1. Maski akin nonamiktiaj peuaj ika miyek pakilistli, ¿tlenon uelis panos ipan innemilis? (Xkita tlaixkopinajli kampa peua tlen tomachtijtokej).

IJKUAK se tlakatl kachtopa kita siuatl akin iuan nonamiktis, omemej melak yolpakij ipan yejon tonajli. Ijkuak yejuamej opeuj noixmatiyaj, intlasojtlalis opeuj ueyiya niman okinejkej nonamiktiskej niman omemej okijtokej ika xkeman nokauaskej. Itech yejon tonajli ika tlayekapan ijkuak ononamiktijkej, peuaj san sekan nemiskej. San ika, noneki kipatlaskej itlaj ipan inemilis niman ijkon san sekan nemiskej nochipa. Jehová, akin okitlali namiktilistli, kineki ika akin yononamiktijkej mapakikan niman kuajli makisatij. Ika yejon, yejua yokinmakak tlajtolpaleuilistin tlen ualeuaj ipan Biblia (Proverbios 18:22). Maski ijkon, Biblia kijtoua ika tejuamej titlajtlakolejkej niman akin nonamiktiaj uelis kipiyaskej tlauejli noso tlen “kimpajsoloua ipan” innemilis (1 Corintios 7:28). Kuakon, ¿tlenon uelis kichiuaskej niman ijkon xkipiyaskej miyek tlauejli akin yononamiktijkej?  ¿Kenon kuajli onkisaskej akin yononamiktijkej?

2. ¿Katlejua tlasojtlalistli noneki kiteititiskej akin yononamiktijkej?

² Biblia temachtia ika tlasojtlalistli se kualneskayotl tlen melak noneki. San ika, miyek ken noneki kiteititiskej akin yononamiktijkej. Se neskayotl, yejuamej noneki kipiyaskej tlasojtlalistli tlen kipiyaj akin kuajli nouikaj niman tlasojtlalistli tlen kimachiliaj omemej akin nouelitaj. Noijki tla yejuamej kinpiyaj inkoneuan, melak noneki kiteititiskej tlasojtlalistli itech inchanejkauan. San ika, tlasojtlalistli tlen kisa itech tlajtolyekanalistin yejon tlen kichiua melak kuajli makisatij akin yononamiktijkej. Pablo, itlatitlankauj Cristo, okijto kenon yejuin tlasojtlalistli: “On tlakatl noneki kitlajsojtlas isiuau sa no ken yejua notlajsojtla, niman on siuatl no noneki kitlakaitas iueuentsin” (Efesios 5:33).

3. ¿Kenon noneki yes intlasojtlalis akin yononamiktijkej?

³ Pablo okijkuilo: “Tlakatl ma kitlajsojtla isiuau ijkon ken Cristo okintlajsojtlak on yejuan kineltokaj niman impampa onotemakak para omik” (Efesios 5:25). Akin kichiuaj ken Cristo kixkopinaj ineskayo Jesús ijkuak notlasojtlaj se iuan okse ijkon ken yejua okintlasojtlak inomachtijkauan (xpoua Juan 13:34, 35; 15:12, 13). Se teueuentsin niman se tesiuauj noneki melak notlasojtlaskej niman hasta kinekiskej mikiskej ipampa imixnamik. San ika, ijkuak kipiyaj se ueyi tlauejli ipan innamiktilis, sekimej kinemiliskej ika xueyi kipiyaj intlasojtlalis. ¿Tlenon uelis kinpaleuis? Tlasojtlalistli tlen kisa itech tlajtolyekanalistin. Yejuin tlasojtlalistli “kixikoua nochi tlajtlamach tlen xkuajli”, “kineltoka on tlen kuajli intech oksekimej”, “kinnekilia nochi kuajli ma uajla impan oksekimej”, “kimijyouis oksekimej” niman “xkeman tlamis” (1 Corintios 13:7, 8). Akin yononamiktijkej noneki kilnamikiskej ika okinoijlikej ika nochipa notlasojtlaskej niman xkeman nokauaskej. Tla kilnamikij yejuin kinpaleuis makitejtemokan itlapaleuilis Jehová niman san sekan tekitiskej kiyektlaliskej maski san katlejua tlauejli.

