1, 2. a) ¿Kenon Isaías 60:22 yemelak nochiujtika ipan yejuin tonaltin? b) ¿Tlenon noneki manochiua ipan ikalpan Jehová ipan tlaltikpaktli?

“TLEN pitentsin nochiuas mil niman tlen xueyi se chikauak kalpan” (Isaías 60:22). Yejuin tlajtoltin nochiujtokej aman ipan itlamiyan tonaltin. Ipan xiuitl 2015, ipan nochi tlaltikpaktli 8,220,105 itekipanojkauan Jehová otenojnotskej itech tlajtoltin itech Tekiuajyotl. ToTajtsin okijto kenon ueyiyaskia ikalpan: “Nejua, Jehová, nikchiuas maueyiya ijkuak ajsis tonajli”. Kuakon ijkon ken panotiuj tonaltin noijki melak onka tekitl tlen noneki tikchiuaskej tinochimej. ¿Tikchiujtokej nochi tlen tiuelij ika titenojnotsaj niman titemachtiaj itech kuajli tlajtoltin? Miyekej tokniuan tekititokej ken precursores regulares niman auxiliares. Sekimej yoyajkej oksekan yotlapaleuitoj manotenojnotsa. Niman oksekimej tlapaleuiyaj kampa nochijchiuaj Kaltin kampa Tosentlaliaj.

² Nochi xiuitl, kanaj 2,000 peuaj yenkuikej tlanechikoltin. Ipan yejon tlanechikoltin noneki tlayekankej niman tlapaleuijkej. Noijki nochi xiuitl, melak miyekej tlapaleuijkej noneki nochiuaskej tlayekankej niman melak miyekej oksekimej tokniuan  noneki nochiuaskej tlapaleuijkej. Kuajli nesi ika “nochipa [‘miyek’, TNM]” onka “itekiu toTeko” niman xsan tlen kichiuaskej tokniuan tlakamej noijki tokniuan siuamej (1 Corintios 15:58).

3, 4. ¿Tlenon uelis tikchiuaskej niman ijkon ok melak kuajli tiktekichiuiliskej toTajtsin?

³ (Xpoua 1 Timoteo 3:1). Pablo, itlatitlankauj Cristo, okimijli tokniuan ika melak kuajli pampa “kineki[yaj] tekitis[kej] ken” tlayekankej ipan tlanechikojli. Tla yakaj kineki itlaj tlen xonka itech, noneki nochikauas niman kanaj ken onnomamelauas niman ijkon konajsis tlen kineki. Aman matiknemilikan ika se tokniuj kuelitaskia nochiuas ken tlapaleuijketl. Yejua kimati ika noneki nochikauas niman ijkon kipiyas kualneskayomej. Sakin tla yejua yopeuj tekiti ken tlapaleuijketl, uelis chikauak tekititias niman ijkon uelis nochiuas tlayekanketl.

⁴ Sekimej tokniuan kipatlatokej itlaj ipan innemilis pampa kinekij ueyi ken kitekichiuiliskej Jehová. Se neskayotl, kanaj yejuamej kinekij nochiuaskej precursores, tlapaleuiskej ipan Betel noso tlapaleuiskej manochijchiuakan Kaltin kampa Tosentlaliaj. Matikitakan kenon Biblia uelis techpaleuis tinochimej nochipa ok melak kuajli tiktekichiuiliskej toTajtsin.

5. ¿Kenon uelis telpokamej niman ichpokamej kikuiskej inchikaualis ipan itekiyo toTajtsin?

