1, 2. ¿Tleka noneki tikinmachtiskej oksekimej kenon kuajli kichiuaskej se kuajli tekitl ipan tlanechikojli?

JESÚS melak chikauak otenojnots itech Tekiuajyotl. Yejua ouejkauj okinmachti inomachtijkauan. Yejua noijki okimititi kenon temachtiskej niman kenon kintlajpiyaskej akin kitekichiuiliaj toTajtsin. Inomachtijkauan onomachtijkej kenon yeskej kentla tlajpixkej akin kintlajpiyaskiaj borreguitos (Mateo 10:5-7). Felipe noijki chikauak otenojnots niman okinpaleui iichpokauan makichiuakan ken yejua (Hechos 21:8, 9). Ipan yejuin tonajli noijki noneki tikinmachtiskej oksekimej kenon kichiuaskej se tekitl. ¿Tleka?

² Ipan nochi tlanechikoltin, nemij miyekej akin yenkuikej niman xinoapolaktiaj. Yejuamej noneki kinmachtiskej kenon kichiuaskej tekitl. Tejuamej noneki tikinpaleuiskej makasikamatikan tleka melak kuajli tla kipouaj niman nomachtiaj Biblia. Noijki noneki tikinmachtiskej kenon tenojnotsaskej itech kuajli tlajtoltin niman kenon temachtiskej itech Biblia. Tokniuan akin san kemach onoapolaktijkej noneki kinpaleuiskej niman ijkon  sakin uelis nochiuaskej ken tlapaleuijkej niman tlayekankej. Tinochimej ipan tlanechikojli uelis tikinpaleuiskej tokniuan akin yenkuikej (Proverbios 4:2).

3, 4. a) ¿Kenon okijto Pablo ika tomachtiskej iTlajtol toTajtsin tepaleuiya ipan totenojnotsalis? b) ¿Tlenon noneki kachtopa tikchiuaskej tejuamej niman ijkon tikinyolchikauaskej akin tikinmachtiaj manomachtikan Biblia?

³ Tinochimej noneki tikpouaskej niman tomachtiskej Biblia niman ijkon tikmatiskej tlenon kineki toTajtsin. Pablo, itlatitlankauj Cristo, okimijli akin kichiuaj ken Cristo ipan tlanechikojli Colosas ijkuak okijto: “Xtikajkauaj para tikchiuaj oración nemopampa. Tiktlajtlaniliaj Dios ma mechpaleui nenkimatiskej nochi on tlen kineki para nenkichiuaskej itechkopa”. ¿Tleka melak nonekiya ika yejuamej makipouakan niman manomachtikan iTlajtol toTajtsin? Pampa tla ijkon kichiuaskiaj, kipiyaskiaj tlamachilistli niman kasikamatiskiaj kenon “kipaktiskej toTeko [Jehová]” ika innemilis. Noijki ueliskiaj kichiuaskej “nochi tlajtlamach tlen kuajli” tlen Jehová kineki makichiuakan, ken tenojnotsaskej kuajli tlajtoltin (Colosenses 1:9, 10). Kuakon, tla tejuamej tomachtiaj iuan yakaj, noneki tikpaleuiskej makasikamati ika tla kipoua niman tla nomachtia Biblia mojmostla uelis kipaleuis kuajli makitekichiuili Jehová.

⁴ Tejuamej xuelis tikinpaleuiskej akin tikinmachtiaj itech Biblia makasikamatikan ika melak tepaleui timomachtis Biblia tla tejuamej xtomachtiaj. Tla tejuamej nochipa tikpouaj Biblia niman titlanemiliaj itech tlen tikpouaj, yejuin techpaleuis ipan tonemilis niman ipan totenojnotsalis. Se neskayotl, ijkuak yakaj kampa titenojnotsaj techtlajtoltis itlaj tlen ouijtika, uelis tikmatiskej kenon tiknankiliskej ika Biblia. Noso ijkuak tikpouaj kenon Jesús, Pablo niman oksekimej xonosiaujkaujkej ipan intenojnotsalis, techyolchikauas niman xtijkajkauaskej ika titenojnotsaskej maski ijkuak ouijtika. Niman ijkuak tikinnojnotsaskej oksekimej tlen yotomachtijkej niman kenon yotechpaleui yejon, uelis tikinyolchikauaskej makinekikan nomachtiskej Biblia niman ijkon noijki uelis ika nopaleuiskej.