4, 5. a) ¿Tlenon tekitl kipiya se akin tlayekana itech ichanejkauan? b) ¿Kenon noneki kitas se tesiuauj itekiyo? c) ¿Tlenon ononek kipatlaskej omemej akin yononamiktijkej?

⁴ Pablo okijto tlen noneki makichiuakan akin yononamiktijkej ijkuak okijto: “Siuamej, se siuatl ma kitlakamati iueuentsin ken kitlakamati on toTeko. Ijkon xchiua, pampa Dios okitlalij on tlakatl ken yejua tlayekanketl itech isiuau, ijkon ken Cristo yejua tlayekanketl intech on yejuan kineltokaj” (Efesios 5:22, 23). Yejuin xteasikamachiltia tla tesiuauj xueyi kijtosneki itech teueuentsin. Jehová kijtoua ika melak ueyi kijtosneki itekiyo se tesiuauj ijkuak okijto: “Xkuajli ika tlakatl iselti manento. Nikchijchiuilis se akin makipaleui, tlen makonaxilti” (Génesis 2:18). Se tesiuauj noneki kipaleuis iueuentsin kuajli matlayekana itech ichanejkauan. Niman se teueuentsin noneki kichiuas ken Jesús okichiuj, akin “tlayekanketl intech on yejuan kineltokaj”. Ijkuak se teueuentsin kichiua yejuin, isiuauj ika iyojlo nomachilia  niman xouijtika kitas kitlakaitas niman kipaleuis.

⁵ Cathy, akin ononamikti iuan Fred, kijtoua: “Ijkuak san noselti katka, nejua nikmatiya tlen nikchiuas niman san nejua ninotlajpiaya. Namiktilistli okichiuj maninopatla niman ijkon ninokauilis manechyekana noueuentsin. Yejon kemantika ouijtika nikitaya. San ika, ijkuak tikchiuaj ken Jehová kineki, techpaleuiya kuajli matouikakan” ^[1] (xkita nota kampa ontlami). Fred kijtoua: “Xnochipa nimantsin niueliya niktlapejpenis tlen nikchiuas. Ipan namiktilistli, ok melak ouijtika niktlapejpenis tlen nochiuas pampa xok san noselti. San ika, ijkuak niktejtemoua itlayekanalis Jehová ika teoyotl niman nijkaki kuajli nosiuauj, kichiua ika nimantsin matikchiuakan tlen noneki. ¡Nikmachilia ika melak kuajli san sekan titekitij tiomemej!”.

6. ¿Kenon tlasojtlalistli tepaleuiya san sekan manemikan akin yononamiktijkej ijkuak kipiyaj tlauejli?

⁶ Akin yononamiktijkej uelis kuajli nouikaskej tla kichiuaj yejuin tlanauatijli: “Xpiakan ijyouilistli iuan oksekimej, niman xmotlapojpoluikan tla yakaj mechtlauelkuitia”. Pampa yejuamej tlajtlakolejkej, uelis nopopoloskej. Ijkuak yejon panos, uelis nomachtiskej itech tlen onopopolojkej, nomachtiskej notlapopoluiskej niman kiteititiskej tlasojtlalistli tlen kisa ipan tlajtolyekanalistin itech Biblia. Yejuin tlasojtlalistli “kajxitia [‘kisentlalia’, TNM] nochi in tlajtlamach” (Colosenses 3:13, 14). Akin yononamiktijkej uelis kiteititiskej yejuin tlasojtlalistli ijkuak teijyouiskej niman teikneliskej niman “xsa konelnamik[toskej] on tlen oksekimej xkuajli ki[n]chiuiliaj” (1 Corintios 13:4, 5). Ijkuak xnotlajtolnamikij akin yononamiktijkej, uelis kiyejyekoskej nimantsin kiyektlaliskej itech tlen xonotlajtolnamijkej ijkuak xitlami tonajli (Efesios 4:26, 27). Itech yejuin noneki kipiyaskej yolyemanilistli niman chikaualistli ika noijliskej: “Xnechtlapopolui pampa onimitsyolkoko”. Tla ijkon kichiuaj, kinpaleuis makiyektlalikan tlauejli niman kuajli manouikakan san sekan.

