NIKILNAMIKI ika se kualkan, tlen ikipiya miyek xiujtin ipan Brookings (Dakota del Sur, Estados Unidos) melak seua katka. Kemach peujtoya ijkuak melak seua. Ninemiya kampa kimejyeuaj yolkamej iuan sekimej tlaltikpakchanejkej, niman tinochimej melak tikuekuetlakayaj. Tinemiyaj nisiuj itech se pila tlen tentoya ika atl tlen melak sesek. Xnechkauilikan manimechijli itlaj itech nonemilis niman ijkon nenkasikamatiskej tleka ompa tinemiyaj.

Nejua onitlakat ipan marzo 7 xiuitl 1936. Nejua nipitentsin katka itech nauimej nokniuan. Tichantiyaj ipan se granja tlen onkatka ipan este itech Dakota del Sur. Nochanejkauan kitayaj ika ueyi kijtosneki tekitl tlen nochiuaya ipan granja. San ika, xsan yejon kitayaj ika melak ueyi kijtosneki. Notajuan yonochiujkaj iteixpantijkauan Jehová. Ipan xiuitl 1934, yejuamej onoapolaktijkej. Yejuamej onosentemakakej itech Jehová. Ika yejon, kitayaj ika kichiuaskej tlen kineki toTajtsin melak ueyi kijtosneki. Notaj itoka katka Clarence. Notaj kachtopa onochiuj siervo de compañía niman sakin notío Alfred ipan se pitentsin tlanechikojli ipan Conde (Dakota del Sur). Siervo de compañía aman noixmati ken akin kixeloua tekitl itech tlayekankej.

Nochanejkauan yayaj ipan tlanechikoltin niman tenojnotsayaj techajchan itech kualtsin tlamachialistli tlen temachtia Biblia. Ineskayo notajuan niman tlamachtijli tlen otechmakakej otechpaleui matiktlasojtlakan Jehová. Nejua iuan nokniuj Dorothy opeuj titenojnotsaj ijkuak tikpiayaj chikuasen xiuitl. Ipan xiuitl 1943, opeuj nipanoua ipan tlanechikojli Kampa Tomachtiaj iTekiyo toTajtsin tlen kemach yopeujka.

 Uejueyimej tlanechikoltin tikitayaj ika melak ueyi kijtosneki. Nejua nikilnamiki se ueyi tlanechikojli tlen onopanolti Sioux Falls (Dakota del Sur) ipan xiuitl 1949. Ompa tokniuj Grant Suiter okitemakak se tlamachtijli tlen itoka katka: “¡Tinemij nisiuj xijkon ken tejua tiknemilia!”. Yejua kuajli okijto ika nochimej tokniuan akin yonosentemakakaj nonekiya kikuiskej innemilis ika tenojnotsaskej kuajli tlajtoltin itech iTekiuajyo toTajtsin. Sakin itech yejon, oninosentemakak itech Jehová. Oninoapolakti ipan okse ueyi tlanechikojli tlen onopanolti ipan noviembre 12 xiuitl 1949 ipan Brookings. Ika yejon, ninemiya kampa melak seua iuan yeyi tlaltikpakchanejkej tlen onikijto kachtopa. Tejuamej itoapolaktiskiaj ompa.

Sakin oniknek ninochiuas precursor. Kuakon opeuj nitekiti ken precursor ipan enero 1 xiuitl 1952 ijkuak nikpiaya 15 xiuitl. Biblia kijtoua: “Akin kistinemi iuan tlamachilise nochiuas tlamachilise”, niman miyekej nemiyaj akin tlamachilisejkej ipan nochanejkauan akin onechpaleuijkej maninochiua precursor (Proverbios 13:20). Miyekpa nontenojnotsaya iuan notío Julius akin ikipiaya 60 xiuitl. Maski melak iueyi katka xijkon ken nejua, tikuelitayaj titenojnotsaskej san sekan. Onka miyek tlen oninomachti itech yejua niman ktlen kimatiya. Dorothy xouejkauj opanok noijki onochiuj precursora.

Ijkuak nikonetl katka, notajuan kuelitayaj kinnotsaskej tlayekankej ipan circuito iuan insiuauan manokauakan tochan. Tokniuj Jesse Cantwell niman isiuauj Lynn melak onechpaleuijkej. Yejuamej najmanayaj nopampa niman nechyolchikauayaj. Ijkuak tokniuan Cantwell kontlajpalouayaj se tlanechikojli tlen nisiuj nokauaya, kemantika niaya imiuan nontenojnotsaya. ¡Melak nikuelitaya ninemis imiuan! Niknekiya nikchiujtos miyek tekitl ijkon ken yejuamej niman ninochiuas precursor.

Okse totlayekankauj ipan circuito katka Bud Miller niman isiuauj Joan. Nejua nikpiaya 18 xiuitl ijkuak otechtlajpalokoj ipan totlanechikol. Ipan yejon tonaltin nejua nonekiya nias kampa teijkuilouaj akin kijtoskiaj tla nias kampa nechmachtiskiaj kenon nitlaixnamikis ipan guerra. Kinekiyaj manikchiua tlen nejua nikitaya kixnamikiya tlanauatijli tlen Jesús okijto itech xtokalaktiskej ipan política (Juan 15:19). San ika, nejua niknekiya nitenojnotsas kuajli tlajtoltin itech Tekiuajyotl. Kuakon oniktlajtlan manechitakan ken se ministro religioso.

