1. ¿Tleka sekimej kinmelaua matikintlakaitakan niman tlenon tikitaskej ipan yejuin tlamachtijli?

¿KENON tikteititiaj ueyiteneualistli? Tikteititiaj ijkuak titetlasojkaitaj niman titetlakaitaj. Miyekpa, tikintlakaitaj akin yokichiujkej itlaj niman kinmelaua noso akin kipiyaj se ueyi tekitl. Ipan yejuin tlamachtijli, tikitaskej akinomej noneki matikintlakaitakan niman tleka.

2, 3. a) ¿Tleka Jehová akin melak kimelaua matiktlakaitakan? (Xkita tlaixkopinajli kampa peua tlen tomachtijtokej). b) ¿Akinon borreguito akin noteneua ipan Apocalipsis 5:13, niman tleka kimelaua matiktlakaitakan?

² Apocalipsis 5:13 kijtoua ika “yejuan yeuatikaj ipan on ueyixtikaj trono” niman “Borreguito” kinmelaua matikinueyiteneuakan. “Yejuan yeuatikaj ipan on ueyixtikaj trono”, kijtosneki Jehová. Ipan Apocalipsis tlaxelojli ueyi 4, akin chantij iluikak techijliaj ika Jehová, pampa yejua “nemi para nochipa”, kimelaua manoueyiteneua. Yejuamej kijtouaj: “ToTeko Dios, tejua mitsmelaua para tikselis ueyilistli, tetlakaitalistli, niman poder, pampa tejua nochi tlajtlamach otiktlalij niman ken tejua otiknek  otikintlalij niman onokej” (Apocalipsis 4:9-11).

³ “Borreguito” akin noteneua ipan Apocalipsis 5:13 kijtosneki Jesucristo. ¿Kenon tikmatij? Ijkuak yejua nemiya ipan tlaltikpaktli, onotokayoti “borreguito para Dios kintlapojpoluilis intlajtlakoluan nochimej on tlaltikpaktlakamej” (Juan 1:29). ¿Nemi okse tekiuaj akin okinek kitemakas inemilis ken tlaxtlauijli ipampa akin kinyekana? Ika yejon, kinamiki matikueyiteneuakan. Jesús yejua kimelaua makiueyiteneuakan pampa “yejua inTeko impan nochimej on tetekouan niman Rey impan nochimej on reyes” (Apocalipsis 17:14; Romanos 6:9). Kanaj tejua noijki timomachilia ijkon ken iluikaktekitkej akin onokuikatijkej: “¡On Borreguito yejuan okimiktijkaj kimelaua kiselis on poder, on riqueza, on tlamatkilistli, on chikaualistli, on tetlakaitalistli, on ueyilistli niman on yekteneualistli!” (Apocalipsis 5:12).

4. ¿Tleka noneki tikueyiteneuaskej Jehová niman Jesucristo?

⁴ Juan 5:22, 23 kijtoua ika Jehová okitlali Jesucristo yejua makinyolkuiti nochimej tlaltikpakchanejkej. Ika yejon noneki tikueyiteneuaskej Jesús. Ijkuak ijkon tikchiuaj, noijki tikueyiteneuaj Jehová. Niman tla tikueyiteneuaj Jesús niman toTajtsin, uelis tikpiyaskej nemilistli tlen xkeman tlamis (xpoua Salmo 2:11, 12). *

5. ¿Tleka tinochimej kimelaua matechtlakaitakan?