7, 8. a) ¿Tlenon tlajtolpaleuilistli kitemaka Biblia itech ijkuak san sekan notekaskej akin yononamiktijkej? b) ¿Tleka noneki akin yononamiktijkej makiteititikan iknelilistli?

⁷ Biblia kitemaka kuajli tlajtolpaleuilistin tlen uelis kinpaleuis akin yononamiktijkej makitakan ken noneki ijkuak se tlakatl iuan siuatl san sekan notekaj (xpoua 1 Corintios 7:3-5). Itech yejuin melak noneki ika teueuentsin niman tesiuauj matlanemilikan itech tlen kimachilia imixnamik niman tlen kipoloua. Tla se teueuentsin xkiknelia isiuauj, yejua melak ouijtika yolpakis ijkuak san sekan notekaskej. Teueuentsitsinuan noneki nouikaskej iuan insiuauan ika tlaixmatilistli (1 Pedro 3:7). Se teueuentsin xkipiya ika kichiualtis isiuauj iuan manoteka, noneki san sekan notekaskej ijkuak omemej kinekiskej. Miyekpa se tlakatl nimantsin kineki xijkon ken se siuatl. San ika, noneki nochiuas ijkuak omemej kuajli nomachiliaj.

⁸ Biblia xkimelajkaijtoua kenon kipiya kititis se ixnamik tlasojtlalistli ijkuak  nemij inselti. San ika, kema kiteneua ika noneki manoteititi tlasojtlalistli (El Cantar de los Cantares 1:2; 2:6). Akin yononamiktijkej noneki kipiyaskej iknelilistli.

9. ¿Tleka xkuajli tla tikteititiaj ika tikuelitaj yakaj akin xtoixnamik?

⁹ Ijkuak tikpiyaj ueyi totlasojtlalis itech toTajtsin niman ipampa oksekimej, xtlaj nion xakaj tijkauiliskej makijtlako tonamiktilis. Sekimej yokijtlakojkej innamiktilis pampa nochipa kimauisouaj kampa auilnemilo. Noneki tikmapeuaskej nochi tlen uelis kichiuas matechyoltilana tiknekiskej tikmauisoskej kampa auilnemilo noso itlaj okse kampa noteititis ika tiknekij tikajkayauaskej toixnamik. Tejuamej noneki xtikchiuaskej itlaj tlen mateasikamachilti ika tikuelitaj yakaj akin xtoixnamik, pampa ijkon xnoteititia tlasojtlalistli. Noneki matikilnamikikan ika toTajtsin kimati tlenon tiknemiliaj niman tlen tikchiuaj. Yejuin techpaleuis melak matiknekikan tikyolpaktiskej niman xkeman tijkauaskej toixnamik (xpoua Mateo 5:27, 28; Hebreos 4:13).

10, 11. a) ¿Tlenon kichiuaj miyekej akin yononamiktijkej? b) ¿Tlenon kijtoua Biblia ijkuak noxelouaj akin yononamiktijkej? c) ¿Tlenon kinpaleuis xnimantsin noxeloskej akin yononamiktijkej?

¹⁰ Ijkuak onka tlauejli niman xueli noyektlalia, sekimej akin yononamiktijkej kinemiliaj noxeloskej noso nokauaskej. Ipan seki países, kanaj panoua tlajko akin yononamiktijkej nokauaj. Yejuin xnochipa ijkon nochiua ipan ikalpan toTajtsin. San ika, miyekej akin yononamiktijkej kixnamiktokej tlaueltin ipan innamiktilis.