5. Xkijto kenon uelis tikinpaleuis akin yenkuikej makinekikan nomachtiskej Biblia inselti.

⁵ Kanaj kemantika timotlajtoltia: “¿Kenon uelis nikinpaleuis akin nikinmachtia makinekikan nomachtiskej Biblia?”. Kanaj kachtopa uelis tikimititis kenon nomachtiskej san yejuamej amatlajkuilojli tlen tiktekitiltia ijkuak inuan timomachtia. Tejua noijki uelis tikimijlis  makipouakan tlen kijtoua ipan apéndice tlen kipiya amoxtli ¿Tlenon melauak temachtia Biblia? niman makitejtemokan tlaxeloltin ipan Biblia tlen ompa noteneua. Noijki uelis tikimititis kenon nomachtiskej tlen noitas ipan tlanechikoltin niman ijkon uelis tlanankiliskej. Xkinyolchikaua makinpouakan nochi revistas tlen kisaj, ken Amatl Tekakistilijketl niman ¡Despertad! Noijki uelis tikimititis kenon kinextiskej tlanankilistli itech tlajtoltilistin itech Biblia. Uelis kikuiskej Watchtower Library niman BIBLIOTECA IPAN INTERNET Watchtower. Ijkuak yejuamej kiyejyekoskej nomachtiskej ika yejuin, melak kuelitaskej niman kinekiskej nomachtiskej okseki.

6. a) ¿Kenon uelis tikpaleuiskej akin tikmachtiaj makineki ika nochi iyojlo manomachti Biblia? b) ¿Tlenon uelis kichiuas se nomachtijketl itech Biblia tla ika nochi iyojlo kitlasojtla iTlajtol toTajtsin?

⁶ Ijkuak iuan yakaj tomachtiaj tiknekij makasikamati ika Biblia melak tepaleui, pampa uelis kipaleuis kuajli makixmati Jehová. Xnoneki tikchiualtiskej manomachti, tejuamej uelis tikititiskej kenon makuelita ijkuak nomachtis. Ijkuak peuas melak nomachtis itech Biblia, noijki nomachilis ijkon ken salmista ijkuak okijto: “Nechpaleuiya ika ninonisiuiya itech toTajtsin. Ipan Ueyixtika toTeko Jehová ninopaleuiya” (Salmo 73:28). Iespíritu santo Jehová kipaleuis se akin kineki nonisiuis itech yejua.

7. ¿Kenon Jesús okinmachti itlatitlankauan matenojnotsakan? (Xkita tlaixkopinajli kampa peua tlen tomachtijtokej).

⁷ Tejuamej uelis tomachtiskej ken Jesús okinmachti itlatitlankauan. Jesús iuan oyaj otenojnotsato, niman yejuamej okitakej kenon temachtiaya. Noijki yejua okinmelajkaijli itech kenon noneki tenojnotsaskej (Mateo tlaxelojli ueyi 10) ^[1] (xkita nota kampa ontlami). Xuejkaujtipan opanok, itlatitlankauan onomachtijkej ken Jesús otemachti tlen melauak (Mateo 11:1). Matikitakan ome tlemach tlen uelis tikinmachtiskej akin yenkuikej ijkuak tenojnotsaj.

8, 9. a) ¿Kenon otenojnots Jesús? b) ¿Kenon uelis tikinpaleuiskej akin yenkuikej matlajtokan iuan tlaltikpakchanejkej ken Jesús okichiuj?