⁵ Tlaltikpakchanejkej okinchijchiujkej ken “itlachialis toTajtsin” (Génesis 1:27). Yejuin kijtosneki ika melak miyekej tlaltikpakchanejkej uelis kiteititiskej ikualneskayouan toTajtsin. Se neskayotl, uelis kiteititiskej ika tetlasojtlaj, teikneliaj niman ika kipiyaj kuajli inyojlo. Tlaltikpakchanejkej noijki otexchijchiujkej ika totlamachilis, tlen techpaleuiya matikmatikan tlen kuajli niman tlen xkuajli, tlen melajki niman tlen xmelajki, tlen kinamiki niman tlen xkinamiki (Romanos 2:14, 15). Miyekej kuelitaj tlemach tlen chipauak niman tlen kualtsin niman kinekij nemiskej ika yolseuilistli iuan oksekimej. Yejuin xtechmojkatlachialtia pampa Jehová se toTajtsin akin kichiua ken noneki niman kuelita yolseuilistli. Kuajli nesi ika tinochimej otexchijchiujkej matiuelikan tikixkopinaskej toTajtsin maski xsan noijki ken oksekimej. Ika yejon, kimelaua matechititikan tlakaitalistli (Salmo 8:5).

6, 7. ¿Tleka iteixpantijkauan Jehová xijkon ken miyekej tlaltikpakchanejkej ijkuak kintlakaitaj oksekimej?

⁶ Tikmatij ika noneki tikintlakaitaskej oksekimej tlaltikpakchanejkej. San ika, kanaj ouijtika yakaj kimatis kenon noneki tetlakaitas niman keski. Yejuin ijkon pampa miyekej tlaltikpakchanejkej tlajtlakolejkej tlanemiliaj ken Satanás. Miyekej tlaltikpakchanejkej melak kinueyiteneuaj tlakamej niman siuamej. Yejuamej kinmakaj ueyiteneualistli tlen san Jehová kimelaua kiselis. Tlaltikpakchanejkej melak kinueyiteneuaj oksekimej, niman kimitaj kentla intajtsitsinuan yeskiaj. Noijki yejuamej kixkopinaj ken notlakentiaj, ken noyekanaj niman tlen kichiuaj akin tlayekanaj ipan política, ipan tlaneltokiltin, akin ueltokej nauiltiaj, akin kisaj ipan tlamauisojli niman oksekimej akin uejueyixtokej.

⁷ Akin melauak kichiuaj ken Cristo kimatij ika xkuajli yeskia kinueyiteneuaskej tlaltikpakchanejkej. Itech nochimej tlaltikpakchanejkej akin yonenkej, san Jesús otechmakak se kuajli neskayotl tlen noneki tikixkopinaskej  (1 Pedro 2:21). Noneki matikilnamikikan ika “nochimej on tlakamej tlajtlakolejkej niman xkipiaj on yolmelajkanemilistli yejuan Dios okinek ma kipiakan” (Romanos 3:23). Nion se tlaltikpakchane xkimelaua makiueyiteneuakan. Ijkuak tikueyiteneuaj se tlaltikpakchane niman xsan tiktlakaitaj, xtikyolpaktiaj Jehová.

8, 9. a) ¿Kenon iteixpantijkauan Jehová kimitaj intlapaleuijkauan tekiuajkej? b) ¿Kemanon xtikintlakamatiskiaj tekiuajkej?

⁸ Nemij sekimej tlaltikpakchanejkej akin kinmelaua matikintlakaitakan ipampa tekitl tlen kipiyaj. Se neskayotl, xtlanemili itech intlapaleuijkauan tekiuajkej niman tlen yejuamej kichiuaj topampa. Yejuamej tlapaleuiyaj kuajli matinemikan niman matikpiyakan tlen techpoloua. Miyek tekitl tlen kichiuaj techpaleuiya. Pablo, itlatitlankauj Cristo, okijto ika itlapaleuijkauan tekiuajkej noneki tikimitaskej ken “tekiuajkej”. Noijki okijto ika noneki tiktlakamatiskej intlanauatiluan: “Nochimej xkintlaxtlauilikan on tlen nenkinuikiliaj” niman “xtlakaitakan on yejuan kimelaua kiselis tetlakaitalistli” (Romanos 13:1, 7).

