1, 2. a) ¿Kenon san sekan noteneuaj tlasojtlalistli niman tlaneltokijli? b) ¿Tlenon tlajtoltilistin tikinnankiliskej?

TOTAJTSIN JEHOVÁ okimijli itekipanojkauan akin xkikauaj ika kinteochiuas. Yejuin san se ken Jehová kiteititia ika techtlasojtla, niman tejuamej tiktlasojtlaj “pampa yejua achtopa otechtlajsojtlak” (1 Juan 4:19). Ijkuak noskaltijtiuj totlasojtlalis itech Jehová, totlaneltokil ueyiya niman melak kuajli tikmatstokej ika Jehová kinteochiuas akin kintlasojtla (xpoua Hebreos 11:6).

² Jehová yejua kitemaka tlaxtlauijli. Yejuin san se tlemach ika noteititia kenon yejua niman tlenon kichiua. Kuakon tejuamej xuelis tikpiyaskej ueyi totlaneltokil itech toTajtsin tla xkuajli tikmatstokej ika yejua kinmaka tlaxtlauijli akin yemelak kitejtemouaj. ¿Tleka ijkon? Pampa “tlaneltoktli kijtosneki ika tikyolmelajka matstokej ika tikseliskej on tlen tikchaj” (Hebreos 11:1). Tlaneltokijli kijtosneki tikpiyas ueyi motlaneltokil itech toTajtsin. San ika ¿kenon techpaleuiya titlamachiaskej ika tikseliskej se tlaxtlauijli? ¿Kenon  Jehová okinmakak tlaxtlauijli itekipanojkauan yeuejkaui niman kenon kinmaka aman? Matikitakan.

3. ¿Tlenon techijlia toTajtsin ipan Malaquías 3:10?

³ ToTajtsin Jehová yokimijli itekipanojkauan akin xkikauaj ika kinmakas tlaxtlauijli. Yejua techtlajtlanilia matikmakakan nochi tlen tiuelij niman matikneltokakan ika yejua techteochiuas. Jehová kijtoua: “Nimechtlajtlanilia, xnechtlatlatakan”. Noijki kijtoua: “Xkitakan tla xniktlapos iluikak niman nikuajtoyauas nemopan se tlateochiualistli hasta ijkuak xok itlaj tlasojtis” (Malaquías 3:10). Tla tijkauiliaj Jehová matechpaleui ijkuak technotsa, tikititiaj ika melak tiktlasojkamatij.

4. ¿Tleka uelis titlaneltokaskej itech tlen okijto Jesús ipan Mateo 6:33?

⁴ Jesús okimijli inomachtijkauan ika tla yejuamej kachtopa kitejtemouaj iTekiuajyo toTajtsin, yejua kinpaleuiskia (xpoua Mateo 6:33). Jesús ouel okijto yejon pampa kimatiya ika tlen toTajtsin kijtoua nochipa nochiua (Isaías 55:11). Kuakon tejuamej noijki uelis kuajli tikmatstoskej ika tla tikpiyaj ueyi totlaneltokil itech Jehová, yejua kichiuas yejuin tlen yotechijli: “Xkeman nimitskauas nion nimitstlalkauis” (Hebreos 13:5). Yejuin tlen techijlia Jehová techpaleuiya matitlaneltokakan itech itlajtoluan Jesús ipan Mateo 6:33.

5. ¿Tleka itech tlen Jesús okijli Pedro techyolchikaua tinochimej?