⁵ Telpokamej uelis kichiuaskej miyek ipan itekiyo Jehová pampa yejuamej kipiyaj kojtilistli niman chikaujtokej (xpoua Proverbios 20:29). * Sekimej tokniuan telpokamej tlapaleuiyaj ipan Betel kampa kinchijchiuaj amoxtin niman Biblias. Miyekej tokniuan telpokamej niman ichpokamej tlapaleuiyaj kampa nochijchiuaj Kaltin kampa Tosentlaliaj noso tlapaleuiyaj manoyektlalikan yejuin kaltin. Sekimej tlapaleuiyaj kampa panoua itlaj tlen tlaijtlakoua. Niman miyekej telpokamej niman ichpokamej akin tekitij ken precursores nomachtiaj okse tlajtojli noso yauej oksekan ontenojnotsaj kuajli tlajtoltin.

6-8. a) ¿Kenon okichiuj se telpochtli ika okipatlak ken kitaya itekiyo toTajtsin niman tlenon kuajli opanok? b) ¿Kenon tejua uelis tikmatis niman tikitas “ika Jehová yolkuajli”?

⁶ Tejuamej tiktlasojtlaj Jehová niman tiknekij tikchiuaskej nochi tlen tiuelij. San ika, maski ijkon, kanaj uelis tomachiliskej ijkon ken onomachili se tokniuj itoka Aaron. Yejua xyolpakiya ijkuak kitekichiuiliaya toTajtsin, san ika, yejua kinekiya yolpakis. Maski Aaron opeuj yauj ipan tlanechikoltin niman kisaya ontenojnotsaya ijkuak konetl katka, okijto: “Xnechyolpaktiaya tlanechikoltin nion ijkuak nontenojnotsaya”. Aman, ¿tlenon okichiuj?

⁷ Aaron melak onochikauj kipouas Biblia nochipa, nomachtiaya kachtopa yas ipan tlanechikoltin niman tlanankiliaya. Yejua noijki opeuj kichiua teoyotl nochipa. Nochi yejuin okipaleui ok melak kuajli makitekichiuili toTajtsin. Yejua opeuj kuajli kixmati Jehová niman noijki opeuj melak kitlasojtla. Sakin ijkuak opanok yejuin, Aaron melak kuajli onomachili. Onochiuj precursor, okinpaleui oksekimej kampa panouaya itlaj tlen tlaijtlakoua niman oyaj otenojnotsato  ipan okse país. Aman yejua se tlayekanketl niman tlapaleuiya ipan Betel. ¿Kenon nomachilia aman? Aaron kijtoua: “Nejua ‘[yonikmat] niman [yonikitak] ika Jehová yolkuajli’”. Ipampa itlateochiualis, aman nikmachilia ika kipiya ika nikchiuas tlen noneki niman melak nikneki nikueyilis ken niktekichiuilia Jehová, niman yejuin kuajkui miyek tlateochiualistin.

⁸ Salmista okijto: “Xmatikan niman xkitakan ika Jehová yolkuajli; yolpaki se tlakatl akin itech nopaleuiya”. Noijki okijto: “Akin kitejtemouaj Jehová xtlaj kinpolos tlen kuajli” (xpoua Salmo 34:8-10). * Kema, ijkuak tejuamej tikmakaj Jehová tlen melak kuajli, yemelak tiyolpakij pampa tikmatij ika tikyolpaktijtokej. Niman yejua kichiua tlen yokijto niman techtlajpiyas.

9, 10. ¿Tleka melak noneki matitlamachiakan?

⁹ Kanaj tiknekij tikueyiliskej ken tiktekichiuiliaj Jehová. San ika ¿tlenon tikchiuaskej tla youejkauj tikchiatokej se tekitl ipan tlanechikojli noso yonopatlak itlaj ipan tonemilis? Kanaj noneki tikpiyaskej ijyouilistli (Miqueas 7:7). Maski tla Jehová kikauilia ijkon mapano, uelis kuajli tikmatstoskej ika yejua nochipa techpaleuis. Uelis tomachtiskej ineskayo Abrahán. Jehová okijli ika kipiyaskia se ikoneuj, san ika, yejua ononek tlamachias miyek xiuitl hasta ijkuak otlakat Isaac. Ipan nochi xiujtin, Abrahán okipix ijyouilistli niman xkeman okipolo itlaneltokil itech Jehová (Génesis 15:3, 4; 21:5; Hebreos 6:12-15).

