IJKUAK xipanouaya yejuin, nejua iniknekiya nikmatis tlen melauak. Nonan yokiselijka seki amatlajkuiloltin itech Biblia niman melak nikinuelitaya. Niman melak nikinuelitaya tlaixkopinaltin tlen kipiayaj. Notaj xkinekiya manechnojnotsa nonan itech tlen nomachtijtoya. San ika, nejua melak niknekiya nikmatis nochi. Kuakon nonan opeuj nomachtia nouan ijkuak notaj xnemiya nochan. Ika yejon nejua oniknek ninosentemakas itech Jehová. Oninoapolakti ipan Blackpool (Inglaterra) ipan xiuitl 1943 ijkuak nikpiya majtlaktli xiuitl.

Nejua iuan nonan nochipa tontenojnotsayaj san sekan. Tikintekitiltiayaj gramófonos ijkuak tontenojnotsayaj. Niman yejon melak uejueyimej niman kanaj naui iuan tlajko kilos ika yetikej katkaj. ¡San xkonemili, se telpokatsin kiyejyekoua kitkitinemis techajchan!

Ijkuak nikpiaya 14 xiuitl, niknekiya ninochiuas precursor. Nonan onechijli ika nonekiya nitlajtos iuan tlapaleuijketl itech tokniuan (aman notokayotia tlayekanketl ipan circuito). Yejua onechijli maninomachti se tekitl tlen nechpaleuis ika ninopanoltis  ijkuak ninochiuaskia precursor. Niman ijkon onikchiuj. Sakin ijkuak yonitekitka ome xiuitl, nejua oniktlajtolti okse tlayekanketl ipan circuito tla iniuelis ninochiuas precursor. Yejua onechijli: “Nimantsin xpeua”.

Kuakon ipan abril xiuitl 1949, otiktemakakej nochi tlen tikpiayaj niman otiajkej Middleton, tlen nokaua nisiuj Mánchester, kampa opeuj titekitij ken precursores. Sakin itech naui metstli, nejua oniktlapejpeni se tokniuj akin tekitiskia nouan ken precursor. Kuakon sucursal otechtlajtlanili ika matiakan ipan okse tlanechikojli tlen kemach peujtoya ipan Irlam. Nonan otekit ken precursora iuan se tokniuj ipan okse tlanechikojli.

Nikpiaya 17 xiuitl ijkuak nejua iuan akin nitekitiya ken precursor otechijlikej ika matikinpanoltikan tlanechikoltin pampa ipan yenkuik tlanechikojli xmiyekej nemiyaj tokniuan akin ueliskiaj kichiuaskej. Sakin, nejua oniaj ipan tlanechikojli tlen onkatka Buxton kampa xmiyekej nemiyaj tenojnotskej niman nonekiya makinpaleuikan. Yejuin tlen nopan onochiuj onechyektlali ken nikchiuaskia okseki tekitl tlen nikseliskia ika tlayekapan.

Ipan xiuitl 1951 oniktemilti tlen notlajtlani itech akin yauej Galaad-Tlamachtijli itech Biblia tlen kiyekana Watchtower. Kuakon, ipan diciembre itech xiuitl 1952 onechnotskej maniuiya kampa ninomachtis kenon ninochiuas soldado. Nejua oniktlajtlan maka manechtitlanikan kampa tlaixnamikij pampa nejua nitekitiya ken ministro akin uejkaujtipan kitekichiuilia toTajtsin. San ika xokinejkej tlen onikintlajtlanili niman onechtsajkej ipan chikuasen metstli. Ijkuak ok nitsauktoya, onechnotskej nikselis tlamachtijli 22 ipan Galaad. Ipan julio itech xiuitl 1953, nimantsin ijkuak onikis kampa nitsauktoya oniaj Nueva York ipan se barco itoka Georgic.

Nimantsin ijkuak onasik, ipan xiuitl 1953, oniaj ipan se ueyi tlanechikojli itoka “Sociedad del Nuevo Mundo”. Kuakon onikasik tren tlen onechuikak South Lansing (Nueva York), kampa nikseliskia tlamachtijli. Pampa nejua san kemach yonikiska kampa nitsauktoya, xnikpiaya miyek tomin. Ijkuak yoniajka ipan tren, aman niaskia ipan autobús niman ijkon najsis South Lansing. San ika, nonekiya niktlaxtlauas 25 centavos niman okse akin  iuan niaya yejua onechmakak tlen ika oniktlaxtlauj.