⁸ Matlajtokan iuan tlaltikpakchanejkej. Jesús xnochipa otlajto iuan miyekej tlaltikpakchanejkej. Miyekpa otlajto iuan tlaltikpakchanejkej inselti niman ika tlasojtlalistli imiuan otlajto. Se neskayotl, yejua melak kualtsin otlajto iuan se siuatl akin okikixtiko atl nisiuj ueyikalpan Sicar (Juan 4:5-30). Jesús noijki iuan otlajto Mateo, akin noijki noixmatiya Leví, akin kipiaya tekitl itech impuestos, niman okinots manochiua inomachtijkauj. Mateo okinek iuan yas Jesús niman sakin okinots niman oksekimej ipan ichan matlakuatij. Ompa Jesús otlajto imiuan miyekej tlaltikpakchanejkej (Mateo 9:9; Lucas 5:27-39).

⁹ Jesús noijki kualtsin otlajto iuan Natanael, maski yejua okijtoka itlaj tlen xkinamiki itech chanejkej Nazaret. Pampa Jesús okinots ika tlasojtlalistli, Natanael okipatlak tlen kinemiliaya itech Jesús, akin ualeuaya Nazaret, niman okinek nomachtis itech Jesús (Juan 1:46-51). Itech ken Jesús otenojnots techmachtia ika ijkuak titlajtouaj iuan tlaltikpakchanejkej ika tlasojtlalistli, uelis kikakiskej tlen tikimijliaj ^[2] (xkita nota kampa ontlami). Ijkuak tikinmachtiaj akin yenkuikej ijkon matenojnotsakan, melak yolpakiskej ijkuak ijkon kichiuaskej.

10-12. a) ¿Kenon Jesús okichiuj makinekikan tlaltikpakchanejkej kikakiskej kuajli tlajtoltin? b) ¿Kenon uelis tikinpaleuiskej akin yenkuikej tenojnotsaj melak kuajli manomachtikan tlen temachtiskej tlen melauak itech Biblia?

 ¹⁰ Matikinmachtikan akin kinektokej techkakiskej. Jesús melak chikauak otekit, san ika, ijkuak tlaltikpakchanejkej melak kinekiyaj kikakiskej, yejua inuan onokauj niman okinmachti miyek tlemach. Se neskayotl, se tonajli melak miyekej onosentlalijkej niman oyajkej kampa yejua nemiya niman ijkon kikakiskej. Kuakon Jesús oyaj ipan se barco iuan Pedro niman ompa opeuj kinmachtia. Sakin noijki okimachti Pedro ijkuak okichiuj se milagro ika makimajsi miyek michimej. Kuakon yejua okijli Pedro: “Pampa desde aman xok tikintejtemos michimej para tikinmajsis, yej tikintejtemos tlakamej”. Nimantsin Pedro niman akin iuan nemiyaj “okinkixtijkej on barcos itenko on atl, nochi ompa okajtejkej” niman iuan oyajkej Jesús (Lucas 5:1-11).

¹¹ Nicodemo kinekiya nomachtis okseki itech Jesús. San ika, pampa yejua teuan katka ipan Sanedrín, nomojtiaya itech tlenon kijtoskiaj oksekimej tla kitaskiaj ika iuan tlajtoua Jesús. Kuakon yejua okitlajpaloto Jesús ika yeuajli. Jesús kuajli okiseli niman iuan onokauj niman ijkon opeuj kimachtia itech tlen melauak (Juan 3:1, 2). Jesús nochipa kinekiya kitekitiltis tiempo ika kinmachtis tlaltikpakchanejkej tlen melauak niman kinchikauilis intlaneltokil. Noijki ijkon, tejuamej noneki matiknekikan tiaskej tikintlajpaloskej tlaltikpakchanejkej ijkuak yejuamej ueliskej niman noneki tikinpaleuiskej makasikamatikan Biblia maski uejkaujtipan.