¹⁰ Kema, tikchiaskej itlaj yejon ouijtika (Proverbios 13:12). San ika, tla san nochipa titlanemilijtokej itech ken tipanotokej niman tla xok tiyolpakij, yejon melak techajmanas. Tejuamej noneki tijkuiskej tiempo ika tochikauaskej tikpiyaskej kualneskayomej tlen techpaleuis kuajli tikchiuaskej tekitl tlen tikseliskej ipan tlanechikojli.

11. ¿Tlenon kualneskayomej noneki tokojtiliskej matikinpiyakan niman tleka melak noneki?

¹¹ Matikinpiyakan kualneskayomej niman tlen techpaleuis matikchiuakan kuajli tekitl. Tla tejua tikpoua Biblia niman titlanemilia itech tlen tikpoua, uelis timochiuas titlamachilise, kuajli titlanemilis niman kuajli tiktlapejpenis tlen tikchiuas. Kema, tokniuan noneki kipiyaskej kualneskayomej niman tlen makinpaleui makichiuakan kuajli tekitl ipan tlanechikojli (Proverbios 1:1-4; Tito 1:7-9). Ijkuak tomachtiaj Biblia, uelis tikasikamatiskej kenon tlanemilia Jehová itech miyek tlemach. Kuakon mojmostla uelis tijkuiskej tlen yotomachtijkej ika tiktlapejpeniskej tikchiuaskej tlen uelis kiyolpaktis Jehová. Se neskayotl, uelis tikmatiskej kenon touikaskej iuan oksekimej, kenon tiktekitiltiskej tomin, tiktlapejpeniskej kenon totlakentiskej niman tlen ika toyolpaktiskej.

12. ¿Kenon tokniuan ipan tlanechikojli kiteititiskej ika uelis kinneltokaskej?

¹² Chikauak matitekitikan itech tekitl tlen techmakaj ipan tlanechikojli. Yeuejkaui, ijkuak ikalpan toTajtsin kichijchiuayaj teopan, Nehemías nonekiya kinpiyas akin kipaleuiskiaj niman kichiuaskiaj miyek tekitl. Yejua okintlapejpeni akin nomatiya kuajli tekitiyaj. Yejua kimatiya ika yejon tlakamej kitlasojtlayaj toTajtsin niman ika kinekiskiaj kichiuaskej ika inyojlo maski san  tlenon tekitl kinmakaskiaj makichiuakan (Nehemías 7:2; 13:12, 13). Noijki ijkon, ipan yejuin tonajli, akin kuajli kichiuaj intekiyo niman chikauak tekitij kuajli ken kimixmatij niman uelis kiseliskej okseki tekitl (1 Corintios 4:2). Ika yejon, tinochimej noneki nochipa matikchiuakan nochi tlen tiuelij ika tikchiuaskej san tlen tekitl techmakaskej (xpoua 1 Timoteo 5:25).

13. ¿Kenon uelis tikchiuaskej ken José ijkuak texchiuiliskej itlaj tlen xkinamiki?

¹³ Xmopaleui itech Jehová. ¿Tlenon uelis tikchiuaskej tla yakaj texchiuiliaj itlaj tlen xkinamiki? Kanaj tejuamej uelis tikijliskej kenon tomachiliaj. San ika, tla xtoteltiaj ika tikijtouaj ika tejuamej xtikpiyaj tlajtlakojli, uelis tikchiuaskej ika tlauejli maueyiya. Uelis tomachtiskej ineskayo José. Ikniuan melak xkuajli tlen okichiuilijkej. Sekimej okijtokej tlen xmelauak itech niman okitsajkej ipampa itlaj tlen xokichiuj. San ika, José onopaleui itech Jehová. Yejua otlanemili itech tlen Jehová yokijtoka kichiuas niman oyolmelaujkanen (Salmo 105:19). Ipan yejon tonaltin tlen melak ouijtika katka, yejua okinpix miyek kualneskayomej tlen okipaleui sakin ijkuak okiseli se ueyi tekitl (Génesis 41:37-44; 45:4-8). Kuakon, tla sekimej texchiuiliaj itlaj tlen xkinamiki, matiktlajtlanilikan Jehová tlamachilistli. Niman yejua techpaleuis maka nimantsin tiknekiskej tikchiuaskej itlaj niman titlajtoskej ika tlasojtlalistli (xpoua 1 Pedro 5:10).

