Yejuin san se itech miyek tlemach tlen akin kitlauelitayaj Jesús okiteneuilijkej niman inomachtijkauan. Tlanauatijli tlen okimakakej Moisés otetomili tlen ueliskia kichiuas akin notsokuilouaya. Se neskayotl, ken ijkuak se yesuetsi, kipiya lepra noso kikitskia se tlaltikpakchane akin yomik noso se yolki. Ipan yejon tlanauatijli noijki kijtouaya ken uelis nochipauas oksejpa. Yejuin uelis yes ika se uentli, nopajpakas niman titlauichuis (Levítico, tlaxeloltin uejueyimej 11-15; Números, tlaxelojli ueyi 19).

Tlayekankej ipan tlaneltokiltin okitlalijkej okseki tlanauatiltin itech Tlanauatijli tlen okimakakej Moisés. Se amoxtli kijtoua ika okitlalijkej okseki tlanauatiltin noso miyek itech kenon uelis se notsokuilos niman kintsokuilos oksekimej. Yejon tlakamej noijki okitlalijkej tlanauatiltin itech tlemach tlen notekitiltia tlen ueliskia noso ka notsokuilos niman costumbres tlen nonekiya makichiuakan tlaltikpakchanejkej niman ijkon oksejpa machipaujkej.

Akin kitlauelitayaj Jesús okitlajtoltijkej: “¿Tlika on monomachtijkauan xnomajtekiyaj ijkon ken otechititijkej on ueuetkej tlajtlajmatkej?” (Marcos 7:5). Yejon fariseos xtlajtouayaj itech chipaualistli niman ijkon kuajli matinemikan. Yejuin katka timomapajpakas ijkuak titlakuas. Fariseos yokintlalijkaj tlanauatijli ika achto tlakuas se tlaltikpakchane nonekiya kinotoyauilis atl ipan imauan ken se costumbre. Yejon amoxtli tlen yotikteneujkej kijtoua ika tlayekankej ipan tlaneltokiltin noijki xnotlajtolnamikiyaj itech tlen kikuiskej tlen ika kitoyauaskej atl, tlen atl notekitiltis, akinon nonekiya kitoyauas atl niman hasta kanon nonekiya manotoyaua atl ipan imauan se tlaltikpakchane.

¿Tlenon okijto Jesús itech nochi yejon okseki tlanauatiltin tlen okintlalijkej tlakamej? Yejua okimijli judíos tlayekankej ipan tlaneltokiltin: “Kuajli okijtoj on tiotlajtojketl Isaías nemotechkopa nemejuamej omexayakyekej, ijkuak okijkuiloj ken Dios okijtoj. Okijtoj: ‘Yejuamej in tlakamej nechtlakaitaj san ika inkamak, pero xnechtlakaitaj ikan inyojlo [nejua niJehová]. Sanenkaj nechmauistiliaj, pampa yejuamej kitemachtiaj on tlanauatiltin yejuan on tlakamej okitlalijkej ken itlanauatiluan yeskiaj Dios’. Kemaj Jesús okimijlij: ‘Xnenkitlakamatij on tlinon Dios omechnauatij, pero nenkitlakamatij yejua on tlinon on ueuetkej tlajtlajmatkej otemachtijkaj. Niman nenkichiuaj okseki miyek tlajtlamach no ijki’” (Marcos 7:6-8).