⁵ Se tonajli Pedro okitlajtolti Jesús: “Tejuamej yotikajkej nochi tlen tikpiayaj,  niman tikistinemij mouan. ¿Tlinon, tej, tikpiaskej?” (Mateo 19:27). Jesús xokiyektlali Pedro ipampa tlen okitlajtolti. Jesús okimijli inomachtijkauan ika yejuamej kiseliskiaj tlaxtlauijli pampa yokikaujkaj miyek tlemach. Itlatitlankauan Jesús niman oksekimej akin oyolmelaujkanenkej itech toTajtsin tlanauatiskej iuan Jesús ipan iluikak ika tlayekapan. San ika, Jesús noijki okijto ika aman tikseliaj tlaxtlauijli: “Nochimej yejuan kauaj inchan noso imikniuan, noso intaj, noso innan, noso insiuau, noso inkoneuan, noso intlaluan san nopampa, kiseliskej se ciento más, niman no kiseliskej nemilistli para nochipa” (Mateo 19:29). Nochimej akin kichiuaj ken Cristo uelis kinnextiskej intajuan, innanuan, imikniuan niman inkoneuan aman ipan tlanechikojli. Yejuin melak ueyi kijtosneki niman tlasojti xijkon ken itlaj tlen yotijkaujkej ipampa iTekiuajyo toTajtsin.

6. ¿Tleka Jehová kimijlia itekipanojkauan kinmakas tlaxtlauijli?

⁶ Maski aman tipakij pampa tikseliaj miyek kualtsin tlateochiualistin, tikchiaj tikseliskej uejueyimej tlateochiualistin ika tlayekapan (1 Timoteo 4:8). Jehová kijtoua kinmakas tlaxtlauijli itekipanojkauan akin xkikauaj, niman tikmatiskej yejuin techpaleuiya matitlaxikokan. Ijkuak yemelak kuajli tikmatstokej ika Jehová “ki[n]makas tlaxtlauijli on yejuan melauak kitejtemouaj”, uelis nochipa tinemiskej itech (Hebreos 11:6).

7. ¿Kenon totlamachialis ijkon ken itlaj tlen kimelajkapia barco?

⁷ Ipan Tlamachtijli ipan Tepetl, Jesús okijto: “Xpakikan niman xnemikan ikan paktli, pampa [...] nenkiseliskej se ueyi tetlayokolijli. On tlakamej no ijki okintlauelitakej [...] tiotlajtojkej yejuan onemikoj yeuejkaui ijkuak xe nennemiyaj” (Mateo 5:12). Sekimej itekipanojkauan toTajtsin kiseliskej intlaxtlauil ipan iluikak. Niman oksekimej kiseliskej intlaxtlauil ika nemilistli tlen xkeman tlamis ipan se xochitlalpan. Yejon noijki kichiua “[mati]pakikan niman [mati]nemikan ikan paktli” (Salmo 37:11; Lucas 18:30). San ika, tinochimej totlamachialis uelis yes “ken on teposcadena kimelajkapia on barco ijkuak ika yokisalojkej” (Hebreos 6:17-20). Kema, ijkon ken tlen kimelajkapiya se barco ijkuak chikauak ajakakiyaui, chikauak totlamachialis uelis techpaleuis matimelajkanemikan. Yejon noijki uelis techmakas chikaualistli tlen techpaleuis matitlaxikokan ijkuak tikixnamikij tlajyouilistli.

8. ¿Kenon totlamachialis uelis kichiuas maka ok melak matajmanakan?

⁸ Totlamachialis uelis kichiuas maka ok melak matikmachilikan ajmantli. Ijkon ken bálsamo kichiua melak kuajli matomachilikan, tlen techijlia toTajtsin uelis kichiuas kuajli manomachili toyojlo. Yejon kichiua kuajli matomachilikan ijkuak tikmatij ika Jehová techtlajpiyas ijkuak tiktlaliskej totlamamal ipan yejua (Salmo 55:22). Uelis titlaneltokaskej ika nochi toyojlo ika toTajtsin uelis kichiuas “miyek más de on yejuan tejuamej ueli tiktlajtlaniaj” (Efesios 3:20). Jehová techpaleuis, san ika, xsan miyek ika techpaleuis, “miyek más” tlen yejua kichiuas topampa.

9. ¿Kenon uelis kuajli tikmatstoskej ika tikseliskej itlateochiualis Jehová?