14, 15. a) ¿Tleka noneki nochipa “kuajli xkita” ken titenojnotsa? b) ¿Tlenon noijki uelis tikpatlaskej ijkuak nopatla itlaj? (Xkita tlaixkopinajli kampa peua tlen tomachtijtokej niman recuadro “ ¿Tiknekij tikyejyekoskej yenkuik ken titenojnotsaskej?”).

¹⁴ Pablo okijli Timoteo ika nochipa kuajli manomachtijtiuj kenon tetomilis iTlajtol toTajtsin. Yejua okijli: “Kuajli xmixtlalo niman kuajli xkita on tlen tiktemachtia” (1 Timoteo 4:13, TNM, 16). Timoteo yopanoka miyek xiuitl tenojnotstinemiya. Kuakon, ¿tleka noneki ok melak kuajli kichiuaskia itekiyo? Timoteo kimatiya ika tlaltikpakchanejkej nopatlaj niman nopatla tonaltin. Yejua kinekiya ika tlaltikpakchanejkej nochipa makikakikan. Ika yejon, yejua nonekiya nochipa ok melak kuajli nomachtis niman kipatlas ken temachtia. Tejuamej noijki noneki ijkon tikchiuaskej ipan totenojnotsalis.

¹⁵ Kanaj kampa titenojnotsaj techajchan, xmiyekej tlaltikpakchanejkej tikinnextiaj. Niman oksekan, kanaj uelis nemiskej ipan inchan, san ika, kanaj xueli tikalakij ipan kaltin kampa yejuamej chantij. Tla ijkon panoua kampa titenojnotsaj, ¿uelis tikyejyekoskej tikpatlaskej ken titenojnotsaj?

16. ¿Kenon melak kuajli onkisaj akin tenojnotsaj kampa tojlan nojuitiaj?

¹⁶ Miyekej tokniuan melak kuelitaj tenojnotsaskej kampa tojlan nojuitiaj. Se neskayotl, yejuamej yauej kampa noteltiaj trenes, kampa kisaj autobuses, kampa tlanemakalo niman ipan parques kampa kinnextiaj akin imiuan tlajtoskej. Sekimej peuaj tlajtoua itech itlaj tlen kemach onochiuj. Niman oksekimej kijliaj tlaltikpakchane tlen kualtsin itech ikoneuan noso kitlajtoltiaj itlaj itech itekiyo. Tla yejon tlaltikpakchane nesi ika kuelita imiuan nonojnotsas, kijliaj itlaj itech Biblia niman kitlajtoltiaj tlenon kinemilia itech yejon. Miyekpa, yejon tlaltikpakchanejkej kinekij kimatiskej okseki itech Biblia.

17, 18. a) ¿Kenon uelis kuajli titenojnotsaskej kampa tojlan nojuitiaj tlaltikpakchanejkej? b) ¿Tleka techpaleuis ipan totenojnotsalis tiknekiskej tikueyichiuaskej Jehová ijkon ken David?