 Melak onipak ijkuak tokniuj Miller onechijli ika nouan yaskia kampa teijkuilouaj. Yejua xnomojtiaya, niman xakaj kimakasiya. Noijki melak kuajli kixmatiya iTlajtol toTajtsin. Melak onechyolchikauj pampa nouan nemiya. ¿Tlenon opanok? Ipan xiuitl 1954, kampa teijkuilouaj okiselijkej tlen oniktlajtlanka ika manechitakan ken ministro religioso. Ika yejon, iueliskia nikchiuas chikauak itekiyo Jehová.

Xuejkaujtipan onechnotskej manitlapaleuiti Betel ipan Hacienda Watchtower tlen onka Staten Island (Nueva York). Ompa ninemiya kanaj yeyi xiuitl. Kuajli tlen nopan onochiuj ijkuak nitekitiya iuan tokniuan akin tlamachilisejkej.

Ipan hacienda onkatka emisora de radio WBBR. Iteixpantijkauan Jehová opeuj kikuij yejuin radio itech xiuitl 1924 hasta ipan xiuitl 1957. Se pitentsin grupo kanaj 15 noso 20 betelitas titekitiyaj ipan hacienda. Miyekej titelpokamej katkaj niman xmiyek tikmatiyaj. San ika, touan nemiya se tokniuj akin iueyi, itoka katka Eldon Woodworth, niman yejua tlapejpenijli katka. Yejua kentla totaj yeskia niman otechmachti miyek tlemach. Ijkuak tikpiayaj se tlauejli, tokniuj Woodworth nochipa techijliaya: “Melak kuajli tlen Jehová kichiujtika maski tlajtlakolejkej akin kintekitiltijtika”.

Tokniuj Frederick W. Franz touan nemiya niman melak otechpaleui. Yejua katka se tlakatl tlamachilise akin melak kuajli kixmatiya Biblia. Noijki yejua najmanaya topampa. Akin texchijchiuiliaya tlakuajli itoka katka Harry Peterson. Melauak iapellido katka Papargyropoulos, san ika, Peterson xouijtika tikitayaj. Yejua noijki katka tlapejpenijli niman melak kuelitaya ontenojnotsas. Yejua melak kuajli kichiuaya itekiyo ipan Betel niman xkeman okikajkauj ika tenojnotsas. Nochi metstin kitemakaya melak miyek revistas. Noijki melak kuajli kixmatiya Biblia niman technankiliaya miyek tlen totlajtoltiayaj.

Ipan hacienda, tikchijchiuayaj conservas itech tlakilyomej niman tlen tiktokayaj. Nochi xiuitl tiktemiltiayaj 45,000 latas tlen kipiaya kanaj se litro, tlen nochijchiuiliaya tokniuan betelitas. Nejua nitekitiya iuan tokniuj Etta Huth akin melak tlamachilise yejua okinemili kenon noyektlalis tlakilyomej niman tlen tiktokayaj niman ijkon nochijchiuas conservas. Miyekej tokniuan siuamej itech  tlanechikoltin tlen onkatkaj nisiuj uajtekitiyaj touan. Tokniuj Etta kinpaleuiaya ken kichiuaskej tekitl. Maski yejua melak kimatiya kenon notemiltiskej yejon latas, nochipa okiteititi ika kintlakaitaya tokniuan akin kiyekanayaj tekitl ipan hacienda. Otechmakak tinochimej se kuajli neskayotl.

Angela (Angie) Romano yejua katka se ichpochtli akin techuajpaleuiayaj. Angie katka se ichpochtli akin Etta okipaleui makixmati tlen melauak. Nejua niman Angie otonamiktikej ipan abril xiuitl 1958. Itech 58 xiuitl yotiktekichiuilijkej Jehová san sekan. Pampa Angie nochipa yonen itech Jehová, yokichiuj machikaui tonamiktilis. Yejua se siuatl melak tlamachilise niman ueli itech kuajli nitlaneltoka maski san tlenon mapano.

Ipan 1957 ijkuak okinemakakej kampa onkatka emisora de radio WBBR ipan Staten Island, seki tonaltin onitlapaleui ipan Betel tlen onka Brooklyn. Ijkuak nejua iuan Angie otonamiktijkej, onijkauj notekiyo ipan Betel. Ipan yeyi xiuitl otitlapaleuijkej ken precursores ipan Staten Island. Itech seki tonaltin, hasta onitekit inuan akin okikoujkej emisora de radio tlen okitokayotikej WPOW.