⁹ Tla tiknekij tikseliskej tlaxtlauijli, noneki tikpiyaskej ueyi totlaneltokil itech Jehová niman tiktlakamatiskej  itlayekanalis. Moisés okijli kalpan Israel: “Jehová yemelak mitsteochiuas ipan tlajli tlen Jehová moTajtsin mitsmakas niman ijkon moyaxka yes, san ika, san tla kuajli tiktlakamati itlajtol Jehová moTajtsin niman kuajli tikchiua nochi yejuin tlanauatijli tlen nimitsmakatok aman. Pampa Jehová moTajtsin mitsteochiuas ijkon ken yejua yomitsijli” (Deuteronomio 15:4-6). ¿Kuajli tikmatstokej ika Jehová techteochiuas tla xtijkauaj ika tiktekichiuiliaj? Onka miyek tlen ipampa uelis titlaneltokaskej itech.

10, 11. ¿Kenon Jehová okimakak tlaxtlauijli José?

¹⁰ Biblia onoijkuilo ika matechpaleui. Ompa tiknextiaj miyek neskayomej itech kenon toTajtsin okinmakak tlaxtlauijli itekipanojkauan yeuejkaui (Romanos 15:4). José se kuajli neskayotl itech tlen titlajtouaj. Kachtopa, ikniuan okinemakakej ken tlakeuajli. Sakin, isiuauj iteko okitlajtolchijchiuili niman okitsajkej ipan Egipto. Ijkuak José tsauktoya, ¿okikauj Jehová? ¡Ka, nion achijtsin! Biblia kijtoua “Jehová xokikauj José niman nochipa okititi tlasojtlalis tlen xtekaua” niman “Jehová iuan nemiya José niman Jehová okichiuj san tlenon yejua kichiuaskia kuajli makisati” (Génesis 39:21, 23). Maski ijkuak okixnamik tlajyouilistli, José otlamachiak itech toTajtsin.

¹¹ Itech seki xiuitl sakin, Faraón okikixti José kampa tsauktoya. Yejua katka san se tlakeuajli, san ika, sakin onochiuj ika ome tlanauatijketl akin ok melak ueyixtoya ipan Egipto (Génesis 41:1, 37-43). Ijkuak José niman isiuauj okinpixkej ome inkoneuan, “José okitokayoti kachtopa ikoneuj, Manasés, pampa yejua okijto: ‘ToTajtsin yokichiuj manikilkaua nochi tlajyouilistin niman nochi ichan notajʼ. Niman ika ome ikoneuj okitokayoti Efraín, pampa yejua okijto: ‘ToTajtsin yokichiuj kuajli manikisati ipan tlajli kampa onitlajyoui’” (Génesis 41:51, 52). Jehová okimakak tlaxtlauijli José pampa xkeman okikauj, niman yejua ouel okinmakixti israelitas niman egipcios itech ueyi apistli. Niman José kimatiya ika Jehová yejua akin yokimakaka tlaxtlauijli niman ika yokiteochiujka (Génesis 45:5-9).

12. ¿Kenon Jesús oyolmelaujkanen ijkuak okitlatlatakej?

¹² Jesucristo noijki okitlakamat toTajtsin ijkuak okixnamik miyek tlatlatalistin, niman Jehová okimakak tlaxtlauijli. ¿Tlenon okipaleui Jesús oyolmelaujkanen? ITlajtol toTajtsin kijtoua: “Jesús xokichiuilij cuenta on tlen tepinajtij ijkuak omik [...], pampa kimatstikatka ika tla yotlajyouij, kipias paktli” (Hebreos 12:2). Jesús melak yolpakiya ika ueliskia kichiuas machipaui itokayo toTajtsin. Niman Jesús okiseli tlaxtlauijli ijkuak toTajtsin okiteochiuj niman okimakak miyek kualtsin tekitl. Biblia kijtoua ika yejua “onotlalij iyekmakopa [...] kampa tlamandaroua Dios”. Noijki “Dios okimakak más ueyilistli yejuan xakaj okse kipia, niman tlanauatijli on yejuan más ueyi kijtosneki xken yakaj okse kipia” (Filipenses 2:9).