¹² Ijkuak titenojnotsaj iuan akin yenkuikej, uelis tikinmachtiskej kenon oksejpa kontlajpaloskej akin nesi ika kuelita kinkakis. Noijki uelis tikimijliskej akin yenkuikej touan mauiyan ijkuak oksejpa tontetlajpaloskej niman titemachtiskej itech Biblia. Ijkon, yejuamej nomachtiskej kenon kinmachtiskej oksekimej niman melak kuajli nomachiliskej pampa kinpaleuiyaj oksekimej manomachtikan itech Jehová. Kuakon akin yenkuikej melak kinekiskej oksejpa ontetlajpaloskej niman ontemachtiskej ika Biblia. Yejuamej noijki nomachtiskej teijyouiskej niman xnosiaujkauaskej nimantsin ijkuak xkinnextiskej tlaltikpakchanejkej inchan (Gálatas 5:22; xkita recuadro “ Yejua xonosiaujkauj”).

13, 14. a) ¿Tlenon tomachtiskej itech akin kinteneua Biblia ika onochikaujkej kichiuaskej tlen kuajli ipampa oksekimej? b) ¿Kenon uelis tikinmachtiskej akin yenkuikej niman telpokamej makiteititikan ika kintlasojtlaj tokniuan?

¹³ Jehová kineki ika itekipanojkauan manotlasojtlakan ken ikniujtin niman manopaleuikan (xpoua Lucas 22:24-27; 1 Pedro 1:22). Biblia kijtoua ika Jesús okitemakak nochi tlen kipiaya ika kinpaleuis oksekimej, hasta okitemakak inemilis ipampa tlaltikpakchanejkej (Mateo 20:28). Yeuejkaui se siuatl itoka Dorcas “nochipa kichiuaya on tlen kuajli” (Hechos 9:36, 39). Okse akin “sajnoye yotekit” ipampa ikniuan akin chantij Roma itoka katka María (Romanos 16:6). ¿Kenon uelis tikinpaleuiskej akin yenkuikej makasikamatikan ika melak noneki tikinpaleuiskej tokniuan?

¹⁴ Uelis tikimijliskej touan mayakan ijkuak tikintlajpaloskej akin kipiyaj miyek xiuitl noso akin kualoj. Niman ijkuak tajtin ontetlajpaloskej uelis kinuikaskej inkoneuan ijkuak  kinamiki. Tlayekankej ipan tlanechikojli uelis kintlajtlaniliskej akin telpokamej noso akin yenkuikej imiuan kinpaleuiskej akin ikipiyaj miyek xiuitl makinmakatij tlakuajli noso makiyektlalikan inkal. Ijkuak telpokamej niman akin yenkuikej kitaj kenon tokniuan nopaleuiyaj, yejuamej nomachtiaj ika noijki kichiuaskej. Se neskayotl, ijkuak se tokniuj tlayekanketl ontenojnotsaya kampa chantiyaj tokniuan, panouaya inchan niman ijkon kimatis kenon nemiyaj. Se tokniuj akin miyekpa iuan yaya sakin noijki opeuj kinpaleuiya tokniuan ijkon ken kichiuaya tokniuj tlayekanketl (Romanos 12:10).

15. ¿Tleka melak noneki ika tlayekankej makinpaleuikan oksekimej tokniuan kuajli matemachtikan ipan tlanechikojli?

¹⁵ Jehová yokinmakak tokniuan tlakamej tekitl ika temachtiskej iTlajtol ipan tlanechikojli. Ika yejon melak noneki ika tokniuan manomachtikan kenon melak kuajli kichiuaskej ijkuak temakaskej se tlamachtijli. Tla tejua titekiti ken tlayekanketl, kanaj uelis tijkakis se tokniuj tlapaleuijketl ijkuak nomachtia kenon kitemakas se tlamachtijli niman uelis tikpaleuis melak kuajli manomachti (Nehemías 8:8) ^[3] (xkita nota kampa ontlami).

