej niman titetlapopoluiyaj, techpaleuis matikitakan melajkayotl ijkon ken Jehová kita.