Tlamachtijli tlen otikselijkej ipan Galaad melak kuajli otechpaleui matochiuakan “ken cada se nouika” (1 Corintios 9:22). Paul Bruun, Raymond Leach, niman nejua otechtitlankej Filipinas san ika nonekiya titlamachiaskej okseki metstli hasta tikpiyaskej visas. Kuakon opeuj tiauej ipan barco niman ijkon otajsikej Rotterdam. Sakin otikpanauijkej mar Mediterráneo, canal de Suez, océano Índico, Malasia niman Hong Kong. Sakin itech 47 tonaltin ika yotinejnenkaj ipan mar, otajsikej Manila ipan 19 noviembre xiuitl 1954.

Nonekiya topatlaskej niman tikchiuaskej ijkon ken ompa kichiuaj niman titlajtoskej se yenkuik tlajtojli. San ika, kachtopa tiyeyimej otechtitlankej matitlapaleuitij ipan tlanechikojli tlen onkatka ipan ueyikalpan Quezón, kampa miyekej tlajtouayaj inglés. Kuakon maski yopanoka chikuasen metstli, san nikmatiya seki tlajtoltin itech tagalo. San ika, xijkon yeskia ijkuak tontlapaleuiskiaj oksekan.

Se tonajli ipan mayo xiuitl 1955, ijkuak otasijkej kampa tochan sakin ijkuak yotontenojnotsatoj, nejua niman tokniuj Leach otiknextijkej amatlajkuiloltin tlen kijtouaya ika aman titekitiskej ken tlayekankej ipan circuito. Nejua nikpiaya san 22 xiuitl, san ika, itech yejuin tekitl nonekiya ninomachtis oksejpa ninochiuas “ken cada se nouika”.

Se neskayotl, kachtopa onitemakak tlamachtijli tlen kisa itech Biblia ken tlayekankej ipan circuito onikchiuj kiyauak kampa tlanemakalo. Ipan yejon tonaltin, ipan Filipinas ijkuak se kitemakaya tlamachtijli itech Biblia nochiuaya kampa nemij miyekej tlaltikpakchanejkej. Ijkuak nikomintlapalouaya tlanechikoltin, nikintemakaya tlamachtiltin itech Biblia ken ipan ayuntamiento, kampa tlanemakalo, kampa tojlan, ipan parques, ipan canchas de básquetbol niman miyekpa kampa esquinas itech calles. Se tonajli, ipan ueyikalpan San Pablo xouel onitemakak se tlamachtijli kampa tlanemakalo pampa chikauak opeuj kiyaui. Kuakon nejua onikimijli tokniuan tla tiaskiaj ipan Kajli kampa Tosentlaliaj niman ijkon ompa niktemakaskia tlamachtijli. Sakin tlayekankej  onechtlajtoltijkej tla ueliskia noteijlis yejon se tlamachtijli tlen miyekej okikajkej, pampa yejon tlamachtijli xonotemakak kampa miyekej makikakikan.

Nejua nochipa ninokauaya inchan tokniuan. Maski kaltin nesi kentla xmiyek tlemach kipiayaj, chipaujkej katkaj. Miyekpa nikochiya san tlen ipan niksouaya ipan tabla. Noijki kampa ninaltiaya katka san kiyauak kampa nochimej ueliskej nechitaskej. Kuakon nejua ononek nikitas kenon ninaltis. Nejua nikistinemiya ipan autobús niman kemantika niaya ipan barco ijkuak nipanouaya ipan okse atlajkotian. Ipan nochi yejuin xiujtin, xkeman onikpix se carro.

Nejua oninomachti tlajtojli tagalo, maski xkeman onia kampa manechmachtikan yejon tlajtojli. Nejua san nikinkakiya tokniuan ken tlajtouayaj ipan tlanechikoltin niman kampa tenojnotsayaj. Tokniuan kinekiyaj nechpaleuiskej maninomachti. Melak onikintlasojkamachili pampa onechijyouijkej niman onechijlikej ken noneki ninoyektlalis.