¹¹ Biblia kitemaka yejuin tlanauatijli: “On siuatl ma ka ma nokakaua noso noxotoni iuan iueuentsin. Pero tla se siuatl nokakaua noso noxotonia iuan iueuentsin, ma ka ma nonamikti iuan okse tlakatl, noso tla ueli ma noyoltlali iuan iueuentsin. Niman no ijki on tlakatl ma ka ma nokakaua noso noxotoni iuan isiuau” (1 Corintios 7:10, 11). Sekimej akin yononamiktijkej uelis kinemiliskej ika kipiyaj melak ueyi tlauejli niman kitaskej ika noneki noxeloskej. San ika, Jesús okiteititi ika maka san makauilmatikan noxeloskej ijkuak oksejpa okijto tlen toTajtsin kinekiya ijkuak okitlali namiktilistli niman kuakon okijto: “Yejua ika se tlakatl xuelis kixelos on tlen Dios okisentlalij” (Mateo 19:3-6; Génesis 2:24). Kuakon Jehová kineki ika teueuentsin niman tesiuauj nochipa san sekan manemikan (1 Corintios 7:39). Tinochimej noneki tikilnamikiskej ika titlanankiliskej ipampa tlen tikchiuaj ixpan Jehová. Yejuin techpaleuis nimantsin matikyektlalikan tlauejli niman maka ueyiyas.

12. ¿Tlenon uelis kichiuas makinemilikan noxeloskej akin yononamiktijkej?

¹² ¿Tleka sekimej akin yononamiktijkej kipiyaj tlauejli? Kanaj sekimej xonochiuj tlen kichiayaj itech innamiktilis niman xyolpakij niman san kualantokej. Miyekpa kipiyaj tlaueltin pampa tlamantik noso sejneka ken onoskaltijkej noso xsan noijki ken nomachiliaj. Noijki uelis ipampa inmontajuan noso itech ken kikuiskej tomin noso ipampa inkoneuan. San ika, kuajli tikitaj ika akin kichiuaj  ken Cristo kinextiaj kenon kiyektlaliskej tlauejli pampa yejuamej kikauiliaj toTajtsin makinyekana.

13. ¿Tleka uelis noxeloskej akin yononamiktijkej?

¹³ Uelis onias tleka akin yononamiktijkej noxeloskej. Se, ijkuak se xkineki kinmakas ichanejkauan tlen kinpoloua. Ika ome, melak kiuisoki ixnamik. Niman ika yeyi, ijkuak kichiua maka sa makitekichiuili toTajtsin. Ika yejuin sekimej yokinemilijkej noxeloskej. Ijkuak onka se ueyi tlauejli, akin yononamiktijkej noneki kintlajtlaniliskej tlayekankej ipan tlanechikojli tlapaleuilistli. Yejuin tokniuan kipiyaj miyek tlaixmatilistli niman uelis kinpaleuiskej makichiuakan itlajtolpaleuilisuan toTajtsin. Niman ijkuak akin yononamiktijkej kitlajtlaniliaj Jehová iespíritu santo, uelis kinpaleuis makichiuakan tlajtolyekanalistin itech Biblia niman kipiyaskej kualneskayomej (Gálatas 5:22, 23) ^[2] (xkita nota kampa ontlami).

14. ¿Tlenon kimijlia Biblia akin kipiyaj imixnamik akin xkiueyichiua Jehová?

¹⁴ Biblia kijtoua ika onka tleka akin yononamiktijkej manemikan san sekan maski tla imixnamik xkiueyichiua Jehová (xpoua 1 Corintios 7:12-14). Ixnamik se tokniuj akin xkiueyichiua Jehová “kiselia se tlatiochiualistli” pampa yejua kitekichiuilia toTajtsin. Niman inkoneuan noijki kiseliaj “itlatiochiualis Dios” niman kinpaleuiya toTajtsin. Pablo okimijli yejuin tlajtoltin akin kichiuaj ken Cristo: “Siuatl, tejua xtikmati, pero kas moueuentsin kiselis temakixtilistli san mopampa. Noso tejua tlakatl, tejua xtikmati, pero kas mosiuau kiselis temakixtilistli san mopampa” (1 Corintios 7:16). Onka miyek neskayomej itech kenon teueuentsitsinuan niman tesiuauan akin kichiuaj ken Cristo  yokipaleuijkej imixnamik noijki makitekichiuili Jehová.