13, 14. ¿Kenon nomachilia Jehová itech tlen tikchiuaj ipampa?

¹³ Kuajli tikmatstoskej ika Jehová kitlasojkaita nochi tlen tikchiuaj ijkuak tiktekichiuiliaj. Yejua kasikamati ijkuak xtikmatij tla uelis tikchiuaskej itlaj noso tikmachiliaj ika xuelis tikchiuaskej. Yejua  yemelak kineki techpaleuis ijkuak melak tajmanaj itech totekiyo noso itech tlen kinpoloua tochanejkauan. Niman yejua kasikamati ijkuak xok ueli tikchiuaj ijkon ken otikchiujkaj yeuejkaui ipan itekiyo pampa tikualoj noso xkuajli tomachiliaj. Uelis kuajli tikmatstoskej ika Jehová melak kitlasojkaita pampa xtijkauaj maski tikixnamikij tlajyouilistin (xpoua Hebreos 6:10, 11).

¹⁴ Noijki matikilnamikikan ika Jehová yejua “Akin [ki]kaki teoyotl”. Uelis kuajli tikmatstoskej ika ijkuak tikchiuiliaj teoyotl, yejua techkaki (Salmo 65:2). “ToTajtsin Dios yejuan [...] techiknelijtikaj niman nochipa techyoltlalijtikaj” techmakas nochi tlen techpoloua niman ijkon tinemiskej itech. Kemantika yejua uelis kintekitiltis tokniuan niman ijkon kichiuas yejon (2 Corintios 1:3). Jehová kuelita ijkuak tejuamej tikimikneliaj oksekimej. “Akin kipaleuiya akin itlaj kipoloua kitlaneujtia Jehová, niman yejua kitlaxtlauilis ipampa tlen kichiua” (Proverbios 19:17; Mateo 6:3, 4). Kuakon ijkuak tikxelouaj tlen tikpiyaj niman tikinpaleuiyaj tokniuan, Jehová kita ika melak kuajli tlen tikchiuaj kentla tiktlaneujtiskiaj itlaj. Niman yejua kijtoua ika techmakas tlaxtlauijli ipampa yejon tlen kuajli tikchiuaj ipampa yakaj.

15. ¿Tlenon tlaxtlauijli tikchia tikselis tejua? (Xkita tlaixkopinajli kampa peua tlen tomachtijtokej).

¹⁵ Tlapejpeniltin akin kichiuaj ken Cristo kichiaj “[in]tlaxtlauil” itech iyolmelaujkanemilis, se tlaxtlauijli tlen kinmakas Jesús (2 Timoteo 4:7, 8). San ika, yejon xkijtosneki tla toTajtsin xtechtlasojkaita pampa tikpiyaj okse tlamachialistli. Melak miyek “oksekimej [i]borregos” Jesús melak kinektokej nemiskej nochipa ipan se xochitlalpan. Kampa yejuamej “melauak kinextiskej inyolpakilis ika ueyi yolseuilistli” (Juan 10:16; Salmo 37:11).

16. ¿Tlenon yolseuilistli tiknextiaj ipan 1 Juan 3:19, 20?

¹⁶ Kanaj kemantika uelis tikmachiliskej ika xmiyek tlen tikchiujtokej ipan itekiyo Jehová noso kanaj totlajtoltiaj tla yejua kiyolpaktia tlen tikchiuaj. Kanaj hasta uelis tikmachiliskej ika xkinamiki tikseliskej nion se tlaxtlauijli. San ika, noneki maka matikilkauakan ika “Dios más nochi kimati xken toyojlo, niman yejua nochi kimati” (xpoua 1 Juan 3:19, 20). Ijkuak tiktekichiuiliaj Jehová ipampa totlaneltokil niman totlasojtlalis, uelis kuajli tikmatstoskej ika yejua techmakas tlaxtlauijli hasta maski tla nesi xueyi tlen tikchiuaj (Marcos 12:41-44).

17. ¿Katlejua seki tlaxtlauijli tlen tikseliaj aman?