Ipan yejon tonaltin, nonekiya ninopatlas itech okseki tlemach ipampa tekitl tlen nikseliskia. Ipan xiuitl 1956, ijkuak Nathan Knorr otechtlajpaloto, tejuamej ononek tikpanoltiskej se ueyi tlanechikojli ipan país. Nejua onechtlalijkej iuan nitlajtos akin kiteijliaj tlen panotok. Nejua nion xnikmatiya kenon nochiua yejuin tekitl, san ika, oksekimej tokniuan onechpaleuijkej maninomachti. Nion xpanouaya se xiuitl, ononek tikpanoltiskej okse se ueyi tlanechikojli ipan país, niman nejua onitlapaleui ken tlayekanketl itech ueyi tlanechikojli. Tokniuj Frederick Franz akin ualeuaya itech oficina kampa noyekanaj nochi sucursales otechtlajpaloto, niman nejua melak miyek inomachti itech. Ijkuak yejua okitemakak se tlamachtijli, okitlali  tlakentli tlen kitlaliaj filipinos itoka barong tagalog. Yejuin okichiuj ika tokniuan akin ompa chantiyaj mayolpakikan, niman yejon onechmachti ika manikneki ninochiuas ijkon ken oksekimej tlaltikpakchanejkej.

Aman oksejpa nonekiya ninopatlas itech okseki tlemach ijkuak oninochiuj ken tlayekanketl ipan distrito. Ipan yejon tonaltin, onikteititi se película tlen itoka La felicidad de la Sociedad del Nuevo Mundo. Nochipa tikteititiayaj kampa nemiyaj miyekej tlaltikpakchanejkej niman san kiyauak, ika yejon kemantika kampa kipiya tlauijli proyector nopepechouayaj yolkamej pitentsitsintin niman xkinekiyaj kikauaskej. Niman melak ouijtika techmakaya tikchipauaskej. Noijki melak ouijtika katka titlayektlaliskej niman ijkon manosentlalikan. San ika, melak kuajli tomachiliayaj ijkuak tikitayaj ika tlaltikpakchanejkej uajlayaj niman nomachtiayaj itech ikalpan toTajtsin.

Teopixkej católicos kinchiualtiayaj tekiuajkej maka matechkauilikan matikpanoltikan uejueyimej tlanechikoltin. Ika yejon, nochipa ijkuak tiktemakayaj tlamachtiltin nisiuj itech teopan, peuayaj kintsiliniayaj campanas, niman ipampa yejuin xueliya nokakiya akin tenojnotsaya itech Biblia. Maski ijkon opanok, tlaltikpakchanejkej xnokajkaujkej nomachtiskej tlen melauak niman miyekan opeuj kiueyichiuaj Jehová.

Ipan xiuitl 1959, onechtlajtlanilijkej manitlapaleui ipan sucursal. Onka miyek tlen oninomachti itech tlen onikchiuj. Ijkuak ompa nitekitiya, onechijlike manikintlajpaloti okse países, ken akin kitlajpaloua se sucursal. Ijkuak nontetlajpalouaya, onikixmat se misionera ipan Tailandia itoka Janet Dumond. Kuakon ototitlanilijkej seki amatlajkuiloltin, niman sakin otonamiktijkej. Ipan 51 xiuitl  melak yotiyolpajkej ika tiktekichiuiliaj Jehová san sekan.

Melak yonechyolpakti nikomintlajpalos itekipanojkauan Jehová ipan 33 países. Melak niktlasojkamati ika kachtopa tekitl tlen onechmakakej onechpaleui maninomachti ninouikas iuan tlaltikpakchanejkej akin ualeuaj oksekan. Noijki ijkuak nontetlajpalouaya onechpaleui kuajli manikasikamati ika Jehová kintlasojtla nochimej tlaltikpakchanejkej (Hechos 10:34, 35).

Nejua iuan Janet melak yotechyolpakti titekitiskej iuan tokniuan filipinos niman nochipa titlapaleuiskej ipan sucursal tlen onka Quezón. Aman nemij majtlaktli ika miyekej akin tenojnotsaj xijkon ken ijkuak otipeujkej titlapaleuiyaj nikan tlen ikipiya 60 xiuitl. Sakin itech nochi yejon xiujtin, ok noneki nikpatlas itech tlen Jehová kitlajtlani. Se neskayotl, pampa tlen onopatlak san kemach ipan ikalpan toTajtsin noijki noneki tiknektoskej tikpatlatoskej itlaj.

Yotikchiujkej nochi tlen yotiuelkej niman ijkon tiktlakamatiskej itlayekanalis Jehová niman yejon melak yotechyolpakti. Ok noneki tikpatlaskej san tlenon nonekis niman ijkon melak kuajli tikinpaleuiskej tokniuan. Kema, tla Jehová techkauilia tiknektokej ika nochi toyojlo tochiuaskej “ken cada se nouika”.