Nejua iuan Angie tinemiyaj san ika achijtsin pampa ijkon ueliskiaj tiaskej san kanon kampa nonekiskia titlapaleuiskej. Ika yejon, ipan xiuitl 1961 ouel otikselijkej titlapaleuiskej ken precursores especiales ipan Falls City (Nebraska). Ijkuak san kemach otajsikej ompa, otechnotskej ika se metstli matiuiyan South Lansing (Nueva York) kampa tikseliskiaj Tlamachtijli itech iTekiyo Tekiuajyotl. Melak otikuelitakej tlamachtijli niman otiknemilijkej ika sakin tokuepaskiaj oksejpa Nebraska. Melak otitlamojkaitakej ijkuak otechijlikej tiaskej ken misioneros ipan Camboya. Ipan yejon kualtsin país tlen nokaua sureste itech Asia, otikitakej, otikajkej niman otikmatkej miyek tlen yenkuik katka. Yemelak tiknekiyaj titenojnotsaskej itech kuajli tlajtoltin itech Tekiuajyotl ipan yejon país.

San ika, onopatlak ken tekitij tekiuajkej ipan Camboya. Ika yejon, ononek tiaskej Vietnam del Sur. Sakin ijkuak yopanoka ome xiuitl melak onikualok niman ononek tokuepaskej Estados Unidos. Opanok seki tonaltin niman onipajtik. Ijkuak kuajli ininomachiliaya, oksejpa opeuj titekitij ken precursores.

Ipan marzo xiuitl 1965, opeuj nitlapaleuiya ken tlayekanketl ipan circuito. Itech 33 xiujtin nejua iuan Angie yotitlapaleuijkej ipan miyek circuitos niman distritos. Noijki yotitlapaleuijkej ipan uejueyimej tlanechikoltin. Melak nikuelitaya nikchiuas yejon tekitl, pampa melak nikuelita uejueyimej tlanechikoltin. Ipan seki xiujtin, tikintlapalouayaj tlanechikoltin ipan Nueva York niman iyeualiyan. Miyek uejueyimej tlanechikoltin otikinpixkej ipan Estadio de los yankees.

Nejua niman Angie otikselijkej miyek yenkuik tekitl tlen ouijtika ipan miyek xiujtin. Ipan xiuitl 1995, onechijlikej manitemachti ipan Escuela de Entrenamiento Ministerial. Yeyi xiuitl sakin, otechnotskej Betel. Kuakon, 40 xiujtin sakin, melak oniyolpak ninokuepas Betel, kampa opeuj  chikauak nitlapaleuiya. Sakin onitlapaleui ipan Grupo akin kiyekana itech ken notenojnotsa niman ken temachtijketl kampa notemaka tlamachtijli. Ipan xiuitl 2007, Grupo akin Tlayekana okitlali kampa noyekanaj tlamachtiltin itech Biblia tlen nochiuaj Patterson niman tlamachtiltin tlen notemakaj ipan Betel. Ipan seki xiujtin nejua ninemiya ompa ken tlayekanketl.

Ipan xiujtin tlen san kemach opanokej, miyek yonopatlak itech tlamachtiltin tlen notemakaj ipan Betel. Ipan 2008 opeuj Tlamachtijli tlen kiseliaj Tlayekankej itech Tlanechikojli. Niman ipan ome xiuitl, ipantsin 12,000 tokniuan tlayekankej yokiselijkej tlamachtijli ipan Patterson niman ipan Betel tlen onka Brooklyn. Yejon tlamachtijli aman notemakatika miyekan. Ipan 2010 tlamachtijli tlen itoka Escuela de Entrenamiento Ministerial onopatlak ika Tlamachtijli itech Biblia tlen kiseliaj akin Xnonamiktiaj, niman se yenkuik tlamachtijli onotlali, itoka Tlamachtijli itech Biblia tlen kiseliaj akin Yononamiktijkej.

Ipan septiembre 2014, yejon ome tlamachtiltin onosentlalijkej niman onochiuj san se tlamachtijli tlen onotokayoti Tlamachtijli tlen kiseliaj Akin Tenojnotsaj itech iTekiuajyo toTajtsin. Nomachtijkej yeskiaj tokniuan akin yononamiktijkej, tokniuan telpokamej niman tokniuan ichpokamej akin xnonamiktiaj. Miyekej tokniuan ipan nochi tlaltikpaktli melak opajkej ijkuak okikakej ika ipan inpaís noijki notemakaskia yejuin tlamachtijli. Teyolpakti pampa miyekej uelis kiseliskej yejon tlamachtiltin. Melak niyolpaki pampa yonikimixmat miyekej akin yokipatlakej innemilis niman ijkon kiseliskej yejuin tlamachtijli.

Ijkuak nitlanemilia itech nonemilis achtopa ninoapolaktiskia ipan yejon tanque ika atl sesek hasta aman, niktlasojkamachilia Jehová pampa yonikimixmat akin tlamachilisejkej. Yejuamej yonechpaleuijkej manikixmati niman melak kuajli maniktekichiuili. Sekimej katka telpokamej xijkon ken nejua niman oksekimej iuejueyimej. Niman miyekej oksekan ualeuayaj. San ika, yonikitak ika itech tlen kichiuaj niman ken tlanemiliaj kitlasojtla Jehová ika nochi inyojlo. Melak niyolpaki ika akin imiuan ninouika ipan ikaIpan Jehová tlamachilisejkej niman ninomachtia itech yejuamej.