16, 17. a) ¿Tlenon okichiuj Pablo ika okipaleui Timoteo? b) ¿Kenon uelis tlayekankej melak kuajli kinpaleuiskej tokniuan ika kuajli kitlajpiyaskej tlanechikojli?

¹⁶ Melak noneki ika oksekimej tokniuan manomachtikan kenon kitlajpiyaskej tlanechikojli. Pablo okimachti Timoteo niman okiyolchikauj noijki makinmachti oksekimej. Pablo okijto: “Xmoyolchikaua [‘ok xpixtiuj kojtilistli’, TNM]  ika on tetlajsojtlalistli yejuan toyaxka pampa aman san sekan tinemij iuan Cristo Jesús. On tlen yotinechkakilij imixpan on miyekej teixpantilikej, yejua xkinmaktili on yolmelajkej tokniuan yejuan ueliskej kuajli kinmachtiskej on oksekimej” (2 Timoteo 2:1, 2). Timoteo onomachti miyek tlemach itech Pablo, akin katka itlatitlankauj Cristo niman tlayekanketl, itech kenon melak kuajli tenojnotsas niman kenon kinpaleuis oksekimej ipan tlanechikojli (2 Timoteo 3:10-12).

¹⁷ Pablo uejkaujtipan opanok ijkuak okimachti Timoteo pampa kinekiya melak kuajli manomachti (Hechos 16:1-5). Tlayekankej noijki uelis ijkon kichiuaskej ken Pablo ijkuak tlapaleuijkej akin ueltokej imiuan yaskej ijkuak kinyolchikauaskej tokniuan. Ijkon, tlapaleuijkej nomachtiskej itech tlayekankej kenon kinmachtiaj oksekimej, kenon  kipiyaskej ijyouilistli niman tlasojtlalistli. Noijki nomachtiskej kenon nopaleuiskej itech Jehová ijkuak kinpaleuiskej tokniuan ipan tlanechikojli (1 Pedro 5:2).

18. ¿Tleka melak noneki matikinmachtikan oksekimej melak kuajli makichiuakan itekiyo Jehová?

¹⁸ Ipan yejuin itlamiyan tonaltin, miyekej akin yenkuikej noneki kuajli nomachtiskej niman ijkon melak kuajli tenojnotsaskej. Tokniuan noijki noneki nomachtiskej kenon kitlajpiyaskej tlanechikojli. Jehová kineki ika nochimej itekipanojkauan makimatikan kenon kuajli kichiuaskej se tekitl niman tejuamej uelis tikinpaleuiskej akin yenkuikej. Ika yejon melak noneki kuajli matikinmachtikan oksekimej, ijkon ken Jesús niman Pablo okichiujkej. Melak noneki matikinmachtikan miyekej hasta kampa tiueliskej pampa ok onka miyek tekitl itech tenojnotsalistli ipan yejuin tonajli pampa xiyejko tlapopolouilistli.

19. ¿Tleka uelis tikmatstoskej ika kuajli yes tla tochikauaj tikinpaleuiskej oksekimej ipan itekiyo Jehová?

¹⁹ Tikinmachtiskej oksekimej noneki tiempo niman tochikauaskej, san ika, uelis kuajli tikmatstoskej ika Jehová niman Jesús techpaleuiskej matikmatikan kenon melak kuajli tikinmachtiskej oksekimej. Melak techpaktis tikitaskej kenon akin tikinmachtiskej chikauak tekitiskej ipan tlanechikojli niman ipan tenojnotsalistli (1 Timoteo 4:10). Noijki noneki tejuamej tikchiuaskej nochi tlen tiuelij ok melak kuajli tiktekichiuiliskej toTajtsin. Niman tikpiyaskej kualneskayomej ken Cristo niman kuajli touikaskej iuan Jehová.