⁹ Tejuamej ken iteixpantijkauan Jehová tikchiuaj nochi tlen tiuelij niman ijkon tikteititiskej ika tikintlakaitaj intlapaleuijkauan tekiuajkej. Kema, nochi países kipiyaj ken noyekanaj. Ika yejon, tlen intlapaleuijkauan tekiuajkej kichiaj matikchiuakan kampa tichantij xsan noijki yejon kitlajtlani manochiua oksekan. Maski ijkon tikintlakamatij intlapaleuijkauan tekiuajkej ijkuak kichiuaj intekiyo. San ika, tla yejuamej techtlajtlaniliaj matikchiuakan itlaj tlen uelis kichiuas maka matiktlakamatikan Jehová, xuelis tikintlakamatiskej. Ijkuak ijkon panoua, tiktlakamatij niman tikueyiteneuaj Jehová niman maka tlakamej (xpoua 1 Pedro 2:13-17).

10. ¿Kenon itekipanojkauan Jehová akin yeuejkaui onenkej techmakaj se kuajli neskayotl aman?

¹⁰ Tejuamej uelis tomachtiskej itech itekipanojkauan Jehová yeuejkaui. Yejuamej okintlakaitakej tekiuajkej niman intlapaleuijkauan. José niman María okitlalijkej se kuajli neskayotl. Ijkuak tlanauatijkej romanos kinekiyaj kimatiskej kech miyekej tlaltikpakchanejkej chantiyaj ipan país, José niman María oyajkej Belén kampa onoijkuilotoj maski María sa achijtsin poliuiya ika kipiyas ikoneuj (Lucas 2:1-5). Pablo noijki otechmakak se kuajli neskayotl pampa okitlakaitak itlanauatiluan tekiuajkej. Ijkuak okitlajtlakoltijkej ika okichiuj tlen xkuajli, ika tlakaitalistli otlajto ixpan tekiuaj Herodes Agripa niman Festo akin tekiuaj ipan Judea tlen kiyekanaya Roma (Hechos 25:1-12; 26:1-3).

11, 12. a) ¿Tleka xtikinueyiteneuaj tlayekankej ipan tlaneltokiltin? b) ¿Tlenon opanok ijkuak se tokniuj okitlakaitak se tlakatl akin kipiaya ueyi tekitl?

¹¹ ¿Tlenon uelis tikijtoskej itech tlayekankej ipan tlaneltokiltin? ¿Noneki matikinueyiteneuakan? Noneki tikintlakaitaskej ijkon ken oksekimej tlaltikpakchanejkej. San ika, xkuajli yeskia tikinueyiteneuaskej maski tla kichiaj matikchiuakan. ¿Tleka? Pampa tlaneltokijli tlen xmelauak xtemachtia tlen melauak itech toTajtsin niman itech iTlajtol, Biblia. Niman Jesús okinchikaujkanots tlayekankej ipan tlaneltokiltin niman okimijli ika kipiayaj ome inxayak niman xkuajli tlayekankej (Mateo 23:23, 24). Aman itech tekiuajkej kema kuajli yeskia tla melak tikintlakaitaskej. Pampa ijkuak ijkon yonochiuj, kemantika yejuamej yotechpaleuijkej.

¹² Se itlapaleuijkauj tekiuaj niman abogado akin otechpaleui, Heinrich Gleissner, ualeuaya Austria. Ipan ika okpa Guerra ipan nochi tlaltikpaktli, nazis okajsikej. Ijkuak yejua  okuikakej ipan se tren kampa konchiuas chikauak tekitl, okixmat Leopold Engleitner, se tokniuj akin ualeuaya Austria. Tokniuj Engleitner okitomili Gleissner tlen kineltokaya ika tlakaitalistli, niman kuajli okikak tlen okijli. Ijkuak otlan guerra, Gleissner miyekpa okitekitilti tlanauatijkayotl tlen kipiayaj ika okinpaleui tokniuan ipan Austria. Kanaj tejua noijki tikmati itech okseki neskayomej ika melak kuajli onkisa pampa iteixpantijkauan Jehová kintlakaitaj intlapaleuijkauan tekiuajkej.

13. ¿Akinomej melak kinmelaua matikintlakaitakan niman tleka?