15, 16. a) ¿Tlenon tlajtolpaleuilistli kinmaka Biblia tesiuauan akin kipiyaj inueuentsitsinuan akin xkitekichiuilia toTajtsin? b) ¿Tlenon noneki kichiuas teueuentsin noso tesiuauj akin kichiuaj ken Cristo tla ixnamik kinemilia noxelos itech?

¹⁵ Pedro, itlatitlankauj Cristo, okintlajtolpaleui tesiuauan ika makintlakaitakan inueuentsitsinuan, “tla se de nemejuamej kipia iueuensin yejuan xkineltoka itemachtil Dios, uelis noyoleuas  ika on ken tejua timouikas, niman xafuerza tiknojnotsas, pampa kitas ken ikan chipaualistli timouika, niman ken ijki tiktlakaita Dios”. Kuakon xnoneki kinnojnotsaskej itech intlaneltokil san nochipa. Se tesiuauj uelis kichiuas ika iueuentsin manomachti tlen melauak ijkuak yejua kiteititis ika “yolyemanki niman tenotski. In, tej, yejua ueyi kijtosneki ixpan Dios” (1 Pedro 3:1-4).

¹⁶ Tla se teueuentsin noso tesiuauj akin xkiueyichiua toTajtsin kinemilia noxelos itech ixnamik, Biblia kijtoua ika tla “yejua kineki tekauas noso noxotonis, ma kichiua. Ijkon, tej, on tokniu tlakatl noso on tokniu siuatl nokauas tlamakajtli, pampa Dios otechnots para tinemiskej ikan yolseuilistli” (1 Corintios 7:15). Maski ijkuak noxelouaj kuajkui yolseuilistli, teueuentsin noso tesiuauj akin kitekichiuilia Jehová xuelis oksejpa nonamiktis ijkon ken tlanauatia Biblia. San ika, yejua xkipiya ika kiyejyekos kichiualtis ixnamik iuan manemi. Sakin akin xkiueyichiua Jehová uelis kinemilis nokuepas itech ixnamik, pampa kineki iuan noyolseuis. Niman ika tlayekapan kanaj yejua uelis noijki peuas kitekichiuilis Jehová.

17. ¿Tlenon noneki kitaskej ika melak ueyi kijtosneki ipan innamiktilis akin kichiuaj ken Cristo?

¹⁷ Pampa tinemij ipan sa itlamiyan tonaltin, tipanouaj “sanoyej xkuajli tonaltin” (2 Timoteo 3:1-5). Ika yejon, melak noneki matikchikauakan ken iuan touikaj Jehová aman. Pablo okijto ika “xok tikpiaj miyek tonaltin”. Noijki okijto ika akin “yononamiktijkej ma nemikan ken xnonamiktiskiaj” (1 Corintios 7:29, 30). Pablo xkijtosnekiya tla akin yononamiktijkej maka makimakakan imixnamik tlen noneki. Pampa tinemij ipan sa itlamiyan tonaltin, noneki tikitaskej ika melak ueyi kijtosneki tikueyichiuaskej Jehová (Mateo 6:33).

18. ¿Tleka uelis yolpakiskej niman kuajli onkisaskej akin yononamiktijkej?

¹⁸ Ipan yejuin tonaltin tlen ouijtika, tikimitaj miyekej akin yononamiktijkej xkuajli onkisaj. ¿Uelis yolpakiskej akin yononamiktijkej niman kuajli onkisaskej? Kema, tla yejuamej nemij nisiuj itech Jehová niman ikalpan; kichiuaj tlajtolyekanalistin itech Biblia niman kiseliaj makinyekana iespíritu santo Jehová. Ijkuak ijkon kichiuaj, kiueyichiuaskej toTajtsin akin “okinsentlalij” akin yononamiktijkej (Marcos 10:9).