¹⁷ Hasta ipan yejuin tonaltin kampa Satanás kiyekana ken nochiua, Jehová kinmakatika tlateochiualistli itekipanojkauan. Yejua kichiua ika matikselikan miyek tlaixmatilistli niman yolseuilistli itech tokniuan ipan nochi tlaltikpaktli (Isaías 54:13). Kema, ijkon ken Jesús okijto, Jehová techmaka tlaxtlauijli aman ika tokniuan ipan nochi tlaltikpaktli akin kentla tochanejkauan yeskiaj (Marcos 10:29, 30). Noijki, akin yemelak kitejtemouaj toTajtsin kiseliaj tlaxtlauijli ika yolseuilistli, nomachiliaj ika inyojlo niman yolpakij (Filipenses 4:4-7).

18, 19. ¿Kenon nomachiliaj itekipanojkauan Jehová itech tlaxtlauijli tlen kiseliaj?

¹⁸ Itekipanojkauan Jehová ipan nochi tlaltikpaktli yokitakej kenon kiseliaj  kualtsin tlaxtlauijli itech toTajtsin. Se neskayotl, Bianca akin chanej Alemania kijtoua: “Xnikmati kenon niktlasojkamachilis Jehová pampa nechpaleuiya ika tlen melak nechajmana niman pampa nouan nemi mojmostla. Yejuin tlaltikpaktli melak xkuajli ken onka niman xtlaj kipiya tlen tepaleui. San ika, nejua nitekiti nisiuj iuan Jehová, nikmachilia ika ninemi ika noyojlo ipan imauan. Nochipa ijkuak nikchiua itlaj ipampa Jehová, yejua nechmaka cien ika miyekpa tlateochiualistin”.

¹⁹ Xtlanemili itech Paula chanej Canadá akin kipiya 70 xiuitl. Yejua melak xkuajli ken kipiya itlalnakayo. Yejua kijtoua ika san pampa ijkon ken nemi ika xueli nouiyonia, xkijtosneki tla xtlaj uelis kichiuas ipan itekiyo toTajtsin. Yejua kijtoua: “Niktejtemoua kenon uelis nitenojnotsas ken ipan teléfono noso san kemanon ijkuak nikimita akin nikinnotsas. Melak nechyolchikaua tlen ijkuiliujtok ipan se cuaderno tlen nikpiya ika textos niman tlen kijtoua toamatlajkuiloluan tlen ueli nikita kemantika. Yejuin niktokayotia ken ‘cuarderno tlen nechmakixtiaʼ. Tla titlanemiliaj itech tlen Jehová yotechijli techmakas, san panos ika tajmanaj. Jehová nochipa ompa nemis niman techpaleuis, maski san tlenon tikixnamikiskej”. Kanaj tejua xijkon tipanoua ken Bianca noso Paula. San ika, tejua uelis tiknemilis itech tlen Jehová yomitsmakak tejua niman oksekimej. ¡Melak kuajli titlanemiliskej itech kenon Jehová techmakatika tlaxtlauijli ipan yejuin tonajli niman kenon techteochiuas ika tlayekapan!

20. ¿Tlenon uelis tikchiaskej tikseliskej tla xtijkauaj tikchiuaskej nochi tlen tiuelij niman ijkon tiktekichiuiliskej Jehová?

²⁰ Maka keman matikilkauakan ika tla tikchiuiliaj teoyotl toTajtsin ika nochi toyojlo, tikseliskej “se ueyi tlaxtlauijli”. Kuajli tikmatstoskej ika sakin ijkuak “[tik]chiuaskej on tlinon Dios kineki”, “[tik]seliskej on tlen yejua” yotechijli (Hebreos 10:35, 36). Kuakon nochipa matikchikauakan totlaneltokil niman matikchiuakan nochi tlen tiuelij ika tiktekichiuiliskej Jehová. ¡Kuajli matikmatstokan ika Jehová techmakas tlaxtlauijli! (xpoua Colosenses 3:23, 24, TNM). *