¹³ Tokniuan kinmelaua matikintlakaitakan. Niman ok melak noneki matikintlakaitakan tokniuan akin tlayekanaj, ken tlayekankej ipan tlanechikojli, tlayekankej ipan circuito, akin nemij itech Grupo akin tlayekana ipan se Sucursal niman akin nemij itech Grupo akin Tlayekana ipan nochi tlanechikoltin (xpoua 1 Timoteo 5:17). Nochimej kitlajpiyaj ikalpan toTajtsin niman Biblia kinteneua ken “tetlayokoliltin on tlakamej” (Efesios 4:8). Ika yejon kinmelaua matikintlakaitakan maski yejuamej xuejueyimej ixpan oksekimej, san kanon maualeuakan, kech onomachtijkej noso tla kipiyaj tomin noso ka. Akin kachtopa kichiuayaj ken Cristo otechmakakej se kuajli neskayotl. Yejuamej okintlakaitakej tlakamej akin tlayekanayaj niman aman tejuamej noijki ijkon tikchiuaj. Ijkuak imiuan tinemij, xtikimitaj kentla iluikaktekitkej noso uejueyixtokej. San ika, tikintlakaitaj ipampa intekiyo niman yolyemanilistli tlen kipiyaj (xpoua 2 Corintios 1:24; Apocalipsis 19:10).

14, 15. ¿Tleka tokniuan tlayekankej xijkon ken tlayekankej ipan tlaneltokiltin?

 ¹⁴ Tokniuan tlayekankej ken tlajpixkej yolyemankej niman xkinekij makimitakan ken akin uejueyixtokej. Ika yejon xijkon ken miyekej tlayekankej ipan tlaneltokiltin ipan yejuin tonajli. Nion ken akin onenkej ipan itonaluan Jesús. Yejua okijto itech yejuamej: “Kinekij kipiaskej on yejuan más uejueyixtokej sietas ne kampa iluipan, niman on más kuajkualtin sietas ne ipan on tiopantin. Yejuamej kinekij para on tlakamej ma kintlajpalokan ikan miyek tetlakaitalistli ne ipan on plazas” (Mateo 23:6, 7).

¹⁵ Tlayekankej akin kichiuaj ken Cristo kitlakamatij tlen okijto Jesús: “Nemejuamej ma ka nenkimokauiliskej ma mechkuitikan temachtijkej, pampa nochimej nemejuamej nemikniutin niman nenkipiaj san se temachtijketl. Niman ipan in tlaltikpaktli ma ka yakaj nenkijliskej ‘noTajtsinʼ, pampa san se nemoTajtsin nenkipiaj, niman yejua nemi ne iluikak. Nion ma ka nenkimokauiliskej ma mechkuitikan tlayekankej, pampa san nejua niCristo yejuan Dios onechtlalij para tlamandaros, ninemotlayekankau. On yejuan más ueyixtikaj mechpaleuis. On yejuan noueyilia kipias noknelilistli, pero on yejuan noknelis kipias ueyilistli” (Mateo 23:8-12). Ijkuak tlayekankej ipan nochi tlanechikoltin yolyemankej niman kitlakamatij itlajtoluan Jesús, imikniuan kintlasojtlaj niman kintlakaitaj.

16. ¿Tleka melak noneki tochikauaskej tikteititiskej tlakaitalistli?

¹⁶ Kanaj uejkaujtipan panos tikmatiskej ken kinamiki tikintlakaitaskej oksekimej. Ijkon inpan onochiuj akin kichiuayaj ken Cristo ipan kachtopa siglo (Hechos 10:22-26; 3 Juan 9, 10). San ika, melak kuajli yes tla tochikauaj. Ijkuak tikintlakaitaskej oksekimej ken Jehová kineki, tikseliskej miyek tlateochiualistli.

17. ¿Katlejua seki tlateochiualistin tikpiyaskej tla tikintlakaitaj akin kipiyaj tlanauatijkayotl?