¹⁷ Kanaj tikitas ika ouijtika tipeuas titenojnotsas kampa panouaj miyekej tlaltikpakchanejkej akin xtikimixmati. Eddie, se tokniuj tekiti ken precursor ipan Nueva York, ijkon nomachilia. San ika ¿tlenon okipaleui niman ijkon xok nomojtia? Yejua kijtoua: “Ijkuak tikueyichiuaj toTajtsin iuan tochanejkauan, nosiuauj niman nejua otiktejtemojkej kenon titlanankiliskej itech tlen kijtouaj tlaltikpakchanejkej niman tlen kinemiliaj. Noijki otikintlajtoltijkej oksekimej kenon kichiuiliayaj”. Aman Eddie melak kuelita tenojnotsas kampa tojlan nojuitiaj.

¹⁸ Ijkuak melak tipakij ipan totenojnotsalis niman melak kuajli ken titenojnotsaj itech kuajli tlajtoltin, oksekimej kitaj ika ok melak kuajli tiktekichiuiliaj toTajtsin (xpoua 1 Timoteo 4:15). Niman hasta uelis tikinpaleuiskej oksekimej makitekichiuilikan Jehová. David okijto: “Nejua ninoueyimatis ipan Jehová; akin yolyemankej kikakiskej niman pakiskej” (Salmo 34:1, 2).

19. ¿Tleka akin kitekichiuilia Jehová uelis pakis maski panoua ipan inemilis tlen ouijtika?

¹⁹ David okijto: “Nochi tlen yotikchijchiuj mitsueyiteneuas, Jehová, niman akin xmitskauaj mitsueyichiuaskej. Yejuamej kiteijliskej moueyilis itech motlanauatijkayo, niman ijkon kichiuaskej makimatikan tlaltikpakchanejkej nochi tlen temojkatlachialti  yotikchiuj niman kech ika ueyi petlani motlanauatijkayo” (Salmo 145:10-12). Nochimej akin kitlasojtlaj Jehová niman nochipa nemij itech melak kinekij kinnojnotsaskej oksekimej itech. San ika, kanaj pampa tikualoj noso itikpiyaj miyek xiuitl, xok ueli tipanouaj uejkaujtipan ipan tenojnotsalistli. Tla ijkon panoua, nochipa matikilnamikikan ika uelis tikueyichiuaskej Jehová nochipa ijkuak tikinnojnotsaj akin nemij toyeualiyan itech toTajtsin, ken tlapajtikej. Niman tla yotechtsajkej ipampa totlaneltokil, noijki ok uelis titlajtoskej itech Jehová, niman yejon kiyolpaktis (Proverbios 27:11). Noijki, yejua melak paki tla tejuamej tiktekichiuilijtokej maski sekimej tochanejkauan xkichiuaj (1 Pedro 3:1-4). Niman hasta ijkuak melak ouijtika tipanouaj, uelis tikueyichiuaskej Jehová, nochipa uelis tinemiskej itech niman ok melak kuajli tiktekichiuiliskej.

20, 21. Tla tejuamej chikauak titekitij ipan ikalpan toTajtsin, ¿kenon uelis kinpaleuis oksekimej?

²⁰ Jehová melauak techteochiuas tla tejuamej nochipa tinemij itech niman tikchiuaj nochi tlen tiuelij ipan itekiyo. Kanaj ijkuak itlaj tikpatlaj ken tinemij, uelis ok melak kuajli ken tikinpaleuiskej tlaltikpakchanejkej manomachtikan itech tlen kualtsin techijlia toTajtsin kichiuas. Tejuamej uelis tikinpaleuiskej oksekimej tokniuan. ¡San xnemili kenon melak techtlasojtlaskej tokniuan ijkuak kitaskej ika chikauak titekitij ipan tlanechikojli!

²¹ Maski tla youejkauj ika tiktekichiuiliaj Jehová noso ka, tinochimej noneki ok melak kuajli tonisiuiskej itech niman ok melak kuajli ken tiktekichiuiliskej. Ipan okse tlamachtijli, tikitaskej kenon uelis tikinpaleuiskej oksekimej ok melak kuajli makitekichiuilikan Jehová.