¹⁷ Ijkuak tikintlakaitaj akin kipiyaj tlanauatijkayotl kampa tichantij, yejuamej hasta uelis techpaleuiskej ijkuak nemiskej akin xtechkauiliskej matitenojnotsakan. Noijki hasta kuajli tlanemiliskej itech totenojnotsalis. Ikipiya miyek xiuitl, yejuin tlen opanok ipan Alemania ijkuak se tokniuj precursora itoka Birgit oyaj kampa otlan nomachtia ichpoch. Tlamachtijkej okijlikej tokniuj ika melak okuelitakej kinmachtiskej kokonej akin iteixpantijkauan Jehová ipan miyek xiujtin. Noijki okijlikej ika kokonej iteixpantijkauan Jehová melak kuajli tlen kichiuayaj ipan kaltlamachtijli. Tokniuj Birgit okimijli: “Tokoneuan yotikinmachtijkej makitlakamatikan itlanauatiluan toTajtsin itech ken noyekanaskej. Seki yejuin kijtosneki kintlakaitaskej tlamachtijkej”. Se tlamachtijketl okijto ika tla nochimej kokonej yeskiaj ken iteixpantijkauan Jehová, xouijtika kinmachtiskia. Yejuamej kuajli tlanemiliaj intech kokonej akin iteixpantijkauan Jehová, niman se itech yejuin tlamachtijketl oyaj ipan se ueyi tlanechikojli.

18, 19. ¿Tlenon noneki tikilnamikiskej ijkuak tikintlakaitaskej tlayekankej?

 ¹⁸ Tlajtolyekanalistin itech Biblia techpaleuiya matikmatikan ken kinamiki tikintlakaitaskej tlayekankej ipan tlanechikojli (xpoua Hebreos 13:7, 17). Tejuamej uelis niman noneki tikimijliskej ika kuajli kichiuaj intekiyo. Ijkuak tiktlakamatij intlayekanalis, kinpaleuiya makichiuakan intekiyo ika paktli. Biblia kijtoua ika noneki noijki tikixkopinaskej intlaneltokil. San ika, yejuin xkijtosneki ika noneki tikixkopinaskej ken se tokniuj tlayekanketl notlakentia, tlajtoua niman temachtia. Tla tikchiuaskiaj yejon, nesiskia ika tikchiujtokej ken kichiua se tlakatl niman xken Cristo. Noneki maka matikilkauakan ika tlayekankej tlajtlakolejkej ijkon ken tejuamej.

¹⁹ Ijkuak tikintlakaitaj tlayekankej niman xtikimitaj ken akin uejueyixtokej, tikinpaleuiyaj. ¿Tleka? Pampa ijkon xouijtika nochipa yeskej yolyemankej niman xkinemiliskej ika yejuamej uejueyixtokej intech oksekimej noso ika tlen kichiuaj nochipa melak kuajli onkisa.

20. ¿Kenon techpaleuiya ijkuak tikintlakaitaj oksekimej?

²⁰ Ijkuak tikintlakaitaj oksekimej techpaleuiya maka matitlanemilikan san totechkopa niman techpaleuiya matiyolyemankej ijkuak melak techtlakaitaskej. Noijki techtlajpiya maka matiuetsikan ijkuak yakaj akin tiktlakaitaj kichiua itlaj tlen techyolkokoua. Okse ken techpaleuiya ika tinemij san sekan ipan ikalpan Jehová. Ikalpan toTajtsin xkiueyiteneua nion se tlaltikpakchane, maski iteixpantijkauj Jehová noso ka.

21. ¿Katlejua melak ueyi tlateochiualistli tikseliaj ijkuak tikintlakaitaj oksekimej?

²¹ Ijkuak tikintlakaitaj oksekimej, melak ueyi ken techpaleuiya pampa ijkon tikyolpaktiaj toTajtsin. Tla tikintlakaitaj oksekimej, tikteititiskej ika tiktlakamatij toTajtsin niman timelajkanemij itech. Kuakon Jehová uelis kinankilis Satanás akin okijto ika nion se tlaltikpakchane xuelis yolmelaujkanemis itech (Proverbios 27:11). Miyekej tlaltikpakchanejkej xkasikamatij kenon kintlakaitaskej oksekimej ken kinamiki. Tejuamej melak tiktlasojkamatij ika Jehová yotechmachti ken tikintlakaitaskej oksekimej.